Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Arufudahani tídangiñeti Bíbülia houn isaanigu

 LEKSIÓUN 1

Aban katei aramudaguati le busén wabéi wasubudirun

Aban katei aramudaguati le busén wabéi wasubudirun

Abahüdaguaali san somu gürigia aban katei bun le mabahüdagun lumuti houn amu?... * Aban katei aramudaguati lira, ladüga ibidiñe lan houn amu. Ayanuhatu Bíbülia luagu aban “katei aramudaguati” espechaliti. Sagüráuti, ladüga lúmagiñe lan Bungiu liabin. Íbini meha ánheligu busentiña meha hasubudiruni katei ligía. Hínsiñeti hamuga bun basubudiruni katei aramudaguati le?...

Íbini ánheligu busentiña meha hasubudiruni katei aramudaguati le

Lüha meha, aba ladügüni Bungiu furumiñeti wügüri tuma furumiñetu würi. Adán meha tuma Ewa híribei. Aba líchuguniña Bungiu awinwanda lidan fuluri-agei Edén. Ma meha lubuidun fulasu ligía! Lun hamuga meha gaganbadi lan Adán tuma Ewa lun Bungiu dandu hamuga hagía kei hasaanigu hadügüñein hamuga sun Ubóu ábanme paraísu le wéiriti lubuidun kei meha fuluri-agei Edén. Hawinwanduña hamugati lun súnwandan lidan aban paraísu. Subuditi bun ka lan asuseredubei?...

Aba meha maganbadi lan Adán tuma Ewa lun Bungiu, ligíati mama lubéi lidan aban paraísu wawinwanda uguñe weyu. Gama lumoun, füramaseti Bungiu ladügübei lan sun Ubóu ábanme paraísu ani hawinwanduba lan gürigia lau ugundani ñein lun súnwandan. Ida lubati lagunfuliruni füramasei le? Sügüti saragu dan ani úati meha ni aban gürigia asubudirúti. Aban meha katei aramudaguati lira!

Dan le liábinbei Hesusu ubouagun, arufudahati houn gürigia luagu katei aramudaguati le. Afuranguagüda lumuti luáguti lan Larúeihan Bungiu. Dan le wafurieidun lun Bungiu, amuriahatiwa luma: “Ñǘbuinla barúeihan”. Ka uagu? Ladüga layusurubei Bungiu Arúeihani le lun ladügüni Ubóu ábanme lubuidun paraísu.

Ma wéiriti bugundan lau basubudiruni katei aramudaguati le?... Mabulieidabéitia gürigiarügübaña lan ha gaganbaditiña lun Heowá awinwanda lidan Paraísu. Abahüdaguatu Bíbülia hawagu saragu wügüriña hama würiña ha meha gaganbadibaña lun Heowá. Hínsiñeti hamuga bun basubudiruniña?... Tíderagubadiwa garüdia to asubudira fiú hádangiñe ani wafurendeiruba giñe ka lan lunbei wadügüni lun ítara wamá kei hagía.

ALIIHA WAMÓUN BÍBÜLIA:

  • Márükosu 4:11

  • 1 Féduru 1:12

  • Agumesehani 1:26-28; 2:8, 9; 3:6, 23

  • Matéu 6:9, 10

  • Sálumu 37:11, 29

^ par. 3 Lidan abahüdaguni le luma lidan le líbiri harihuba puntu burí le arufuduti lunti lan hararamagun murusun (...). Lárigiñe haliihani álügüdahani, ráramagua humá lun híchugun dan lun hisaani lun lóunabun.