Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Nefu-hati irumu 2015

 TÍTULU LE LUÁGUBEI TIDÁÜ | KA ASUSEREDUBEI LÁRIGIÑE ÓUNWENI?

Águyuguni. Ka uagu gayara lubéi wachoururuni ñeinbei lan?

Águyuguni. Ka uagu gayara lubéi wachoururuni ñeinbei lan?

Másiñati añahein lan asaminarutiña libidiounigan lan aau lafiñerúniwa ñeinbei lan águyuguni. Mítaranti meha larihini apostolu Pábulu katei, lugundun ariñagati: “Anhein lúntirügü lubéi ibagari le wemenigin luagu Kristu, fugiabu wagía hádangiñe súngubei! Gama lumoun le inarünitibei, sarati Kristu lídangiñe óunweni; ligía furumiñetibei ásaaruti lídangiñe óunweni” (1 Korintuna 15:19, 20). Chouru lumuti meha Pábulu anihein lan águyuguni, lugundun chóurugüda lumuti láguyugun Hesusu lun (Adügaü 17:31). * Kei meha Hesusu lubéi furumiñetibei ásaaruti lídangiñe óunweni lun lawinwandun lun súnwandan, ligía lariñagunbei Pábulu luagu “ligía [lan] furumiñetibei”. Ánheinti Hesusu lubéi furumiñetibei, añaheinrügühaña amu lárigiñe.

Ariñagati Hobu lun Bungiu: “Bayumahaba barihini luadigimari búhabu”. (Hobu 14:14, 15TNM)

Anihein amu resun lun wafiñerun ñeinbei lan águyuguni: Lubungiute inarüni Heowá, “Bungiu, le meyeehanbei” (Titu 1:2). Meyehanñahagili ani meyeehanbei. Maweiyasunbei Bungiu ariñaga láguyuguagüdübaña lan hilaaña, arufudaléi gabafu lan lun ladügüni, néingiñe aba madügün lani. Maweiyasunbei!

Ka uagu desidírühali lubéi Heowá láguyuguagüdüniña hilaaña? Ladüga línsiñehabu. Álügüdahati Hobu: “Anhein ounwe aban gürigia, labagaridayaba san?”. Ábati lariñagun: “Bagúaruba nun, ábame nóunabunibu. Bayumahaba barihini luadigimari búhabu” (Hobu 14:14, 15, TNM). Chouru lumuti meha Hobu weiri lan layumahan Heowá, Lúguchi le siélubei, láguyuguagüdüni. Anihagua san Heowá ayumaha láguyuguagüdüniña hilaaña? Ligía guánarügü óunabubei: “Au [...] masansiragungidina” (Malakíasi 3:6). Ayumahamémegili Bungiu láguyuguagüdüniña hilaaña winwan hamaamuga lau ugundani  luma lubuidun átuadi. Ma ligía layumahabei furumiñeguarügü úguchili le uéibei lounwe somu lisaani? Leti buídubei, mama lan ayumaharügüti Bungiu láguyuguagüdüniña hilaaña, gabafuti giñe lun ladügüni (Sálumu 135:6).

Aban óunwenbu turobuli óunweni, gama lumoun, anihein lárani luma Bungiu

Líchuguba Heowá ubafu lun Liráü lun láguyuguagüdüniña hilaaña, lanügüba katei le ugundani houn sun ha féridihañabaña somu haduhe lidan óunweni. Layumahaña giñe Hesusu ladügüni. Ida liña wasubudiruni? Lugundun lubaragiñebei meha láguyuguagüdüni Hesusu Lásaru, le lumada, “aba layahun” dan le larihinbalin igarigu le hasandirubei lítunu hama lumadagu le óunwebei (Huan 11:35). Amu weyu, dan le larihinbei aban würi hilaaru úmari ayahuahei lounwen tiráü le ábanrügüti, “aba tagudemedagun lun, aba lariñagun tun: ‘Mayahuahabá’”. Ábati láguyuguagüdüni nibureinti ligía reiti ñein (Lúkasi 7:13). Furendeitiwa lídangiñe abahüdaguni le gari lan lun Hesusu larihiniña gürigia asufurirei igarigu le lanügübei óunweni. Ligíati, wéiribei lubéi lugundan danme le gayara lan líchugun lébuna ugundani houn gürigia lubaragiñe lébuna íruni.

Egebirihañahaadün san? Háfuga samina humá máranina lan óunweni. Gama lumoun, gáraninati: Láguyuguagüdübaña Bungiu hilaaña ani anúadira laali Liráü lun ladügüni wadagimanu le. Haritagua huméi busén lan Bungiu lun ñein humá, gayara láamuga heresibiruniña hiduheñu danme le háguyugun. Aríagua humá hungua ñein, ayanuha luagu le habusenrunbei hadügün úara lídanme ibagari magumuchaditi le lunbei hawinwanduni danme le mayouragundigiaadün lan húniwagua.

Ariñagati Lionel, le buga uágubei wayanuha: “Dan le layanuhóunbei nun luagu emenigini lánina águyuguni, güreweiti meha nun nafiñeruni, nariñaga yebe neyeedúña lan. Lárigiñehali narihei nungua tidan Bíbülia inarüni lan. Wéiriti nayumahan narihiniya náruguti!”.

Hínsiñeti hamuga san hun hasigirun afurendeira luagu katei le? Gúndaabaña gefentiña luagu Heowá harufuduni hun tidan Bíbülia ka lan íchugubei ichouruni houn luagu háguyuguba lan hilaaña. *

^ par. 3 Tidan Garüdia Atalaya, to lánina 1 lidan ǘrüwa-hati, irumu 2013, páhina 3 darí 5, akutihóuati amu burí katei le arufudubalin águyugua lan meha Hesukrístu.

^ par. 9 Akutiha huméi kapítulu 7 tidan líburu Kátima san tarufudahabei Bíbülia?, hadügün gefentiña luagu Heowá.