Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Sisi-hati irumu 2015

Hínsiñetiña meha gürigia lun Kristu

Hínsiñetiña meha gürigia lun Kristu

“Gúndaatina meha hau sun gürigia.” (ARIÑAWAGÚNI 8:31)

1, 2. Ida liña meha larufuduni Hesusu weiri lan hínsiñe gürigia lun?

LIDAN Ariñawagúni kapítulu 8 ayanuhóuati luagu lichú aau kamá hamuga aban gürigia. Lidan kesi le layanuhaña bérusu le luagu Hesusu lubaragiñe liabin ubouagun. Ariñagati ñein dan le lan ladügünbalin Bungiu sun katei, ñeinñein lan Hesusu luma keisi aban nadagimeinti le hemeniti. Chóuruti gunda lan saragu dan le ladügünbalin Bungiu sielu luma Ubóu. Gama lumoun, lídangiñe sun katei le ladügübei Bungiu, sanditi meha Hesusu aban ínsiñeni espechaliti hawagu gürigia (Ariñawagúni 8:22-31).

2 Ida liña meha larufuduni Hesusu weiri lan línsiñe Bungiu lun ani hínsiñe hamá giñe gürigia lun? Arufuda lumuti dan le lánharunbei liabin ubouagun lun líchuguni libagari luma lun lesefuruniwa lídangiñe figóu luma óunweni (Matéu 20:28; Filipuna 2:5-8). Ani dan le meha ya lubéi ubouagu, resibiti ubafu lúmagiñe Bungiu lun ladügün milaguru. Arufuda lumuti giñe lau milaguru burí ligía weiri lan wínsiñe lun ani arufudalei katei buiti le lunbei ladügüni luagu wafulesein yarafa madise.

3. Kaba uagu wayanuha lidan arütíkulu le?

 3 Dan le ya lubéi Hesusu ubouagu, ayanuhati hama gürigia luagu Larúeihan Bungiu (Lúkasi 4:43). Subudi lumuti meha larumadahabei lan arúeihani ligía liri Bungiu ani aransehaleime turóbuli le ubouagubei lun súnwandan. Ani lau milaguru burí le ladügübei dan le lapurichihanbei, arufuda lumuti hínsiñe hamá sun gürigia lun. Súdiniti katei le woun. Ka uagu? Ladüga ruti lani Hesusu milaguru emenigini woun lubá ámuñegü. Lidan arütíkulu le wayanuhaba luagu gádürü lídangiñe lani Hesusu milaguru.

“BUSENTINA, AREIDAGUABÁ”

4. Ka asuseredubei dan le ladunragunbei Hesusu luma aban gürigia gawaguti lépüra?

4 Lidan lapurichihan Hesusu, ñǘdünti meha lidan aban fulasu gíriti Galiléa. Ñein dúnguati luma aban wügüri sánditi lau lépüra (Márükosu 1:39, 40). Hanarimeti meha lisandi wügüri ligía darí lun lariñagun Lúkasi le surusia “buin liña lan lau lépüra” (Lúkasi 5:12TNM). Ariñagatu Bíbülia dan le lan larihinbalin wügüri ligía Hesusu, aba lan láhuduragun ani aba lariñagun lun: “Nabureme, gayaraati bareidaguágüdünina ánhabu busén”. Subudi lumuti meha gayara lan lareidaguagüdüni Hesusu. Le ibidiñebei lun anhein busenbei lubéi Hesusu ladügüni. Ka uagu? Ladüga mebereseguntiña lan meha lábutigu relihión huríu hau gürigia ha gawagutiña lépüra. Ani háfuga günringua laali meha lépüra gürigia ligía. Ka ladügübei Hesusu? Aba san lóuseruni kei lábutigu relihión? Kaba hamuga meha san hadüga?

