Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Arufudahani tídangiñeti Bíbülia houn isaanigu

 LEKSIÓUN 13

Busenti meha Timotéu líderaguniña gürigia

Busenti meha Timotéu líderaguniña gürigia

Aban meha nibureinti le gúndaati dan le líderagun amu Timotéu. Aweiyasuhati lidoun saragu fulasu lun líderaguniña gürigia. Gíbeti meha katei buiti lidan libagari. Busentibu nasigirun abahüdagua bun luagu?...

Arufudahatu meha lúguchu tuma lagütü Timotéu lun luagu Heowá

Lidan meha aban uburugu gíriti Lísütüra laweirida Timotéu. Gumesetu Eunise to lúguchu tuma Loida to lagütü arufudaha luagu Heowá lun lúmagiñe liñüraü. Ligía lúmagiñe lubéi meha liñüraü Timotéu labusenra líderaguniña gürigia asubudirei Heowá.

Aban weyu, dan le wéiriaraühali Timotéu, aba lariñagun Pábulu lun: “Néibuga apurichiha lidan burí amu fulasu. Busentibu bidin numa?”. Aba lagundaaragun Timotéu saragu, ábati lariñagun: “Anha, busentina nidin!”. Busenti meha Timotéu líderaguniña gürigia asubudirei Heowá.

 Ñǘdünti Timotéu luma Pábulu Güresia lidoun aban uburugu gíriti Tesalónika. Mosu meha héibugun saragu áfayaha hagía tidan waporu lun hachülürün ñein. Dan le hachülürünbei, íderaguatiña saragu gürigia asubudirei Heowá. Gama lumoun, añahein meha asafaragutiña hama ábati hálugun hadügün wuribati houn. Ligía aba lubéi lidin Pábulu luma Timotéu apurichiha lidan burí amu fulasu.

Gíbeti meha katei buiti lidan libagari Timotéu gunda ligía

Fiu hati lárigiñe, aba lamuriahan Pábulu luma Timotéu lun lagiribudun uburugun Tesalónika. Busenti meha lasubudiruni ida haña lan íbirigu ha ñéinbaña. Gama lumoun, denchati meha katei le lugundun wuribati meha houserún kristiánugu Tesalónika. Mosu meha ganigi lan Timotéu lun lagiribudun ñeinhin! Kati ladügübei Timotéu? Ánhati lidin, ladüga nidiheri lan meha hawagu íbirigu. Danti le lagiribudúnbei, barüti uganu buiti lun Pábulu. Añahagua meha íbirigu eseriwida lun Heowá uburugu Tesalónika!

Seriwiti Timotéu lun Heowá úara luma Pábulu luagu saragu irumu. Ligía lariñagunbei Pábulu tidan aban gárada: “Nóunahaali Timotéu íderaguaña íbirigu. Úati amu kei ligía. Hínsiñeti Heowá lun, hínsiñe hagía gürigia lun”.

Hínsiñetiña giñe gürigia bun, adián? Hínsiñeti hamuga bun bíderaguniña afurendeira luagu Heowá?... Anhein ítara liña lubéi, gúndaabei bibagari, ítara kei meha libagari Timotéu.

ALIIHA WAMÓUN BÍBÜLIA:

  • 2 Timotéu 1:5; 3:15

  • Adügaü 16:1-5; 17:1-10

  • 1 Tesalónikana 3:2-7

  • Filipuna 2:19-22