Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Seingü-hati irumu 2015

 TÍTULU LE LUÁGUBEI TIDÁÜ | YARAFAALI SAN LAGUMUCHAGÜLE UBÓU?

Chülümémeeli lagumuchagüle ubóu

Chülümémeeli lagumuchagüle ubóu

Lídanñein peliguru habagari gürigia ladüga wügüri. Lígiruba san Bungiu lun hasigirun gürigia agumadiha ubouagu? Uá. Kei aubei warihei, málühali Bungiu agumucha hau urúeigu ubouaguna ani gumú ligíame lau saragu asufuriruni luma luriban layusurún ubafu. Busenti Bungiu le Adügübaliña gürigia luma Ubóu lun wasubudiruni málühali lan agumucha lau wuribani. Ida liña lasubudiragüdüni ariñahani le woun?

Samina humá mosu lan hadügün aban wéiyaasu. Chóuruti háluahaba lan aban mapa furumiñe lun hasubudiruni ida luba lan hachülürün. Eibu hawanserun, aba hetenirun lun üma lun harihini anhein hasigiruñein lubéi üma le tídanbei mapa. Ruti katei le ichouruni hun luagu yarafaadün lan lun fulasu le ñéinhinbadün lubéi. Ítarameme, ru laaru Bungiu Lererun woun kamá hamuga aban mapa. Ani tidan ayanuhóuati luagu saragu katei le lunbei lasuseredun lubaragiñe lagumuchun ubóu. Eibu lásügürün dan, aba warihini úara lan le asuseredubei luma le bürüwañubei tidan Bíbülia. Ruti katei le ichouruni woun luagu yarafatimahali lan lagumuchagüle ubóu.

Ariñagatu Bíbülia ñeinbei lan aban dan súdiniti lubaragiñe lagumuchun ubóu. Ani lasusereduba lan saragu katei le masuseredunñahagili lidan dan ligía. Ariha wamá fiú lídangiñe katei ligía.

1. GUDEMEI LUMA TURÓBULI LIDAN SUN UBÓU Lidan profesía le lídanbei Matéu kapítulu 24 anihein aban seini le ayanuhabei luagu saragu sügǘ. Ariñagati profesía ligía séiniba lan ligía amakürei ‘lagumuchagüle ubóu’ (bérusu 3 luma 14). Laganagua sügǘ burí ligía ñeinbei wuribu wéinamuti, ilamaü, hárabaganali lidan sun ubóu, íweruhani, mínsiñehabuni luma iyeeni lidan relihión (bérusu 6 darí 26). Inarüni suseregubeiñein lan katei burí le. Gama lumoun, lasusereduba súngubei lidan ábanmeme dan lubaragiñe lagumuchagüle ubóu. Ani, úarabei giñe luma lagunfulirun 3 profesía le asigirubei.

2. HEFERIDIRUNI GÜRIGIA LUBUIDUN IGABURI Ariñagatu Bíbülia heferidirubei lan lubuidun hagaburi lidan burí “lagumuhóun dan” le. Ariñagatu: “Hóunguarügübei burí gürigia habusenra buiti, hínsiñebei seinsu houn, panta hagíame, barüguabaña houngua. Hadimurehaba wuriba luagu Bungiu, maganbunhabaña hagübürigu, meteingiradibaña, minebenme katei lánina Bungiu houn. Mínsiñehabubaña, magudemehabu, marasualugubaña, siñabei hárügüdagun houngua, hanarimebaña, láganibaña sun le buídubei. Halugurubaña hamadagu, hadügüba burí katei mabuidunti meberesenga hagía kaba lan asusereda lárigiñe, hanarimebei hanaagun houngua, háluahabei hagundan guánarügü lubaragiñe hamuga háluahani Bungiu” (2 Timotéu 3:1-4). Inarüni mama lan iseriti igaburi burí le hawagu gürigia, gama lumoun, wuribatimabei katei lidan “lagumuhóun dan”. Ligía tariñagunbei Bíbülia hénrengubei lan katei ubouagu lidan dan ligía. Afiñetün san ítara haña lan gürigia uguñe weyu?

3. ABAN UBÓU GÁDEIHALI Ariñagatu Bíbülia lagumuchuba lan Bungiu hau ha “agünrinchagubalin ubóu” (Arufudúni 11:18). Ida liña san lagadeirúniwa Ubóu uguñe weyu? Ítara kei meha lidan lidaani Noé. Ariñagatu Bíbülia: “Lun Bungiu, buin liña bugaha ubóu lau wuribani luma anarimeni, sun gürigia aba híchaagun houngua lun wuribani”. Ligía lariñagunbei Bungiu lun Noé hawagu wuribatiña hagía: “Nagumuchaguagüdaaña lubeiti labu sun ubóu” (Agumesehani 6:11-13). Ariha humuti san gíbetima lan wuribani ubouagu eibu lásügürün dan? Ani ligibuagun lira, lasusereduña aban katei le masuseredunñahagili: adügaali wügüri áruma to gabafutu lun tagünrinchaguni  ubóu ani gumú tuguyame hau gürigia. Ani murusun murusun hagumuchuña giñe gürigia lau sun katei le ídehabei lun ñein lan ibagari ubouagu kéiburi garabali, duna luma sun katei le íchugubei ibagari.