5. Ka meha lasandirubei Hesusu luagu gürigia le gawagubei lépüra?

5 Ariñagati meha lilurudun Moisesi anhein lan ayarafada somu gawaguti lépüra lubadun amu gürigia, mosu lan lawisahan luagu sandi lan. Ani genegeti madügün lani wügüri ligía katei le (Fádirigu 13:43-46). Aba san lagañidun Hesusu? Uá. Nidiherirügüti Hesusu luagu gürigia ligía ani aba lareidaguagüdüni. Ladüga lugudemehabu Hesusu, aba ladügün aban katei le madügün hamuti amu gürigia: aba laguuruni gürigia le gawagubei lépüra. Lárigiñe aba lariñagun lun: “Busentina, areidaguabá”. Aba lagidarun lépüra luéi gürigia ligía óurameme ligía (Lúkasi 5:13). Chóuruti ru lani Heowá lubafu lun Hesusu lun ladügüni milaguru ligía luma lun larufuduni weiri lan hínsiñe gürigia lun (Lúkasi 5:17).

6. a) Kátima buídubei luagu milaguru le ladügübei Hesusu? b) Ka larufudahabei lani Hesusu milaguru woun?

6 Seremei lubafu Bungiu, adügati Hesusu saragu milaguru wéinamuti. Areidaguagüdati gürigia gawagutiña lépüra hama ha gawagutiña amu burí luwuyeri sandi. Ariñagatu Bíbülia aba lan meha taweiridun hanigi gürigia lau harihin “adimurehaaña lan ha meha mariñagadibaña, [...] éibuga ha méibugunñahabaña, ariha ha marihinñahabaña” (Matéu 15:31). Uguñe weyu, anihein dan megei hamá surusiagu lun ledewehan somu gürigia somu lídangiñe lumegegun lúgubu lun gayara lan hareidaguagüdün amu. Ánheinti Hesusu, memegeirunti meha ladügüni lira. Gayarati meha lareidaguagüdün furumiñeguarügü sandi lidan murusun oura. Íbini dan le dise hamá sánditiña hagía luéi (Huan 4:46-54). Ka larufudahabei le woun? Busen lan urúei Hesukrístu lagumuchun lau sandi ani gayara lan ladügüni. Dan le warihini ida liña  lan meha lóuseruniña Hesusu gürigia ruti ichouruni luagu ‘gudemehabubei lan houn ha gudemebaña, ani lesefurubei lan giñe habagari gudemetiña’ lidan Paraísu (Sálumu 72:13). Subudi wamuti busén lan lareidaguagüdüniña sun ha asufurirubaña.

“SARABA, BUDABOUN BUBARARI, BEIBA”

7, 8. Ka ladügübei Hesusu lubaragiñe lidin lubadu aban fusu wéiriti laganbahóun luagu?

7 Fiú hati lárigiñe lareidaguagüdüni Hesusu wügüri le gawagubei lépüra, aba lidin Galiléagiñe lun Hudeoun lun lasigirun apurichiha. Aganba hamuti saragu milu gürigia ani aba híchugun fe hínsiñe hamá lun. Ruti Hesusu gurasu houn ha asufurirubaña ani aba líchugun aban emenigini houn (Isaíasi 61:1, 2; Lúkasi 4:18-21).

8 Lidan hati le gíribei Nisán, aweiyasuhati Hesusu Herusaléun lun lefeduhani hafedun huríu le lánina Luéyuri Esefuruni. Ñǘdüntiña meha saragu milu gürigia ñeinhin lun hefeduhani. Aba lidin Hesusu lubadu aban fusu le wéiriti laganbahóun luagu lidan uburugu ligía, luéigiñe nórute tun ténpulu. Ñein aba ladunragun luma aban wügüri roun tidan aban ubarari ladüga siñá lan léibugun.

9, 10. a) Ka meha uagu houdin gürigia lubadu fusu le Herusalénbei? b) Ka ladügübei Hesusu lubadu fusu ligía? (Ariha huméi dibuhu le lídanbei lagumeseha arütíkulu.) c) Ka wafurendeirubei lídangiñe milaguru le?

9 Gíbetiña meha gürigia ñǘdüntiña lubadu fusu ligía. Ka uagu? Ladüga afiñetiña ánhaña lan ágawa dan le lánhingichun duna, aba lanme hareidagun kei lau aban milaguru. Samina humá san ida liña lan meha funa katei ñein hau bandi gürigia ha busentiña hareidagun. Furanguti masandiradi lan meha Hesusu, ligíati, ka meha san uagu lidin ñein? Ladüga hínsiñe hamá gürigia lun. Ñein meha ladeirei wügüri le méibugunbei. Lǘhali meha wügüri ligía lau sandi, lúmagiñe lubaragiñe nasirua lan Hesusu ubouagu (aliiha huméi Huan 5:5-9).

