Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Sisi-hati irumu 2015

Ka wafurendeirubei lídangiñe furíei Wáguchi Bungiu (libiaman fánreinti)

Ka wafurendeirubei lídangiñe furíei Wáguchi Bungiu (libiaman fánreinti)

“Subudi laali [Bungiu] ka lan habusenrubei.” (MATÉU 6:8)

1-3. Ka uagu tachoururei aban íbiri óunaba lani Heowá tafurieidun?

ABA tidin aban prekursora gíritu Lana to adügüboun 70 oura luagu hati ebeluha Yámani lidan irumu 2012. Mabulieidun tumuti le asuseredubei tun lidan wéiyaasu ligía. Ariñagatu óunaba lani Heowá bián furíei le tadügübei. Le furumiñeti dan le tídiña lubéi lidoun fulasu ñeinba lubéi tárügüdoun awión. Tídanñoun íngiini oura ligía ani aba tamuriahan luma Heowá lun líderagunun adarira somu gürigia lun tapurichihan lun. Dan le tachülürünbei, aba tíchugun fe siñabei lan taweiyasuhan weyu ligía darí larugan. Ábaya tafurieidun lun Heowá lun tamuriahan ídemuei luma lugundun lóuguaali tiseinsun ani ibidiñeti tun halíaba lan tarumuga.

2 Dan le lásurunbei tafurieidun, aba lariñagun somu badi tun: “Lana, ka badaagubei ya?”. Gürigia ligía aban binadu tani paaná lidan taturiahan ani laweiyasuha suru lani Áfürika. Ñǘdüntu lúguchu tuma lagütü íchaahei. Dan le tabahüdahanbalin Lana tásügürün houn, aba hamisurahanu lun terederun hama hábiñe. Adügatiña giñe saragu  álügüdahani tun luagu tafiñen luma luagu teseriwidun lidan dan dayarüti.

3 Larugan, ábaya tóunabun Lana saragu álügüdahani houn tau Bíbülia. Ani lubaragiñe tagiribudun tageiroun aba tabürüdüni hani dátosu lun houdin amu íbirigu bisidaña. Anuhamémegua Lana eseriwida kei prekursora ani chouru tumuti óunaba lani Heowá tafurieidun (Sálumu 65:2).

4. Kaba wariha lidan arütíkulu le?

4 Dan le gaturóbulin wamá, furíeitiwa lun Heowá lau lóufudagun. Ani aganba lumutiwa ani íderagua lawa lau sun lugundan (Sálumu 34:15; Ariñawagúni 15:8). Gama lumoun, arufudahati Hesusu woun lidan furíei le gíribei Wáguchi Bungiu anihein lan katei le súdinitimati lun wafurieidun luagu súnwandan. Lidan arütíkulu le warihibei lagumuhóun gádürü katei le lariñagubei furíei le luma ida liña lan líderaguniwa lun úaragua wamá (aliiha huméi Matéu 6:11-13).

“RUBOUN WEIGAN FEIN TO LÁNINA SAGÜ WEYU WOUN”

5, 6. Ka uagu lunti lubéi wamuriahanu “weigan fein” lau sun anihein lan éigini buídurügüti wama?

5 Marufudahanti Hesusu woun lun wariñagun “ruboun neigan fein nun”. Arufudahati woun lun wariñagun “ruboun weigan fein [...] woun”. Ariha waméi ida liña lan ladügüni aban óunigiruti sirkuitu áfürikana gíriti Victor katei le. Ariñagati: “Rútina seremei lun Heowá ladüga mama lan mosu nadiheridun ni au ni nani weiriou luagu kaba lan weiga ni luagu wafayeirunu muna to ñein lubéi weredera. Íderagua hamutiwa wíbirigu lidan katei le. Gama lumoun, amuriahatina luma Bungiu lun líderaguniña íbirigu asigira habaruaguóun lau sun anihein lan turóbuli lánina seinsu lidan ubóu le”.

6 Háfuga gibe lan éigini wama, gama lumoun, saragu hádangiñe wíbirigu gudemetiña. Ani fiú hádangiñe hasufuriruña ladüga amu burí lamiselu. Lunti wafurieidun hawagu. Ani gayarati giñe  wíderaguniña. Gayarati wíchugun houn lídangiñe le wámabei. Gayarati giñe wíchugun seinsu lun wadagimanu lánina apurichihani. Subudi wamuti ídeha lan budagia le wíchugubei lun híderawagun íbirigu ha mégeibaña (1 Huan 3:17).

