Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Niliburun lánina abahüdaguni tídangiñeti Bíbülia

Abahüdaguni 3: Hagumeseha gürigia

Abahüdaguni 3: Hagumeseha gürigia

KA SAN iseriti barihibei lidan dibuhu le? Aayé, gürigia ha barihibaña ñein. Hagía furumiñeti wügüri tuma furumiñetu würi. Ka adügübaliñu? Bungiu. Subuditi bun ka lan liri? Heowá líribei. Ánheinti wügüri tuma würi Adán tuma Ewa híribei.

Adán tuma Ewa lidan fuluri-agei Edén

Ítara liña ladügüni Heowá Bungiu Adán: aba lanügün kaliki lídangiñe múa lun ladügün aban úgubu mafigounti le lani wügüri. Ábati láfurun lígirugun wügüri, aba latatirun Adán abagarida.

Nihein meha aban wadagimanu luma Bungiu lun Adán. Ariñagati lun, lun líchugun hiri ámuñegueinarügü hawuyeri animaalugu. Háfuga lüti Adán aturiahaña animaalugu lun líchugun aban iri buiti hawagu súngubei. Lidan nihán lan Adán adügei wadagimanu ligía, aba lagumeserun ariha aban katei. Subuditi bun katei lan?

Goubatiña sun animaalugu. Ñéinñanu lefan úguchuru luma lefan úguchili, ñéinñanu giñe liñún úguchuru luma liñún úguchili. Ánheinti Adán moubati meha. Ligía larumugagüdünbalin Heowá Adán lidan aban idabagu huliliti, ábati lasagarun aban lídangiñe luruhure. Aba layusuruni Heowá uruhurei ligía lun ladügün aban würi lun Adán lun lánime weiriou.

Ma lugundan Adán guentó! Ma giñe tugundan Ewa lau tawinwandun lidan aban lubuidun fuluri-agei! Guentó gayarahali gasaanigu hamá winwan hagía úara lidan ugundani.

Busenti meha Heowá lun lawinwandun Adán tuma Ewa lun súnwandan. Busenti meha lun hadügüni sun Ubóu lun buidu lan kei fuluri-agei Edén. Máfuna lueirin hagundan Adán tuma Ewa dan le hasaminarun hadügüni le! Hínsiñeti hamuga meha san bun bídehan lidan ladügǘn Ubóu ábanme lubuidun fuluri-agei? Ani madurati lugundan Adán tuma Ewa. Warihali ka lan uagu.

Sálumu 83:18, Reina-Valera Actualizada (RVA); Agumesehani 1:26-31; 2:7-25.



Álügüdahani burí

  • Ka lídanbei dibuhu le lánina abahüdaguni 3 le úati lidan abahüdaguni 2?
  • Ka adügübalin furumiñeti wügüri, ani ka meha liri?
  • Ka meha wadagimanu líchugubei Bungiu lun Adán?
  • Ka uagu ladüga Bungiu lun léiguadun Adán lidoun aban idabagu huliliti?
  • Átiriñein yebe dan gayara lan hawinwandun Adán tuma Ewa, ani ka meha wadagimanu labuseerubei Bungiu hadügün?

Lanwoun burí álügüdahani

  • Aliihabei Sálumu 83:18, (RVA).

    Ka líribei Bungiu ani ka ubaraü ábanrügüti lánibei Ubouagu? (Her. 16:21, RVA; Dan. 4:17.)

  • Aliihabei Agumesehani 1:26-31.

    Lidan lisisin weyu, ka katei íñugutimati ladügübei Bungiu lidan lagumuchun ladügüni ubóu, ani ida liña amu lan hawéi animaalugu? (Agu. 1:26.)

    Ka éigini líchugubei Heowá lun wügüri hama animaalugu? (Agu. 1:30.)

  • Aliihabei Agumesehani 2:7-25.

    Ka meha lunbei ladügüni Adán lun gayara lan líchugun hiri animaalugu? (Agu. 2:19.)

    Ida liña líderaguniwa Agumesehani 2:24 lun gufunranda wamani le lasaminarubei Heowá luagu maríei, afanreinraguni luma ígiraguni? (Mat. 19:4-6, 9.)