Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Sisi-hati irumu 2015

Kristu “lubafubei […] Bungiu”

Kristu “lubafubei […] Bungiu”

“Kristu lubafubei [...] Bungiu.” (1 KORINTUNA 1:24)

1. Ka uagu lariñaga Pábulu Hesusu lan ‘lubafubei Bungiu’?

DAN le meha ya lubéi Hesusu ubouagu, adügati milaguru burí le aweiridagüdübarun hanigi gürigia. Ánhawa aliiha luagu milaguru ligía tidan Bíbülia, léredatimaba wafiñen (Matéu 9:35; Lúkasi 9:11). Adüga lumuti meha Hesusu milaguru burí ligía ladüga líchugun Heowá ubafu lun. Ligía lariñagunbei apostolu Pábulu ‘Kristu lan lubafubei Bungiu’ (1 Korintuna 1:24). Gama lumoun, ka san larufudahabei lani Hesusu milaguru woun?

2. Ka larufudahabei lani Hesusu milaguru woun?

2 Arufudahati lani Hesusu milaguru saragu katei woun (Adügaü 2:22). Seremei milaguru burí ligía, ligía wasubudirunbalin ladügüba lan Hesusu milaguru burí lun líderaguniña sun gürigia ha lúnbaña hawinwandun ubouagu lábugiñe milu irumu le lánina larúeihan. Íderagua lumutiwa giñe lani Hesusu milaguru lun wasubudiruni ligaburi luma ligaburi Heowá buidu. Lidan arütíkulu le wayanuhaba luagu ǘrüwa lani Hesusu milaguru ani warihibei giñe ida luba lan líderaguniwa guentó luma ámuñegü.

 ABAN MILAGURU LE ARUFUDAHABEI AREIDUNI WOUN

3. a) Ka meha asuseredubei lidan aban maríei uburugu Kaná? b) Ka meha san uagu ladügei Hesusu milaguru ligía?

3 Lidan aban maríei uburugu Kaná ladügei Hesusu furumiñeti lani milaguru. Úati meha buídurügü tan diwéin to lídanboun fedu ligía ani aba meha busiganu lira houn amarieidutiña lugundun mosu meha hetenirun buidu houn sun gürigia ha lídanbaña fedu. Ábati tamuriahan María luma Hesusu lun líderaguniña amarieidutiña hagía. Ka uagu? Subudi tumuti meha profesía luáguti Hesusu buidu ani subudi tumuti meha laguarúba lan lun “Liráü Bungiu le íñubei” (Lúkasi 1:30-32; 2:52). Háfuga giñe samina tan meha gayara lan líderaguniña Hesusu amarieidutiña. Chóuruti busén tan meha María luma Hesusu híderaguniña. Ligía lasaliraguagüdünbei Hesusu 380 líturu (100 galun) duna diweinme to buitu (aliiha huméi Huan 2:3, 6-11). Mama meha mosu ladügüni Hesusu milaguru ligía, ani adüga lumuti ladüga lidiheri hawagu gürigia. Lafalaruñein meha lani Heowá hénpulu le lánina areiduni.

4, 5. a) Ka larufudahabei milaguru luáguti duna tuma diwéin woun? b) Ka ichouruni líchugubei milaguru le woun?

4 Lau lubafu Heowá, saliguagüdati Hesusu bandi duna diweinme to fínutu. Adügati saragu diwéin houn bandi gürigia ha ñéinbaña. Arufudati milaguru le woun areida lan Heowá luma Hesusu ani inarüni lan berese hamá lau le wasandirubei. Ani ruti giñe ichouruni woun luagu líchuguba lan Heowá éigini le buídurügüti houn sun gürigia lidan Paraísu (aliiha huméi Isaíasi 25:6).

5 Samina humá san! Danme le lidan wamá Paraísu, líchugubei Heowá sun le wemegeirubei woun. Sun wagía gábanbadiwa to buitu ani wéigiba giñe buidu. Dan le wasaminarun luagun sun katei buiti le lunbei líchuguni Heowá woun, aba wíchugun saragu eteingiruni lun.

