Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 9: Ladügünu Noé árüka

Abahüdaguni 9: Ladügünu Noé árüka
Gürigia éheraha lau Noé

GANITI meha Noé aban weiriou hama ǘrüwa hasaanigu. Semü, Kamü luma Hafeti híribei. Kada aban ganiti weiriou. Ítara liñati wídüñanu lan gürigia hadan lufamilia Noé.

Adügati Bungiu lun ladügün Noé aban katei ámuti. Ariñagati lun, lun ladügün aban óunwenbu árüka. Wéiritu árüka kei aban waporu, ani tenegetima aban gafu wéiritu to migifetu. ‘Ǘrüwabei fuló tidan,’ liña Bungiu, ‘badaagua burime rumu tidan.’ Rumu burí tuguya lun Noé hama lufamilia, animaalugu luma éigini houn súngubei.

Ariñagati Bungiu lun Noé lun ladügünu árüka lun siñá lan lebelurun duna tidoun. Ariñagati: ‘Nóunaha aban óunwenbu gunran le lunbei lagumuchún lau ubóu. Le mebeluti tidoun árüka lóunweba.’

Gaganbaditi Noé hama lirahüñü lun Bungiu ábati hatatirun adügoun árüka. Ha híbiri gürigia éhereharügütiñu. Aba hasigirun lau hariban. Úati ni aban afiñeruti dan le lariñaguni Noé le lunbei ladügüni Bungiu.

Lebelaagüdüña Noé hama lufamilia éigini hama animaalugu turageirugu árüka

Sügütiñu saragu dan adügoun árüka, ladüga tuéirin. Aba tóunwenbudun, lárigiñe saragu irumu. Ábati lariñagun Bungiu lun Noé lebelaagüdüniñu animaalugu tidoun. Ariñagati lebelaagüdün biama hádangiñe fiú hawuyeri animaalugu, wügüri tuma würi. Ani hádangiñe ha híbiri animaalugu, ariñagati lun lebelaagüdün sedü. Belugüda ligíame ámuñegueinarügü hawuyeri dunuru. Adügati Noé kei le aubei lariñagei Bungiu.

Lárigiñe, aba lebelurun Noé hama lufamilia tidoun árüka. Ábati ladouruni Bungiu bena. Turageirugu árüka, agurabahati Noé hama lufamilia. Saminabá ñéinñadibu lan, agurabaha. Ñeinbei funa san aban gunran kei meha lariñaguni Bungiu?

Agumesehani 6:9-22; 7:1-9.



Álügüdahani burí

  • Átiriñanu meha gürigia lidan lufamilia Noé, ani ka meha híribei ǘrüwa lirahüñü?
  • Ka san katei ámuti lariñagubei Bungiu lun Noé lun ladügün, ani ka uagu?
  • Ka hadügübei lubesinanigu Noé dan le ladimurehanbei houn tuagu árüka?
  • Ka lariñagubei Bungiu lun Noé lun ladügün hau animaalugu?
  • Lárigiñe ladouruni Bungiu tubenari árüka, ka meha mosu lubéi ladügün Noé hama lufamilia?

Lanwoun burí álügüdahani

  • Aliihabei Agumesehani 6:9-22.

    Ka adügübei lun aban lan ubuein buitimaati Noé lun Bungiu inarüniti? (Agu. 6:9, 22.)

    Ka lasaminarubei Heowá luagu anarimeni, ani ka efekütu lanibei lidan wanúadahani isebáhari? (Agu. 6:11, 12; Sal. 11:5.)

    Ida luba gayara lan wáyeihani Noé dan le wibihin adundehani tídangiñe óundaruni to lani Heowá? (Agu. 6:22; 1 Huan 5:3.)

  • Aliihabei Agumesehani 7:1-9.

    Ida liña líchugun gurasu woun larihini Heowá Noé kei aban wügüri richati, íbini gafigoun lan? (Agu. 7:1; Ari. 10:16; Isa. 26:7.)