Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Sisi-hati irumu 2015

Ka wafurendeirubei lídangiñe furíei Wáguchi Bungiu (furumiñeti fánreinti)

Ka wafurendeirubei lídangiñe furíei Wáguchi Bungiu (furumiñeti fánreinti)

“Inebewalá biri.” (MATÉU 6:9)

1. Ida liña wayusuruni furíei le gíribei Wáguchi Bungiu lidan wapurichihan?

BESAFU gürigia subudi hamuti furíei le gíribei Wáguchi Bungiu (Matéu 6:9-13). Liibe-agei dan ayanuhatiwa hama gürigia luagu furíei le lidan wapurichihan. Yúsutiwa dimurei kéiburi “ñǘbuinla barúeihan” lun warufuduni luagu larúeihan lan Bungiu Arúeihani ligía ani málühali lan adüga lan Ubóu paraísume. Yusu wamuti giñe dimurei “inebewalá biri” lun warufuduni giri lan Bungiu ani mosu lan inebe lan woun ladüga sandu lan (Matéu 6:9).

2. Ida liña wasubudiruni mabusenrun lan Hesusu lun wáguyuguagüdüni ligiaméme dimurei dan le wafurieidun?

2 Añahein saragu gürigia aba háguyuguagüdüni furíei le dan le hafurieidun lun Bungiu. Ligía meha funa san labusenrubei Hesusu lun wadügüni? Uá. Ariñagati: “Lidan le hafurieidun, máguyuguagüda humá dimurei le málati [o máguyuguagüda huméi ligiaméme dimurei]” (Matéu 6:7). Luagu aban weyu, larufudahaña meha Hesusu houn lani disipulugu ida luba lan hafurieidun ani írida lumuti furíei Wáguchi Bungiu lidan amu burí dimurei (Lúkasi 11:1-4). Arufudati le woun larufudahañein lan Hesusu furíei ligía lun wasubudiruni ka burí lan katei lunbei wíriduni lidan wafurieidun.

3. Ka burí álügüdahani gayarabei hadügüni húniwagua danme haturiahani arütíkulu burí le?

 3 Lidan arütíkulu le luma lidan le aban wayanuhaba luagu furíei le gíribei Wáguchi Bungiu. Lídanme haturiahani arütíkulu burí le, álügüdagua humá hungua: “Ida liña líderagunina furíei le lun nabuiduragüdüni nafurieidun? Úarati san nibagari luma le lariñagubei furíei Wáguchi Bungiu?”.

“WÁGUCHI BUNGIU LE SIÉLUBEI”

4. a) Ka laritaguagüdübei dimurei “Wáguchi Bungiu” woun? b)Ka uagu gayara lubéi giñe hariñagun ha lúnbaña hawinwandun ya ubouagu háguchi lan Heowá?

4 Gumese lumuti Hesusu lafurieidun lau dimurei “Wáguchi Bungiu”. Haritaguagüda lumutiwa katei le Heowá lan háguchibei sun wíbirigu lidan sun ubóu (1 Féduru 2:17). Anúadahaali Heowá fiú kristiánugu lun hawinwandun sielu. Barǘ laaña lirahüñüme. Ligía lirahüñü habéi lidan aban igaburi espechaliti (Rómana 8:15-17). Ágiati ha ibihibalin emenigini lun hawinwandun ya ubouagu? Ka uagu gayara lubéi giñe hariñagun háguchi lan Heowá? Ladüga Heowá lan íchugubalin habagari houn luma sun le hemegeirubei. Ani danme le mafigounhaña ámuñegü ani danme le sügǘ hamaali lagumuhóun óuchawaguni, lirahüñübaña giñe Bungiu (Rómana 8:21; Arufudúni 20:7, 8).

5, 6. a) Ka idewesei buídutimati gayarabei híchuguni agübürigu houn hasaanigu? b) Ka lunbei ladügüni kada isaani lau idewesei le? (Ariha humóun iyawaü to lídanboun lagumeseha arütíkulu.)

