Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Ǘrüwa-hati irumu 2015

Álügüdahani burí tuagu Bíbülia

Álügüdahani burí tuagu Bíbülia

Ka uagu lunti lubéi waritaguni lounwen Hesusu?

Kaba san luwuyeri ibagari wawinwanda ámuñegü seremei lounwen Hesusu? (Isaíasi 25:8; 33:24)

Lounwen Hesusu ligía sügǘ le súdinitimabei ubouagu, lugundun seremei lounwen gayarabei hibihini gürigia le féridi hamaalibei. Madügǘnti wügüri lun ladügün wuribani, ni lun lasandirun ni lun lounwen (Agumesehani 1:31). Gama lumoun, aba lebelurun figóu ubouagun lau lafigouhan Adán, le furumiñeti wügüri. Derege lumuti Hesusu libagari lun lesefuruniwa lídangiñe figóu luma óunweni. (Aliiha huméi Matéu 20:28 luma Rómana 6:23.)

Arufuda lumuti meha Bungiu ínsiñeni le lasandirubei wawagu lau lóunahani Liráü ubouagun lun lounwen wawagu (1 Huan 4:9, 10). Óunaha lumutiña meha Hesusu lani disipulugu lun haritaguni lounwen lau aban adineruni le ñein lubéi féinrügüba lan tuma diwéin ayusurúa. Lau wadügüni adineruni le sagü irumu wíchuguña seremei lun Bungiu luma lun Liráü luagu ínsiñeni le arufuda hamaalibei woun. (Aliiha huméi Lúkasi 22:19, 20.)

Ka lúnbaña heigin tídangiñe fein ani gurá hagía tídangiñe diwéin?

Dan le layanuhanbei Hesusu hama lani disipulugu luagu furumiñeti wéiyaasu libügürü laritawagún lounwen, adimurehati luagu aban daradu (Matéu 26:26-28). Dará lumuti daradu ligía üma houn luma houn amu gürigia lun harúeihan luma lun hafadirihan luma Kristu sielu. Hádangiñe saragu míñunu gürigia ha lúnbaña haritaguni lounwen Hesusu, gürigiarügübaña ha eiga tídangiñe fein ani gurá hagía tídangiñe diwéin. (Aliiha huméi Arufudúni 5:10.)

Barühali Heowá kéiburi bián-milu irumu guentó anúadahaña ha lúnbaña harúeihan luma Lisaani (Lúkasi 12:32). Míbetiña gürigia ha dan le konparárü wamaniña hama ha lúnbaña hawinwandun ya ubouagu lun súnwandan. (Aliiha huméi Arufudúni 7:4, 9, 17.)

 

Lanwoun ariñahani

WAWAGU

Laritaguagüle lounwen Hesusu

Sagü irumu hóundaragun saragu míñunu gürigia lun haritaguni lagunfulirun Hesusu irumu lúmagiñe lounwen. Amisurahóuatün lun hachülürün aganbei ka lan uagu lunti lubéi súdini lan adamuridaguni le hun.

Kátima san tarufudahabei Bíbülia?

Lebegi asalbaruni ligía idewesei wéiritimabei lúmagiñe Bungiu

Katei san lebegibei asalbaruni? Ka buiti gayaraabei lanügüni hun?