Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Ǘrüwa-hati irumu 2015

Íderagua wamaña líbirigu Kristu

Íderagua wamaña líbirigu Kristu

“Furumiñeguarügü katei le hadügübei lun aban hádangiñe namulenu, ka lan lǘnabunbei, nun giñe hadügei.” (MATÉU 25:40)

1, 2. a) Ka hénpulu labahüdagubei Hesusu houn lumadagu? (Ariha huméi dibuhu le lídanbei lagumeseha arütíkulu.) b) Ka burí álügüdahani hawaguti gábara hama mudún lunbei wakutihani lidan arütíkulu le?

AYANUHAALI Hesusu hama lumadagu Féduru, Andürési, Santiagu luma Huan. Sun liña labahüdaguni hénpulu luáguti musu úaraguati, hawaguti diisi nibureintiña luma luáguti seinsu. Gama lumoun, mégeigili aban abahüdaguni lunti labahüdaguni houn. Ábati layanuhan houn luagu dan le lunbei liabin “Wügüri Garaüwarügüti” lun laguseragüdüniña “sun gürigia”. Aba lariñagun houn lafanreinragubaña lan “Wügüri Garaüwarügüti” gürigia lidan bián sétanu: gábara hama mudún. Lárigiñe, aba líridun aban sétanu súdiniti: ‘lamulenu urúei’ (aliiha huméi Matéu 25:31-46; ariha huméi bérusu 41 luma 46 lidan abürüdǘni). *

2 Ítara kei apostolugu, súdiniti giñe le mini lubéi hénpulu burí le houn kristiánugu uguñe weyu ladüga lídangiñe dipeni lan habagari. Ariñagati Hesusu ñeinbei lan aban sétanu ibihiti ibagari magumuchaditi luma aban agünrinchawaguti. Ligíati, lun wawinwandun mosu gunfuranda wamani lererun buidu ani falá wameime lidan wabagari. Lidan arütíkulu  le wakutihabei álügüdahani burí le: Ida liña líderaguniwa Heowá lun gunfuranda wamani hénpulu ligía? Ka uagu wariñaga afuranguagüda lani lisudinin apurichihani? Kátaña lúnbaña hapurichihan? Ani, ka uagu anihán lubéi lidaani úaragua wamá lun “urúei” luma houn “lamulenu”?

LAFURANGUAGÜDÜNI HEOWÁ LE MINI LUBÉI HÉNPULU

3, 4. a) Ka wemegeirubei wasubudirun lun gunfuranda wamani hénpulu hawaguti mudún hama gábara? b) Ka tafuranguagüdübei Garüdia Atalaya lidan irumu 1881?

3 Lun gunfuranda wamani hénpulu hawaguti mudún hama gábara, mégeitiwa gunfuranda wamá ǘrüwa katei. Furumiñe, ka lan mini lubéi “Wügüri Garaüwarügüti”, urúei, líbirigu urúei, mudún hama gábara. Libiaman, ídaba lan desidírü lani Wügüri Garaüwarügüti kátaña lan gábarabaña luma ka lan mudunbaña. Ani Lǘrüwan, ka lan uagu lariñaga mudún hamá fiú gürigia ani gábara hamá ha híbiri.

4 Lidan irumu 1881 ariñagatu Garüdia Atalaya luagu Hesusu lan ‘Wügüribei Garaüwarügüti’ o urúei. Saminatiña meha giñe furumiñetiña aturiahatiña Bíbülia dan le lan layanuhanbei Hesusu hawagu ‘líbirigu’ layanuhaña lan dandu hawagu ha lúnbaña harúeihan sielu kei hawagu ha lúnbaña hawinwandun ubouagu. Ídaba san desidírü lani Hesusu ka lan mudunbaña luma ka lan gábarabaña? Lidan milu irumu lánina larúeihan Kristu. Kábati uagu desidírü lan mudún hamá fiú gürigia? Ladüga áyeiha hamani gürigia hagía línsiñehabu Bungiu lidan sun le hadügübei.

