Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Seingü-hati irumu 2015

Gayarati hagañeiruni Satanási

Gayarati hagañeiruni Satanási

“Mígiraguagüda humá hungua lun [Mafia]; deregüdagu humá lidan hafiñen.” (1 FÉDURU 5:9)

1. a) Ka uagu súdini lubéi wasigirun ageindagua luma Satanási uguñe weyu? b) Ida liña wasubudiruni gayara lan wagañeiruni Satanási?

UGUÑE weyu, ageindaguati Satanási kóntüra sun wagía le eseriwidubei lun Heowá. Ageindaguati kóntüra kristiánugu anuadirúaaña luma kóntüra “amu mudún” (Huan 10:16). Kei le subudi lubalin murusunrügaali lan lidaani, busenti lagumuchun lau hafiñen sun lubúeingu Heowá (aliiha huméi Arufudúni 12:9, 12). Ligía lunti lubéi wasigirun ageindagua luma. Gayarati san wagañeiruni? Anha, lugundun ariñagatu Bíbülia: “Gagibugua humá luma Mafia, ábame lanurahan huéi” (Santiagu 4:7).

2, 3. a) Ka uagu gunda lubéi Mafia lau hasaminarun gürigia ua lan Mafia? b) Ida liña wasubudiruni anihein lan Mafia?

2 Gíbetiña gürigia asaminarutiña úati lan Mafia. Ariñagatiña tídanrügüñein lan líburu, lidan pelíkula lánina anufudei luma lidan burí bidéu lánina huraraü láfurida Mafia hama lumafianu. Ani ariñagatiña gürigia lan súnsutiña afiñerubaña añahein lan sífirigu wuribatiña. Busenti Mafia lun hasaminarun gürigia úati lan. Ka uagu? Lugundun ménrenguntimati leyeeduniña ítara (2 Korintuna 4:4). Ligía ladügünbei lun gíbetima hamá gürigia asaminarutiña ítara.

3 Gama lumoun, subudi hamuti lubúeingu Bungiu anihein lan Satanási. Ka uagu? Ladüga ariñagatu Bíbülia ayanuha lan Satanási tun Ewa  tídangiñe aban hewe (Agumesehani 3:1-5). Ayanuhati giñe luma Heowá dan le lariñagunbei lun seriwi lan Hobu lun luágurügü katei le libihibei lúmagiñe (Hobu 1:9-12). Ayanuhati giñe luma Hesusu dan le lóuchagunbalin (Matéu 4:1-10). Ani dan le lichugúnbei Hesusu urúeime lidan irumu 1914, aba lagumeserun Satanási agayuaha hawagun kristiánugu anuadirúaaña ha ubouagubaña (Arufudúni 12:17). Ani aniheingua Satanási éibaahaña sun ha eseriwidubaña lun Bungiu uguñe weyu. Lun wagañeiruni, mosu wáfaagun lun méiguadun wamá tidoun lisadaran luma lun héreñu lan wafiñen. Lidan arütíkulu le wafurendeiruba ida luba lan wadisedun tuéi ǘrüwa tídangiñe lisadaran Satanási.

MÍÑUNLA WANAAGUN WOUNGUA

4. Ka uagu gayara lubéi wariñagun Satanási lan gürigia le barüguatimabei lungua?

4 Satanási barüguatimabei lungua. Ka uagu wariñagei le? Ladüga mabusigari lan lariñagun maricha lan Heowá lun larúeihan. Ani áluahati lun háhuduragun gürigia lun mama lun Heowá. Kei aubei warihei, barüguati Satanási lungua. Ligíati, anhein busén wabéi wagañeiruni, moun lumuti wanaagun woungua (aliiha huméi 1 Féduru 5:5). Ka san mini lubéi anaaguni unguaü? Súnwandan san wuriba lan?

5, 6. a) Afuranguagüda huméi ka lan uagu mama lubéi súnwandan lun wuribabei lan pantaü. b) Ka gayarabei lasuseredun anhein barügua wabéi woungua? c) Ru humá hénpulu hani gürigia ha meha burüguabaña houngua.