Áyeiha waméi Hesusu ani yusu waméi wadaani lun wíderagun amu (Ariha huméi párafu 6)

6. a) Ka meha un layusurei Hesusu lubafu? b) Ida luba wasigiruni lani Hesusu hénpulu?

6 Mayusurun lumuti meha Hesusu lubafu lun lubuidun guánarügü. Kéiburi dan le lóuchagunbalin Mafia lun lasaliraguagüdün dübü feinme, ka ladügübei? Máhati ladügüni (Matéu 4:2-4). Yusu lumuti meha lubafu lun líderagun amu. Ida luba wasigiruni lani hénpulu? Ariñagati Hesusu mosu lan wéchudun adüga katei luagu hafulesein amu (Lúkasi 6:38). Gayarati wamisurahaniña eiga wábiñe. Gayarati giñe wásügürün dan hama lárigiñe adamuridaguni, háfuga lun waganbun somu íbiri le busenti lasayahani liyanun. O gayarati giñe wíderaguniña ha agumeserubaña afurendeira ida luba lan hapurichihan. Dan le gíchigadi wamá ani íderagua wagía amu, wáyeihañein lani Hesusu hénpulu.

“SUN HAGÍA HÓUTIÑA KIMULE”

7. Kaba turóbuli magumuchagun lídangiñe ubóu le lani Satanási?

7 Uguñe weyu gíbetiña gürigia gudemetiña ubouagu. Ani aniheinhali meha turóbuli le lúmagiñe lidan tidaani Bíbülia. Ariñagati meha Heowá  houn ísüraelina: “Súnwandan ñeinbei lan megei fulasurugu” (2 Lúrudu 15:11). Ani saragu sígulu lárigiñe, ariñagati Hesusu: “Súnwandan yáabaña lan gudemetiña huma” (Matéu 26:11). Mini lan san le ñéinbaña lan gudemetiña ligibuagu Ubóu súnwandan? Uá. Le labusenrubei Hesusu lariñagun luagu súnwandan lan ñéinbaña lan gudemetiña lidan ubóu le lani Satanási. Ánheinti lidan Paraísu ámubei léibugun katei. Ñeinbei éigini houn sun gürigia ani úabei gudemei.

8, 9. a) Ka meha uagu ladügei Hesusu milaguru tau fein hama úduraü? b) Ka hasandirubei dan le hasaminarun luagun milaguru le?

8 Ariñagati Sálumu 145:16 dará lumuti lan Heowá lúhabu lun líchuguni sun hemegeirun gürigia hama animaalugu houn. Dan le meha ya lubéi Hesusu ubouagu, falá lumuti lani Lúguchi hénpulu ani ru lumuti le hemegeirubei saragu gürigia houn. Ani mama meha ladügüñein lun larufuduni weiri lan lubafu. Adüga lumuti ladüga linarün lan nidiheri lan hawagun. Ariha waméi le lariñagubei Matéu 14:14-21 (aliiha huméi). Gíbetiña gürigia lídangiñetiña saragu ageiraü ñǘdüntiña lárigi Hesusu eibu (Matéu 14:13). Dan le laguñedunbei, aba harihini lani Hesusu disipulugu buchá lan hawagu gürigia ani lamaaña lan. Aba hariñagun lun Hesusu lun lan lariñagun houn gürigia hagía lun houdin agañeinha somu katei lun heigin. Ka san ladügübei Hesusu?

9 Hóugüda lumutiña Hesusu saragu milu gürigia hagía táurügü seingü fein hama bián úduraü. Ka uagu ladügei milaguru ligía? Lugundun hínsiñetiña gürigia lun ani bereseti giñe hau. Ani ruti saragu éigini houn, lugundun ariñagatu Bíbülia hóutiña lan súngubei kimule. Ruti éigini ligía erei houn lun hadügüni lidise wéiyaasu ligía lun hagiribudun hábiñoun (Lúkasi 9:10-17). Gíbeti éigini ligía darí lun habuinchagüdün duusu faniñe lau le ígiragubei.

