Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Seingü-hati irumu 2015

Álügüdahani burí tuagu Bíbülia

Álügüdahani burí tuagu Bíbülia

Katei san luéyuribei aguseruni?

Ábanbei dan lánina ugundani luéyuri aguseruni. Ka uagu?

Lidan binadu dan, íridati meha Bungiu aguseragüdütiña lun lesefuruniña lumutuniña lídangiñe marichaü (Alidihatiña 2:18). Ayanuhatu Bíbülia luagu Luéyuri Aguseruni kei aban dan lánina ugundani le ñeinba lubéi lesefuraña Heowá, le lunbei laguseragüdüni sun Ubóu, sun gürigia lídangiñe marichaü. (Aliiha huméi Sálumu 96:12, 13 luma Isaíasi 26:9.)

Ladügübei lau lídehan Hesusu, le líridubei aguseragüdütime lun laguseragüdün lau irichaü dandu houn wínwangiña kei houn hilaaña (Adügaü 10:42; 17:31). Lídanme Luéyuri Aguseruni láguyuguagüdübaña Hesusu hilaaña ha óunwegubaña sin hasubudiruni Bungiu le inarüniti, gayara láamuga hibihini chansi lun hasubudiruni ani hínsiñe ligíame houn. (Aliiha huméi Adügaü 24:15.)

Átiribei san lidura Luéyuri Aguseruni?

Ariñagatu Bíbülia laduraruba lan milu irumu. Lídanba dan ligía hásaara hilaaña lídangiñe óunweni ani hibihiba chansi lun hasubudiruni Bungiu luma lun gaganbadi hamá lun (Arufudúni 20:4, 12). Gíbetiña gürigia saminatiña haguseruba lan gürigia luagu katei burí le hadügübei lubaragiñe hounwen. Gama lumoun, arufudatu Bíbülia haguseragüdüwaba lan según le lunbei hadügüni lárigiñe háguyugun. (Aliiha huméi Rómana 6:7.)

Ayanuhatu Bíbülia luagu ámuya luéyuri aguseruni le lunbei lachülürün sódini lubaragiñe lagumeserun milu irumu. Ani kei warihini lidan arütíkulu le luágubei tidan garüdia to, wáwati giñe lun weyu ligía lagumuchagüle ubóu. Lídanme aguseruni ligía, lagumuchuba Bungiu hau gürigia wuribatiña (2 Féduru 3:7). Ligía lunti lubéi warufuduni anhein inarüni lubéi hínsiñe lan Bungiu woun. (Aliiha huméi 2 Féduru 3:9, 13.)