Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Gádürü-hati irumu 2015

Afiñe humá luagu Heowá súnwandan

Afiñe humá luagu Heowá súnwandan

“Numutuniña, afiñe humá luagu Bungiu súnwandan!” (SÁLUMU 62:8)

1-3. Ka meha uagu chouru lubalin Pábulu gayara lan lafiñerun luagu Heowá? (Ariha huméi dibuhu le lídanbei lagumeseha arütíkulu.)

WÍNWANTIÑA meha kristiánugu ha Rómabaña lidan furumiñeti sígulu lidan aban dan le hénrenguti. Éibaaha hamutiña rómana lau furundei. Ariñagatiña luagu iyereegu hamá gürigia houn ani hadüga lan lágudunbei uburugu. Dáüwatiña saragu kristiánugu, ani añahein hádangiñe ru hamutiña houn animaalugu gáñitiña lun héiginiña. Dáguatiña fiú hádangiñe luagu wagabu ani aba háguduniña lun ligemerime uburugu guñoun. Subudi hamuti meha kristiánugu gayara lan lasuseredun aban lídangiñe katei ligía houn.

2 Lidan dan hénrenguti ligía, aba hárügüdüni rómana apostolu Pábulu. Gayarati álügüdagua lan lungua anhein híderagubei lubéi kristiánugu. Ka uagu? Lugundun lubaragiñe dan ligía héiguaali meha lidoun aban óunwenbu turóbuli ani mibihinti ídemuei. Gama lumoun, ariñagati Pábulu yusu lani Heowá Hesusu lun líderaguni ani ligía lan íchugubalin erei le lemegeirubei lun. Ani ariñagati giñe séfuwa lan “liyumulugugiñe liñún” (2 Timotéu 4:16, 17 TNM). *

 3 Chouru lumuti meha Pábulu gayara lan lafiñerun luagu Heowá ladüga haritagua lumuti ida liña lan meha líderaguni lidan dan le sügühalibei. Chouru lumuti meha líchuguba lan Heowá erei lun lun lawanduni turóbuli ligía luma furumiñeguarügü turóbuli le lunti liabin ámuñegü. Ani chouru lumuti buidu luagu lesefurubei lan Aburemei luéi furumiñeguarügü katei wuribati le lunbei lasuseredun lun (2 Timotéu 4:18). Afiñeti meha íbini lan siñá lan híderaguni líbirigu, líderagubei lan Heowá luma Hesusu súnwandan. Chouru lumuti meha katei le.

ARIHA HUMÉI TURÓBULI KEISI CHANSI LUN HAFIÑERUN LUAGU HEOWÁ

4, 5. a) Ka gayarabei líderaguniwa súnwandan? b) Ka lunbei hadügüni lun héredagüdüni humadagua luma Heowá?

4 Beluñahadün san lidoun aban turóbuli wéiriti ani aba hasandirun hábuguarügüñadün lan? Háfuga aba heferidiruni huádigimari o aba lan hebelurun lidoun somu turóbuli leskuelarugu. Háfuga sándiñahañadün o furumiñeguarügü amu turóbuli. Háfuga aba hírudun ani féridi huméi huguraasun lau harihin míderawagun humá. Anihein turóbuli le hénrenguti darí lun siñá hamani gürigia aranseha. Ka gayarabei hadügüni? Ariñagatu Bíbülia lun lan wafiñerun luagu Heowá (Ariñawagúni 3:5, 6). Inarüni san gayara lan wafiñerun luagu? Anha. Anihein saragu abahüdaguni tidan Bíbülia le achoururubalin woun luagu inarüni lan íderagua lániña Heowá lubúeingu.

Anhein gaturobulin hubéi, ariha huméi kei aban chansi lun hafiñerun luagu Heowá sunsuinagubei

5 Anhein lídanñadün lubéi somu turóbuli ani úatiña íderagutün, madiherida humá. Adüga humá kei Pábulu ani ariha huméi turóbuli ligía keisi aban chansi lun hafiñerun sunsuinagubei luagu Heowá. Ariha huméi giñe turóbuli ligía keisi aban chansi lun hachoururuni hungua ida liña lan lóunigirunün Heowá. Ladügüba katei le lúntima léredun hafiñen luma humadagua luma.