5 Mama súnwandan lun wuribabei lan pantaü. Kei hénpulu, gayarati wapantahan luagu somu katei buiti le hadügübei amu. Ítara liña meha lasandiragun apostolu Pábulu lungua luagu aban dan. Aba lariñagun panta lan hau íbirigu ha Tesalónikabaña ladüga kipu hamá úaraguni lidan lidaani turóbuli luma éibaahouni (2 Tesalónikana 1:4). Maribanti giñe lapantahan gürigia luagu somu katei buiti le lúmabei o luagu somu katei buiti le adüga láalibei. Moun lumuti wabusigaridun hau waduheñu, warasan o lau fulasu le ñein lubéi wágurahoua (Adügaü 21:39).

6 Anhein barügua wabéi woungua weferidiruba umadagu buítiña, íbini wamadagua luma Heowá. Gayarati ladügün barüguaü unguaü lun magundan wamá dan le wibihin adundehani ani lun meresibirun wamani (Sálumu 141:5). Gürigia ha barüguabaña houngua súdiniti hasandiragun houngua ani saminatiña buidu hamá hawéi ha híbiri. Mínsiñeti igaburi le lun Heowá (Esekiéli 33:28; Amosu 6:8). Ánheinti Mafia, hínsiñeti lun lun barügua hamá gürigia houngua. Chóuruti gunda lan meha lau lóuserun Nimüródu, lurúeite Ehiptu luma Abüsalón lau anaaguni unguaü (Agumesehani 10:8, 9; Áfuriduni 5:1, 2; 2 Samueli 15:4-6). Barüguati meha giñe Kaín lungua. Aban weyu, ruti Heowá aban eweridihani lun, ani máhati leresibiruni. Maganbaditi meha ani meberesegunti lafigouhan kóntüra Heowá. Ligía leferidirunbalin lumadagua luma (Agumesehani 4:6-8).

7, 8. a) Ka mini lubéi mínsiñeni luagu somu rasa? b) Ka uagu añahein lubéi gürigia mínsiñetiña gürigia lánina amu rasa houn? c) Ka uagu peliguru lubéi barüguaü unguaü lidan damuriguaü?

7 Gayarati giñe ladügün íñuguni lun hadügün gürigia dañu houn amu. Gíbetiña gürigia íñugutiña iyereegutiña lílana amu rasa houn. Ani dan le mínsiñe hamá lílana amu rasa houn gürigia, mini lan luagu samina hamá anihein lan rasa buítimati luéi amu o luagu aban lan habu sun lílana aban rasa. Ka uagu ítara habéi saragu gürigia? Ladüga íñugu hamá ani saminatiña buidu hamá hawéi ha híbiri. Barǘ lumutiña igaburi le saragu gürigia lun hageindagun hámagua, lun háfarahan lidan wuribu o lun háfarun saragu gürigia lidan aban.

Gayarati lagumuchun barügüaü unguaü lau darangilaü lelídanbei damuriguaü

8 Moun lumuti yebe lasuseredun le lidan damuriguaü. Gama lumoun, gayarati ladügün íñuguni lun hasigenehan íbirigu hámagua ani aba lagumuchun lidan aban turóbuli wéiriti. Ligía meha asuseredubei houn fiú kristiánugu lidan furumiñeti sígulu. Ligía lálügüdünbaliña Santiagu: “Ka burí uéigiñe habusenra hawuribuhan, luma hageindagun?” (Santiagu 4:1). Anhein mínsiñe habéi somu gürigia woun ani saminatiwa buidu wamá hawéi, gayarabei wadügün o wariñagun somu katei le lunti ladügün saragu dañu houn (Ariñawagúni 12:18).  Furanguti gayara lan lagumuchun barüguaü unguaü lau darangilaü le lídanbei damuriguaü.

9. Ida liña tíderaguniwa Bíbülia lun míñugun wamá ani lun masaminarun wamá buídutima wamá hawéi amu? (Ariha humóun iyawaü to lídanboun lagumeseha arütíkulu.)