7. Ka hénpulu layusurubei Hesusu lun larufudahan woun lun madiheridun wamá saragu luagu katei le wemegeirubei?

7 Lárigiñe larufudahani Hesusu furíei le, aba líchugun aban hénpulu lun larufudahan woun lun madiheridun wamá saragu luagu katei le wemegeirubei lun wawinwandun. Ariñagati madiheridun lan fuluri burí le áraabubei lun libihini le lemegeirubei lugundun góunigi lani Heowá. Ítarameme, moun lumuti giñe wadiheridun luagu ida luba lan wibihini le lunbei wemegeiruni ámuñegü (Matéu 6:30-34). Lunti gufuruma wamá lau wibihini le wemegeirubei lubá kada weyu. Gayarati wamuriahan luma Bungiu lun líchugun aban fulasu woun lun wawinwandun, aban wadagimanu lun wibihini weigin luma lun líderaguniwa lun desidírü wamá buidu danme le sandi wamá. Gama lumoun, anihein aban katei súdinitimati lunti wafurieidun luagu. Katei san katei ligía?

8. Ka laritaguagüdübei dimurei “ruboun weigan fein [...] woun”?

8 Dimurei “ruboun weigan fein [...] woun” haritaguagüda lumutiwa lunti lan wamuriahan luma Heowá lun lasigirun arufudaha woun luma lun líderaguniwa lun lumadagu wamá. Ka uagu wariñagei le? Lugundun ariñagati giñe Hesusu: “Mámarügübei tau fein habagarida gürigia; habagariduba giñe lau sun dimurei le lariñagubei Bungiu” (Matéu 4:4).

“FERUDUNABÉI WURIBATI LE ADÜGA WAMAALIBEI”

9. Ka uagu gayara lubéi wariñagun ítara liña lan figóu kei dúeiti?

9 Ariñagati Hesusu lidan furíei Wáguchi Bungiu: “Ferudunabéi wadúeihan” (Matéu 6:12TNM). Ani lidan amu ókaasion ariñagati: “Ferudunabéi wuribati le adüga wamaalibei” (Lúkasi 11:4). Lariñagunbalin dimurei burí le ladüga ítara liña lan wuribati le wadügübei o figóu le wadügübei kei dúeiti. Lidan irumu 1952, ariñagatu garüdia to mosu lan línsiñedun Bungiu woun ani gaganbadi wagíame lun. Dan le wafigouhan, mama wafayeiruñein le yuubei lun Bungiu lun. Ligía lídanñadiwa lubéi dúeiti luma. Ariñagatu garüdia tuguya lun hamuga busén lan Heowá, gayarati hamuga mama lan wamada. Ani ábaya tariñagun: “Dan le hafigouhan gürigia lóuguarügü liña línsiñe Bungiu houn” (1 Huan 5:3).

10. a) Ka uagu gayara lubéi feruduna lániwa Heowá? b) Ida liña wasandiragun woungua luagu le ladügübei Heowá wawagu?

10 Mégeitiwa lun feruduna lániwa Heowá sagü weyu. Gayarati feruduna lániwa ladüga hilá lan Hesusu wawagu kéiburi 2,000 irumu guentó. Lunti wíchugun seremei lun Heowá luagu lubuidun idewesei ligía. Lun hamuga meha móunwenti Hesusu wawagu, siñati hamuga wesefurun lídangiñe figóu luma óunweni (aliiha huméi Sálumu 49:7-9 luma 1 Féduru 1:18, 19). Haritaguagüda lumutiwa dimurei “ferudunabéi wuribati le adüga wamaalibei” luagu megei hamani giñe wíbirigu lani Hesusu sákürifisiu. Furanguti busén lan giñe Heowá lun wasaminarun hawagun luma luagun hamadagua luma. Gayarati wadügüni katei le dan le feruduna wamaniña dan le hachararun woun. Liibe-agei dan, ñǘbüriti charati ligía. Dan le feruduna wamaniña wíbirigu, arufuda wamuti hínsiñe hamá woun ani seremei wamani Heowá luagu feruduna lániwa (Kolosana 3:13).

