Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Sisi-hati irumu 2015

Áfaagua humá lun méiguadun humá lidoun luriban ayumahani

Áfaagua humá lun méiguadun humá lidoun luriban ayumahani

“Chibá huméi húhabu; [...] harumagüda humóun hanigi.” (SANTIAGU 4:8)

1. Ka hasaminarubei saragu gürigia uguñe weyu?

GÍBETIÑA gürigia uguñe weyu minebenehabutiña lun lilurudun Bungiu luáguti laruman ibagari. Saminatiña mariban lan hagamaridun gürigia mamarieidunga o lun larounrun wügüri luma wügüri líledi o würi tuma würi. Súnwandan háfuridun gürigia ha adügübalin katei burí le lidan pelíkula, líburu luma lidan burí uremu (Sálumu 12:8). Íbini wiye lan ubóu le, gayarati líderaguniwa Heowá lun wawinwandun kei aubei labusenra (aliiha huméi 1 Tesalónikana 4:3-5).

2, 3. a) Ka uagu súdini lubéi wadisedun luéi luriban ayumahani? b) Kaba wakutiha lidan arütíkulu le?

2 Súngubei wagía gafigountiwa. Ligía gayara lubéi línsiñedun somu katei wuribati woun, ítara kei lidin úduraü eiga aban emei. Ka lunbei wadügüni anhein ñübuin somu luriban ayumahani lidoun wachügü? Mosu wasagaruni ñéingiñe lau lóufudagun. Anhein madügün wamá, ábatima léredun luriban ayumahani ligía. Ani ánhawa adeira chansi, gayarabei wafigouhan (aliiha huméi Santiagu 1:14, 15). Ligíati, anhein busén wabéi lun gunda lan  Heowá wau, mosu wasagaruni luriban ayumahani lídangiñe wasaminan.

3 Kei aubei warihei, mosu wóunigiruni wasaminan. Anhein wasagara luriban ayumahani lídangiñe wasaminan, méiguadunbadiwa lidoun figóu lánina agamariduni ani masufurirun wabéi lani resultóu (Galasiana 5:16). Lidan arütíkulu le warihiba ǘrüwa katei le lunbei líderaguniwa áfaagua kóntüra luriban ayumahani. Le furumiñeti, wamadagua luma Heowá. Libiaman, adundehani burí tídangiñeti Bíbülia. Ani lǘrüwan, hídehan íbirigu ha lǘhaña lidan inarüni.

WAMADAGUA LUMA HEOWÁ

4. Ida liña líderaguniwa wamadagua luma Bungiu?

4 Ariñagatu Bíbülia houn ha busentiña gamadagua hamá luma Bungiu: “Chibá huméi húhabu; [...] harumagüda humóun hanigi” (Santiagu 4:8). Mini lan le sun lan lumadagu Bungiu adüga wamuti le hínsiñebei lun ani samina wagía luagun le hínsiñebei lun. Kei le busén wabéi wakipuruni wamadagua luma, mabusenruntiwa wadügün ni kata le mínsiñeti lun ani busentiwa wasaminarun luágunrügü katei le harumati (Sálumu 24:3, 4; 51:6; Filipuna 4:8). Subudi lumuti Heowá gafigoun wamá ani anihein lan dan liabin luriban ayumahani lidoun wasaminan. Ani kei le mabusenrun wamá lagañidun wama, adüga wamuti sun wayaraati lun wagidaruni wawariua ani lun luágunrügü lan katei harumati wasaminara (Agumesehani 6:5, 6).

5, 6. Ida liña líderaguniwa furíei lun wáfaagun lun méiguadun wamá lidoun luriban ayumahani?

5 Ánhawa afurieida lun Heowá súnwandan, líderagubadiwa lun wagidaruni luriban ayumahani wawariua. Líchuguba sífiri sandu woun luma erei lun wakipuragun woungua harumañu. Lidan wafurieidun gayarati wariñagun lun busén wamá wasaminarun luágunrügü katei le hínsiñebei lun (Sálumu 19:14). Gayarati giñe wálügüdüni anhein ariha lubéi somu katei wuribati wawagu le gayarati lanügüniwa lidoun figóu (Sálumu 139:23, 24). Gayarati giñe wamuriahan luma lun líderaguniwa lun méiguadun wamá lidoun figóu lánina agamariduni, dántima le lidan wamá óuchawaguni (Matéu 6:13).