DAN LE MÓUNABUN LANI HEOWÁ FURÍEI LAU LÓUFUDAGUN

6. Ka uagu anihein lubéi dan hénrengu lan wafiñerun luagu Heowá dan le lídanñadiwa lan somu turóbuli?

6 Samina humá lídanñadün lan aban turóbuli hénrenguti ani wéiriti hidiheri. Adüga humaali sun hiyaraati lun haransehani ani amuriaha hugía ídemuei luma Heowá. Anhein ítara liña lubéi, gayarati darangilu humá ani afiñe hugíame líderagubadün lan Bungiu (aliiha huméi Sálumu 62:8 luma 1 Féduru 5:7). Anhein busén hubéi lumada humá Heowá le tímatimaati, mosu hafurendeirun íchigei hafiñen luagu. Anihein dan hénrengu lan wafiñerun luagu. Ka uagu? Ladüga mama súnwandan lóunabuni Heowá furíei lau lóufudagun (Sálumu 13:1, 2; 74:10; 89:46; 90:13; Abakúku 1:2).

7. Ka uagu mama lubéi súnwandan lóunabuni Heowá furíei lau lóufudagun?

7 Ka uagu mama lubéi súnwandan lóunabuni Heowá furíei lau lóufudagun? Lun gunfuranda humani, haritagua huméi ariñaga tan Bíbülia Wáguchi lan Heowá ani lirahüñü wamá (Sálumu 103:13). Mama súnwandan híchuguni agübürigu le hamuriahabei hasaanigu houn, ani dan le híchuguni houn, mama le oura habusenruni. Subudi hamuti anhein megei habéi hasaanigu somu katei o anhein memegeirun habalin. Subudi hamuti giñe anhein hamuriahaña lubéi hasaanigu aban katei le lunbei wuribabei lan houn o houn amu gürigia. Anhein híchiga agübürigu sun le hamuriahabei hasaanigu houn, ítara haba kei hadamun hasaanigu. Susereti aban katei ítarati luma Heowá. Hínsiñetiwa lun Bungiu, subudi lumuti ka lan wemegeirubei luma ídaba lan líchigei woun. Ligía mosu lubéi wafurendeirun agurabaha ani ariha wameime ida liña lan lóunabuniwa Heowá (konparárü huméi luma Isaíasi 29:16 luma 45:9).

8. Ka füramase lubéi Heowá woun?

 8 Haritagua waméi giñe subudi lani Heowá halía lan lébeda wawandun (Sálumu 103:14). Súnwandan líchuguni erei le wemegeirubei woun. Háfuga anihein dan wasandirun mawandunhadiwa lan. Gama lumoun, füramaseti Heowá anhein lan weiri lubéi turóbuli le gádanbaliwa, líderagubadiwa lan awanda (aliiha huméi 1 Korintuna 10:13). Afiñetiwa luagu subudi lani Heowá le wayarabei awanda, ani ligía íchugubei darangilaü woun.

9. Anhein móunabun lan Heowá hafurieidun lau lóufudagun, ka lunbei hadügüni?

9 Anhein móunabun lan Heowá hafurieidun lau lóufudagun, gaguraasun humá. Haritagua humá busén lan líderaguniwa, lagurabaharügüñein dan le buídutimabei lun ladügüni. Ariñagatu Bíbülia agurabaha lan Heowá lau gurasu lun líderaguniwa luma lun larufuduni lugudemehabu woun, ladüga aban lan Bungiu richati. Ani ariñagatu giñe gunda hamá ha afiñebaña luagu (Isaíasi 30:18).

DAN LE WEIRI LAN WATUROBULIN

10-12. a) Ka uagu hénrengu lubéi lounigirún aban iduhei sánditi? b) Dan le lidan wamá turóbuli ani aba wafiñerun luagu Heowá, ka asuseredubei lun wamadagua luma? Ru humá aban hénpulu.

10 Lidan párafu 2 ariñagatiwa séfuwa lan Pábulu “liyumulugugiñe liñún” (2 Timotéu 4:17 TNM). Anhein súfurihadün lubéi ladüga aban turóbuli wéiriti kei Pábulu, ka lunbei hadügüni? Súdiniti híchuguni hafiñen luagu Heowá. Kéiburi anhein hóunigiruña lubéi aban hiduhe le sánditi, chóuruti amuriahadün lan luma Heowá lun líderagunün lun here humá luma lun desidírü humá buidu. * Anhein ítara liña lubéi, gayarati darangilu humá lugundun subudi humuti gunfuranda lani Heowá gádantün. Subudi humuti líderagubadün lan lun hawandun luma lun úaragua humá lun (Sálumu 32:8).