10. Kaba asusereda lau gudemei yarafa madise?

10 Gíbetiña gürigia gudemetiña ubouagu ladüga hawouguounrügüñein lan gumadimatiña hasaminara. Añahein íbini fiú gefentiña luagu Heowá murusunrügüñein éigini hadarirun lun hawinwandun. Gama lumoun, gayarati líchuguni Bungiu le hemegeirubei sun gürigia houn lun hawinwandun ani busenti ladügüni. Füramaseti lagumuchuba lan lau gudemei (aliiha huméi Sálumu 72:16). Yarafa madise, sun gürigia ha gaganbadibaña lun Bungiu hawinwanduba lidan aban ubóu le ídanbei úabei lan marichaü ni gudemei.

11. a) Ka uagu gayara lubéi wachoururuni málühali lan Kristu ayusurei lubafu lun líderaguniña gürigia? b) Dan le wasaminarun luagun le lunbei ladügüni Kristu, ka wabusenrubei wadügün?

11 Dan le ya lubéi Hesusu ubouagu, sügüti ǘrüwa irumu dimí adüga milaguru lidan fiú fulasu (Matéu 15:24). Urúeihali Hesusu guentó, ani lídanme larúeihan le lánina milu irumu gayarabei líderaguniña sun gürigia (Sálumu 72:8). Lau milaguru burí le ladügübei Hesusu arufuda lumuti busén lan layusuruni lubafu lun líderaguniwa. Ligía chouru wabalin málühali lan adüga lan. Dan le wasaminarun luagun katei le, busentiwa wayusuruni wadaani luma were lun wíderaguniña ha híbiri gürigia (Sálumu 45:1; 49:3). Inarüni siñati lan wadügün milaguru. Gama lumoun, gayarati wayanuhan houn gürigia luagu katei buiti le füramase tubéi Bíbülia. Ani le linarün katei, ligía wánibei buligasion (Rómana 1:14, 15).

GABAFUTI HEOWÁ LUMA HESUSU LUAGU GARABALI LUMA DUNA

12. Ka uagu chouru wabalin gunfuranda lani Hesusu sun luáguti Ubóu buidu?

12 Ariñagatu Bíbülia dan le lan meha ladügünbalin Bungiu Ubóu, anihein meha Hesusu luma kei aban “nadagimeinti hemeniti” (Ariñawagúni 8:22, 30, 31, TNM; Kolosana 1:15-17). Ligía gunfuranda lubalin Hesusu sun luáguti Ubóu ani subusiti lun ida luba lan lahandilihani garabali luma barana.

Dan le wasaminarun ka lan meha uagu ladüga Hesusu milaguru, ka aweiridagüdübarun wanigi? (Ariha huméi párafu 13 luma 14)

13, 14. Ru humá aban hénpulu le arufudubalin gabafu lan Hesusu luagu garabali luma barana.

13 Dan le ya lubéi Hesusu ubouagu, arufuda lumuti gayara lan lararamun erei kéiburi garabali  luma duna. Luagu aban weyu, yusu lumuti lubafu Bungiu lun lararamun aban “garabali héreti” (aliiha huméi Márükosu 4:37-39). Según lariñaguni aban hulili taturiahan, chóuruti weiri lan meha liñawan dan ligía, tau tanarime dúeri, garabali héreti, wayuhururu luma lanarime huya. Ítara liña kei burí liñawan dan le agünrinchagubalin sun le ladarirun lubarua. Ayanuhati giñe apostolu Matéu luagu lanarime liñawan dan ligía (Matéu 8:24).

14 Samina humá luagun sügǘ ligía. Anihán meha lugudi barana áfaraha tuagu ugunei, ani sagü meha liabin lugudi barana lebelurun duna tidoun. Ahuuha meha barana ani ma meha lanarime tánhinhan ugunei. Íbini ítara, larumuguña meha Hesusu ladüga lanarime lubucha luagu. Wéiriti meha anufudei le hawagubei disipulugu darí lun hagúahan lun Hesusu aba hariñagun lun hóunwegua lan (Matéu 8:25). Ka ladügübei Hesusu? Aba lásaarun ani aba lariñagun lun garabali luma lun barana: “Maniba!” (Márükosu 4:39). Aba lederaguagüdün garabali. Furanguti gabafu lan Hesusu luagu katei burí le.

