Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Sedü-hati irumu 2015

Le san lúgubu gayara lan wagundaaragüdüni Bungiu?

Le san lúgubu gayara lan wagundaaragüdüni Bungiu?

Aliihañahaadün san hawagu wügüriña ha lídanbaña dibuhu le íñubei? Adimurehóuati buidu hawagu tidan Bíbülia. Saminatün san machülübei lan dan lun lariñawagún ligiaméme huagu? Másiñati ariñaga humá húniwagua: “Gafigountina, maricharaguntina ani díseguati nadügüni katei keisi lubudubu”.

Aban meha wügüri le “suruti [...] labagaridun ligibugiñe Bungiu” Hobu ani hóuchati meha “madügün lan wuribani ni ka un”. (Hobu 1:1)

Ariñagatu Bíbülia luagu Hobu: “Suruti meha labagaridun ligibugiñe Bungiu [...] hóuchati súnwandan lun madügün lan wuribani ni ka un” (Hobu 1:1). Luagu Lotu, ariñagatu: “Wügüri buiti [o richaguati] ligía” (2 Féduru 2:8). Ánheinti luagu Dawidi, ariñagatu: “Úaraguati [ligibugiñe Bungiu]” (1 Urúeigu 14:8). Akutiha waméi ka lan tabahüdagubei Bíbülia luagu habagari wügüriña ha. Warihibei íbini lan meha hagía charatiña, ariha wameime ka lan gayaraabei wafurendeiruni hámagiñe luma ida luba lan wagundaaragüdüni Bungiu lau sun gafigoun wamá.

CHARATIÑA MEHA GIÑE

“Salba lumuti meha [Bungiu] Lotu, le wéiribei lidiheri luagu liwiye hagaburi gürigia wuribatiña” ha uburugubaña Sodoma luma Gomora. (2 Féduru 2:7)

Súfuriti meha Hobu saragu lamiselu ani genegeti meha lun madüna lani lasufurirun ítara, darí lun lasaminarun meberesegun lan Bungiu anhein gaganbadi o maganbadi lubéi lun, ani mítaranti meha katei (Hobu 9:20-22). Hanarimeti meha lagiribuhan Hobu luagu aban lan wügüri buiti ligía darí lun hasaminarun ha aganbubalin richaguatima lan lanügagun lungua sügǘ lau Bungiu (Hobu 32:1, 2; 35:1, 2).

Ásuhati meha Lotu lubá ladügün gasu lau gumadi furanguti le líchugubei Bungiu lun. Wíyeti  meha hagaburi lílana Sodoma luma Gomora ani buchá meha luagu Lotu lubá lahahürüha habagari. Ábaha “lasufurirun [...] tidan lanigi lau larihini” wuribani le hadaagubei lílana fulasu (2 Féduru 2:8). Aba lariñagun Bungiu lun lagünrinchaguaaña lan gürigia hagía ani anhein lan busén lubéi lesefurun hau liduheñu mosu lan láfuridun hau ñéingiñe. Agurabúati hamuga lun éibaagueinaba lan ladügei Lotu le ariñawagúbei lun; gama lumoun, madügün lumuti, ábarüga lerederun agararaha lúbiñe. Mósuti buga ánheliguba lan ha lóunahabaña Bungiu awisarei árügüdei lúhabu luma háhabu liduheñu lun hasagaruniña uburugugiñe luéi hóunwegun lidan lagünrinchawagun (Agumesehani 19:15, 16).

Éibugati meha Dawidi ligibugiñe Bungiu “tau sun lanigi, ani úaraguati” meha ligibugiñe. (1 Urúeigu 14:8)

Aba meha lígiraguagüdün Dawidi lungua lun luriban ayumahani, ábati lagabarahan tuma aban würi maríeitu. Lun ladouragun lau lifigoun, aba lóunahan áfaragüdei tani weiriei (2 Samueli, kapítulu 11). Ariñagatu Bíbülia magundan lan Heowá “lau katei le ladügübei Dawidi” (2 Samueli 11:27).

Furanguti chará hamá meha ǘrüwa wügüriña ha, ani anihein meha lídangiñe charati ligía hanarimeyati. Íbini ítara, kei larufuduni ariñahani le lunbei wakutihani, ayumahatiña meha gaganbadi hamá lun Bungiu. Arufuda hamuti asaküriha hamá tídangiñe sun hanigi ani rárama hamuti hadügüni le mabuidunbei, gúndaagüda hamutiti Bungiu ítara. Ligía layanuhóunbei hawagu tidan Bíbülia keisi wügüriña derebugu tafiñen.

