Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 15: Tarihin lúmari Lotu tárigoun

Abahüdaguni 15: Tarihin lúmari Lotu tárigoun

LOTU hama lufamilia wínwantiñu meha úara luma Abüraámü Kanán. Aban weyu aba lariñagun Abüraámü lun Lotu: ‘Úati bandi fulasu ya houn sun wabiñanigu. Adügabá aban fulesei nun, fánreingua wamá: Ánhabu ñüdün luagun aban oubaü, ábame nidin luagun amu.’

Aba larihini Lotu múa. Ábati larihini buidu lan fulasu le lóubawagubei Hordán, nihein duna luma saragu sagadi buiti ñein houn libiñanigu. Ligía laguyunbei Lotu hau lufamilia hama libiñanigu ñeinhin. Ábati hadügünu haban Sodoma.

Wéiriti meha hariban gürigia ha Sodomabaña. Mínsiñeti meha le lun Lotu, ladüga aban lan wügüri buiti. Mínsiñeti meha giñe usa ligía lun Bungiu. Ábati lóunahan Bungiu biama ánheligu lun hawisaruni Lotu luagu lagünrinchaguaali lan Sodoma luma uburugu le yarafabei ñein le gíribei Gomora ladüga hariban.

Aba hariñagun ánheligu lun Lotu: ‘Furesebá! Ragüboun bani weiriou hama biama birahüñü würiña furiba yáagiñe!’ Darasatiñu, ligía aba lubéi hárügüdüni ánheligu hagía háhabu aba hasagaruniñu lídangiñe uburugu. Aba lariñagun aban hádangiñe ánheligu hagía: ‘Éibaagua humá lau hibagari! Madigiragua huma hárigoun. Éibaagua humá áraabun, mounwe humaamuga.’

Gaganbaditi Lotu hama lisaanigu aba hanurahan Sodomagiñe. Mararamaguntiña ni luagu murusun oura, marihintiñu giñe hárigoun. Ánhounti lani Lotu weiriou maganbaditu. Dan le diseraü haaña luéi Sodoma, aba tararamu aba tadigiragun tárigoun. Ábati tasaliragun wagabume lauti salu. Gayarati barihinu lidan dibuhu.

Lídangiñe le furendeitiwa aban lubuidun leksióun: salba lumutiñu lan Bungiu ha gaganbadibaña lun, ánhañati ha maganbadibaña féridi hamuti habagari.

Agumesehani 13:5-13; 18:20-33; 19:1-29; Lúkasi 17:28-32; 2 Féduru 2:6-8.

Lanurahan Lotu Sodomagiñe


Álügüdahani burí

  • Ka uagu hafanreinragua Abüraámü luma Lotu?
  • Ka uagu desidírü lubéi Lotu lawinwandun Sodoma?
  • Ida haña meha gürigia ha Sodomabaña?
  • Ka awisahani híchugubei biama ánheligu lun Lotu?
  • Ka san uagu tasaliragunbei lani Lotu weiriou ábame wagabu lauti salu?
  • Ka leksióun wafurendeirubei lídangiñe le asuseredubei tun lani Lotu weiriou?

Lanwoun burí álügüdahani

  • Aliihabei Agumesehani 13:5-13.

    Ka leksióun wafurendeirubei lúmagiñe Abüraámü lidan lourate waransehan turóbuli wádangua? (Agu. 13:8, 9; Rom. 12:10; Fili. 2:3, 4.)

  • Aliihabei Agumesehani 18:20-33.

    Dan le waturiahani liyanun Abüraámü luma Heowá, ka uagu gayara lubéi wachóuruni luagu richabaña lan Heowá luma Hesusu lidan haguseragüdün? (Agu. 18:25, 26; Mat. 25:31-33.)

  • Aliihabei Agumesehani 19:1-29.

    Kei larufuduni abahüdaguni tídangiñeti Bíbülia le, Ida liña larihiniñu Bungiu wügüriña ha agamaridubaña wügüriña háledi? (Agu. 19:5,13; Fad. 20:13.)

    Ka ámuñegueinarügü igaburi warihibei lidan hóunabun Abüraámü luma Lotu lun ladundehan Heowá, ani ka wafurendeirubei lídangiñe? (Agu. 19:15, 16, 19, 20; 22:3.)

  • Aliihabei Lúkasi 17:28-32.

    Ida liña meha tarihini lani Lotu weiriou umegeguni, ani ida liña lahuudun tani hénpulu woun keisi aban eweridihani? (Luk. 12:15; 17:31, 32; Mat. 6:19-21, 25.)

  • Aliihabei 2 Féduru 2:6-8.

    Kei Lotu, ka usa lunbei warufuduni lidan ubóu würibati le geyegubei wau? (Ese. 9:4; 1 Huan 2:15-17.)