Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Seingü-hati irumu 2015

 TÍTULU LE LUÁGUBEI TIDÁÜ | YARAFAALI SAN LAGUMUCHAGÜLE UBÓU?

Ka san mini lubéi lagumuchagüle ubóu?

Ka san mini lubéi lagumuchagüle ubóu?

Dan le haganbuni dimurei “yarafaali lagumuchagüle ubóu”, ka ñǘbuinbei lidoun hisaminan? Saminatün san liábinba lan aban hárabaganali, aban óunwenbu durumandei o aban wuribu le lunbei lagumuchun lau ubóu? Añahein gürigia aba hanufudedun dan le harihin katei burí kei le ani añahein amu mebereseguntiña.

Ariñagatu Bíbülia furangu liábinba lan “lagumuchun ubóu” (Matéu 24:14). “Óunwenbu luéyuri Bungiu” luma “Arümahedón” ligía amu iri le ayusurúbei lun layanuhóun luagu dan ligía (Arufudúni 16:14, 16). Lidan burí relihión, amu katei arufudahóubei luagu lagumuchagüle ubóu, ani anihein saragu burí saminaü le ruti anufudei. Gama lumoun, katei san lagumuchagüle ubóu le uágubei tayanuha Bíbülia? Tugía guánarügü afuranguagüdübalin woun. Ani ligibuagun lira, íderagua tumutiwa lun warihini yarafaali lan lagumuchagüle ubóu luma lun wasubudiruni ida luba lan wakipuruni wabagari. Akutiha wamóun lun gunfuranda wamani buidu katei lan lagumuchagüle ubóu. Warihibei giñe kábatima lan agünrinchawagúa.

 ARIÑAHANI LUÁGUTI LAGUMUCHAGÜLE UBÓU

  1. MAGÜNRINCHAWAGUNBEI UBÓU LAU WATU

    Ariñagatu Bíbülia: “Ru [l]umuti [Bungiu] múa luagu lebu, lun mánhingichun lan lídangiñe lubara” (Sálumu 104:5). Afuranguagüdatu Bíbülia lidan bérusu le luma lidan amu burí bérusu luagu magünrinchagun lubéi lan Bungiu Ubóu ani mígirunbei lan lun lagünrinchaguni somu gürigia o somu katei (Apurichihati 1:4; Isaíasi 45:18).

  2. GAWEYURIHALI GÓURATE LIGÍA LAGUMUCHUN UBÓU

    Íbini añahein lan asaminarutiña maweyuri lan liabin lagumuchagüle ubóu, ariñagatu Bíbülia rúhali lan Bungiu aban weyu lun lanügüni. Ariñagatu: “Ánheinti weyu luma oura le lunbei lasuseredun sun katei le, ibidiñeti ni ka un, ni houn lani Bungiu ánheligu ha siélubaña, ni lun Liráü; Búngiurügüñein le Úguchili asubudirei. Lunti lubeiti aranseñu humá, agagudúañu [...]; ladüga ibidiñeti hun ídaame lan lachülüra oura ligía” (Márükosu 13:32, 33). Furanguti rúhali lan Bungiu, “le Úguchili”, aban “oura” lun lagumuchun lau ubóu.

  3. MÁMABA WÜGÜRI AGUMUCHA LAU UBÓU NI SOMU KATEI LE ÁBÜRÜHATI HUARIÑURUGUGIÑE

    Kaba agumeserei lagumuchagüle ubóu? Ariñagatu líburu Arufudúni: “Ábati narihini sielu hunreñu, aba lasaliragun aban gabayu haruti; leti awarihabalin, Gúnfuliti luma Inarüni, ligía líribei. [...] Ábati narihini mónsturu hama lurúeitegu ubóu hau hánigu óundaraguaaña lun hageindagun luma le wariñubei luagu gabayu haruti hama lánigu” (Arufudúni 19:11-21). Sun dimurei le lídanbei bérusu burí le íderagua lumutiwa lun gunfuranda wamani lóunahaba lan Bungiu saragu ánheligu lun hagumuchun hau láganiñu.

Lagumuchagüle ubóu le uágubei tayanuha Bíbülia ligía aban lubuidun ñunsu houn sun gürigia

KABA AGUMUCHAGUA?

