Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 4: Heferidiruni hábiñe

Abahüdaguni 4: Heferidiruni hábiñe

ARIHABEI le ásügürübei. Labugúña Adán tuma Ewa lídangiñe fuluri-agei Edén. Subuditi san bun ka lan uagu?

Habugúña Adán tuma Ewa lídangiñe fuluri-agei Edén

Ladüga hadügün somu katei le wéiriti luriban. Ligía labugaguñanu lubéi Heowá. Subuditi san bun ka lan hadügübei Adán tuma Ewa?

Aba hadügüni le uágubei lariñaga Bungiu houn lun madügün hamani. Ariñagati Bungiu houn gayara lan héiginu tin tídibu wewe to burí lídanboun fuluri-agei. Ani ariñagati giñe lun meigin hamanu tin aban tídibu wewe; anhoun lan heiga, hóunweba lan. Lareiduñoun meha lubarua. Ani subudi wamuti luagu wuriba lan lanügünua le hani amu, adián? Kati asuseredubei?

Aban weyu dan le tabuguarügü tan Ewa lidan fuluri-agei, aba tadimurehan aban hewe tun. Saminabá luagun le! Aba tariñagun tun Ewa lun teigin tídangiñe tin tídibu wewe to uéigiñeboun lariñaga Bungiu houn lun meigin hamá. Dan le ladügünbaliñu Heowá hewe madügün lumutiñu lun hadimurehan. Ligía anihein lubéi meha amu gürigia le adügüti lun tadimurehan hewe. Katei meha san?

Mama meha Adán. Ligía mosu lubéi aban lan hádangiñe gürigia ha meha ladügübaña Heowá saragu dan lubaragiñe ladügüni Ubóu. Ánheligu meha gürigia hagía, siñati harihín. Hanarimeti meha lanaagun ánheli le lungua. Aba lasaminarun mosu lan urúei lan kei Bungiu ani mosu lan yebe gaganbadiwa lan lun lubaragiñe Heowá. Ligía adügübei lun tadimurehan hewe.

Ayeeda lumutu ánheli le Ewa. Dan le lariñagun tun ítara tuba lan kei Bungiu anhoun eiga tídangiñe furuda, aba tafiñerun lun. Ligía téiginbei, ligíameme ladügübei Adán. Aba maganbadi hamá Adán tuma Ewa lun Bungiu, ligía heferidirunbalin lubuidun fuluri-agei le ñein lubéi heredera.

Gama lumoun lachülürüba aban weyu lun ladügüni Bungiu Ubóu lun buidu lan kei fuluri-agei Edén. Warihubeime ida luba lan gayara lan bídehan lidan le. Guentó ariha waméi ka lan asuseredubei lun Adán tuma Ewa.

Agumesehani 2:16, 17; 3:1-13, 24; Arufudúni (Apocalipsis) 12:9.



Álügüdahani burí

  • Arihabei dibuhu. Ka ásügürübei houn Adán tuma Ewa?
  • Ka uagu lasíadiraña Heowá?
  • Ka tariñagubei aban hewe tun Ewa?
  • Ka adügübei lun tadimurehan hewe tun Ewa?
  • Ka uagu heferidirunbalin Adán tuma Ewa hábiñe lidan Paraísu?

Lanwoun burí álügüdahani

  • Aliihabei Agumesehani 2:16, 17 luma 3:1-13, 24.

    Ka uagu ladügünbei álügüdahani le tadügübei hewe tun Ewa lun larihín Heowá wuriba? (Agu. 3:1-5; 1 Huan 5:3.)

    Ka uagu seriwi lubéi tani Ewa hénpulu woun kei aban eweridihani? (Fili. 4:8; Sant. 1:14, 15; 1 Huan 2:16.)

    Ida liña lálugun Adán tuma Ewa lun hagidaruni duru hawariua luagu le hadügübei? (Agu. 3:12, 13.)

    Ida liña hóunigiruni liricha Heowá lun larúeihan kátaña garünatiñu o kerubín ha rarabaña luéigiñe oubaü le ñéingiñe lubéi laboucha Weyu libiti Edén? (Agu. 3:24.)

  • Aliihabei Arufudúni 12:9. Aliihabei Arufudúni 12:9.

    Lagañeiruña san Satanási lidan líchuguniña gürigia kóntüra larúeihan Bungiu? (1 Huan 5:19)