Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 6: Aban buiti, aban wuribati

Abahüdaguni 6: Aban buiti, aban wuribati

ARIHABEI Kaín luma Aweli guentó. Wéinamuhaña. Aba lábunaguni Kaín múa bunaguati sun luwuyeri inadürigu luma türigu.

Kaín luma Aweli adüga sákürifisiu lun Bungiu

Aweliti aba lagüriahan mudún. Hínsiñeti hóunigirunua harahüñü mudún lun. Ábati awéinamudeina hamá mudún ha, ma loufun lagamadun Aweli bandi mudún lun latenirun houn.

Aban weyu aba lanügün Kaín luma Aweli aban idewesei lun Bungiu. Barüti Kaín éigini lídangiñe le lalubahabei. Aweliti barüti tubuidun-agei mudún to lumaboun. Gúndaati Heowá lau Aweli luma lau lidewese. Magundanti lau Kaín ni lau lidewese. Subuditi san bun ka lan uagu?

Mámarügü ladüga buídutima lan lidewese Aweli luéi Kaín. Ladüga buidu lan Aweli ani hínsiñeti Heowá luma líbugaña lun. Kaínti wuribati; mínsiñeti lamulen lun.

Ligíati lariñagunbei Bungiu lun Kaín mosu lan lasansirun. Meberesenti Kaín lau. Hanarimeti ligañi ladüga himein lani Bungiu Aweli. Aba lagunbirahani Kaín Aweli lun houdin áraabu. Lidan áraabuhaña, aba labuleseiruni Kaín lamulen lau erei darí lun láfaruni hilagubei. Afiñetibu san hanarime lan luriban le ladügübei Kaín?

Lanurahaña Kaín lárigiñe láfaruni Aweli

Lau sun hilá lan Aweli, haritagualagili Bungiu. Buiti meha Aweli, ani mabulieidun lumutiña Heowá gürigia ha buidubaña. Ligíati lachülürüba lubéi aban weyu lun lagiribudagüdüni Heowá libagari Aweli lun. Lídanme dan ligía móunwendigiaalime Aweli. Gayarahalime lawinwandun lun súnwandan ya Ubouagu. Ma buidubei hasubudirunua gürigia kei ligía?

Magundanti Bungiu hau gürigia ha ítarabaña kei Kaín. Ligíati, lárigiñebei láfaruni Kaín Aweli, asíadira lumuti Bungiu aba lóunahani dise hawéi lufamilia. Dan le lidinbei Kaín awinwanda lidan amu fulasu, barüti aban hádangiñe lítunu lúmagua, ábati lamarieidun tuma.

Lau lásügürün dan aba garahüñü lan Kaín tuma lani weiriou. Ha híbiri hasaanigu Adán tuma Ewa aba hamarieidun aba giñe garahüñü hamá. Ma loufun hagibedagun gürigia Ubouagu. Subudi wamá fiú hádangiñe.

Agumesehani 4:2-26; 1 Huan 3:11, 12; Huan 11:25.



Álügüdahani burí

  • Ka idan hatatira Kaín luma Aweli awadigimarida?
  • Ka burí idewesei lanügübei Kaín luma Aweli lun Heowá?
  • Ka uagu hínsiñe lubéi lidewese Aweli lun Heowá, ani kati uagu mínsiñe lubéi lidewese Kaín lun?
  • Ka luwuyeri gürigia Kaín, ani ida liña lálugun Heowá lun lasansiruni Kaín ligaburi?
  • Ka ladügübei Kaín dan le lábuguarügali luma lamulen áraabu?
  • Afuranguagüdabei ka lan ásügürübei lun Kaín lárigiñe láfaruni lamulen.

Lanwoun burí álügüdahani

  • Aliihabei Agumesehani 4:2-26.

    Ida liña larufuduni Heowá peliguru le gádanbalin Kaín? (Agu. 4:7.)

    Ida liña larufuduni Kaín ka lan tídanbei lanigi? (Agu. 4:9.)

    Ida liña larihini Heowá láwiyuragüdünua lita gürigia madurunti? (Agu. 4:10; Isa. 26:21.)

  • Aliihabei 1 Huan 3:11, 12.

    Ka uagu lágañida Kaín, ani ida liña leseriwidun le woun uguñe weyu keisi aban eweridihani? (Agu. 4:4, 5; Ari.14:30; 28:22.)

    Ida liña san tarufuduni Bíbülia, luagu íbini lan maha hamá sun wafamilia lun lilurudun Heowá, gayara lan wakipurun úaraguni lun Heowá? (Sal. 27:10; Mat. 10:21, 22.)

  • Aliihabei Huan 11:25.

    Ka ichouruni líchugubei Heowá hawagu sun ha hilaguaañabaña luéigiñe irichaü? (Huan 5:24.)