Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Unsu-hati irumu 2015

 TÍTULU LE LUÁGUBEI TIDÁÜ | KÁTAÑA SAN GEFENTIÑA LUAGU HEOWÁ

Ka hawuyeri gürigia gefentiña luagu Heowá?

Ka hawuyeri gürigia gefentiña luagu Heowá?

Lílana aban óundaruni wagía, lídanñadiwa sun ubóu ani wóunguañadiwa luéi furumiñeguarügü amu relihión. Lau sun tídangiñe lan sukursáli to Merigaboun larihúa lau wawadigimari, lidan amu burí ageiraü haganawa hiibe-agei gefentiña luagu Heowá. Lidan sun ubóu, hóugiñehaadiwa widü-míñunu, ani rútiwa aturiahani tídangiñeti Bíbülia lidan lóugiñe 230 ageiraü luma burí fulasu. Ítara liña wagunfuliruni le lariñagubei Hesusu: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu (Matéu 24:14).

Meberesenga halía lan waganawa, inebeti ani gaganbaditiwa lun lilurudun ageiraü ligía, gama lumoun, mádaraguntiwa woungua lidoun polítika. Ítara liña wagunfulirun lau gumadi le líchugubei Hesusu houn kristiánugu libügürü moun lumuti lan lánigu wamá ubóu. Ligía mádaragun wabéi woungua lidoun polítika ni lidoun wuribu (Huan 15:19; 17:16). Adügati meha katei le lun hadaürǘn saragu gefentiña luagu Heowá, hasufurirawagüdün luma lun háfarawagun saragu hádangiñe lidan Libiaman Wuribu Wéiriti. Abürühati aban wügüri yámanina le meha íñubei ubara hadan fádirigu: “Garichatiña lun hariñagun hagíatimañanu lan meha sétanu gürigia árügüda luagu haricha lidan lidaani Lǘrüwan Reich lánina mama lan mosu gaganbadi hamá lun gumadi le múaranbei luma hasaminan”.

“Wéiriti ubafu le hawagubei [gefentiña luagu Heowá] lun hadügüni le buídubei íbini ladügüdarúña lan hawagu lun hadügün amu katei. Gayaraati hamuga wíchugun gürigia ha masaminaruntiña hawouguounrügü kei hagía lidan burí wadagimanu le súdinitimabei lidan polítika, gama lumoun, maweiyasunbadiwa ibiha lun hánharun lun. [...] Rédeitiña lábugiñe hererehan gumadimatiña, gama lumoun afiñetiña Larúeihanrügübei lan Bungiu gabafu lun laransehani sun haturóbulin gürigia.” (Tídangiñe periodiku Nová Svoboda, República Checa)

Úati mini lan lira díseñu liña lan wakipuragun woungua hawéi ha híbiri gürigia. Dan meha le lafurieidunbei Hesusu lun Bungiu hawagu lani disipulugu, ariñagati lun: “Mamuriahantina buma lun basagaruniña ubouagugiñe” (Huan 17:15). Ligía ñüdün wabéi awadigimarida, agañeiha luma aturiaha ítara kei wabesinanigu.