Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Seingü-hati irumu 2015

Góunigi wamá luéi lagayuahan “liñún gáñiti”

Góunigi wamá luéi lagayuahan “liñún gáñiti”

“Agagudúañu humá, [...] lugundun éibugañahadügü liña Mafia le hágani keisi liñún gáñiti áluaha kaba lan lagünrinchagua.” (1 FÉDURU 5:8)

1. Ka ladügübei aban ánheli le meha gamadaguabei luma Heowá?

LUAGU aban dan, anihein meha aban ánheli gamadaguati luma Heowá. Luagu aban weyu aba lagumeserun ayumaha lun háhuduragun gürigia lun lubaragiñe háhuduragun lun Heowá. Kei le aba lubéi lasigirun asaminara luagun katei ligía, aba lafigouhan (Santiagu 1:14, 15). Aba lebedaagun lun Bungiu ani aba liabin lun ligía lan ‘lúguchi iyeeni’ (Huan 8:44). Ibidiñeti woun ka lan meha líribei lubaragiñe lebedaagun, gama lumoun, Satanási wagúahan lun guentó.

2, 3. Ka uagu laguahóua lun lágani Heowá “Satanási”, “Mafia”, “hewe” luma “düragón”?

2 Satanási láganibei Heowá le tímatimaati. Íderagua tumutiwa Bíbülia lun warihini lanarime luriban. Kei hénpulu, watu lun Satanási, ani “Kóntürati” mini lubéi dimurei le. Wáwati lun ítara ladüga iyereegu lan lagumadihan Heowá lun ani mafalarun lumuti. Mabusenrunti Satanási lun Heowá lan agumadiha.

 3 Lidan Arufudúni 12:9, “Mafia” liña laguahóun lun lágani Heowá le. Ka uagu? Ladüga “Marasualuguti” mini lubéi dimurei le, aban gürigia le ayanuhabei iyeeni hawagu amu. Ani ariñagati Mafia yee lan Heowá. Wáwati giñe lun “binadu hewe”, lugundun yúsuti meha aban hewe lun leyeedunu Ewa. Ani wáwati lun “óunwenbu düragón” lugundun ítara liña kei aban mónsturu gáñiti ani furundeti. Mabusenrunti lun ladügüni Heowá le füramase láalibei. Ani busenti giñe lagumuchun hau sun lubúeingu Bungiu.

4. Kaba wariha lidan arütíkulu le?

4 Chóuruti lágani lan Heowá Satanási ani hágani giñe lumutuniña Heowá. Busenti lun wígiruni weseriwidun lun Heowá. Ligía teweridirunbadiwa Bíbülia: “Agagudúañu humá, [...] lugundun éibugañahadügü liña Mafia le hágani keisi liñún gáñiti áluaha kaba lan lagünrinchagua” (1 Féduru 5:8). Lidan arütíkulu le warihiba ǘrüwa resun lun wóunigiragun woungua luéi Satanási.

GABAFUTI SATANÁSI

5, 6. a) Ru humá fiú hénpulu le arufudubalin gabafu hamá ánheligu. b) Ka uagu tariñaga Bíbülia gabafuti lan Mafia lun ladügün lun hóunwegun gürigia?

5 Gabafutiña ánheligu (Sálumu 103:20). Chútimaati hau ani héretimatiña wawéi. Ánheligu ha úaraguabaña yusu hamuti habafu lun hadügün katei buiti. Kéiburi lidan tidaani Bíbülia, áfarati aban ánheli 185,000 súdaragu lidan ábanrügü áriebu. Siñabei hamuga ladügüni aban gürigia ligiaméme ani hénrengubei hamuga houn saragu súdaragu (2 Urúeigu 19:35). Lidan ámuya dan, sagá lumutiña aban ánheli lani Hesusu apostolugu furisunrugugiñe. Aba ladaaruni bena, aba lasagaruniña apostolugu ani ábaya ladouruni bena lárigoun sin híchugun súdaragu ha óunigirubaña fe (Adügaü 5:18-23).

