Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 7: Aban wügüri ganigiti

Abahüdaguni 7: Aban wügüri ganigiti
Enoku

DAN le latatirunbei Ubóu abuincha hau gürigia, hibe-agei adügatiñu katei wuribati kei meha Kaín. Gama lumoun anihein meha aban wügüri ámuti ligaburi hawéi, Enoku líribei. Abanha wügüri ganigiti. Wuribatiñu meha gürigia ha aganóubaña geyegu lau, ani ligía aba lasigirun eseriwida lun Bungiu.

Subuditi san bun ka lan uagu hadügünbei gürigia hagía bandi katei wuribati? Saminabei le: Ka adügübei lun maganbadi hamá Adán tuma Ewa lun Bungiu, adüga ligía héiginu furuda to uaguboun heweridiruwa? Aban ánheli wuribati. Satanási tagúahan Bíbülia lun. Ani houchati ladügün lun wuriba wamá súngubei.

Iweruhani luma áfarahani

Aban weyu aba ladügün Heowá Bungiu lun lariñagun Enoku somu katei le mabuseerun habéi gürigia haganbun. Ariñagati luagu lagumuchaguagüdübaña lan Bungiu sun wuribatiñu. Gayarati hanarime lan lagañidagüdüniñu katei le gürigia. Háfuga álugatiñu háfaruni Enoku hilagubei. Ligíati, mosuha aban lan wügüri ganigiti Enoku lun lariñaguni houn gürigia le lunbei ladügüni Bungiu.

Mígirunti Bungiu lun lawinwandun Enoku saragu dan haganagua gürigia wuribatiñu hagía. Ǘrüwa-san-ǘrüwa-wein-seingürügüñein irumu lawinwandun. Ka uagu wariñagei? Ladüga lidan meha dan ligía héretimatiñu gürigia luéi dan le ani gíbetimatiha dan hawinwandun. Anha; wínwanti Matusalén le liráü Enoku 969 irumu!

Hadügüña gürigia katei wuribati

Lárigiñe lounwen Enoku, ábatima haribadun gürigia. Erengatu Bíbülia luagu sun dan ‘hasaminaruña hadügün katei wuribati,’ ani ‘gíbeti anarimeni ubouagu.’

Subuditi san bun katei lan lébunabei saragu turóbuli lidan dan ligía? Ladüga ladeirun Satanási aban iseri igaburi lun línchahaniñu gürigia lidoun katei wuribati. Ariha waméi katei lan.

Agumesehani 5:21-24, 27; 6:5; Ebüréu 11:5; Húdasi 14, 15.



Álügüdahani burí

  • Ida liña meha san amu lubéi Enoku?
  • Ka san uagu gibe lubéi katei wuribati hadügün gürigia lidan lidaani Enoku?
  • Ka meha katei wuribati hadaagübei gürigia? (Arihabei dibuhu.)
  • Ka meha uagu mosu lubéi ganigi lan Enoku?
  • Átiriñein meha dan hawinwandun wügüriña lidan dan ligira, gama lumoun átiriñein dan lawinwandun Enoku?
  • Ka asuseredubei lárigiñe lounwen Enoku?

Lanwoun burí álügüdahani

  • Aliihabei Agumesehani 5:21-24 27.

    Ida liña san lanaagun Enoku lungua luma Heowá? (Agu. 5:24.)

    Según le tariñagubei Bíbülia, Ka wügüri gíbetimabei dan lawinwandun, ani átiri meha irumu lau dan le lóunwenbei? (Agu. 5:27.)

  • Aliihabei Agumesehani 6:5.

    Ida liña laweiridun lanarime wuribani Ubouagu lárigiñe lounwen Enoku, ani ida liña genegegua lan luma dan le? (2 Tim. 3:13.)

  • Aliihabei Agumesehani 5:22.

    Ka ligaburi Enoku aubei “gunda lan Bungiu”, ani ka resultóu lanibei?

  • Aliihabei Húdasi 14, 15.

    Ida liña gayara lan háyeihani kristiánugu ganigi le luagubei Enoku dan le hapurichihan luagu wuribu le lunbei liabin le gíribei Arümahedón? (2 Tim. 4:2; Ebü. 13:6.)