9 Íderagua tumutiwa Bíbülia lun míñugun wamá ani lun maweirigun lan wasandiragun woungua hawéi ha híbiri. Ariñagati Ariñawagúni 16:5 iyereegu hamá “gürigia pántatiña” lun Heowá. Ani ariñagati Adügaü 17:26 adügati lan meha Bungiu lun hayabin sun rasa lídangiñe ábanrügü wügüri. Ligía gayara lubéi wariñagun ábanmeme lan rasa sun wagía, lugundun lídangiñe Adán wayabin súngubei. Le linarün katei, marichati wasaminarun adüga lan Bungiu fiú rasa le buídutimati luéi le líbiri. Ligía lunti lubéi wálügüdagun woungua: “Saminatina san buídutima nan hawéi lílana amu rasa o amu ageiraü?”. Ánhawa asaminara ítara, gayarabei wígirun lun lagumuchun Mafia lau ínsiñeni luma úarani le lídanbei damuriguaü (Huan 13:35). Anhein busén wabéi wagañeiruni Satanási, lunti wáfaagun lun miñun lan wanaagun woungua (Ariñawagúni 16:18).

ÍGIRA WAMÉI ÍNSIÑENI LUAGU UBÓU LUMA LUAGU SEINSU

10, 11. a) Ka ladügübei Satanási lun línsiñedun ubóu woun? b) Ka asuseredubei lun Démasi ladüga línsiñedun ubóu lun?

10 Satanási agumadihabei lidan ubóu le ídanbei wawinwanda (Huan 12:31; 1 Huan 5:19). Saragu lídangiñe katei le líchugubei ubóu le wuribati, íbini mama lan súngubei. Gama lumoun, kei le subudi lani Satanási anihein lan burí katei le wayumahabei wadügün, láfaaguba lun layusuruni sun le líchugubei ubóu lun ladügün lun maganbadi wamá lun Bungiu. Lóuchuba lun línsiñedun ubóu le woun luma lun máfaagun wamá saragu lun gaganbadi wamá lun Heowá (aliiha huméi 1 Huan 2:15, 16).

11 Ligía meha asuseredubei houn fiú hádangiñe furumiñetiña kristiánugu. Anihein meha aban kristiánu gíriti Démasi íderaguei apostolu Pábulu. Gama lumoun, ariñagati Pábulu aba lan lidin Démasi luéi ladüga hínsiñe lan ubóu lun (2 Timotéu 4:10). Ka meha hínsiñebei lun Démasi? Mariñagun tumuti Bíbülia. Háfuga hínsiñetimati meha seinsu lun sügǘ lau leseriwidun lun Heowá. Ligía aba lubéi leferidiruni chansi lun ladügün katei buíduburiti lidan leseriwidun lun Bungiu. Buiti san le ladügübei? Uá. Míchubei meha ubóu le aban katei buítimati lun luéi le líchugubei Heowá (Ariñawagúni 10:22).

12. Ida liña lálugun Satanási ladügün lun wafigouhan?

12 Kei le kristiánugu wabéi, busentiwa wagañeirun seinsu lun wóunigiruniña waduheñu buidu (1 Timotéu 5:8). Ani busenti Heowá lun wagundaarun lau wabagari. Subudi wamuti ladüga adüga lani Adán tuma Ewa lidan aban lubuidun fuluri-agei (Agumesehani 2:9). Gama lumoun, gayarati ladügüni Satanási le ladügübei lun Démasi, ani lun wéiguadun lidoun luriban ayumahani. Ida? Lau layusuruni lubafu “irisini” lun leyeeduniwa (Matéu 13:22). Busenti wafiñerun ánhawa lan agañeira saragu seinsu luma umegeguni, gúndaatimabadiwa lan. Ani anhein wafiñera katei le, weferidirubei katei buítimati le wámabei: wamadagua luma Heowá. Ariñagati Hesusu: “Úati ni aban gayaraati leseriwidun houn bián iyubudirigu, ladüga línsiñeduba aban hádangiñe lun, liyereegudáme le aban lun; úaraguabei luma aban hádangiñe, líchigame mebereseni luagu le aban. Siñati leseriwidúniwa lun Bungiu luma lun seinsu” (Matéu 6:24). Anhein seinsu lubéi súdinitimabei woun, lidamunbadiwa seinsu. Ani siñabei wasigirun eseriwida lun Heowá. Ani ligía labusenrubei Satanási. Anhein mabusenrun wabéi lagañeirun Satanási, masaminara  wamá súdinitima lan lagañeirúniwa seinsu luma umegeguni sügǘ lau lumadagu wamá Heowá (aliiha huméi 1 Timotéu 6:6-10).