15. Ka uagu subudi wabalin gabafu lan Heowá lun lahandilihani ligaburi dan?

15 Heowá meha íchugubei ubafu lun Hesusu lun lararamuni liñawan dan ligía. Chouru wamuti lubeiti gayara lan giñe lararamuni Heowá. Kéiburi lubaragiñe Guran, ariñagati: “Sedü weyu lárigiñe le, náhuyagüdüba huya luagu bián-wein weyu luma bián-wein áriebu” (Agumesehani 7:4). Ani ariñagati Áfuriduni 14:21 yusu lan Bungiu “aban garabali héreti luéigiñe oubaü le ñéingiñe  lubéi laboucha weyu” lun lafanreinragun barana. Ariñagati giñe Honasi 1:4 adüga lan Bungiu lun “ladagarun aban lanarime dan baranaha”. Ruti darangilaü woun wasubudiruni Heowába lan ahandilihei ligaburi dan lidan Paraísu.

16. Ka uagu líchiga darangilaü woun wasubudiruni lararamubei lan Heowá luma Hesusu liñawan dan?

16 Ka uagu ru lubéi awalidaguni woun wasubudiruni gabafu lan Heowá luma Hesusu luagu erei le lánina liñawan dan? Ladüga mini lan lira lidan lanme milu irumu lánina lagumadihan Kristu úabei lan durumandei ni hárabaganali ani máfuridunbei giñe barana lídangiñe lubara. Manufudebadiwa luéi lasuseredun somu chagaguaü lánina liñawan dan, ladüga lóunigirubaña Heowá sun gürigia (Arufudúni 21:3, 4). Chouru wamuti layusurubei lan Kristu lubafu Bungiu lun lahandilihani sun katei.

ÁYEIHA WAMÉI HEOWÁ LUMA KRISTU GUENTÓ

17. Ida luba wasigiruni lani Heowá luma Kristu hénpulu?

17 Ida liña gayara lan wáyeihani lani Heowá luma Hesusu hénpulu? Wagía siñati wadügün milaguru, gama lumoun, gayarati wadügüni le lariñagubei Ariñawagúni 3:27 (aliiha huméi). Dan le hasufurirun wíbirigu, gayarati wíchuguni le hemegeirubei houn ani ru wagíame gurasu houn (Ariñawagúni 17:17). Gayarati wadügüni katei le dan le lasuseredun somu liñawan dan. Kei hénpulu, lárigiñe aban durumandei, aba tagadeirun tuban aban íbiri to hilaali tani weiriei. Dan le híderagunu íbirigu, aba tariñagun weiri lan teteingiradi luagu aban tan gefentu luagu Heowá, mámarügü luagu katei burí le híchugubei tun, le súdinitimabei tun ídemuei le tibihibei lun téredagüdüni tafiñen luagu Heowá. Ani susereti giñe aban katei ítarati tun aban íbiri to mamarieidungiru. Ibidiñe meha tun kaba lan tadüga lárigiñe lagünrinchagunu aban liñawan dan tuban. Ani aba houdin íbirigu íderaguoun aransehoun muna tuguya. Aba tariñagun úati lan dimurei lun tafuranguagüdüni le tasandirubei. Ani aba tariñagun: “Seremei Heowá”. Súngubei wagía rútiwa seremei hawagu wíbirigu, wügüriña hama würiña ha beresebaña wau. Ani ligibuagun lira, rútiwa seremei lun Heowá luma Hesukrístu luagu hóunigiruniwa.

18. Dan le wasaminarun ka lan meha uagu ladüga Hesusu milaguru, ka aweiridagüdübarun wanigi?

18 Dan le meha ya lubéi Hesusu ubouagu, arufuda lumuti ligía lan ‘lubafubei Bungiu’. Madügünti meha Hesusu milaguru lun taweiridun hanigi gürigia lau lubafu ni lun lubuidun guánarügü. Súnwandan ladügüni ladüga hínsiñe hamá gürigia lun ani busenti líderaguniña. Wasigiruba ayanuha luagu katei le lidan leweñegua arütíkulu.