LE WAFURENDEIRUBEI HÁMAGIÑE

Le linarün katei, sun wagía charatiwa (Rómana 3:23). Íbini ítara, gayaraati wasakürihan luagu wafigoun, áfaagua wagíame lun waransehani wawaguti ligibugiñe Bungiu.

Ka ladügübei Hobu, Lotu luma Dawidi lun haransehani gádantiña ligibugiñe Bungiu? Kei aban lubéi meha wügüri haruma tanigi Hobu, asakürihati  luagu le lariñagubei ani sansi lumuti ligaburi lisaminan lárigiñebei ladimurehan Bungiu luma lun líderaguni asaminara keisi lubudubu (Hobu 42:6). Iyereeguti meha liwiye habagari lílana Sodoma luma Gomora lun Lotu ítara kei liyereegun lun Bungiu. Le turobulibei, adarasaha lan Lotu lubaragiñe lígirunu luban. Lárigiñe lira, adügati gasu. Anurahati ani madigiragungubeiti arihei le lígirubei lárigiñegua. Ánheinti Dawidi, lau sun meha dürügua lani lilurudun Bungiu, arufuda lumuti buidu tan lanigi: asakürihati ani ayumuraguati lun lun feruduna lani lifigoun (Sálumu 51).

Subudi lumuti Bungiu gafigoun wamá. Ligía madügün lubéi meha hachara wügüriña ha lun magundaarundigiaali lan hau. Mamuriahanbei Bungiu aban katei wama le wásiñarun adüga lugundun “subudi lumuti [...] káteitimañadiwa lan” ani “múa lan wabuñabei” (Sálumu 103:14). Kati lagurabubei wámagiñe?

Subudi lumuti Bungiu “káteitimañadiwa lan [...], múa lan wabuñabei”. (Sálumu 103:14)

LE LAGURABUBEI BUNGIU WÁMAGIÑE

Íderagua lumutiwa dimurei le lariñagubei Dawidi lun liráü asubudirei: “Buguyati Salomón, niráü. Subudibéi Bungiu le Habungiute bagübürigu, seriwibéi tau sun banigi” (1 Krónikasi 28:9). Mini lan le, mosu lan línsiñedun woun, wayumahan wasubudiruni luma wagunfulirun lau le lamuriahabei wama. Úati mini lan lira, wadügübei lan sun katei buidu. Gürigia le eseriwidubei lun Bungiu tau sun lanigi ayumahati lafalaruni ladundehan ani aganba lumuti Lererehan. Kei ítara haña lan meha wügüriña ha, ligía larihinbalin Bungiu Hobu kei wügüri le “suruti [...] labagaridun ligibugiñe”, larihei Lotu kei “wügüri buiti [o richaguati]”, arihaléi Dawidi kei wügüri “úaraguati”. Lau sun meha chará hamá, ibihatiña hagundaaragüdüni Bungiu.

Weseriwidun lun Bungiu tau sun wanigi, mini lan, línsiñedun woun, ayumaha wagíame wasubudiruni luma wagunfulirun lau le lamuriahabei wámagiñe

Anhein ñübuin luriban saminaü wachüguagun, ánhawa ariñaga katei le uáguti wasandira busiganu lárigiñe o wadügün katei le uáguti wíchiga fe lárigiñe moun lumuti lan hamuga buga wadügüni, meferidira waméi waguraasun. Mabulieida waméi le asuseredubei houn ǘrüwa lubúeingu Bungiu ha. Subudi lumuti sun lan wagía charatiwa. Ani agurabati weseriwidun lun tau sun wanigi, lidan amu dimurei, agurabati línsiñedun woun, áfaagua wagíame lun gaganbadi wamá lun. Anhein wadüga ítara, chóuruti wéiribei lan lagundaarun wau.

Lanwoun ariñahani

Kátima san tarufudahabei Bíbülia?

Ibagari le aubei lagundaara Bungiu

Gayaraati wanügün aban ibagari le auti lagundaara Heowá. Inarüni gayara lan lumadagu wamá Bungiu.