MÉIGUADA WAMÁ LIDOUN FIGÓU LÁNINA AGAMARIDUNI

13. Ka hasaminarubei saragu gürigia uguñe weyu?

13 Agamariduni mamarieidunga tuguya ábanya tídangiñe sádara to layusuruboun Satanási. Uguñe weyu, gíbetiña gürigia saminatiña sügüha lan lidaani hamarieidun gürigia o herederun lidan úaraguni túmarügü gürigia to úmaboun hamarieida. Kei hénpulu, ariñagatu aban würi to nadagimeintu tidan bigibigitu siñati lan úaragua hamá maríeitiña hóuniwagua ani luagu masubudirun tan ni aban le máluahanti amu gürigia bóugudin luéi lamarieidun. Ani ariñagati aban wügüri le nadagimeinti tidan bigibigitu mama lan lunti lásügürüni aban gürigia sun libagari tuma tuguyaméme würi. Chóuruti gunda lan Mafia dan le hayanuhan gürigia burí ha wuriba luagu maríei, aban idewesei lúmagiñeti Bungiu. Busenti Satanási lun wuriba lan lidin houn sun maríeitiña. Anhein busén wabéi wagañeiruni, mosu warihini maríei ítara kei larihini Heowá.

14, 15. Anhein anihein lubéi ayumahani huagu lun hadügün somu figóu lánina agamariduni, ka gayarabei hadügüni?

14 Mosu háfaagun sun kristiánugu dandu maríeitiña kei mamarieidungiña lun méiguadun hamá lidoun agamariduni le múaranti luma lilurudun Bungiu. Ani hénrenguti katei le. Lugundun ha nibureingiñabaña aganbatiña habulofuhan hánigu paaná luagu roun hamá luma le habusenrun. Ani aganba hamutiña giñe ayanuha luagu óunaha  hamá iyawaü burí lánina agamariduni luagu gágamuru. Lidan fiú ageiraü ligiaméme larihín lounahóun ariñahani burí le luéigiñe gágamuru kéigubeirügü hamuga tounahóun hayawa irahüñü surusu. Ariñagatu Bíbülia ha lan adügübaña magíaguni “hadügüña [lan] figóu luagu hágubu guánarügü” (1 Korintuna 6:18). Gíbeeña gürigia óunwegutiña o asufurirutiña lau sandi burí le ásügürübei hawagun gürigia lídangiñe agamariduni. Ani besafu hádangiñe nibureintiña ha agamaridubaña lubaragiñe hamarieidun asakürihatiña lárigiñe. Gíbetu líburu, pelikula luma uremu adügati lun wasaminarun masuseredunbei lan ni kata woun ánhawa maganbadi lun lilurudun Bungiu. Ani iyeeni lira. Ánhawa móunigi, gayarabei wéiguadun lidoun “figóu” (Ebüréu 3:13).

15 Anhein anihein lubéi ayumahani huagu lun hadügün somu figóu lánina agamariduni, ka gayarabei hadügüni? Mosu hánharun luagu débili humá (Rómana 7:22, 23). Furíei humá lun Heowá ani amuriaha humá erei luma (Filipuna 4:6, 7, 13). Dise humá luéi katei burí le gayarabei ladügün lun hábürühan lidoun figóu ligía (Ariñawagúni 22:3). Ani danme le liabin chansi hun lun hadügüni figóu ligía, dise humá luéi lau lóufudagun (Agumesehani 39:12).