5 Gayarati híchugun agübürigu kristiánu aban idewesei buiti houn hasaanigu. Katei idewesei ligía? Harufudahan houn luagu Heowá lan háguchibei le siélubei ani arufuda hagíame houn ida luba lan hafurieidun. Ariñagati aban óunigiruti sirkuitu le awinwandubei suru lani Áfürika lúmagiñe lan nasirua hamá lisaanigu, aba lan lafurieidun hama sagü guñoun, dánrügüñein ua lan múnada madügün lani. Ariñagatiña lisaanigu maritagun hamani buidu dimurei burí le lariñagubei. Gama lumoun, haritagua hamuti darangilaü luma ichouruni le meha hasandirubei lidan ókaasion espechaliti ligía. Dan le gayarahali hafurieidun hábugua, aba lamuriahan hama lun hafurieidun lau umalali héreti. Ítara liña meha gayara lan laganbuni ida liña lan hariñaguni lun Heowá le hasaminarubei luma le hasandirubei. Ligía meha giñe lichansin lun lasubudiruni ídatima liña lan hasandiragun houngua. Ítara liña meha gayara lan líderaguniña lun hafurieidun luagu katei súdiniti le lídanbei furíei Wáguchi Bungiu luma lun habuiduragüdüni ligaburi hafurieidun.

6 Dan le aweinamudeina hamá lisaanigu íbiri le, aba éredeinatima lan hamadagua luma Heowá. Guentó maríeihaña ani heseriwiduña lun Heowá lidan dan dayarüti úara hama hánigu weiriei. Le linarün katei, harufudahan agübürigu houn hasaanigu lun harihini Heowá kei aban Bungiu inarüniti ani gayara lan gamadagua hamá luma ligía idewesei buídutimati le gayarabei híchuguni houn. Íbini ítara, kada isaani lunti lóunigiruni lumadagua luma Heowá (Sálumu 5:11, 12; 91:14).

“INEBEWALÁ BIRI”

7. a) Ka chansi wibihibei wagía gefentiña luagu Heowá? b) Ida liña warufuduni gebegi lan chansi ligía woun?

7 Wagía, gefentiña luagu Heowá, fuleseiwatiwa lau wasubudiruni liri Bungiu ani lau gayara lan wanügüni iri ligía (Adügaü 15:14; Isaíasi 43:10). Lidan furíei le gíribei Wáguchi Bungiu, arufudahati Hesusu woun lun wariñagun lun Heowá: “Inebewalá biri”. Mini lan le busén wamá lun larumadahóun liri Bungiu. Ida liña san warufuduni gebegi lan chansi le wibihibei lun wasubudiruni luma lun wanügüni liri Heowá woun? Lau wamuriahan luma lun líderaguniwa lun mariñagun wamá ani madügün wagíame ni kata  le gayarati lawiyeduni liri. Mítaran wamá kei fiú kristiánugu lidan furumiñeti sígulu, ha arufudahabaña aban katei ani hadüga amu. Abürühati apostolu Pábulu hadüga lan kristiánugu hagía layanuhóunbei wuriba luagu liri Bungiu (Rómana 2:21-24).

8, 9. Ida liña líderagunu Heowá aban íbiri to meha áfaaguboun lun tíchugun uéiriguni lun liri?

8 Áfaaguatiwa wagía kristiánugu lun wíchugun uéiriguni lun liri Heowá. Kéiburi aban íbiri noruegana, aba lounwen tani weiriei ani aba terederun tábuguarügü lau aban tisaani bián irumu lau. Ariñagatu: “Ligía meha aban dan hénrenguti lidan nibagari. Súnwandan meha nafurieidun lun Bungiu lun líchugun erei nun luma lun líderagunina lun nárügüdagun nungua. Mabusenruntina meha nadügün katei le íchuguti üma lun ladügün Satanási bula lau Heowá. Mabusenruntina meha giñe nachararun lun Bungiu. Busenrügütina meha níchugun uéiriguni lun liri luma lun gayara lan larihini nisaani lúguchi lidan Paraísu” (Ariñawagúni 27:11).

9 Chóuruti áfaagua tan meha íbiri to lun tíchugun uéiriguni lun liri Heowá. Ida liña meha líderagunu? Seremei gurasu le híchugubei íbirigu tun gayara lubéi tárügüdagun tungua ani buidu ligía le desidírü tubéi. Seingü irumu lárigiñe aba tamarieidun luma aban wéiyaali lidan afiñeni. Guentó gúnfulihali tisaani 20 irumu ani ábanhali gefenti luagu Heowá le badiseihali. Ariñagatu: “Rútina seremei lun nani weiriei luagu líderagunina agüriarei nisaani”.