11. Ka uagu lunti lubéi feruduna wamaniña amu?

11 Kei le gafigoun wabéi, háfuga aniheinbei dan hénrengu lan woun feruduna wamá somu íbiri (Fádirigu 19:18). Ani anhein wabahüdagua houn amu ka lan ladügübei íbiri ligía woun, gayarabei houdin luéigiñe wóubadina ani lun kóntüra hamá luagu íbiri ligía. Ani gayarati lagadeiruni katei le úarani le lídanbei damuriguaü. Anhein asusereda katei le ani madügüntiwa ni kata lun waransehani, warufuduña meteingirun wamani Hesusu luagu lounwen wawagu (Matéu 18:35). Anhein ua feruduna wamaniña amu, úabei giñe feruduna lániwa Heowá (aliiha huméi Matéu 6:14, 15). Ani  anhein giñe busén wabéi feruduna lániwa Heowá, moun lumuti wadügün figóu le wéinamuti (1 Huan 3:4, 6).

Anhein busén hubéi lun feruduna lanün Bungiu, mosu feruduna humaniña amu

(Ariha huméi párafu 11)

“MÍGIRA BAWA LUN WÁBÜRÜHAN LIDOUN ÓUCHAWAGUNI”

12, 13. a) Ka asuseredubei lun Hesusu lárigiñebei labadiseirun? b) Ka uagu moun lumuti lubéi wíchuguni duru hawagun amu ánhawa mawandun somu óuchawaguni? c) Ka larufudubei Hesusu lau gaganbadi lan lun Bungiu súnwandan?

12 Lidan furíei Wáguchi Bungiu, ariñagati Hesusu: “Mígira bawa lun wábürühan lidoun óuchawaguni”. Haritaguagüda lumutiwa katei le luagun le asuseredubei lun Hesusu lárigiñe labadiseirun. Aba lígirun Heowá lun “lóuchaguni Mafia” (Matéu 4:1; 6:13). Ka uagu lígira Heowá lun lóuchawagun? Ladüga aba hamahadun Adán tuma Ewa lun Bungiu keisi harúeite. Ani lunti meha lounabún álügüdahani burí le: “Adüga lumutiña san Heowá gürigia lau somu charati? Gayarati san úaragua lan aban gürigia mafigounti dan le louchawagún? Buídubei hamuga san lidin houn gürigia ánhaña agumadiragua houngua, kei lariñaguni Mafia? (Agumesehani 3:4, 5.) Óunaha lumuti Heowá Hesusu ubouagun lun lóunabuni álügüdahani burí le. Gama lumoun, lounabúba álügüdahani burí le sunsuinagubei ámuñegü. Sunme gürigia ha lúnbaña hawinwandun dandu sielu kei ubouagu hasubudirubei Heowá lan urúeibei le buídutimabei.

13 Sánduti Heowá ani móuchagunti ni aban. Satanási adügübalin lira (Matéu 4:3). Gama lumoun, wagía desidírübei anhein wawanduba lubéi aban óuchawaguni o mawandun wabéi lan (aliiha huméi Santiagu 1:13-15). Samina wamá luagun Hesusu. Ka ladügübei dan le lóuchagunbalin Satanási? Aba labuguni lau lóufudagun ani aba lariñaguni le tariñagubei Lererun Bungiu lun. Desidírüti Hesusu úaraguabei lan lun Heowá. Lau sun lira, mararamagunti Satanási. Aba lagurabahan amu dan lunya lóuchaguni Hesusu (Lúkasi 4:13). Íbini ítara, gaganbadimémeti Hesusu lun Bungiu súnwandan. Ítara liña larufuduni gayara lan úaragua lan aban gürigia le mafigounti lun Bungiu íbini lidan lénrengunga. Uguñe weyu, aniheingua Satanási óuchaguawa lun maganbadi wamá lun Heowá.

14. Ka lunbei wadügüni anhein busén wabéi wawanduni óuchawaguni?

 14 Sun katei le meha lasigenehabei Satanási dan le lamahadunbei Adán tuma Ewa lun Bungiu keisi harúeite magumugili laransehóun. Ligía anihagua lubéi Heowá ígira lun lóuchaguniwa Satanási. Gama lumoun, lunti waritaguni móuchagun lániwa Bungiu. Afiñeti wawagu ani íderagua lumutiwa. Gama lumoun, mafosurun lumutiwa lun gaganbadi wamá lun. Ígira lumutiwa lun desidírü wamá anhein úaraguabadiwa lubéi lun o múaragunbadiwa lan. Ka lunbei wadügüni anhein mabusenrun wabéi wéiguadun lidoun óuchawaguni? Mosu wadügün aban umadaguaü buiti luma Heowá ani furíei wagíame lun lun líderaguniwa. Ida luba san lóunabuniwa? Ariha waméi.