6 Kei aubei warihei, yusu hamuti ánheligu ha úaraguabaña habafu lun hadügün katei buiti. Ánheinti Satanási lun katei wuribati layusurei lubafu. Ani wéiriti lubafu. Ligía tariñagunbei Bíbülia ligía lan “agumadihabei lidan ubóu le” ani luagu ligía lan ‘lubungiutebei ubóu’ (Huan 12:31; 2 Korintuna 4:4). Ariñagatu giñe gabafuti lan lun ladügün lun hóunwegun gürigia (Ebüréu 2:14). Úati mini lan le Mafia lan áfaragubaliña gürigia. Kati uagu tariñaga Bíbülia gayarati lan ladügün lun hóunwegun gürigia? Furumiñe, adügati lun iyereehabu hamá gürigia ani lun háfaragun houngua. Libiaman, lugundun ligía adügübei lun hafigouhan Adán tuma Ewa ani ligía wafigouhanbei ani hilagua wagía (Rómana 5:12). Ligía lariñagunbei Hesusu gáfarahadi lan Mafia (Huan 8:44). Ítara liña, gabafuti Satanási.

Láurügüñein lídehan Heowá gayara lan wagañeiruni Mafia

7. Ru humá hénpulu tídangiñeti Bíbülia le arufudubalin gabafu hamá máfianu.

7 Dan le webedaagun lun Mafia, webedaaguña giñe houn lánigu. Haganagua lánigu añahein máfianu o ánheligu ha maganbadibaña (Arufudúni 12:3, 4). Tidan Bíbülia anihein hénpulu burí le arufudubalin luagu here hamá wawéi ani gayara lan hadügün lun wasufurirun saragu (Matéu 8:28-32; Márükosu 5:1-5). Mabulieida waméi gabafu lan Satanási ani gabafu hamá giñe lumafianu (Matéu 9:34). Láurügübei lídehan Heowá gayara lan wagañeiruniña.

WURIBATI MAFIA

8. a) Ka labusenrubei Mafia? (Ariha huméi dibuhu le lídanbei lagumeseha arütíkulu.) b) Ka burí katei harihibei le arufudubalin hun wuribatimahali lan ubóu le kei Satanási?

8 Hanarimeti luriban Mafia. Kei warihini lidan  párafu 4, ariñagatu Bíbülia ítara liña lan kei aban liñún le lamati. Ligía agumadihabei ya ubouagu. Gama lumoun, úati buídurügü lan lira lun (1 Huan 5:19). Busenti giñe lagumuchun hau kristiánugu anuadirúaaña ha añaheinguabaña ubouagu luma hau “amu mudún” (Huan 10:16; Arufudúni 12:17). Ligía ladügünbei lun heibaahóun kristiánugu inarünitiña lúmagiñe lidan furumiñeti sígulu darí guentó.

9, 10. a) Ida liña meha lagayuahan Mafia hawagun ísüraelina? b) Ka meha uagu busén lubéi Satanási lábürühan hawagun ísüraelina? c) Según hisaminan, ida liña san lasandiragun Satanási lungua dan le lábürühan aban lubúein Heowá lidoun aban figóu wéiriti?

9 Aban liñún le lamaali magudemedaguntiña líliru lun ni lubaragiñe láfaruniña ni lárigiñe. Ítara liña giñe Satanási, magudemehabuti houn gürigia ha lárügüdübaña. Samina wamá luagun ida liña lan lagayuahan hawagu ísüraelina. Adügati lun hábürühan ísüraelina kéiburi Simürí lidoun figóu lánina agamariduni luma lun lábürühan Geasí lidoun igaaduaü. Barüti meha katei le saragu asufuriruni. Ani chóuruti weiri lan meha lugundan Satanási lau lagañeirun lidan dan ligía (1 Lúrudu 25:6-8, 14, 15; 2 Urúeigu 5:20-27).

Gúndaati Satanási dan le lafigouhan aban lubúein Heowá (Ariha huméi párafu 10)

10 Ka meha uagu busén lubéi Satanási lagumuchun hau ísüraelina? Ladüga subudi lumuti meha lídangiñeba lan néchani ligía liabin Mesíasi. Ani subudi lumuti giñe lagumuchuba lan Mesíasi lau ani larufudubei lan luagu Heowá lan garichabei lun larúeihan (Agumesehani 3:15). Mabusenrunti meha Satanási lun hagañeiruni ísüraelina lufulesein Heowá, ligía ladügünbalin sun liyaraati lun lafigougüdüniña. Magudementi meha Dawidi lun dan le léiguadunbei lidoun agabarahani. Magudementi meha giñe Moisesi lun dan le leferidirunbalin chansi lun lebelurun lidoun Fulasu Füramasewati. Le linarün katei, gúndaati Satanási dan  le lafigouhan aban lubúein Bungiu. Yusu lumuti chansi burí ligía lun ladügün bula lau Heowá (Ariñawagúni 27:11).