16. a) Ka ladügübei Hesusu dan le lálugunbei Mafia lóuchaguni? b) Ka wafurendeirubei lídangiñe lani Hesusu hénpulu?

16 Ka ladügübei Hesusu dan le lálugunbei Satanási lóuchaguni? Mígirunti lun leyeeduni Satanási lau sun le lunbei líchuguni lun. Mararamagungubeiti asaminara luagun. Lubaragiñe lira, aba líridun dimurei tídangiñeti Lererun Bungiu lun, lariñaga: “Tariñahare Lererun Bungiu” (aliiha huméi Matéu 4:4-10). Ka wafurendeirubei lídangiñe lani Hesusu hénpulu? Subudi lumutu meha Hesusu Lererun Bungiu buidu. Ligía dan lubéi le lóuchagunbalin Satanási, aba liábingua dimurei tídangiñeti Lererun Bungiu lidoun lichügü lau lóufudagun. Anhein busén wabéi wagañeiruni Satanási, mosu wadisedun luéi furumiñeguarügü katei le gayarati ladügün lun wafigouhan (1 Korintuna 6:9, 10).

MABUCHADALÁ WAWAGU

17, 18. a) Ka amu sádara layusuruboun Satanási? b) Ka uagu maweiridun tubéi wanigi tau lisadaran Satanási? c) Kaba asusereda lun Satanási? d) Ka uagu ru lubéi gurasu woun wasubudiruni mibihinbei lan Mafia ni kata buiti ámuñegü?

17 Lidan arütíkulu le arihatiwa ǘrüwa tídangiñe lisadaran Satanási: íñuguni, ínsiñeni luagu seinsu luma umegeguni, luma figóu lánina agamariduni. Gama lumoun, anihein amu burí sádara. Kei hénpulu, añahein íbirigu gefentiña luagu Heowá ani mabusenruntiña haduheñu lun heseriwidun lun Heowá. Añahein amu adügatiña hapanaagu leskuelarugu bula hau. Ani añahein amu awinwandutiña lidan burí ageiraü le ñein lubéi hamahada gumadimatiña lun hapurichihan. Maweiriduntu wanigi lau katei burí le, lugundun ariñagaali meha Hesusu lasusereduba lan katei libe burí le woun. Ariñagati: “Hiyereegudúba lun sun ubóu nuéigiñe; gama lumoun le áfaaguti darí lumoun lagumuhóun, ligíaba asalbara” (Matéu 10:22).

Mibihinbei Satanási ni kata buiti ámuñegü (Ariha huméi párafu 18)

18 Kaba wadüga lun magañeirun lan Satanási? Ariñagati Hesusu ánhawa lan awanda, wawinwanduba lan (Lúkasi 21:19). Úati ni aban gürigia gayarati ladügün dañu woun le ídangiñebei siñá lan wiñuragun. Ánhawa asigira eseriwida lun Heowá lau úaraguni, úabei gayarati ladügün lun weferidiruni wamadagua luma (Rómana 8:38, 39). Ani ánhawa óunwegua úaragu lun Heowá, ni Satanási magañeirunbei, ladüga lásaaragüdübadiwa Heowá lídangiñe óunweni (Huan 5:28, 29). Kábati asusereda lun Satanási? Lárigiñeme lagumuchun Bungiu lau ubóu wuribati le, ladaürübei Kristu Satanási luagu milu irumu lun meyeedun lan ni aban (Arufudúni 20:1-3). Lárigiñe, ábame lígirawagüdün Satanási ani ábame louchun leyeeduniña gürigia luagu lagumuhóun wéiyaasu. Ábahalime lagumuchún lau (Arufudúni 20:7-10). Kei aubei warihei, úati ni kata buiti lunti libihini Satanási, ánheinti hugía, gíbeti katei buiti lunti hibihini. Ligíati, gaguraasun humá, sigí humá áfaagua kóntüra Satanási ani hereñulá hafiñen. Gayarati hachoururuni gayara lan hagañeiruni Satanási.