6 Háfuga hínsiñeti meha woun wadügün fiú katei wuribati dan le mámagidiwa gefentiña luagu Heowá. Ani háfuga anihein lan dan liabin luriban ayumahani ligía woun lunya wadügüni. Gama lumoun, gayarati líderaguniwa Heowá lun wasansirun. Ligía meha asuseredubei lun urúei Dawidi. Aba meha lagamaridun aban würi to mama lani weiriou. Lau lásügürün dan aba lasakürihan ani aba lamuriahan luma Heowá lun líchugun “aban anigi to harumatu” lun luma lun líderaguni lun gaganbadi lan (Sálumu 51:10, 12). Ligíati, anhein háfaaguña lubéi lun hagidaruni luriban ayumahani huáriua, amuriaha humá ídemuei luma Heowá. Líderagubadün lun héretima lan hayumahan hadügüni lugundan luma lun hahandilihani hisaminan buidu (Sálumu 119:133).

Anhein láhüchüña lubéi aban luriban ayumahani tidan wanigi, lunti wasagaruni lau lóufudagun (Ariha huméi párafu 6)

ADUNDEHANI BURÍ LE TÍDANBEI BÍBÜLIA

7. Ida liña tíderaguniwa Bíbülia lun wagidaruni luriban ayumahani wawariua?

7 Gayarati layusurunu Heowá Bíbülia lun lóunabuni wafurieidun. Tidan Bíbülia wadarirei lichú aau le lúmagiñeti Bungiu, le ‘harumabei’ (Santiagu 3:17). Anhoun waliiha Bíbülia sagü weyu, labuinchuba wasaminan lau katei harumati (Sálumu 19:7, 11; 119:9, 11). Daritiwa giñe adundehani luma burí hénpulu tidan Bíbülia le íderagubaliwa lun wagidaruni luriban ayumahani wawariua.

8, 9. a) Según lariñaguni Ariñawagúni kapítulu 7, ka uagu lábürüha aban nibureinti lidoun figóu lánina agamariduni tuma aban horu? b) Ka burí sügǘ gayarabei ladügün lun wafigouhan?

8 Lidan Ariñawagúni 5:8, ariñagatu Bíbülia woun lunti lan wadisedun luéi magíaguni. Lidan Ariñawaguni kapítulu 7 aliihatiwa luagu aban nibureinti le áfuridubei guñoun éibuga lidan fulasu le ñein lubéi teredera aban  horu. Rara tiña luagu larigei üma tau daüguaü to adügütu lun hawamadirunu wügüriña ha arihitu. Dan le tarihinbalin nibureinti ligía, aba tayarafadun lun, aba tachuuruni ani aba tariñagun katei burí lun le adügübei lúntima laweiridun layumahan. Dan le láfuridunbei nibureinti le lúbiñegiñe masaminarunti lidin afigouha. Gama lumoun, kei le madisedun lubéi luéi luriban ayumahani, aba lafigouhan. Ani súfuri lumuti lani resultóu. Lun hamuga meha samina lan luagun peliguru le gádanbalin, aba hamuga ladisedun tuéi würi tuguya (Ariñawagúni 7:6-27).

9 Ítara kei nibureinti ligía, gayarati giñe wadügün katei mabuidunti ánhawa masaminarun luagun peliguru lan fiú katei. Kéiburi dan le werederun áriebu tigibugiñe bigibigitu lúnrügü warihini ka burí lan programa tídanbei. Peliguruti katei le. Ka uagu? Lugundun gayarati wadunragun luma programa le gaganati agamariduni. Ani anhein lídanñadiwa lubéi Internet, peliguruti wanúadirun somu ariñahani ibidiñeñu woun ka lan páhina le lunbei ñéinhinba lan lanügawa, o webelurun lidoun páhina burí le ayanuhati luagu agamariduni o páhina lánina pornografía. Gayarati ladügün katei burí le lun warihin katei le gayarati ladügün lun liabin luriban ayumahani woun ani lun maganbadi wamá lun Heowá.

10. Ánhawa madügün gasu lau le lariñagubei 1 Timotéu 5:2, ka gayarabei lasuseredun woun? (Ariha humóun iyawaü to lídanboun lagumeseha arütíkulu.)