Héreñula humadagua luma Heowá ani apurichiha humá lau ubebeni (Ariha huméi párafu 15)

15, 16. a) Írida humá fiú lídangiñe óuchawaguni le lunbei wáfaagun lun mábürühan wamá lidoun. b) Ánhawa éiguada lidoun aban óuchawaguni, ka gadurunbei?

15 Yusu lumuti Heowá lani sífiri sandu lun líderaguniwa awandei óuchawaguni. Ani yusu lumutu giñe Bíbülia luma damuriguaü lun lawisaruniwa luagu peliguru. Adundeha lumutiwa lun mewesirun wamani sun were, wadaani luma waseinsun luagu katei le memegeirun wamuti. Ariha waméi hásügürün aban feru maríeitiña gefentiña luagu Heowá gíriti Espen tuma Janne. Lidan meha aban ageiraü rísiti heredera Yuropa. Seriwitiña saragu irumu kei prekursorugu lidan aban fulasu le ñein lubéi mégeiwa hamá apurichihatiña. Guentó, biámaña hasaanigu ani siñá heseriwidun kei prekursorugu. Ariñagati Espen: “Amuriahatiwa luma Heowá lun líderaguniwa lun méiguadun wamá lidoun óuchawaguni guentó lau siñahali lan wadügün saragu lidan weseriwidun lun. Amuriahatiwa luma lun líderaguniwa lun héreñu lan wamadagua luma luma lun wasigirun apurichiha lau ubebeni”.

16 Pornografía ligía ábanya óuchawaguni le lunbei wáfaagun lun méiguadun wamá lidoun. Añahein gürigia héchutiña aríagua iwiyei ladüga magidarun hamani luriban saminaü lídangiñe hachügü. Ligíati, ánhawa éiguada lidoun óuchawaguni ligía, siñati wíchuguni duru luagun Satanási ni luagun ubóu le. Ka uagu? Lugundun siñati hafosuruniwa lun wadügün katei wuribati. Gama lumoun, añahein saragu íbirigu dandu wügüriña kei würiña ha áfaaguaña kóntüra óuchawaguni le ani méiguaduntiña lidoun. Ani wagía, gayarati giñe wadügüni (1 Korintuna 10:12, 13).

“DÍSEGÜDARÜGÜ BAWA LUÉI [WURIBANI]”

17. a) Ida luba warufuduni busén wamá lun lóunigiruniwa Heowá luéi Satanási? b) Kaba ladüga Heowá yarafa madise?

17 Dan le wariñagun “dísegüdarügü bawa luéi [wuribani]” wamuriahaña luma Heowá lun lóunigiruniwa luéi Satanási. Ida liña warufuduni ligía lan wabusenrubei? Lau mádaragun wamá woungua lidoun luáguti “ubóu” ani lau mínsiñedun lan katei burí “le lídanbei ubóu” woun (Huan 15:19; 1 Huan 2:15-17). Málühali daü lan Heowá Satanási ani ábame lagumuchaguagüdüni ubóu wuribati le. Lidan wagurabahan lasuseredun katei le, lunti waritaguni gáñiñein lan Satanási ladüga subudi lumuti lagumuchagua lan lidaani. Ladügübei sun liyaraati lun ladügün lun meseriwidun wamá lun Heowá. Ligía lunti lubéi wasigirun amuriaha luma Bungiu lun lóunigiruniwa luéi Satanási (Arufudúni 12:12, 17).

18. Anhein busén wabéi wawinwandun lidan aban ubóu sin Satanási, ka lunbei wadügüni?

18 Anhein busén wabéi wawinwandun lidan aban ubóu sin Satanási, lunti wawinwandun úara luma le lariñagubei furíei Wáguchi Bungiu. Ida? Mosu wamuriahan luma Bungiu lun liabin Larúeihan, lun larumadahóun liri luma lun ladügǘn lugundan ya ubouagu. Afiñe wamá líchugubei lan sun le wemegeirubei woun lun wawinwandun sagü weyu luma lun úaragua wamá lun.