10. Ida luba líchugun Heowá uériguni lun liri sunsuinagubei?

10 Larumadahabei Heowá liri sunsuinagubei danme le lagumuchun hau sun ha mínsiñehabubaña lun ani ha meresibirunbalin keisi harúeite (aliiha huméi Esekiéli 38:22, 23). Lárigiñe, ábame mafigounhaña lan gürigia. Ani sunme ha lúnbaña hawinwandun sielu luma ubouagu háhuduraguba lun Heowá ani híchuguba uéiriguni lun liri le sándubei. Chülüdügame dan “lun Búngiurügüba lan sun katei hadan súngubei”, mini lan lira, larúeihabaña lan sun gürigia ha ubouagubaña (1 Korintuna 15:28).

“ÑǗBUINLA BARÚEIHAN”

11, 12. Ka ladügübei Heowá lidan irumu 1876?

11 Lubaragiñebei lagiribudun Hesusu sielun, aba hálügüdüni lani disipulugu anhein málühali lubéi Larúeihan Bungiu agumadiha. Ani aba lariñagun Hesusu houn mámagili lan lidaani hasubudiruni, ani lun lan hetenirun lun hapurichihan (aliiha huméi Adügaü 1:6-8). Arufudahati giñe houn lun hamuriahan lun liabin Larúeihan Bungiu ani ariñagati houn lun aranseñu hamá lun hasubudiruni ídaba lan buga lagumesera arúeiha. Ligía awanheingua lubéi amuriaha luma Heowá lun liabin Larúeihan.

12 Lidan irumu 1876, íderagua lumutiña Heowá lubúeingu lun gunfuranda hamani luagu lagumeseruba lan Hesusu arúeiha lidan irumu 1914. Ida liña líderaguniña? Lidan irumu ligía, bürǘ lumuti íbiri Russell arütíkulu le gíribei “Ídaba san lagumucha hadaani ha mámabaña huríu?”. Afuranguagüdati ñein layanuhaña lan lani Danieli profesía le luáguti “sedü irumu” luagu ligiaméme profesía le uágubei layanuha lani Hesusu profesía luáguti dan le ichugúbei houn “ha mámabaña huríu” (Danieli 4:16; Lúkasi 21:24). Afuranguagüda lumuti arütíkulu ligía lagumuchuba lan meha dan ligía lidan irumu 1914. *

13. a) Ka asuseredubei lidan irumu 1914? b) Ka larufudubei sun le asuseredubei ubouagu lúmagiñe irumu 1914?

13 Lidan irumu 1914, gumeseti aban wuribu Yuropa le aburuchagubei lidoun sun  ubóu. Gíbetiña gürigia óunwegutiña ladüga ilamaü. Lidan irumu 1918, ñǘbuinti aban lanarime sandi ani gíbetimatiña gürigia láfaragun sügǘ lau wuribu. Sun katei le lídangiñeti meha seini le uágubei layanuha Hesusu (Matéu 24:3-8; Lúkasi 21:10, 11). Arufudati seini ligía gumese lan agumadiha sielu lidan irumu 1914. Lidan irumu ligía “aba láfuridun agañeireina” (Arufudúni 6:2). Aba labuguni Hesusu Satanási siélugiñe hau sun lumafianu ani aba láguruniña ubouagun. Lúmagiñe dan ligía, aba lagunfulirun profesía le: “Fugiabugu ha aganóubaña ubouagu luma baranaha! Lugundun ñǘdünha Mafia humoun lau óunwenbu igañi, ladüga subudi lumuti luagu murusunrügaali lan lidaani” (Arufudúni 12:7-12).

14. a) Ka uagu wasigira amuriaha lun liabin Larúeihan Bungiu? b) Ka wadagimanu súdiniti lunbei wasigirun adügei?

14 Íderagua lumutiwa profesía le lídanbei Arufudúni kapítulu 12 lun gunfuranda wamani ka lan uagu lagumesera saragu katei wuribati asusereda ubouagu dan le lagumeserunbei Hesusu arúeiha. Íbini gumeseeli lan agumadiha sielu, Satanási agumadihabei ubouagu. Málühali Kristu agumucha lau wuribani. Ani ítara luba lagumuchuni lagañeirun. Ligía wasigirubei amuriaha lun liabin Larúeihan Bungiu. Wasigiruba giñe agunfulira lau wadagimanu le súdinitimabei: wayanuhan houn gürigia luagu Larúeihan Bungiu. Gúnfuli lumuti apurichihani lani Hesusu profesía le: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Matéu 24:14).