Áluaha lumutiña meha Hesusu gürigia ha mégeibaña ídemuei

10 Aba lálügüdüni Hesusu wügüri ligía anhein busén lubéi lareidagun. Aba lóunabun lau íruni busén lan, gama lumoun, úati lan ni aban gürigia lun líderaguni lun lebelurun lidoun fusu. Aba lariñagun Hesusu lun lun ladügün aban katei le genegeti siñabei lan ladügüni. Aba lariñagun lun lun lásaarun, lun lárügüdünu lubarari ani lun lidin éibugeina. Ani aba ladügüni! Adügati milaguru le lun wasaminarun luagun milaguru burí le lunbei ladügüni Hesusu lidan Paraísu yarafa madise. Ani arufudahati giñe woun hínsiñe hamá gürigia lun Hesusu. Ñǘdünti lubadu fusu ligía áluahaña gürigia ha mégeibaña ídemuei. Lunti wáyeihani lani hénpulu lun woudin áluahaña gürigia ha awinwandubaña lidan idiheri luagu katei wuribati le asuseredubei ubouagu.

“AREIDAGUAADIBU LADÜGA BAFIÑEN”

11. Ida liña wasubudiruni hínsiñe hamá meha gürigia ha sándibaña lun Hesusu?

11 (Aliiha huméi Márükosu 5:25-34.) Anuhein meha aban würi to barüharuboun 12 irumu lau aban lanarime sandi. Chagaaru meha bandi seinsu áluaha  surusia, ani eibu dan wuribatimarügüti tasandiragun tungua. Gadei laali meha sandi ligía tibagari luma táhuduragun lun Bungiu. Luagu aban weyu, lidan siñagua lan tungua aba desidírü tan tebelurun haganaguoun bandi gürigia lun tachülürün lubadun Hesusu lun taguurunu ladaüragun (Fádirigu 15:19, 25). Ani aba tareidagun! Sandí lumuti meha Hesusu láfuridun erei lídangiñe, aba ladigiragun ani aba lálügüdahan ka lan aguurubei luagu. Lau lanarime anufudei, aba táhuduragun würi tuguya ani aba tabahüdaguni sun inarüni lun. Subudi lumuti meha Hesusu Heowá lan areidaguagüdübalun würi tuguya. Ligía lariñagunbei tun: “Niráü, areidaguaadibu ladüga bafiñen”. Lárigiñe aba lariñagun tun lun tidin tungua darangilu. Chóuruti hínsiñe hamá gürigia ha sándibaña lun Hesusu.

Arufuda lumuti Hesusu lau burí lani milaguru berese lan wau luma lau waturobulin (Ariha huméi párafu 11 luma 12)

12. a) Según le ariha wamaalibei, ka hisaminanbei luagu Hesusu? b) Ka hénpulu buiti líchugubei Hesusu woun?

12 Ruti gurasu woun wasubudiruni hínsiñe hamá gürigia lun Hesusu saragu, dántima le sandi hamá. Ánheinti Satanási busenti lun wafiñerun mebegi wamá ni kata ani mínsiñe wamá ni ka un. Arufuda lumuti Hesusu lau lani milaguru berese lan wau luma lau waturobulin. Lunti geteingiradi wamá luagu wibihin aban urúei ani fádiri le hínsiñehabuti woun (Ebüréu 4:15). Anhein masandi wabéi, háfuga hénrengubei woun gunfuranda wamaniña ha lǘhañabaña lau sandi. Gama lumoun, gayarati wáyeihani Hesusu. Íbini meha masandiradi lan, gunfuranda lumutiña meha sánditiña ani gudemehabuti meha houn (1 Féduru 3:8). Falá waméi lani hénpulu.

“LÁSARU, FURIBA ÑÉINGIÑE!”

13. Ka larufudahabei láguyugun Lásaru woun luagu Hesusu?

13 Gáriti meha lun Hesusu larihiniña gürigia asufurira. Kéiburi dan le lóunwenbei Lásaru, aba lírudun Hesusu saragu dan le larihini hagarigu liduheñu hama lumadagu (aliiha huméi Huan 11:33-36). Subudi lumuti meha lásaaragüdübei lan Lásaru lídangiñe óunweni, ani  íbini ítara ayahuati. Míchuti meha busiganu lun larufuduni ligarigu hagibugiñe amu. Wéiriti meha línsiñe Lásaru lun hau sun liduheñu darí lun layusuruni lubafu Bungiu lun lagiribudagüdüni libagari lumada lun (Huan 11:43, 44).