Samina humá murusun: san irumu lubaragiñe le, gabafuti meha san wügüri lun lagumuchun hau sun gürigia ha ubouagubaña? Uá. Ánheinti guentó gayara lumuti. Arihúati katei le lidan ligaburi lagadeirún Ubóu luma tuagu sun áruma to areidaha hamaaruboun gürigia. Le hírubei, genegeti luagu ua lan gunfuranda lani wügüri peliguru ani siñagua ligía lungua lun lafurendeirun ahandilihei lanarime lawanserun teknolohía. Le buídubei, mama lúhaburuguñein wügüri le lunbei lasuseredun lun Ubóu. Füramaseti Bungiu lubaragiñe lanme hagumuchun gürigia lau ibagari ubouagu, lagumuchuba lan hau.

4. WADAGIMANU LÁNINA APURICHIHANI LIDAN SUN UBÓU Ariñagati giñe lani Matéu profesía ladügǘba lan aban wadagimanu lánina apurichihani lidan sun ubóu: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Matéu 24:14). Ámubei buga luwuyeri apurichihani le sügǘ lau sun le adügǘwaalibei tidan amu burí ligilisi. Ayanuhóuati luagu aban uganu furanguti: “uganu buiti le luáguti larúeihan Bungiu”. Kátaña asubudiragüdübalin uganu buiti luáguti Larúeihan Bungiu “lidan sun ubóu”?

Lapurichihóuña uganu buiti luáguti Larúeihan Bungiu lidan sun ubóu lidan saragu iñeñein

Anihein aban páhina hama gefentiña luagu Heowá lidan Internet gíriti jw.org, adügǘwati lun lapurichihóun uganu buiti luáguti Larúeihan Bungiu. Anuhein agumeiraguagüdüni ñein to afuranguagüdübalin uganu le lidan lóugiñe 700 iñeñein. Anihein funa san amu relihión le áfaagubei lun layanuhan houn gürigia luagu Larúeihan Bungiu? Saragu dan lubaragiñe ñein lan Internet, subudiwaaña gefentiña luagu Heowá luagu hapurichihani uganu buiti luáguti Larúeihan Bungiu. Lúmagiñe irumu 1939, tidan kada Garüdia Atalaya anihein dimurei burí le: “Tasubudiragüdüñein Larúeihan Heowá”. Ani ariñagatu aban líburu to ayanuhaboun luagu relihión “úati lan adügüti aban wadagimanu lánina apurichihani libe le wadügübei”. Ani lidan uganu le wapurichihabei súdiniti ayanuha wamá luagu málühali lan Larúeihan Bungiu agumucha lau ubóu wuribati le.

ABAN DAN SÚDINITI

Ariha humaali san lagunfulirun profesía burí le lídanbei arütíkulu le? Lidan san irumu le sügühalibei, rúharu garüdia to ariñahani le iseriti luagu burí katei le asuseredubei ubouagu, ani ha aliihabarun rútiña fe lagunfuliruña lan burí seini  le lánina lagumuhóun dan. Gama lumoun, añahein gürigia ha mafiñenbaña luagu inarüni ani ariñagatiña gayara lan laransehóun ariñahani ani iyeeni lan wuribatimahali lan katei ubouagu. Ariñagatiña ladüga lan gayarahali lan haganbun gürigia ariñahani le lídangiñeti sun ubóu ligía lan híchugunbei fe luagu turóbuli burí le meha maganbahóunwati lidan binadu dan. Meberesenga ka lan hariñagubei gürigia burí ha, añahein saragu gürigia ha úaraguati hasaminan ani ariha hamuti saragu katei le asuseredubei keisi seini luagu wawinwanduña lan lidan aban dan súdiniti.

Eweridihani le híchugubei fiú aturiahatiña siensia houn ha arihibaña lau ichouruni tidan Óundaruni hani Néchanigu (Naciones Unidas) lidan irumu 2014 ligía aban lídangiñe katei le arufudubalin wawinwanduña lan lidan aban dan súdiniti. Dan le hayanuhanbei luagu peliguru burí le ubouagubei, ariñagatiña aturiahatiña hagía: “Dan le wakutihani peliguru burí le buidu, aba wíchugun fe luagu gayara lan lasuseredun aban chagaguaü ladüga lanarime awanseruni lidan luáguti teknolohía ani gayara lan lagumuchun lau ubóu”. Katei burí le ruti ichouruni houn saragu gürigia, íbini houn ha adügübarun garüdia to hama saragu gürigia ha aliihabarun, luagu wawinwanduña lan lidan dan hénrenguti ani yarafaali lan lagumuchun ubóu. Ani moun lumuti wanufudedun. Ka uagu? Ladüga gayarati wásügürün lau ibagari.