  1. LAGUMUCHAGUBA HARÚEIHAN WÜGÜRIÑA

    Ariñagatu Bíbülia: “Ladügüba Bungiu le siélubei aban arúeihani le siñabei lagünrinchaguni ni lagumadiruni ni aban néchani, günringuarügü lubéi arúeihani ligía sun le líbiri arúeihani sunsuinagubei, ábame ladurarun lun súnwandan” (Danieli 2:44). Kei warihini lidan puntu 3, hóundaraguba “lurúeitegu ubóu” “lun hageindagun luma le wariñubei  luagu gabayu haruti hama lánigu” (Arufudúni 19:19). Lárigiñe, lagumuchuba Larúeihan Bungiu hau.

  2. LAGUMUCHUBA WURIBU, ÁFARAHANI LUMA MARICHAÜ

    ‘Lagumuchuba Bungiu lau wuribu’ lidan sun ubóu (Sálumu 46:9). Samina wamá luagun le lariñagubei bérusu le: “Ha abagaridubaña lidan ísuruni sunsuinagubei, habagariduba súnwandan ubouagu, ánhaña ha salufuribaña hama ha múaranbaña, hahulúba, bugawa hagíame ubouagugiñe” (Ariñawagúni 2:21, 22). Ani ariñagati Arufudúni 21:4, 5 ladügübei lan Bungiu “sun katei iserime”.

  3. LAGUMUCHUBA RELIHIÓN LE MADÜGÜNBALIN LUGUNDAN BUNGIU

    Ariñagatu liliburun Heremíasi hawagu tábutigu relihión biangua tigibu: “Iyeeni le hariñagubei profetagu; hagumadihaña fádirigu kei líchaahouniwa houn [...]. Gama lumoun kaba san hadüga danme lachülürün lagumuhóun dan?” (Heremíasi 5:31). Kaba asusereda houn tábutigu ligilisi ha? Óunabati Hesusu: “Saragubaña ariñagutiña nun: ‘Wabureme, Wabureme, apurichihatiwa méhatia luagu biri, sagá wagía sífirigu wuribatiña lidan biri, adüga wagía saragu milaguru lidan biri’. Ábameti nariñagun houn: ‘Ibidiñegubeiñadün nun; dise humá nuéi’” (Matéu 7:21-23).

  4. LAGUMUCHÚBA HAU GÜRIGIA HA HÍNSIÑEHABUBAÑA LUN WURIBANI LUMA MARICHAÜ

    Ariñagati Hesukrístu: “Ha mafiñenbaña, siádiwaaña ladüga dan buga le liábinbei larugounga ubouagun lun narugoungadágüdün lau ubóu, hímeintima hamuti lílana ubóu luburiga sügǘ lau larugounga, ladüga katei lan wuribati hadaagubei” (Huan 3:19). Lidan meha lidaani Noé, aban wügüri deregeguati lungua lun Bungiu, aba lagünrinchaguniña Bungiu sun gürigia wuribatiña ha ubouagubaña. Lidan 2 Féduru 3:5-7, ariñagatu Bíbülia: “Aba lachülürün dan lun lagünrinchaguni Bungiu ubóu meha ligira lau lidunarina guran. Ánheinti sielu luma múa le guentobei, lareiduñein Bungiu lubame weyu lagünrinchawagun lau watu gemeti. Lareidahouña lubá luéyuri guséi luma hagünrinchawagun wuribatiña”.

Konparáruati lagünrinchawagun ubóu lidan lidaani Noé luma “luéyuri guséi luma hagünrinchawagun wuribatiña” le lunbei lasuseredun yarafa madise. Ani lunti waritaguni magünrinchagun lani Bungiu ubóu lidan binadu dan, gürigia “wuribatiña” agünrinchawagubaña, lidan amu dimurei, ha láganiñu Bungiu. Ítarameme, lidan “luéyuri aguseruni”, lagumuchuba Heowá hau sun ha hínsiñehabubaña lun wuribani ani aba láganiñu hamá. Ánhañati lumadagu, lóunigirubaña, ítara kei meha lóunigiruni Noé hama liduheñu (Matéu 24:37-42).

Wéiribei lubuidun wabagari danme le lagidaruni Bungiu sun wuribati le ubouagubei! Chóuruti dan le lan tayanuhan Bíbülia luagu lagumuchagüle ubóu, tanügüña lan aban lubuidun ñunsu houn sun gürigia. Ani háfuga álügüdagua humá hungua anhein lǘgili lubéi lagumuchun ubóu ani ka lan lunbei hadügüni lun hesefurun. Ariha waméi ka lan tariñagubei Bíbülia.