10 Ariñaga tumuti giñe Bíbülia woun ida luba lan hóuseruniña wügüriña würiña o ida luba lan hóuseruniña würiña wügüriña (aliiha huméi 1 Timotéu 5:2). Aban gefenti luagu Heowá le maríeiti lánirügüboun weiriou lóusera lau aban igaburi le espechaliti. Ánheinti  Gefenti le mamarieidungili würi to úmaboun lasaminara lamarieidun tuguyarügüboun lóusera lau aban igaburi espechaliti. Añahein asaminarutiña magurugungaña ligía lan gürigia houngua, mariban lan hadarigun hóuniwagua lau ligaburi hamufurun, ligaburi haríagun hawouguoun o lau ligaburi héibugun. Gama lumoun, dan le hadügüni bián gürigia katei burí le, gayarati lagumeserun luriban ayumahani tidan hanigi ani aba hadügün somu figóu. Susereeli houn amu gürigia, ligía gayara lubéi giñe lasuseredun woun.

11. Ka wafurendeirubei lídangiñe lani Hosé hénpulu?

11 Gayarati wafurendeirun saragu lídangiñe lani Hosé hénpulu. Busentu meha lani liyubudiri weiriou lun larounrun tuma. Kei le maha lubéi Hosé, aba tasigirun afuuda. Sagü meha weyu tariñagun lun lun herederun hábuguarügü (Agumesehani 39:7, 8, 10). Afuranguagüdati aban sásaamu saminatu lan yebe anhein lan eredera Hosé lábuguarügü tuma, mawandun lubéi lan óuchawaguni ligía. Gama lumoun, desidírühali meha Hosé máhurerun lan tuma ani lun madügün lan gasu tau. Ítara liña ladügün lun miabin lan luriban ayumahani tidoun lanigi. Aban weyu, aba tárügüdüni würi tuguya Hosé tuéigiñe ladaüragun ani aba tálugun tafosuruni lun larounrun tuma. Aba “láfuridun éibaagueina aba terederun ladaüragun túhaburugu” (Agumesehani 39:12).

12. Ida liña wasubudiruni gayara lan ladügün le waríagubei lun liabin luriban ayumahani tidoun wanigi?

12 Gayarati ladügün le warihibei lun liabin luriban ayumahani woun. Ariñagati Hesusu anhein lan eredera aban wügüri aríagua aban würi to mama lani weiriou lau ayumahani lun larounrun tuma, afigouhaali lan tidan lanigi (Matéu 5:28). Ligía meha asuseredubei lun urúei Dawidi. Ariñagatu Bíbülia tábuluguñein lan lani palasiu “aba larihin aban würi magadiñetu [...] tágounña” (2 Samueli 11:2). Maríeitu meha würi tuguya. Ani lubaragiñe hamuga ladigiruni Dawidi larihin lidoun amu fulasu, aba lerederun aríaguoun luma asaminara tuagun. Lagumuhóun oura, aba lagamaridunu.

13. Ka uagu lunti lubéi wadügün aban “daradu” luma wagu, ani ka mini lubéi?

13 Gayarati giñe wafurendeirun saragu katei lídangiñe lani Hobu hénpulu. Ariñagati: “Adügaadina aban daradu luma nagu” (Hobu 31:1, TNM; 31:7, 9). Súdiniti lun wafalaruni lani Hobu hénpulu lun wadügün aban “daradu” luma wagu. Ka uagu? Lugundun líderagubadiwa katei le lun mayumahan wamá katei wuribati. Ka mini lubéi ladügün aban gürigia “daradu” luma lagu? Mini lan desidírü lan lun marihin lan tuagun ni aban gürigia lau luriban ayumahani lánina agamariduni. Ani ánhawa ariha somu iyawaü lánina agamariduni tidan bigibigitu, tuagu somu gárada, tidan somu garüdia o lidan furumiñeguarügü fulasu, lunti wadigiruni warihin lau lóufudagun.

14. Ka lunbei wadügüni lun wakipuragun woungua harumañu?

14 Dan le wasaminarun luagun le akutiha wamaalibei, háfuga híchugun fe megei humá hadügün fiú asansiruni. Anhein ítara liña lubéi, adüga waméi lau lóufudagun. Ánhawa gaganbadi lun Heowá, gayarabei wadisedun luéi figóu le lánina agamariduni ani kípugua wagíame woungua harumañu (aliiha huméi Santiagu 1:21-25).

