Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 20: Dina lidan turóbuli

Abahüdaguni 20: Dina lidan turóbuli

ARIHA bumuti kátaña lan umounbaña tidin Dina ebeluha? Tidinña arihaña würiña irahüñü ha erederubaña Kanán. Gúndaabei funa san Hakobu le túguchi lau le tadügübei? Baritaguni le meha lasaminarubei Abüraámü luma Isaakü hawagu würiña Kananna líderagubadibu lun bóunabuni álügüdahani le.

Dina ebeluha hamoun würiña Kananna

Busenti meha san Abüraámü lun lamarieidun Isaakü le liráü tuma aban würi Kananna? Uá. Busenti meha san Isaakü tuma Rebeka lun lamarieidun Hakobu le haráü tuma aban Kananna? Uá. Subuditi bun ka lan uagu?

Ladüga meha hudugua hamá Kananna houn búngiugu mama inarünitiñu. Mama meha gürigia buítiñu lun lamarieidunua hama ni lun gamadawa hamá. Ligía gayara lubéi wachóuruni luagu magundanbei lan meha Hakobu luagu táluahan liráü umadaguaü hama Kananna ha.

Aba tádaragun Dina tungua lidoun turóbuli. Ariha bumuti san Kananna le aríagubanu Dina lidan dibuhu? Sikemü líribei. Aban weyu dan le tidin Dina ebeluha, aba lafosurunu Sikemü lun tarounrun luma. Wuribati meha katei le, ladüga gürigiarügüñanu maríeitiñu gayara harounrun úara. Katei le ladügübei Sikemü tun Dina barüti lanwoun turóbuli.

Dan le haganbunbalin tátinu Dina le asuseredubei, aba hagañidun saragu. Biama hádangiñe, Simeón luma Lewí, wéiriti hagañi, darí lun hanügün eféin aba hebelurun sódini uburugun. Hagía hama híbiri lirahüñü Hakobu aba háfaruni Sikemü hama sun ha híbiri wügüriña. Aba lagañidun Hakobu saragu ladüga katei wuribati le hadügübei lirahüñü.

Ida liña san latatirun sun turóbuli le? Ladüga tumadagua Dina hama gürigia ha maganbadibaña lun lilurudun Bungiu. Maluahanbadiwa umadagu ítaratiña, adián?

Agumesehani 34:1-31.



Álügüdahani burí

  • Ka meha uagu mabuseerun lubéi Abüraámü luma Isaakü lun hamarieidun harahüñü hama gürigia Kananna?
  • Gúndaati meha san Hakobu lun tadügün liráü umadaguaü hama würiña Kananna?
  • Katei san wügüri le aríagubanu Dina lidan dibuhu le, ani ka katei wuribati ladügübei?
  • Ka hadügübei Simeón luma Lewí (ha tátinu Dina) dan le haganbunbalin le asuseredubei?
  • Gúndaati meha san Hakobu lau le ladügübei Simeón luma Lewí?
  • Ida liña meha lagumeserun haturobulin familia ha?

Lanwoun burí álügüdahani

  • Aliihabei Agumesehani 34:1-31.

    Aban funa san katei sódinirügüti lasuseredun, tidin Dina bisidaña würiña irahüñü Kananna? Afuranguagüdabéi (Agu. 34:1, Traducción del Nuevo Mundo, NM).

    Ka uagu gadurun tubéi Dina lidan teferidiruni tiñǘn? (Gal. 6:7.)

    Ida luba harufuduni nibureintiñu uguñe weyu luagu ariha hamani tani Dina hénpulu keisi aban eweridihani? (Ari. 13:20; 1 Ko. 15:33; 1 Huan 5:19.)