11 Gama lumoun, aniheinbei dan genege lan hun míderagun lanün Heowá. Háfuga múaran lan hasaminan surusiagu luagu ida luba lan hetenirun lun hiduhe le sándibei. O háfuga aguraba humá yebe ídemuei hámagiñe hiduheñu, ani wéiriguagüdarügü hamuti turóbuli. Lidan kesi le súdiniti hamuriahan erei luma Heowá ani sigí huguyame ayarafada lun (aliiha huméi 1 Samueli 30:3, 6). Ani danme le gunfuranda humani ida liña lan líderagunün Heowá, laweiridaguba humadagua luma.

12 Ariha waméi hénpulu tani aban íbiri gíritu Linda. * Barütu saragu dan óunigiraña tagübürigu lubaragiñe hounwen. Abahüdaguatu anihein lan dan libidiñedun houn kaba lan hadüga, tuguya, tani weiriei luma tamulen. Anihein dan sandiguatiña houngua siñá lan houn. Gama lumoun uguñe weyu ariha tumuti furangu Heowá lan íderagubaliña lun hawandun. Chouru tumuti ligía lan íchugubalin erei le hemegeirubei houn, dántima le harihin siñá lan houn.

13. Ida liña líderagunu tafiñen aban íbiri gíritu Rosa lun tawandun aban lamiselu lárigi aban?

13 Ánhawa afiñera luagu Heowá sunsuinagubei, líderagubadiwa awanda danme le wasufurirun somu lamiselu. Ligía meha asuseredubei tun aban íbiri gíritu Rosa. Mama gefenti luagu Heowá tani weiriei ani hígiraguña meha. Ani lídanmeme dan ligía, aba líchugun tati fe luagu anihein lan aban lanarime sandi luagu. Ani fiú hati lárigiñe, aba tounwen lani tati weiriou. Sun lira aban meha lanarime lamiselu tun Rosa. Dan le tasandirubei murusun awalidaguni lídangiñe le gádanbarun, aba teseriwidun kei prekursora to adügüboun 70 oura lidan hati. Gama lumoun aba tounwen túguchu. Ka íderagubarun lun tawanduni sun katei le? Tafurieidun lun Heowá sagü weyu íbini luagu katei le maweirinti lisudinin. Ariñagatu aba lan tarihini Heowá kei aban umadaü inarüniti. Ariñagatu giñe aba lan tagumeserun afiñera luagu Heowá lubaragiñe tafiñerun tuougua o hawagu amu gürigia. Ani sandí tumuti Rosa líderaguñoun lan Heowá ladüga ibiha tani sun le temegeirubei súnwandan. Sanditu tawadigimariduña lan louba louba Heowá.

Gayarati ladügün turóbuli hadan waduheñu lun lóuchawagun ínsiñeni le wasandirubei luagu Heowá (Ariha huméi párafu 14 darí 16)

14. Ida liña gayara lan líderagunün Heowá anhein abugúa aban hiduhe lídangiñe damuriguaü?

 14 Ayanuha wamá luagu ábanya turóbuli hénrenguti. Kéiburi dan le labugún somu hiduhe lídangiñe damuriguaü. Subudi humuti ariñaga tan Bíbülia moun lumuti lan wayanuhan hama bugawaaña (1 Korintuna 5:11; 2 Huan 10). Gama lumoun, kei le hínsiñe lubéi hiduhe hun, háfuga genege lan hun hénrengu lan lagunfulirún gumadi le. Ida luba líderagunün Heowá? Líchugubei erei le hemegeirubei hun lun úaragua humá lun ani gaganbadi huguyame. Afiñe humá luagu Heowá ani ariha huméi gádantün kei aban chansi lúntima hayarafadun lun.

15. Ka meha uagu maganbadi lubéi Adán lun Heowá?

15 Gayarati konparárua lan katei le luma le ladügübei Adán. Ka uagu leiga tídangiñe furuda to tíchuguboun Ewa lun? Mama ladüga samina lan gayara lan maganbadi lan lun Bungiu ani lasigiramémeba lan awinwanda. Ariñagatu Bíbülia “mama [lan...] Adán leyeedubei Mafia” (1 Timotéu 2:14). Ligíati, ka uagu ladüga gasu tau lani weiriou lubaragiñe hamuga ladügün gasu lau Heowá? Ladüga hínsiñe tan lun sügǘ lau Heowá (Agumesehani 3:6, 17). Ka wafurendeirubei lídangiñe le?

