Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 17: Mádounu menegeguatiña

Abahüdaguni 17: Mádounu menegeguatiña
Esaú

BIÁNGUBEI irahüñü ha barihibaña menegeguatiñu, adián? Subuditi san bun ka lan hiri? Le géibaahadibei Esaú, ánheinti irahü le óunigirubaliñu mudún Hakobu líribei.

Esaú luma Hakobu ha mádounu, lisaanigu meha Isaakü tau Rebeka. Wéiriti meha línsiñe Esaú lun Isaakü le háguchi, ladüga buidu lan lidan éibaahani ani barüti éigini múnadoun houn lufamilia. Ánhounti Rebeka hínsiñetimati Hakobu tun, ladüga darangilu lan ani buiti lóuserun.

Wínwangili meha Abüraámü le háruguti, ani gayarati wegesihani lanarime meha línsiñe lun Hakobu laganbuni adimureha luagu Heowá. Lóunwenbei Abüraámü 175 irumu lau, keinsihali meha irumu hau mádounu.

Dan le 40 lubéi irumu lau Esaú aba lamarieidun hama biama würiña Kananna. Híruguda lumuti katei le Isaakü tuma Rebeka, ladüga ua lan adorarü hamani würiña ha Heowá.

Aban weyu aba lasuseredun aban katei le adügübei lun lagañidun Esaú saragu luma Hakobu le lamulen. Aba lachülürün dan lun labiniruni Isaakü liráü le íbugañaü. Keiti íbugañaü lan Esaú lun Hakobu, agurabati yebe Esaú libihini abinirúni ligía. Ani alugura laali meha Esaú liricha lun leresibiruni abinirúni lun Hakobu. Ani dan le nasirua habéi irahüñü ha, ariñaga laali meha Bungiu Hakobuba lan eresibirei abinirúni. Nihánti asuseredubei. Ru lumuti Isaakü abinirúni lun Hakobu le liráü.

Hakobu

Lárigiñe, dan le lasubudirunbalin Esaú le, aba lagañidun luma Hakobu. Hanarimeti ligañi darí lun lariñagun luagu láfarubei lan Hakobu hilagubei. Dan le tasubudirunbalin Rebeka le, aba tadiheridun saragu. Ligía aba lubéi tariñagun lun Isaakü le tani weiriei: ‘Anhein amarieida Hakobu tuma aban hiñaru Kananna mawandun nubéi.’

Ligíati lagúarunbei Isaakü lun Hakobu le liráü aba lariñagun lun: ‘Mamarieidabá tuma ni aban würi Kananna. Lubaragiñe lira, beiba lúbiñe báruguti Betueli Arán. Ábame bamarieidun tuma aban hádangiñe lirahüñü Lawán le liráü.’

Gaganbaditi Hakobu lun lúguchi, lau loufudagun aba lagumeseruni lidise wéiyaasu ñeinhin lubéi heredera liduheñu Arán.

Agumesehani 25:5-11, 20-34; 26:34, 35; 27:1-46; 28:1-5; Ebüréu 12:16, 17.



Álügüdahani burí

  • Ka meha Esaúbei luma Hakobu, ani ka idan amu hamá hawariuagua?
  • Átiri meha irumu lau Esaú luma Hakobu dan le lóunwenbei Abüraámü le háruguti?
  • Ka meha ladügübei Esaú lirudagüdünbaliñu lagübürigu saragu?
  • Ka san uéigiñe lanarimebei lagañidun Esaú luma Hakobu le lamulen?
  • Ka burí adundehani líchugubei Isaakü lun Hakobu le liráü?

Lanwoun burí álügüdahani

  • Aliihabei Agumesehani 25:5-11, 20-34.

    Ka lariñagubei Heowá hawagu biama tirahüñü Rebeka lubaragiñebei hágurahoun? (Agu. 25:23.)

    Ka ámuñegueinarügü igaburi harufudubei Esaú luma Hakobu lidan luáguti liricha íbugañaü? (Agu. 25:31-34.)

  • Aliihabei Agumesehani 26:34, 35; 27:1-46, luma 28:1-5.

    Ida liña lafurangudun lilouguan línsiñehabu Esaú luagu katei le lúmagiñeti Bungiu? (Agu. 26:34, 35; 27:46.)

    Lun libihini Hakobu abinirúni lúmagiñe Bungiu, ka lariñagubei Isaakü lun, lun ladügün? (Agu. 28:1-4.)

  • Aliihabei Ebüréu 12:16, 17.

    Ida liña larufuduni lani Esaú hénpulu, le lunbei lasuseredun houn ha arufudubaña mebereseni luagu katei sagüráuti?