“ADUGUWALÁ BUGUNDAN YA UBOUAGU”

15, 16. Ka uagu ua lubéi buídurügü lan wamuriahan lun ladügǘn lugundan Bungiu ya ubouagu?

15 Kéiburi 6,000 irumu guentó, adügǘwati meha lugundan Bungiu ya ubouagu. Lidan amu dimurei, adüga hamuti gürigia le lariñagubei Heowá. Ligía lariñagunbei “luagu buidu lan sun le ladügübei”  (Agumesehani 1:31). Gama lumoun aba lebedaagun Satanási, ani lúmagiñe dan ligía madügün hamuti hiibe-agei gürigia lugundan Bungiu. Íbini ítara, añaheinhaña hóugiñe widü míñunu gefentiña luagu Heowá ubouagu. Ani subudi hamuti úati lan buídurügü lan hamuriahan lun ladügǘn lugundan ya ubouagu. Ligía háfaagunbei lun hadügüni. Áfaaguatiña lun hagundaaragüdüni Bungiu luma lun hayanuhan luagu Larúeihan lau ubebeni.

Harufudahaña san houn hisaanigu lun hadügüni lugundan Bungiu? (Ariha huméi párafu 16)

16 Samina wamá luagun le asuseredubei tun aban misionera 80 irumu tau to eseriwiduboun Áfürika ani to abadiseiruboun lidan irumu 1948. Ariñagatu: “Súnwandan namuriahan luma Bungiu lun gayara lan hasubudiruni sun gürigia ha harumabaña anigi lubaragiñe leletidun. Ani dan le napurichihan lun somu gürigia, aba namuriahan luma Heowá lun líchugun lichú aau nun lun gayara lan nachülürün tidoun lanigi. Amuriahatina giñe luma lun líderaguniwa súngubei lun wóunigiruniña ha ánharubaña lun uganu”. Íderaguaaru íbiri to saragu gürigia lun hasubudiruni Heowá. Subuditiña san amu íbirigu ha wéiyougaaña hun ani añaheingua adügei lugundan Heowá lau ubebeni? (Aliiha huméi Filipuna 2:17.)

17. Ka hisaminanbei luagu le lunbei ladügüni Heowá ámuñegü?

17 Wagía lubúeingu Bungiu wasigiruba amuriaha lun ladügǘn lugundan ya ubouagu darime lun lachülürün dan lun lagumuchun hau sun láganiñu. Ábameti paraísu lan Ubóu ani ábame hásaarun saragu míñunu gürigia lídangiñe óunweni. Ariñagati Hesusu haganbubei lan “sun hilaguaaña [l]umalali, ábame háfuridunga lídangiñe hamúaha” (Huan 5:28, 29). Samina humá san luagun lanarime ugundani le lunbei wasandiruni danme le warihiniña waduheñu ha hilaguaañabaña. “Laragahabei Bungiu sun [w]águira” (Arufudúni 21:4). Hiibe-agei gürigia ha lúnbaña háguyugun mafurendeirun hamuti meha inarüni luagu Heowá luma luagu Hesusu. Ligía tagúarunbei Bíbülia houn “marichatiña”. Gúndaabadiwa lau warufudahan houn lun hadügüni lugundan Bungiu lun gayara lan hawinwandun lun súnwandan (Adügaü 24:15, TNM; Huan 17:3).

18. Kátima san hemegeirubei gürigia?

18 Málühali Heowá adüga lun lagunfulirun ǘrüwa furumiñeti katei le wamuriahabei lidan furíei Wáguchi Bungiu: liábinba Larúeihan, larumadahabei liri ani sun le lunbei gabagari lan lidan dan ligía láhuduraguba lun Heowá. Ítara luba líchuguni Heowá sun le hemegeirubei gürigia houn. Lidan le aban arütíkulu wayanuhaba luagu amu burí katei le larufudahabei Hesusu woun lun wamuriahani lidan furíei le gíribei Wáguchi Bungiu.

^ par. 12 Anhein busén hubéi hasubudiruni ka lan uagu wariñaga gúnfuli lan profesía le lidan irumu 1914, ariha humóun líburu Kátima san tarufudahabei Bíbülia?, páhina 215 darí 218.