Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Sedü-hati irumu 2015

 TÍTULU LE LUÁGUBEI TIDÁÜ | KA ÁRANIBEI LUN SARAGU IDIHERI?

Saragu idiheri luagu seinsu

Saragu idiheri luagu seinsu

“Dan le liñurunbei lebegi sun katei wageira, lóuguati meha éigini, seru ligía, —liña Paul, aban maríeiti le háguchi bián isaanigu—, gíbeti meha wéiyaasu lasuseredun agurabaha wamá saragu oura lun wagañeihan, ani dan lachülürün aban oura úaali ni kata. Ábunrügaaña meha luma uraü gürigia ani óunwehatiña meha ǘmada le halama. Ma meha loufun liñurun lebegi katei burí létima mégeiwabei! Lúmagiñe meha saragu lan míñunu gáwanaü lebegi darí lun saragu lan milu míñunu. Mebegihali meha seinsu. Féridi numuti sun seinsu le númabei bánkurugu, le nafayeirubei lun nibihin ichouruni luma le yebe lunbei lafayeirúniwa nun danme nígiragüdüniwa lídangiñe wadagimanu.”

Paul

Subudi lumuti meha Paul mosu lan lánhingichun anhein mabusenrun lubéi hóunwegun liduheñu halama (Ariñawagúni 3:21). Ariñagati: “Aturiahatina meha luadigimaríniwa lau elekütrisida. Íbini ítara, aranseñu niña meha lun nadügün furumiñeguarügü wadagimanu, íbini meha míbebei lan fáyeiti ichugúti nun. Añahein meha hádangiñe gürigia ha únbaña nawadigimarida afayeirutina lau éigini o lau somu katei le huuti múnada. Ánhana meha hafayeira lau gádürü sabun, aba meha nalugurun biama, redei au lau biama. Ibihatina 40 harahüñü gayu, aba nagüriahaniña. Dan le haweinamudunbei, aba naluguruniña, ábati nagañeihan 300. Lárigiñe, aba nasansirun 50 gayu tuagu bián sagü to gaganatu san-diisi líburu fulúaru awasi kada aban. Tau néigagüdüniña niduheñu hámaya amu luagu saragu dan”.

Subudi lumuti meha giñe Paul lafiñerúniwa lan luagu Bungiu katei sudinitimati le gayaraabei ladügüni gürigia. Dan le gaganbadi wamá lun Bungiu, íderagua lumutiwa. Ariñagati Hesusu libugürü le wemegeirubei lun wabagaridun: “Madiherida humá [...] luagu kaba lan heiga [...] anihein aban Húguchi le subudihabúbei lun sun hemegeirun” (Lúkasi 12:29-31).

Híruti adügaali lan Satanási, létima láganibei Bungiu, lun hasaminarun hiibe-agei gürigia umegeguni lan súdinitimabei lidan ibagari. Aba hafuudun lun habihini le hemegeirubei, le lan yebe lúgubu  megei hamani o saminarügü hamá megei hamani. Gíbetiña gürigia, aba habuinchagun lau dúeiti, ábati hafurendeiruni lau luriban “urúeiñanu [lan ha afuredeihabaña] hadan ha adúeihabaña” (Ariñawagúni 22:7).

Añahein desidírütiña wuriba. “Gíbetiña meha nasubudiragun ígirutiña haduheñu hama hamadagu lun houdin ‘áluagua houngua’ lidan amu ageiraü —liña Paul—. Kei meha magaradan habéi besafu hádangiñe, madaritiña meha wadagimanu. Ani anihein meha dan mosu lan haramudagun hawéi lúrudugu o harumugun ǘmadarugu. Míchuguntiña chansi lun Bungiu lun líderaguniña. Ánheinti wagía, aba desidírü wamá wagagibudagun luma lénrengunga úara, kei iduheñu, lau lídehan Bungiu.”

FALÁ WAMÉI LADUNDEHAN HESUSU

Sigiti Paul ariñaga: “Ariñagati Hesusu: ‘Madiherida humá [...] luagu haruga, ladüga barǘ lumuti giñe haruga lidiheridüna lúmagua. Buídurügüti lénrengunga le lanügübei kada weyu lúmagua’. Ligía sagü lubéi meha weyu namuriahan luma Bungiu lun líchugunu ‘weigan fein to lánina sagü weyu woun’. Ítara kei lariñaguni Hesusu, gúnfuli lumuti Bungiu le füramase lubéi. Inarüni mama lan meha súnwandan wadariruni le hínsiñetimabei woun. Aban weyu, agurabahatina lalugurún éigini nun tidan aban budigü ibidiñega nun ka lan alugurahóubei ñein. Dan le nachülürünbei lumoun alugurahati ñein narihei Yoguru lan lalugurahaboun. Mínsiñetuti Yoguru nun higán! Gama lumoun, kei éigini lubéi, tau wata bachati rábounweyu ligía. Wéiriti neteingiruni Bungiu luagu lidan lan sun dan ligía, matokarunti houn niduheñu harounrun lau halama ni aban wéiyaasu. *

Ariñagaali Bungiu: “Nóunigirubadibu; mígirun nubadibu”.(Ebüréu 13:5)

”Guentó buíduraühali dan woun. Furendeihadiwa lídangiñe le wásügürübei emenigini lan luagu Heowá láranibei idiheri. * Líderagubadiwa anhein wadüga lugundan. Ariha wamaali woungua inarüni lan le lariñagubei Sálumu 34:8: ‘Houcha humá, ariha humeime luagu buidu lan [Heowá]. Fuleseiwatiña gürigia ha hemenigibaña luagu’. Ligíati, máhüchüragüdün láadiwa wásügürünya lídangiñe lidere dan.

Íderagua lumutiña Heowá ha úaraguabaña ibihoun heigan “fein to lánina sagü weyu”

”Mámatima seinsu ni wadagimanu hemegeirubei gürigia lun hawinwandun, éigini hemegeirubei. Ligía ayumaha wabéi lachülürün dan lun lagunfulirun füramasei le: ‘Ñeinlá saragu türigu fulasurugu’. Ligíati, sunme awanha lan agurabaha, gufurumabadiwa ‘anhein geigin wabéi, gadaüragun’. Eweridihatu Bíbülia: ‘Míchiga huméi hínsiñehabu luagun seinsu; gunda humá lau le húmati, lugundun líchugubei Bungiu le hemegeirubei hun. Ariñagaali: “Nóunigirubadibu; mígirun nubadibu”’. * Ruti füramasei le saragu dǘgüdaguaü woun.”

Mégeiwati aban óunwenbu afiñeni lun lafalarúniwa ladundehan Bungiu, kei ladügüni Paul hama liduheñu (Agumesehani 6:9). Gayaraati wafurendeirun saragu lídangiñe lichú aau le aubei lahandilihei Paul gádanti, dandu anhein wásügürüña lubéi lídangiñe lidere dan guentó, kei danme le wásügürün lídangiñe ámuñegü.

Ánheinti luagu lubéi turobuli hadan waduheñu wadiherida?

^ par. 9 Aliiha huméi Matéu 6:11, 34.

^ par. 10 Ariñagatu Bíbülia Heowá lan líribei Bungiu.

^ par. 11 Aliiha huméi Sálumu 72:16; 1 Timotéu 6:8; Ebüréu 13:5, 6.