Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Unsu-hati irumu 2015

Lisudinin feruduna wamaniña amu

Lisudinin feruduna wamaniña amu

 BINADU ADUNDEHANI LE HUUTI UGUÑE WEYU

ADUNDEHANI TÍDANGIÑETI BÍBÜLIA: “Ferudunagua humá húmagua ítara kei feruduna lanün Bungiu lidan Kristu” (Éfesuna 4:32).

Ka mini lubéi? Tidan Bíbülia, góubaguagüdawati figóu luma dúeiti, ánheinti ferudun luma lafayeirún (Matéu 18:21-35). Ariñagatu aban líburu dimurei lan le ásügürawagüdübei kei “ferudun” lidan Abürüdǘni Güriegu gayaraati mini lan “ligirún lun lásügürün aban dúeiti lau maguburahóun lan”. Ligíati, dan le feruduna wamá somu gürigia le achararuti woun, aba wasandirun madueirun láadiwa lan ni kata. Úati mini lan lira, samina wamá buidu lan le ladügübei o magari lan woun. Lubaragiñe lira, arufudatiwa desidírühadiwa lan magüürün wamá wuribani lubá, íbini garicha wamá lun wagañidun.

Huuti san adundehani le? Kei sun lubéi wagía gafigountiwa, charatiwa (Rómana 3:23). Ligía buidu lubéi lun feruduna wamaniña amu, lugundun lachülürüba dan lun wemegeirun lun feruduna lániwa somu gürigia. Ibihatiwa giñe buiti dan le feruduna wamaniña amu. Ida?

Wadügüña wuribati wóuniwagua dan le wagañidun, wareidahan igarihabu tidan wanigi ani máhatiwa wíchugun ferudun. Másiñati lagidaruni katei burí le wagundan, lagüreweiduni wabagari, gífigüdalei. Gayaraati íbini lasandiragüdüniwa. Ariñagati surusia le gíribei Yoichi Chida luma Andrew Steptoe, máisturu le aturiahabei luagu hasaminan luma hóuserun gürigia, tidan aban garüdia lánina agaranihani: “Málügili lúmagiñe larufuduni aban aturiahani anihein lan igañi luma furundei lanagangiñe tisandi anigi” (Journal of the American College of Cardiology).

Guentó samina humá luagu buiti le lanügübei feruduna wamaniña amu. Buiti wanaagun woungua hama, úati fánreinguaü wadan, darangilu ligía wawinwandun. Ani le súdinitimabei wáyeihañeinme Bungiu le gíchigadibei ferudun houn gafigountiña ha asakürihabaña ani agurabati lun wadügüni ligiaméme (Márükosu 11:25; Éfesuna 5:1).