Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Ǘrüwa-hati irumu 2015

Gayaraagili san hadarirun aban gürigia le afiñeti lun hamarieidun?

Gayaraagili san hadarirun aban gürigia le afiñeti lun hamarieidun?

“Madaritina ni aban gefenti luagu Heowá lun namarieidun, ani hanufudetina luéi nerederun nábugua.”

“Añahein eyeriñu ha mama gefentiña luagu Heowá ani buítiña. Buiti housan, hínsiñehabutiña ani aransetiña lun hídehan. Ani maribanti harihini gefén nan luagu Heowá. Darí lun buídutima lan harihín sügǘ hau saragu íbirigu.”

Anihán dimurei burí le ariñaga hamaalibei fiú íbirigu ha mamarieidungiña. Gama lumoun, subudi hamuti busén lan Heowá lun hamarieidun lubúeingu luma aban gürigia le afiñeti luagu. Mini lan le lunti lan wamarieidun lúmarügü aban gefenti luagu Heowá le badiseihali (1 Korintuna 7:39). Kati uagu hasaminara íbirigu ha ítara?

KA UAGU HASAMINARA ÍTARA?

Añahein asaminarutiña ítara ladüga afiñe hamá luagu gíbetima hamá íbirigu würiña mamarieidungiña sügǘ hau wügüriña. Ani inarüni ítara liña lan lidan saragu ageiraü. Kéiburi Corea, añahein 57 würiña hama 43 wügüriña hádangiñe kada 100 gefentiña. Ani Colombia, hádangiñe kada 100 gefentiña, añahein 66 würiña hama 34 wügüriña.

Lidan saragu ageiraü héchutiña lun líchugun adari seinsu o idewesei houn tagübürigu ladari lun gayara lan lamarieidun tuma. Dan le mama hamá Gefentiña agübürigu, gayarati hamuriahan saragu seinsu tuagu o idewesei le séruti. Gama lumoun, añahein íbirigu mamarieidungiña ha siñati hagañeinhani idewesei burí ligía. Ligía hasaminarunbei fiú íbirigu würiña siñabei lan hamarieidun luma aban gefenti luagu Heowá. * (Aliiha huméi abürüdǘni.)

AFIÑEBÁ LUAGU HEOWÁ

Anhein saminañahaadibu lubéi ítara, haritaguabei  subudi lani Heowá ida liña lan basandiragun bungua ani gunfuranda lumutibu (2 Krónikasi 6:29, 30).

Íbini ítara, ariñagati Heowá lunti lan wamarieidun lúmarügü aban gürigia le eseriwiduti lun. Ka uagu? Ladüga subudi lumuti ka lan buídutimabei woun ani busenti lóunigiruniwa. Mabusenrunti lun desidírü wamá wuriba lárigiñe ábame wasufurirun. Lidan meha lidaani profeta Neemíasi, gíbetiña meha huríu amarieidutiña hama würiña ha meseriwiduntiña lun Heowá. Ligía laritaguagüdünbaliña Neemíasi luagun le asuseredubei lun urúei Salomón. Aba lariñagun houn hínsiñeti lan meha Salomón lun Heowá ani aba líchuguni urúeime Ísüraeli. Gama lumoun, aba lamarieidun hama würiña ha meseriwiduntiña lun Heowá ani aba hadügün lun lafigouhan (Neemíasi 13:23-26). Busenti Heowá lun buidu lan lidin woun. Ligía lariñagunbei houn kristiánugu lun hamarieidun hámarügü gürigia ha eseriwidutiña lun (Sálumu 19:7-10; Isaíasi 48:17, 18). Subudi wamuti garicha lan lun lariñaguni woun ka lan gayarabei wadügüni luma le siñabei. Rútiwa giñe seremei lun luagu líchugun adundehani woun lugundun ítara liña larufuduni línsiñehabu woun ani súnwandan lahuudun woun lun wabuidun guánarügü (Ariñawagúni 1:5).

Ánhabu amarieida luma aban gürigia le mínsiñeti Heowá lun, gayarabei ladügün lun bígiruni beseriwidun lun Heowá. Chóuruti mabusenrun ban lun lasuseredun lira (2 Korintuna 6:14). Haritaguabei lun lan wabuidun guánarügü ladundehawa Heowá. Le linarün katei, desidírühaña saragu lubúeingu Heowá buidu ani falá hamuti ladundehan. Gama lumoun, añahein amu madügün hamuti.

