Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 8: Hígandei Ubouagu

Abahüdaguni 8: Hígandei Ubouagu

LUN hamuga liabin somu gürigia bubaroun gágubuti darí lun ladagarun lichügü tábulugun buban, kaba hamuga basaminara? Aban lan hígandei! Anihein meha aban dan ñéinñanu gürigia ítaratiñu Ubouagu. Arufudatu Bíbülia ánheligu lan siélugiñetiñu hagübürigübaña. Ida liña lasuseredun le?

Hígandei furundetiña

Haritaguabá, Satanási ánheli le wuribabei lagubuhaña meha turóbuli. Álugati yebe ladügün haribadun lánigu Bungiu ánheligu. Lau lásügürün dan, aba hatatirun fiú ánheligu aganbei le lariñagubei Satanási. Aba hígiruni wadagimanu le líchugubei Bungiu houn sielu. Aba hayabin ya Ubouagu aba hadügün úgubu kei le hani gürigia. Subuditi san bun ka lan uagu?

Ariñagatu Bíbülia ladüga lan harihin würiña magadietiñu ya Ubouagu ani busentiñu hawinwandun hama. Ligíati hayabinbei ábati hamarieidun hama. Ariñagatu Bíbülia wuriba lan le hadügübei, ladüga lun hawinwandun sielu ladügaña Bungiu ánheligu.

Dan le garahüñü hamá ánheligu hama hánigu weiriou, mítarantiñu kei ha híbiri irahüñü. Dan le ñǘbürigiña aba harihinua kei ha híbiri irahüñü. Eibu lásügürün dan aba awéinamudeina hamá, ani eheredeina hagía, darí lun hígandei hamá.

Wuribatiñu meha hígandei ha. Ani keiti wéinamu habéi here hagía, adügatiñu dañu houn gürigia. Houchatiñu hafosuruniñu gürigia lun haribadun kei hagía.

Hilá bugati Enoku, gama lumoun ñeinñein meha aban wügüri buiti Ubouagu. Noé líribei. Súnwandanha ladügüni le labusenrubei Bungiu.

Aban weyu ariñagati Bungiu lun Noé chülüha lan dan lun lagumuchún hau sun wuribatiñu. Ani lasalbarubei Bungiu Noé, lufamilia, hama bandi animaalugu. Ariha waméi ida liña lan ladügüni.

Agumesehani 6:1-8; Húdasi 6.



Álügüdahani burí

  • Ka asuseredubei dan le hetenirun fiú ánheligu lani Bungiu lun le lerengubei Satanási?
  • Ka uagu hígirei fiú ánheligu hawadigimari sielu ani aba hararirun Ubouagun?
  • Ka uagu wuriba lubéi hayabin ánheligu ha Ubouagun, ani adüga hagía úgubu kei hani gürigia?
  • Ka meha idan amu hamá hasaanigu ánheligu hagía?
  • Kei barihini lidan dibuhu, ka hadügübei harahüñü ánheligu dan le hígandeihaña?
  • Lárigiñe Enoku, ka wügüri buiti abagaridubei Ubouagu, ani ka uagu hínsiñe lubéi lun Bungiu?

Lanwoun burí álügüdahani

  • Aliihabei Agumesehani 6:1-8.

    Ka lariñagubei Agumesehani 6:6 luagu ida liña lan lasandiragun Heowá lungua ladüga wousan? (Sal. 78:40, 41; Ari. 27:11.)

  • Aliihabei Húdasi 6.

    Ida liña leseriwidun woun uguñe keisi aban aritaguagülei le hadügübei ánheligu “ha ígirubalin hábiñe sielu”? (1 Ko. 3:5-9; 2 Fe. 2:4, 9, 10.)