Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 13: Abüraámü… lumada Bungiu

Abahüdaguni 13: Abüraámü… lumada Bungiu

ABAN lídangiñe fulasu le ñein lubéi meha houdin gürigia awinwanda lárigiñe Gunran Uru líribei. Aba lawanserun Uru darí lun aban lan uburugu súdiniti tau muna buíduburitu. Ánheinti gürigia ha ñeinbaña adorarütiña meha búngiugu mama inarünitiñu. Ligíameme meha hadügübei Babeli. Gürigia ha meha Úrubaña luma Babeli mítarantiñu kei Noé luma Semü le liráü, ha asigirubaña eseriwida lun Heowá.

Gama lumoun, 350 irumu lárigiñe gunran, aba lounwen Noé wügüri úaraguati. Bián irumu lárigiñe aba nasirua lan wügüri le barihibei lidan dibuhu le. Aban meha gürigia espechaliti lun Bungiu. Abüraámü líribei. Lidan meha uburugu Uru lawinwanda hama lufamilia.

Abüraámü aríaguaña waruguma

Aban weyu aba lariñagun Heowá lun Abüraámü: ‘Ígirabei Uru hau sun biduheñu, beiba lidoun ageiraü le lunbei narufuduni bun.’ Gaganbaditi san lun Bungiu ani ígiralei lubuidun libagari Uru? Aayé. Ani kei gaganbadi lan Abüraámü lun Bungiu súnwandan, aba lasubudirunua kei lumada Bungiu.

Fiú hádangiñe lufamilia Abüraámü furitiñu luma dan le lidinbei Úrugiñe. Furiti Tera le lúguchi, Lotu le libase tuma Sara to lani weiriou. Dan luagun dan aba hachülürün súngubei lidoun fulasu le gíribei Arán, aba lounwen Tera. Diseeña meha luéi Uru.

Lárigiñe aba láfuridun Abüraámü hama lufamilia Arangiñe aba hachülürün lidoun fulasu le gíribei Kanán. Aba lariñagun Heowá ñein: ‘Nihán múa le lunbei níchuguni houn birahüñü.’ Aba lerederun Abüraámü Kanán aba laganóun tidan kianpu.

Aba lagumeserun Bungiu íderaguei Abüraámü ábati hagibedun lilügüniñu mudún hama amu burí animaalugu gíbetiñu meha giñe lumusuniñu. Ani ligía tuma Sara marahüñütiñu meha.

Dan le 99 irumu lau Abüraámü, aba lariñagun Heowá lun: ‘Füramasetina bun háguchibadibu lan saragu néchanigu.’ Ani ida lubati lasuseredun le, dan le wéiyougaaña Abüraámü tuma Sara lun gasaani hamá?

Agumesehani 11:27-32; 12:1-7; 17:1-8, 15-17; 18:9-19.



Álügüdahani burí

  • Ka meha hawuyeri gürigia awinwandubaña Uru?
  • Ka san wügüri le lídanbei dibuhu? Ídabuga nasirua lan? Halía meha laganawa?
  • Ka lariñagubei Bungiu lun Abüraámü lun ladügüni?
  • Ka uagu lagúahoua lun Abüraámü lumada Bungiu?
  • Ka ñǘdünbaña luma Abüraámü dan le láfuridunbei Úrugiñe?
  • Ka lariñagubei Bungiu lun Abüraámü dan le lachülürünbei Kanán?
  • Ka meha füramase lubéi Bungiu lun Abüraámü dan le 99 lubéi irumu lau?

Lanwoun burí álügüdahani

  • Aliihabei Agumesehani 11:27-32.

    Ida liña gaduhegua hamá Abüraámü luma Lotu? (Agu. 11:27.)

    Íbini iridahoua lan Tera luagu háguyun liduheñu uburugun Kanán, ida liña wasubudiruni Abüraámü lan lichügüdinabei águyuni ligía, ani kati uagu ladügei? (Agu. 11:31; Adü. 7:2-4.)

  • Aliihabei Agumesehani 12:1-7.

    Ida liña laweiridaguagüdüni Heowá daradu le ladügübei luma Abüraámü dan le lachülürünbei Abüraámü Kanán? (Agu. 12:7.)

  • Aliihabei Agumesehani 17:1-8, 15-17.

    Ka amu iri libihubei Abürámü dan 99 lubéi irumu lau, ani ka uagu? (Agu. 17:5.)

    Ka burí abinirúni lubaati ámuñegü füramase lubéi Heowá tun Sara? (Agu. 17:15, 16.)

  • Aliihabei Agumesehani 18:9-19.

    Lidan Agumesehani 18:19, ka buligasion abürüdübei ñein habá agübürigu? (2 Lur. 6:6, 7; Efe. 6:4.)

    Ka sügǘ lidan tibagari Sara arufudubei luagu siñá lan waramudun ni kata luéi Heowá? (Agu. 18:12, 15; Sal. 44:21.)