11. Ka uagu másiñan lubéi Satanási lan óuchagubarun Sara?

11 Iduheñu ha ñéingiñeba lubéi liabin Mesíasi hagía meha iyereegutimabaña lun Satanási. Kei hénpulu, haritagua waméi le asuseredubei dan le lariñagunbei Heowá lun Abüraámü ladügüba lan “aban óunwenbu néchani” hau ladügawagun (Agumesehani 12:1-3). Dan le Ehiptuñein lubéi Abüraámü tuma Sara, aba lanügünu lurúeite fulasu ligía Sara lun lamarieidun tuma. Gama lumoun, sefu lumutu Heowá (aliiha huméi Agumesehani 12:14-20). Adüga lumuti amu urúei ligiaméme uburugu Gerarü lubaragiñe nasirua lan Isaakü (Agumesehani 20:1-7). Satanási funa san adügübei lun tínsiñedun Sara houn urúeigu hagía? Mariñagun tumuti Bíbülia. Gama lumoun, lunti waritaguni ígira tani Sara sun lubuidun tibagari Uru lun tidin awinwanda tidan kianpu. Háfuga busenti meha Satanási lóuchagunu lau sun irisini le hámabei urúeigu ani lun tachararun lun tani weiriei luma lun Heowá. Hínsiñeti hamuga meha lun Satanási teferidiruni Sara chansi lun hádangiñe tan liduheñu Mesíasi. Meberesegunti meha lagadeiruni tamarieidun würi tuguya, lubuidun tiri luma tumadagua luma Heowá. Wéiriti luriban Satanási!

12, 13. a) Ka ladügübei Satanási dan le lágurahounbei Hesusu? b) Según hisaminan, ida liña larihiniña Satanási nibureintiña ha eseriwidubaña lun Heowá uguñe weyu?

12 Saragu irumu lárigiñe ligía nasirua lan Hesusu. Meberesegunti meha Satanási aban lan irahü magadiñeti. Subudi lumuti meha hádangiñe lan ladügawagun Abüraámü liabin ani ligíaba lan Mesíasi. Ani lagumuchuba meha Hesusu lau sun le adüga láalibei Mafia (1 Huan 3:8). Saminati san Satanási weiri lan luriban katei le ladügübei lau láfarun aban irahü? Uá. Meberesegunti Satanási lau le buídubei lumoun le wuribabei. Ligía lafuresehanbei lun láfaruni Hesusu hilagubei. Ka ladügübei?

13 Dan le líchugunbei urúei Erodesi fe luagu nasiruali lan “harúeite huríu”, aba lagañidun ani aba busén lan láfaruni (Matéu 2:1-3, 13). Ligía aba lubéi líchugun gumadi lun háfarawagun sun irahüñü ha bián irumu hau lun ǘnabun dandu Belén kei lidan ageiraü le burí yarafabei ñein (aliiha huméi Matéu 2:13-18). Móunwenti Hesusu lidan áfarahani ligía. Ka larufudahabei katei le woun luagu Satanási? Mebegi lan habagari gürigia lun, ni habagari irahüñü. Chóuruti ítara liña lan Satanási kei aban liñún gáñiti. Mabulieida waméi wuriba lan Mafia.

BUSENTI MAFIA LEYEEDUNIWA

14, 15. Ida liña leyeeduniña Satanási gürigia?

14 Wéiriti línsiñehabu Heowá (1 Huan 4:8). Láurügüñein iyeeni gayara lan ladügün Satanási lun hebedaagun gürigia lun Heowá. Ida? Lau ladügün lun hasaminarun ‘memegeirun hamani lídehan Bungiu’. Lidan amu dimurei, aba ladügün lun míchugun hamá fe megei hamá hadügün umadaguaü luma Bungiu (Matéu 5:3). Yeeda laaña Mafia saragu gürigia lun mafurendeirun hamani inarüni luagu Bungiu (2 Korintuna 4:4).