16. Ka lunbei hínsiñetima lan woun sügǘ lau furumiñeguarügü gürigia, ani ka uagu?

16 Le ladügübei Adán arufudahati woun mosu lan línsiñedun Heowá woun sügǘ hau amu gürigia (aliiha huméi Matéu 22:37, 38). Ka uagu? Ladüga dan le hínsiñe lan Heowá woun, gayarati wíderaguniña waduheñu saragu, dandu anhein seriwi habéi lun Heowá o anhein meseriwidun habéi lun. Ligíati, áfaagua humá lun línsiñedun Heowá hun ani afiñe humá luagu eibu dan. Anhein nidiheri hubéi luagu somu hiduhe le bugawaali, abahüdagua huméi lun Heowá ida liña lan hasandiragun hungua (Rómana 12:12; Filipuna 4:6, 7). * Íbini weiri lan íruni  huagu, ariha huméi turóbuli ligía kei aban chansi lun héredagüdüni humadagua luma Heowá. ítara luba hafiñerun luagu ani hachoururubei ánhadün lan gaganbadi lun, buídutimabei lan léibugun katei.

KA LUNBEI HADÜGÜNI LIDAN HAGURABAHAÑA LAN

Ánhawa akipuragua woungua beresegu lidan apurichihani, warufudubei afiñe wamá luagu Heowá (Ariha huméi párafu 17)

17. Ánhawa akipuragua woungua beresegu lidan apurichihani, ka gayarabei wachoururuni?

17 Ka uagu lesefurei Heowá Pábulu “liyumulugugiñe liñún”? Ariñagati Pábulu lun lan lasigirun apurichiha luma lun lagumuchuni wadagimanu le líchugubei Bungiu lun (2 Timotéu 4:17). Rúlaali giñe Bungiu wadagimanu lánina apurichihani woun. Anúadira láadiwa lun wawadigimaridun luma (1 Korintuna 3:9; 1 Tesalónikana 2:4). Ánhawa akipuragua woungua beresegu lidan apurichihani, gayarabei wachoururuni líchugubei lan Heowá sun le wemegeirubei woun (Matéu 6:33). Ani ménrengunbei woun wagurabuni lóunabuni wafurieidun.

18. Ka gayarabei wadügüni lun buídutima lan wamadagua luma Heowá ani lúntima wafiñerun luagu?

18 Áfaagua humá sagü weyu lúntima héredagüdüni humadagua luma Heowá. Danme le lidan humá somu turóbuli le hénrenguti, ariha huméi kei aban chansi lun hayarafadun lun Heowá. Aliiha humóun Bíbülia, aturiaha humóun ani samina humá luagun le hafurendeirubei tídangiñe. Sigí humá afurieida lun Heowá ani sigí huguyame eseriwida lun. Anhein hadüga sun katei le, gayarabei hafiñerun luagu líderagubadün lan Heowá lidan turóbuli le ñǘbuinti hun guentó luma le lunbei liabin ámuñegü.

^ par. 2 Lau dimurei le, gayarati ladimurehaña lan Pábulu luagu aban liñún inarüniti o luagu amu turóbuli.

^ par. 10 Tidan wani garüdia anihein fiú arütíkulu le ideragubaliña sánditiña hama ha óunigirubaliña. Hadariruba fiú lídangiñe arütíkulu le tidan ¡Despertad! to lánina 8 lidan bián-hati irumu 1994, tidan to lánina 8 lidan bián-hati irumu 1997, tidan to lánina 22 lidan seingü-hati irumu 2000 luma tidan to lánina 22 lidan eneru irumu 2001.

^ par. 12 Lidan arütíkulu le, sánsiwati iri.

^ par. 16 Tidan wani garüdia anihein fiú arütíkulu le íderagubaliña haduheñu ha bugawaaña lídangiñe damuriguaü. Hadariruba fiú lídangiñe arütíkulu ligía tidan La Atalaya to lánina 1 lidan nefu-hati irumu 2006, páhina 17 darí 21, luma tidan to lánina 15 lidan eneru irumu 2007, páhina 17 darí 20.