HÍDEHAN ÍBIRIGU HA LǗHAÑA LIDAN INARÜNI

15. Anhein hénrengu lubéi hun hageindagun luma luriban ayumahani, ka uagu súdini lubéi hamuriahan ídemuei?

15 Anhein hénrengu lubéi hun háfaagun kóntüra luriban ayumahani, amuriaha humá ídemuei luma somu íbiri le lǘhali eseriwida lun Heowá ani le gayarati líchugun adundehani buiti hun tau Bíbülia. Inarüni hénrengu lan layanuhóun luagu katei burí le,  gama lumoun, mosu hadügüni (Ariñawagúni 18:1; Ebüréu 3:12, 13). Ka uagu? Lugundun gayarati hayusurunu íbirigu ha lǘhaña lidan inarüni Lererun Bungiu lun híderagunün arihei ka lan asansiruni hemegeirubei hadügün. Ítara luba gayara lan lumadaméme humá Heowá.

16, 17. a) Afuranguagüda huméi lau aban hénpulu ida liña lan híderaguniña wéiyaaña lidan afiñeni íbirigu ha ageindagubaña luma luriban ayumahani. b) Ka uagu lunti lubéi hamuriahan ha aríagubaña pornografía ídemuei lau lóufudagun?

16 Wéiyaaña lidan afiñeni gayarabei híchuguni ídemuei le buídutimabei woun (aliiha huméi Santiagu 5:13-15). Ariha waméi lásügürün aban nibureinti Brasili. Ariñagati gaturobulin lan meha lun mígiraguagüdün lan lungua lun luriban ayumahani luagu saragu dan. Aba lariñagun: “Subudi numuti mínsiñe lan le nasaminarubei lun Heowá, gama lumoun, nibusigaritina meha lun nariñaguni houn amu”. Aba líchugun aban wéiyaali lidan afiñeni fe luagu megei lan nibureinti ligía ídemuei, ligía aba lubéi línchahani lun layanuhan hama wéiyaaña lidan afiñeni. Aba lariñagun nibureinti ligía: “Gunfuranda hamutina wéiyaaña lidan afiñeni ani óusera hamutina lau ínsiñeni. Aba taweiridun nanigi lau katei le lugundun saminatina madüna nan lun hóuserunina ítara. Aganba hamutina, yusu hamutu Bíbülia lun haritaguagüdüni nun hínsiñe nan lun Heowá ani furíeitiña numa. Sun katei le íderagua lumutina lun neresibiruni adundehani le híchugubei nun tídangiñe Bíbülia”. Guentó buíduhali lumadagua luma Heowá. Ani ariñagati: “Gunfuranda naali buídutima lan láluahan gürigia ídemuei sügǘ lau láfaagun lábuguarügü kóntüra luriban ayumahani”.

17 Anhein hechu hubéi aríagua pornografía, súdiniti lun háluahan ídemuei lau lóufudagun. Ka uagu? Lugundun eibu hálüdün agurabaha, ménrenguntimabei héiguadun lidoun figóu. Ani anhein asusereda katei le, hadügüba saragu dañu houn hiduheñu hama humadagu. Hadügüba giñe lun hayanuhan gürigia wuriba luagu Bungiu. Gíbeeña amuriahatiña ídemuei hama wéiyaaña lidan afiñeni ani resibi hamuti adundehani. Ítara liña hakipuruni hamadagua luma Heowá ani aba hasigirun lidan damuriguaü (Sálumu 141:5; Ebüréu 12:5, 6; Santiagu 1:15).

ÁFAAGUA HUMÁ LUN HARUMA HUMÁ

18. Ka lunbei wasigirun adügei?

18 Eibu dan wíyetimahali ubóu le lani Satanási. Gama lumoun, áfaaguatiña lubúeingu Bungiu lun hagidaruni luriban ayumahani hawariua ani lun hakipuragun houngua harumañu. Ani gúndaati Heowá hau. Ligíati, sigí wamá ayusurei ǘrüwa ídemuei le ariha wamaalibei: wamadagua luma Heowá, adundehani le tídanbei Bíbülia luma hídehan íbirigu ha lǘhaña lidan inarüni. Anhein wadüga, gúndaabadiwa ani harumañu luba wasaminan (Sálumu 119:5, 6). Ámuñegü, úaalime Satanási ani ábame wawinwandun lun súnwandan lidan aban iseri ubóu le harumati.