Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Unsu-hati irumu 2015

 TÍTULU LE LUÁGUBEI TIDÁÜ | KÁTAÑA SAN GEFENTIÑA LUAGU HEOWÁ

Ka uagu hafiñera gefentiña luagu Heowá?

Ka uagu hafiñera gefentiña luagu Heowá?

Afiñetiwa, wagía gefentiña luagu Heowá, “sun [lan] le bürüwañubei tidan Lererun Bungiu, Bungiu guánarügü íchugubalin haritagunrugun wügüriña lun habürüdüni, ani huutu” (2 Timotéu 3:16). Yusu wamutu Bíbülia lun wafurendeirun luagu Bungiu le adügübalin sun katei luma lun tadundehani wabagari lun gasuuni lan.

Ariñagatu Lererun Bungiu: “Subudi hamaamugei gürigia buguyarügüñein lan, le gíribei Heowá, Íñugutima ligibuagu sun ubóu” (Sálumu 83:18, Traducción del Nuevo Mundo, [TNM]). Ligía lúnrügüñein lubéi Bungiu Heowá wáhuduragua. Keiti lánigu lubéi gefentiña wagía, áfaaguatiwa lun wasubudiragüdüni liri houn amu (Isaíasi 43:10-12).

Kristiánugu wagía ani afiñetiwa Hesusu “lan Liraübei Bungiu”, * le meha ñǘbuinbei ubouagun lun ligía lan Mesíasi o Kristu (Huan 1:34, 41; 4:25, 26). Lárigiñebei lounwen Hesusu aba láguyuguagüdüni Bungiu, ábati lagiribudun lárigoun sielun (1 Korintuna 15:3, 4). Dan lárigiñe, aba liridún Urúeime lidan Larúeihan Bungiu (Arufudúni [Apocalipsis] 11:15). Afiñetiwa gumeseeli lan Arúeihani le agumadiha ani ladügayabei lan Ubóu paraísume (Danieli 2:44). Darí wamuti füramasei le tidan Bíbülia: “Ha ǘnabubei hanaagun houngua, hagíaba laburiña múa, habagariduba lidan darangilaü le dayarüti” (Sálumu 37:11, 29).

“Dan le haliihanu Bíbülia, ítara liña houn kamá hamuga layanuhaña Bungiu houn. Sagü gaturóbulin hamá, háluahani laranseha tidan Lererun Bungiu. [...] Móunwengiru Lererun Bungiu houn.” (Fádiri katoliku Benjamin Cherayath, tidan periodiku Münsterländische Volkszeitung, Yámani)

Wagía, gefentiña luagu Heowá, afiñetiwa gayara lan líderaguniña le tariñagubei Bíbülia gürigia uguñe weyu (Isaíasi 48:17, 18). Ligía wadügünbalin sun wayaraati lun gaganbadi wamá lun gumadi le tídanbei. Kéiburi le tariñagubei libügürü mosu lan “wachibuni sun luwuyeri iwiyei wawariua” dandu luéi wágubu kei luéi wasaminan, ligía magumulahan wabéi mayusu wagía düroga (2 Korintuna 7:1). Áfaaguatiwa giñe lun madügün wamani katei burí le uágubei tariñaga Bíbülia furangu moun lumuti lan wadügüni, kéiburi wabacharuadun, wadügün magíaguni lidan agamariduni o wíweruhan (1 Korintuna 6:9-11).

^ par. 5 Tidan Bíbülia, wáwati giñe lun Hesusu “Liráü Bungiu le ábanrügüti” ladüga ligíarügüñein lan ladügün Heowá lábuguarügü ani ligía giñe furumiñetibei lídangiñe sun le ladügübei (Huan 3:18; Kolosana 1:13-15).

Lanwoun ariñahani

ÁLÜGÜDAHANI LE GABÜGÜRÜGUATI LADÜGǗN

Afiñetiña san gefentiña luagu Heowá hani lan relihión inarünibei?

Ariñagati meha san Hesusu gibe lan üma anügütiña gürigia lidoun asalbaruni?