Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 12: Ladügǘn óunwenbu wáyelesi

Abahüdaguni 12: Ladügǘn óunwenbu wáyelesi

SÜGÜTI bandi irumu. Ha lirahüñü Noé gíbetiñu meha harahüñü. Aba hawéinamudun harahüñü aba giñe garahüñü hamá. Aba hagibedun gürigia Ubouagu lau loufudagun.

Aba hádangiñe gürigia hagía Nimüródu meha líribei, lílawa Noé. Wuribati, géibaahati ani áfaraha ligía animaalugu hama gürigia. Adügaguati Nimüródu lungua urúeime lun larúeihan amu gürigia. Mínsiñeti meha Nimüródu lun Bungiu.

Sun meha gürigia dan ligía ábanmeme hererun. Busenti yebe meha Nimüródu lun lidan hamá aban lun gayara lan larúeihaniñu. Ligíati, subuditi bun ka lan ladügübei? Aba lariñagun houn lun hadügün aban uburugu lau aban óunwenbu wáyelesi lidan. Ariha bumutiñu lidan dibuhu adaagua ladüríyu.

Magundanti meha Heowá Bungiu lau bunaguaü le. Busenti meha lun houdin sun gürigia ñéingiñe lun hawinwandun ligibuagu sun Ubóu. Ani aba hariñagun: ‘Keima! Bunagua wamá aban uburugu luma aban wáyelesi le hanarimeti liñun lun lachülürün sielu. Ábameti laganbahóun wawagu!’ Busentiñu meha inebesei houngua, mama lun Bungiu.

Ligía ladügünbei Bungiu lun hígiruni gürigia ladügǘn wáyelesi. Subuditi san bun ida liña lan ladügüni? Sódini, aba lámuñedaguagüdüni Bungiu hererun, mámarügaali meha aban hererun. Úaali meha gúnfunrandagua hamá hámagua. Ligía lagúahounbei lun uburugu ligía Babeli, o Babilónia, “Yuriguaü” lilabei iri ligía.

Guentó aba hatatirun gürigia ñüdün Babeligiñe. Gürigia ha gúnfunrandaguabaña hámagua ladüga ábanmeme lan hererun aba houdin awinwanda úara lidan amu burí fulasu Ubouagu.

Agumesehani 10:1, 8-10; 11:1-9.

Hadügün gürigia aban óunwenbu wáyelesi


Álügüdahani burí

  • Ka meha Nimüródubei, ani ka meha lisaminanbei Bungiu luagun?
  • Ka uagu hadaaguña lubéi wügüriña ha lídanbaña dibuhu ladüríyu?
  • Ka meha uagu magundan lubéi Heowá lau ábunaguni le?
  • Ida liña lararamuni Bungiu lábunawagun wáyelesi?
  • Ka meha liri uburugu, ani ka lilabei iri ligía?
  • Ka hadügübei gürigia lárigiñebei lámuñedaguagüdüni Bungiu hererun?

Lanwoun burí álügüdahani

  • Aliihabei Agumesehani 10:1, 8-10.

    Ka igaburi larufudubei Nimüródu, ani ka eweridihani tíchugubei Bíbülia woun? (Ari. 3:31.)

  • Aliihabei Agumesehani 11:1-9.

    Ka meha lébunabei lábunawagun wáyelesi, ani ka uagu siadi waali lubéi lun mawanserun lan? (Agu. 11:4; Ari. 16:18; Huan 5:44.)