GAYARAAGILI

Aba tagumeserun aban íbiri australiana gíritu Maggy áfurida luma aban gürigia le meseriwidunti lun Heowá. * (Arihabei abürüdǘni.) Ariñagatu féridi tan saragu adamuridaguni lun táfuridun luma. Ani aba lagadeirun tumadagua luma Heowá. Gumesetu giñe aban würi nibureingiru gíritu Ratana áfurida luma aban tani paaná leskuelarugu. Aba lagumeserun aturiahoun Bíbülia lúnrügü yarafa lan tun. Lau lásügürün dan, aba tígiruni teseriwidun lun Heowá ani aba tidin lidoun amu relihión lun tamarieidun luma.

Aban íbiri gíritu Ndenguè lídangiñe ageiraü le gíribei Camerún, aba tamarieidun dan le 19 irumu tau luma aban wügüri le mefenti luagu Heowá. Füramaseti meha tun gayarabei lan tasigirun eseriwida lun Heowá. Gama lumoun, bián dimaasu lárigiñe maríei aba lamahadun tidin adamuridagua. Aba tariñagun aba lan tasandiragun tungua kamá tábuguarügüñoun ani aba lan tayahuahan saragu. Aba tíchugun fe mámaru lan tuguya labureme tibagari. Ani sandiguatu meha tungua lau duru súnwandan.

Háfuga basaminarun: “Añahein íbirigu ha amarieidutiña hama gürigia ha meseriwiduntiña lun Heowá ani buítiña gürigia hagía”. Inarüni katei le. Gama lumoun, ánhabu amarieida luma aban gürigia ítarati, kaba san lani lira efekütu lidan bumadagua luma Heowá? Ida luba basandiragun bungua ladüga masigirunbani adundehani le líchugubei Heowá bun lun bubuidun guánarügü? Ani le súdinitimabei, ida luba san lasandiragun Heowá lungua? (Ariñawagúni 1:33.)

Gíbetiña íbirigu gaganbaditiña lun ladundehan Heowá ani aba hamarieidun luma aban gefenti luagu Heowá. Chouru hamuti ligía lan buídutimabei. Ani busentiña giñe hagundaaragüdüni Heowá. Kei hénpulu, anuhein aban íbiri Japón gíritu Michiko busentu meha tafalaruni le lariñagubei Bungiu, gama lumoun, busentiña meha tiduheñu lun tamarieidun luma aban gürigia le meseriwidunti lun Heowá. Ligibuagun lira, aba meha hamarieidun tumadagu hama wügüriña gefentiña luagu Heowá ani tuguya anuheingua tábugua. Hénrenguti meha katei le tun. Gama lumoun, ariñagatu íderagua lanu taritaguni mama lan maríei anügübei ugundani. Le súdinitimabei eseriwiduni lun Heowá, Bungiu le gúndaabei (1 Timotéu 1:11). Chouru tumuti giñe ru lani Heowá le wemegeirubei woun. Ligía tariñagunbei anhein lan busén tubéi aban gürigia tamarieidun, ani madaritu aban gürigia le eseriwiduti lun Heowá, buítimati tasigirun tábugua lubarügü tadariruni. Lau lásügürün dan, aba tamarieidun Michiko luma aban Gefenti. Ani gúndaatu lau gaganbadi tan lun Heowá.

Añahein giñe íbirigu ha agurabahatiña lun hamarieidun tuma gürigia to buíduboun houn. Kéiburi  aban íbiri australiana gíriti Bill ariñagati anihein lan dan tínsiñedun somu würi to mama gefentu lun. Gama lumoun, madügünti saragu umadaguaü hama ladüga mabusenrunti gadaradun lan tuma aban gürigia to meseriwiduntu lun Heowá. Lau lásügürün dan, añahein meha giñe somu íbirigu würiña ínsiñedutiña lun. Gama lumoun mabusenruntiña ni kata luma. Agurabahati Bill 30 irumu darí ladarirun aban würi to busentu tadügüni ligiaméme katei kei ligía lidan heseriwidun. Ariñagati Bill masakürihan lan luagu ni kata. Gúndaati, gayarati lapurichihan úara tuma lani weiriou, haturiahan ani seriwi hagía lun Heowá úara. Gúndaati giñe dan le hama lan tumadagu ladüga seriwi hamá giñe lun Heowá. Ariñagati héretima lan lamarieidun ladüga gaganbadi hamá lun ladundehan Heowá.