14, 15. a) Ka arufudubalin busén lan Heowá lagumuchun lau sun katei le adügübei lun wasufurirun? b) Ka uagu súdini lubéi dimurei güriegu le ásügürawagüdübei kei ‘umúahaü’?

14 Ariñagatu Bíbülia ítara liña lan Hesusu kei Lúguchi (Ebüréu 1:3). Arufudati lubeiti lani Hesusu milaguru busén lan giñe Bungiu lagumuchun lau sun katei le adügübei lun wasufurirun, kéiburi sandi, igarigu luma óunweni. Yarafa madise, lagiribudagüdübei Heowá luma Hesusu habagari saragu míñunu gürigia houn. Ariñagati Hesusu háfuriduba lan sun ha hilaguañabaña “lídangiñe hamúaha” (Huan 5:28, 29).

15 Dimurei güriegu le ásügürawagüdübei kei ‘umúahaü’ lídangiñeti aban dimurei güriegu ani mini lan aritaguni. Buiti dimurei le lugundun Bungiu Suntigabafu le adügübalin ubóu luma sun le aniheinbei gayarati laritaguni buidu ida haña lan meha waduheñu ha hilaañabaña luma ka lan meha hagaburibei (Isaíasi 40:26). Ani mama gayararügüti laritaguniña, busenti laritaguniña. Águyuguni burí le uágubei tayanuha Bíbülia arufudubalin furangu kaba lan asusereda lidan Paraísu.

KA LARUFUDAHABEI LANI HESUSU MILAGURU WOUN

16. Kaba burí milaguru hawinwanda saragu lubúeingu Bungiu?

16 Ánhawa gaganbadi lun Bungiu súnwandan, gayarabei móunwegun wamá lidan Arümahedón. Ligíaba aban lídangiñe milaguru burí le wéiritimabei lidan sun dan. Dan lárigiñe, ábame wagumeserun ariha saragu amu milaguru. Ábame agidareina lan figóu hawéi sun gürigia (Isaíasi 33:24; 35:5, 6; Arufudúni 21:4). Memegeirunhañame gürigia gágülesi, ni badun, ni haláü gabalabalati ni somu katei lun gayara lan haganbun. Lau lídehan Heowá, sun ha lúnbaña hásügürün lau ibagari lídangiñe Arümahedón hérebaña ani buídubei hátuadi. Ani megei habéi katei le lugundun hagíaba nadagimein lun haransehani Ubóu lun aban lan paraísu (Sálumu 115:16).

17, 18. a) Ka meha san uagu ladüga Hesusu milaguru? b) Ka uagu busén wabéi wadügüni sun wayaraati lun lidan wamá Paraísu?

17 Dan le haliihan luagu burí lani Hesusu milaguru, aba laganwoundun hemenigin “saragu gürigia” ha lúnbaña hawinwandun ubouagu luagu málühaña lanme masandirun (Arufudúni 7:9). Arufuda lumuti milaguru burí ligía woun weiri lan wínsiñen lun Hesusu (Huan 10:11; 15:12, 13). Arufuda lumuti giñe lugudemehabu woun luagu weiri lan ínsiñeni le lasandirubei Heowá hawagu gürigia ha eseriwidubaña lun.

18 Buin liña ubóu le lau óunweni, igarigu luma asufuriruni (Rómana 8:22). Ligía megei wabalin Paraísu. Chouru lumuti Malakíasi 4:2 woun gúndaatimabadiwa lan ñein lugundun buídubei wátuadi. Dan le wasaminarun luagun katei le, aba weteingiruni Heowá tidan wanigi ani ábatima wafiñerun luagu le füramase lubéi woun. Ligía busén wabéi wadügüni sun le mégeiwabei lun lidan wamá Paraísu. Gúndaatiwa lau wasubudiruni sun lan milaguru le ladügübei Hesusu larufuduñein lan sun katei buiti le lunbei wibihini lábugiñe larúeihan.