Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le lunbei ladügǘniwa lidan adamuridaguni Habagari Kristiánugu luma Heseriwidun  |  Sisi-hati irumu 2017

 WABAGARI KEISI KRISTIÁNUGU

Falá waméi lilurudun Heowá luáguti laruman ibagari

Falá waméi lilurudun Heowá luáguti laruman ibagari

Bungiu Heowá íchugubalin gumadi le lunbei wafalaruni lidan luáguti laruman ibagari. Kéiburi gumadi le líchugubei libügürü ábanrügübei lan wügüri tuma aban würi lidan maríei ani lunti lan hawinwandun hámagua lun sun habagari (Mat 19:4-6, 9). Iyereeguti sun luwuyeri magíaguni lun Heowá (1 Ko 6:9, 10). Ruti adundehani houn lumutuniña íbini tibügürü daüguaü luma ligaburi haranseragun houngua amu láamuga haríawagun hawéi gürigia ha meseriwidunbaña lun (2 Lur 22:5; 1 Tim 2:9, 10).

Gíbetiña gürigia uguñe weyu, máhatiña hafalaruni lugumadin Heowá libügürü laruman ibagari (Rom 1:18-32). Falá hamuti saminaü le kamanibei hadan hiibe-agei gürigia lidan tuáguti daüguaü, ligaburi haranseragun houngua luma hóuserun. Gíbetiña apantahatiña lau lahahürüha ibagari le hanügübei ani wuribati hayanuhan hawagu ha ámubei hanügüni habagari hawéi (1 Fe 4:3, 4).

Kei gefentiña luagu Heowá, mosu ganigi wamá lun wárügüdün luéigiñe lóubadina lugumadin Bungiu le luáguti laruman ibagari (Rom 12:9). Ida luba wadügüni? Lau wasubudiragüdüni houn amu lau inebesei ka lan igaburi aubei lagundaara Bungiu. Ani mosu giñe haruma lan ligaburi wanügüni wabagari. Kéiburi dan le wanúadahan ida luba lan wasansiragun luma waranseragun woungua, buiti lun wálügüdagun woungua: “Ka ugumadin nafalarubei: lugumadin san Heowá o áyeiha numutiña gürigia ha meseriwidunbaña lun? Arihúati san lidan ligaburi nasansiragun luma naranseragun nungua neseriwiduña lan lun Bungiu?”. O dan le wanúadiruni kaba lan waríagua tidan bigibigitu o katei líbeina lira, álügüdagua wamá woungua: Gúndaati san Heowá lau programa le? Ka igaburi ídounbei línchahana? Adügati san isebáhari le nanúadirubei lun nagumeserun ánhara lun igaburi le mabuidunti? (Sal 101:3.) Adügati san le nanúadirubei lun hachugeragun niduheñu o amu gürigia? (1 Ko 10:31-33).

Ka uagu weiri lubéi lisudinin wárügüdün luéigiñe lóubadina lugumadin Heowá lidan luáguti laruman ibagari? Ladüga málühali Hesukrístu agünrinchaguaña néchanigu lau sun hariban (Ese 9:4-7). Ani hárügübaña adügüti lugundan Bungiu eredera wínwanñu (1 Huan 2:15-17). Ligíati, ragǘ wamá luéigiñe lóubadina lugumadin Heowá luáguti laruman ibagari, ru láamuga lubuidun wóuserun uéiriguni lun Bungiu hagibugiñe sun ha arihitiwa (1 Fe 2:11, 12).

Ka tarufudubei daüguaü to nanúadiruboun luma ligaburi naranseragun nungua libügürü gumadi le nafalarubei lidan nibagari?

ARIHA HUMÉI BIDÉU HAZTE AMIGO DE JEHOVÁ: UN HOMBRE Y UNA MUJER, ÁBAMETI HAKUTIHANI ÁLÜGÜDAHANI BURÍ LE:

  • Ka uagu arufuda wabéi lichú aau lau wafalaruni lugumadin Heowá?

  • Ka uagu lunti lubéi hagumeserun agübürigu arufudahei lugumadin Heowá houn hasaanigu lúmagiñe hañüraü?

  • Ka gayaraabei hadügüni dandu nibureingiña kei wéinamugaaña lun híderagun amu gürigia asagara buiti lídangiñe lareini Bungiu?