KA GAYARABEI BADÜGÜNI LIDAN ABUNHA LAN AGURABAHA?

Anhein mamarieidungidibu lubéi ladüga busén ban gaganbadi ban lun Heowá, ka gayarabei líderagunibu lun basigirun agurabaha? Gayarati basaminarun luagun ugundani le lasandirubei Heowá dan le larihini busén ban gaganbadi ban lun (1 Samueli 15:22; Ariñawagúni 27:11). Líderagubadibu giñe bafurieidun lun súnwandan lun bariñaguni lun ida liña lan basandiragun bungua (Sálumu 62:8). Ani ánhabu áfaagua lun méiguadun ban lidoun óuchawaguni luma lidoun luriban ayumahani, héretimabei bumadagua luma Heowá eibu dan. Haritaguabei seru ban luma Heowá. Gayarati bachoururuni berese lan Heowá lau le basandirubei. Úati füramase lan líchuguba lan aban bani weiriei o aban bani weiriou, gama lumoun subudi lumuti ida luba lan líderagunibu lun gunda ban (Sálumu 145:16; Matéu 6:32).

Gayarati aniheinbei lan dan basandiragun bungua kei Dawidi. Luagu aban weyu wéiriti íruni le luágubei darí lun lamuriahan luma Heowá lun líderaguni lau lóufudagun ladüga úaali lan erei luagu lun lasigirun awanda (Sálumu 143:5-7, 10). Gama lumoun, mabuchadalá buagu. Agurababei lóunabuni Heowá bafurieidun. Aliihaboun Bíbülia ani saminabá luagun le baliihabei. Ítara luba basubudiruni ka lan lagurabahabei Heowá búmagiñe luma ida liña lan líderaguniña lubúeingu lidan binadu dan. Líderagubadibu katei le lun bafiñerun luagu luma lun gaganbadi ban lun.

Wéiriti hebegi ha mamarieidungiñabaña lun damuriguaü. Saragu hádangiñe rútiña ídemuei houn nibureintiña luma houn iduheñu

Ka amu katei gayarabei badügüni? Áfaaguaba lun babuiduragüdüni bumadagua luma Heowá luma lun buídutima lan bóuserun. Gayarati giñe bafurendeirun anaagua bungua buidu hama amu luma lun gíchigadi ban, lun benefatima ban ani úaragua buguyame lun Heowá. Buiti igaburi burí le lun gunda hamá maríeitiña (Agumesehani 24:16-21; Rudu 1:16, 17; 2:6, 7, 11; Ariñawagúni 31:10-27). Áfaaguaba lun beresegu ban lidan apurichihani luma lidan adamuridaguni. Líderagubadibu katei le lun ua lan desidírü ban wuriba. Ariñagati Bill fureseti lan lásügürün dan le lábuguarügü lubéi ladüga leseriwiduña lan kei prekursoru.

Gayaraagili gaganbadiwa lan lun ladundehan Heowá lun wamarieidun luma aban gürigia le seriwiti lun Heowá. Ánhawa desidírü wamarieidun luma aban gefenti luagu Heowá, wíchuguba uéiriguni lun Bungiu ani gúndabadiwa. Ariñagatu Bíbülia le lan gaganbaditi lun Heowá lau sun lugundan gúndaabei lan lun súnwandan (Sálumu 112:1, 3). Ligíati, mabulieidabei lilurudun Heowá lun bamarieidun lúmarügü aban gürigia le eseriwiduti lun Bungiu.

^ par. 7 Lidan arütíkulu le wayanuhaba según ligaburi hasaminarun íbirigu würiña. Gama lumoun, huuti giñe adundehani burí le houn wügüriña.

^ par. 13 Sánsiwati iri.