Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 5: Aban lidere ibagari

Abahüdaguni 5: Aban lidere ibagari

BÓUGUDI luéi fuluri-agei Edén, gíbeti meha haturóbulin Adán tuma Ewa. Mosu meha hawadigimaridun lau lidere lun heigin. Lubaragiñe hamuga táhüchün tídibu wewe íchugutu furuda buíduburitu aba harihin láhüchün hiyu luma híduru geyegu hau. Susereti le dan maganbadi lubéi Adán tuma Ewa lun Bungiu aba mámaaña lan Lumadagu.

Adán awadigimarida lau lidere luma lisaani

Wuribatimaati dan le hagumeserunbei Adán tuma Ewa óunwegua. Haritaguabá: Ariñagati Bungiu houn hóunweguba lan anhaña eiga tídangiñe tin aban tídibu wewe. Lúmagiñe weyu le héiginbarun aba hagumeserun óunwegua. Ma lueirin libidiouniga hau ladüga maganbun hamani Bungiu!

Sun lirahüñü Adán tuma Ewa nasiruatiñu lárigiñe lábugaguniñu Bungiu hagübürigu lídangiñe fuluri-agei Edén. Mini lan le mosu lan giñe haweiyadun hasaanigu hilagua hagía.

Lun hamuga gaganbadi lan Adán tuma Ewa lun Heowá, gúndaati hamuga habagari hau sun harahüñü. Gayarati hamuga hawinwandun lau ugundani lun súnwandan Ubouagu. Úati hamuga aweiyaduti, ni asandiruti, ni óunweti.

Busenti Bungiu lun hawinwandun gürigia lun súnwandan lau ugundani, ani füramaseti luagu ítara luba lan ámuñegü. Mámarügübei Ubóu buidu, sun gürigia buidubei hátuadi. Ñeinbei aban lubuidun umadaguaü hádangua íbini luma Bungiu.

Ewa hama tisaanigu

Gama lumoun mamaru meha lumada Bungiu Ewa. Ligíati, lénrengunbei tágurahaniñu tisaanigu. Sanditu gáriti. Le linarün aban katei le maganbadi tan lun Heowá barüti bandi igarigu tun, ida liña barihin lun?

Gíbetiñu meha harahüñü Adán tuma Ewa dandu wügüriña kei würiña. Dan nasirua lubéi furumiñeti haráü aba hagúahan lun Kaín. Le libiaman aba hagúahan lun Aweli. Subuditi bun ka lan asuseredubei houn?

Agumesehani 3:16-23; 4:1, 2; Arufudúni 21:3, 4.



Álügüdahani burí

  • Ida liña meha libagari Adán tuma Ewa bóugudi luéi fuluri-agei Edén?
  • Ka atatirubei asusereda lun Adán tuma Ewa, ani ka uagu?
  • Ka funa san uagu haweiyada Adán tuma Ewa ani hilagua hagía?
  • Lun hamuga gaganbadi hamá meha Adán tuma Ewa lun Heowá, Ida liña hamuga ibagari houn hama hasaanigu?
  • Ida liña lanügün maganbadi igarigu tun Ewa?
  • Ka meha hiri biama furumiñetiñu lisaanigu Adán tuma Ewa?
  • Kátaña san híbiri irahüñü ha lídanbaña dibuhu?

Lanwoun burí álügüdahani

  • Aliihabei Agumesehani 3:16-23 luma 4:1, 2.

    Ka efekütu lanibei líñarawagun múa lidan libagari Adán? (Agu. 3:17-19; Rom. 8:20, 22.)

    Lidan Ebüréu “nibagariti” mini lan tiri Ewa, ka uagu buidu lubéi iri ligía? (Agu. 3:20.)

    Ida liña gudemehabu lan Heowá lun Adán tuma Ewa íbini lárigiñe hafigouhan? (Agu. 3:7, 21.)

  • Aliihabei Arufudúni 21:3, 4.

    Ka “furumiñeti burí katei” hínsiñebei hamuga woun warihini lagidarun?