Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Arufudahani tídangiñeti Bíbülia houn isaanigu

 LEKSIÓUN 10

Súnwandan meha gaganbadi lan Hesusu

Súnwandan meha gaganbadi lan Hesusu

Anihein dan hénrengu lan bun gaganbadi ban houn bagübürigu, adián?... Aayé, anihein dan hénrengu lan. Subuditi san bun gaganbadi lan meha Hesusu dandu lun Heowá kei houn lagübürigu?... Gayarati líderagunibu lani Hesusu hénpulu lun gaganbadi ban houn bagübürigu íbini dan le hénrengu lan bun. Furendei wamá murusunraü luagu Hesusu.

Lubaragiñebei meha liabin Hesusu ubouagun, sielu meha laganawa luma Heowá le Lúguchi. Gama lumoun, dan le lawinwandunbei ya ubouagu, gáguchi liña meha gáguchu. Hosé meha tuma María híribei. Hínsiñeti hamuga bun basubudiruni ida liña lan lachülürün Hesusu tun María luma lun Hosé lun hagíaba lan lagübürigu?...

Adügati Heowá aban milaguru lun gayara lan nasirua lan Hesusu ya ubouagu. Aba lanügüni Heowá libagari Hesusu siélugiñe aba líchuguni turageirugun María. Ñein laweirida Hesusu, ítara kei haweinamudun sun irahüñü turageirugu háguchu. Nefu hati lárigiñe, aba nasirua lan Hesusu. Ábati tagüriaruni María úara luma Hosé le tani weiriei.

Dan le meha dúusurügügili irumu lau Hesusu, aba ladügün aban katei le aubei larufudei lueirin línsiñe Heowá, Lúguchi le siélubei, lun. Dan le lasuseredunbei katei le, laweiyasuhaña meha Hesusu hama liduheñu lidoun lidise uburugu Herusalén lun houdin áhuduragua lun Heowá. Dan le hagiribuduña lubéi hábiñoun, ligía líchugun Hosé tuma María fe ua lan Hesusu hama. Geyegua hamuti sun fulasu áluahei, madari hamuti! Subuditi bun ka lan ladügübei Hosé tuma María?...

Ka meha uagu leredera Hesusu ténpulurugu?

Aba hagiribudun áluahei Hesusu Herusalén. Ǘrüwañein weyu hau áluahei lau idiheri ladüga madari hamani. Lárigiñebei ǘrüwa weyu ligía, aba hadariruni. Subuditi bun halía lan hadarirei?... Ténpulurugu! Ka meha uagu lerederunbei ñein? Ladüga gibe lan meha katei lafurendeirun luagu Heowá ñein. Hínsiñeti meha Lúguchi lun ani busenti meha lafurendeiruni ka lan lunbei ladügüni lun gunda lan lau. Sigiti Hesusu lau laganbadi lun Heowá íbini dan le laweiridunbei. Súnwandan meha gaganbadi lan, íbini dan le hénrengu lan lun ladüga hóuseruni gürigia wuriba. Gaganbaditi meha giñe san Hesusu lun Hosé luma tun María? Ka basaminarubei?... Ariñagatu Bíbülia gaganbadi lan meha giñe houn.

Ariha bumuti súnwandan lan meha gaganbadi lan Hesusu?... Furendeitiwa aban katei súdiniti lídangiñe lani hénpulu: mosu gaganbadi wamá houn wagübürigu íbini hénrengu lan. Angia buguya, gaganbadibadibu san?...

ALIIHA WAMÓUN BÍBÜLIA:

  • Lúkasi 1:30-35; 2:45-52

  • Éfesuna 6:1

  • Ebüréu 5:8