Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 14: Lafiñen Abüraámü

Abahüdaguni 14: Lafiñen Abüraámü

ARIHA bumuti san ka lan ladügübei Abüraámü? Nuhán gusiñu luma, genegeti láfaraali lan liráü. Ka uagu? Furumiñe, ariha waméi ida liña lan libihini Abüraámü tuma Sara haráü.

Abüraámü íchigei Isaakü keisi sákürifisiu

Haritaguabá, füramaseti Bungiu houn gasaanibaña lan aban irahü. Ani genegeti yebe siñá lan lasuseredun, ladüga wéiyougaaña lan Abüraámü tuma Sara. Ani afiñeti Abüraámü gayara lan ladügün Bungiu katei le genegeti siñá lan lasuseredun. Ligíati, ka asuseredubei?

Lárigiñebei ladügüni Bungiu lani füramasei, sügüti aban irumu dayarüti. Dan le 100 lubéi irumu lau Abüraámü luma 90 tau Sara, aba gasaani hamá aban irahü Isaakü líribei. Gúnfuli laali Bungiu lani füramasei!

Ani dan le laweiridunbei Isaakü, aba lóuchaguni Heowá lafiñen Abüraámü. Aba lagúahan: ‘Abüraámü!’ Aba lóunabun Abüraámü: ‘Anahán ya!’ Ábati lariñagun Bungiu lun: ‘Barübei biráü, biráü le ábanrügüti, Isaakü, beiba luagun wübü le lunbei narufuduni bun. Áfarabei biráü ñein ábame badagaragüdüni keisi aban sákürifisiu.’

Aba lírudun Abüraámü, ladüga wéiriti línsiñe liráü lun! Haritaguabá, füramaseti meha Bungiu hawinwanduba lan lirahüñü Abüraámü Kanán. Ani ida liña hamugati lasuseredun le, lun hamuga hilati Isaakü? Úati meha gufunranda lani Abüraámü, ani gaganbadimemeti lun Bungiu.

Hachülürünbei luagu wübü, aba lagüraguni Abüraámü Isaakü aba líchuguni luagu latarü le ladügübei. Ábati lasagarunu gusiñu lun láfararuni liráü. Lidan oura ligía aba lagúarun lani Bungiu ánheli lun: ‘Abüraámü, Abüraámü!’ Aba lóunabun Abüraámü: ‘Anahán ya!’

‘Madügabá dañu lun irahü le,’ liña Bungiu. ‘Subudi naali afiñetibu lan nuagu, ladüga mamahantibu lau biráü le ábanrügüti nuéi.’

Wéiriti lafiñen Abüraámü luagu Bungiu! Afiñeti meha luagu ua lan lásiñarun Heowá adüga, ani gayara lan lásaaragüdüni Isaakü hádangiñe hilaaña. Ani mabusenrunti meha Bungiu lun láfaruni Abüraámü Isaakü; adügati lun tadahiragun aban mudún lidan áraabu yarafa, aba lariñagun lun, lun ladagaragüdǘnu leweñegua Isaakü.

Agumesehani 21:1-7; 22:1-18.



Álügüdahani burí

  • Ka füramasei ladügübei Heowá lun Abüraámü, ani ida liña lagunfuliruni?
  • Kei larihín lidan dibuhu, ida liña lóuchaguni Bungiu lafiñen Abüraámü?
  • Ka ladügübei Abüraámü íbini ua lan gufunranda lani lébuna le lamuriahabei Bungiu lúmagiñe?
  • Ka asuseredubei dan le lasagarunbanu Abüraámü gusiñu lun láfaruni liráü?
  • Átiriñein meha san lafiñen Abüraámü luagu Bungiu?
  • Ka líchugubei Bungiu lun Abüraámü lun ladügüni sákürifisiu, ani ida?

Lanwoun burí álügüdahani

  • Aliihabei Agumesehani 21:1-7.

    Ka uagu líchiga Abüraámü seini tuagu lóustarun liráü lidan liwidün weyu? (Agu. 17:10-12; 21:4.)

  • Aliihabei Agumesehani 22:1-18.

    Ida liña larufuduni Isaakü redei lan lábugiñe lererehan Abüraámü le lúguchi, ani ida liña larufudun le ábaya sügǘ súdinitimaati le lunbei lasuseredun ámuñegü? (Agu. 22:7-9; 1 Ko. 5:7; Fili. 2:8, 9.)