15 Subudi lumuti Satanási busén lan Heowá lun lúnrügü lan wáhuduragua (Áfuriduni 20:5). Ligía leyeedunbaliña gürigia lau burí relihión le mama inarüniti. Gúndaati dan le ladügün lun háhuduragun gürigia houn haduheñu ha hilaguaaña, houn burí animaalugu o lun furumiñeguarügü amu katei lubaragiñe háhuduragun lun Heowá. Ha adügübalin katei burí le saminatiña gunda lan Bungiu lau, gama lumoun meseriwínti hafiñen ni katei le hadügübei lun ni kata. Susereti meha aban katei ítarati houn ísüraelina lidan lidaani profeta Isaíasi. Álugati Heowá líderaguniña lau konparárü lani  relihión mama inarüniti luma éigini le mabuidunti. Ariñagati houn moun lumuti lan hasigirun afayeiha seinsu luagu katei le mámabei éigini. Ani ábaya lariñagun: “Aganba humana buidu, ábame heigin éigini buiti” (Isaíasi 55:2).

16, 17. a) Ka uagu lariñaga Hesusu lun Féduru: “Disebá nuéi, Mafia!”? b) Ida liña louchun Satanási leyeeduniwa?

16 Gayarati giñe leyeeduniña Satanási lubúeingu Bungiu ha úaraguatiña. Kéiburi dan le lariñagunbei Hesusu houn lani disipulugu luagu málühali lan ounwe. Wéiriti meha línsiñe Hesusu lun Féduru darí lun lariñagun lun lun lanügüni katei lau lámarun. Ábati lariñagun Hesusu lun: “Disebá nuéi, Mafia!” (Matéu 16:22, 23). Ka uagu lariñaga lun ítara? Ladüga subudi lani mosu lan lounwen lun lesefuruniña gürigia luma lun larufuduni ye lan Satanási. Súdiniti meha dan ligía. Mama meha lidaani lanügüni katei lau darangilaü. Chóuruti gúndaabei lan hamuga meha Satanási lun merederun lan Hesusu agagudúañu.

17 Murusunrügaali dan lun lagumuchun ubóu wuribati le. Ligía lídanñadiwa lubéi giñe aban dan súdiniti. Ani busenti Satanási lun wanügüni sun katei lau darangilaü luma lun wetenirun lun ugundani le lídanbei ubóu le. Busenti lun wasaminarun luagu lǘgili lan liabin lagumuchagüle ubóu o íbini miábinbei lan. Ani iyeeni lira. Agagudúañu wamá ani mabulieida waméi wawinwanduña lan lidan lagumuhóun dan (Matéu 24:42).

18, 19. a) Ka labusenrubei Satanási lun wafiñerun? b) Ida liña líderaguniwa Heowá?

18 Busenti giñe Satanási wafiñerun mínsiñe wamá lun Heowá ani úabei lan feruduna lani wafigoun. Ani iyeeni lira. Ariñagatu Bíbülia: “Richaguati Bungiu, ani mabulieidun lubéi le adüga humaalibei, luma ínsiñehabuni le arufuda humaalibei lun” (Ebüréu 6:10). Kei aubei warihei, sun le wadügübei luagu Heowá gebegiti lun (aliiha huméi 1 Korintuna 15:58). Le linarün katei, Satanási mínsiñebei lun Heowá ani ligíaba mibihin ferudun. Ligíati, mígira wamá lun leyeeduniwa Mafia.

19 Lidan arütíkulu le ariha wamuti gabafu lan Satanási, wuriba lan ani busén lan leyeeduniwa. Gama lumoun, gayarati wagañeiruni ladüga anihein Heowá wama. Yusu lumutu Bíbülia lun layanuhan woun tuagu lisadaran Mafia, gayara láamuga werederun agagudúañu (2 Korintuna 2:11). Ani úati buídurügü lan láurügü wasubudiruni ka lan lisadaranboun. Lunti wáfaagun lun wadisedun tuéi. Ligía tariñagunbei Bíbülia: “Gagibugua humá luma Mafia, ábame lanurahan huéi” (Santiagu 4:7). Lidan le aban arütíkulu warihibei ka lan lunbei wadügüni lun wadisedun tuéi ǘrüwa tídangiñe lisadaran Satanási.