5. Lidan irumu 1923, ida liña gunfuranda hamani lumutuniña Bungiu abahüdaguni hawaguti mudún hama gábara?

5 Lárigiñe, aba líderaguniña Heowá lumutuniña lun buídutima lan gunfuranda hamani hénpulu ligía. Tidan garüdia Watch Tower to lánina 15 lidan diisi-hati irumu 1923 chóurugüda tumuti luagu Hesusu lan “Wügüri Garaüwarügüti”. Gama lumoun, yúsutu saragu bérusu tídangiñe Bíbülia lun tarufuduni luagu ha lan lúnbaña harúeihan luma Kristu sielu líbirigubaña ani ha amu mudún yaaba lan ubouagu hawinwanda. Afuranguagüda tumuti san ídaba lan hafanreinrawagúa mudún hawéi gábara? Anha. Kei le ariñaga lan lidan hénpulu luagu ñéinbaña lan gürigia íderagutiña líbirigu Kristu hama ha mídehantiña, mosu lan hafanreinrawagún danme le añaheingua ya ubouagu, lubaragiñe hawarirun sielun lun harúeihan luma Kristu luagu milu irumu. Ka san uagu hiridúba lubéi fiú kei mudún? Ladüga hafiñeruba lan luagu Hesusu luma luagu lanügüba lan Larúeihan Bungiu aban ibagari buítimati.

6. Ida liña lasansirun ligaburi wafuranguagüdüni hénpulu le lidan irumu 1995?

6 Luagu saragu irumu saminatiwa meha según lan ligaburi hóunabun gürigia lun uganu buiti lidan lagumuhóun dan ítara liña lan hafanreinhóun keisi gábara o mudún. Ánhaña ánhara lun uganu buiti, aba hanügǘn kei mudún, ánhaña maha, aba hanügǘn keisi gábara. Gama lumoun lidan irumu 1995 aba lasansirun ligaburi gunfurandawa lan hénpulu ligía. Konparárü tumuti meha garüdia to Matéu 24:29-31 luma Matéu 25:31, 32 (aliiha huméi). Ani afuranguagüdatu giñe laguseragüdübaña lan Hesusu gürigia danme le liabin kei “urúei” lidan óunwenbu asufuriruni. * (Ariha huméi abürüdǘni.)

Gúndaatiwa lau líderaguniwa Heowá lun gunfuranda wamani hénpulu burí le labahüdagubei Hesusu

7. Ka gunfuranda wabéi guentó luagu hénpulu hawaguti mudún hama gábara?

7 Guentó, buídutimahali gunfuranda wamani hénpulu hawaguti mudún hama gábara. Subudi wamaali Hesusu lan ‘Wügüribei Garaüwarügüti’ o  “urúei”. ‘Líbirigu’ urúei kristiánugu ha anuadirúaañabaña lau sífiri sandu ani ha lúnbaña harúeihan luma Hesusu sielu (Rómana 8:16, 17). “Gábara” hama “mudún” gürigia ha lídangiñetiña sun ubóu. Ha lúnbaña haguseragüdüniwa lidoun lagumuha óunwenbu asufuriruni, le málühalibei agumesera. Ka san uagu ñéinbaña lubéi gürigia iridútiña kei mudún híbiri kei gábara? Ladüga ligaburi hóuseruniña líbirigu Kristu ha yáabaña ubouagu. Wéiriti weteingiruni Heowá luagu líderaguniwa luagu saragu irumu lun gunfuranda wamani hénpulu le luma amu burí hénpulu le lídanbei Matéu kapítulu 24 luma 25.

ARUFUDAHATI ABAHÜDAGUNI LE WOUN WEIRI LAN LISUDININ APURICHIHANI

8, 9. Ka uagu larihaña Hesusu ha iridúbaña kei mudún keisi gürigia richatiña?

8 Mayanuhanti Hesusu luagu apurichihani lidan hénpulu hawaguti mudún hama gábara. Ida liñati wasubudiruni afuranguagüda lani hénpulu le lisudinin apurichihani?

9 Lun wadariruni óunabagülei, mosu gunfuranda wamani arufudaha lan Hesusu somu katei luagu le mini lubéi hénpulu ligía. Mama meha layanuhaña hawagu mudún hama gábara ha inarünitiña. Mama giñe lariñaguña ha lan iridútiña kei mudún mosu lan híchugun heigin tuma hadaüragun líbirigu Kristu ani ñüdün hagíame arihaña furisunrugu. Layusuruñein meha hénpulu ligía lun larufuduni houn ida luba lan hóuserun. Ayanuhati Hesusu hawagu kei gürigia richatiña ladüga subudi hamani añaheingua lan kristiánugu anuadirúaaña ubouagu ani íderagua hamutiña lidan lagumuhóun dan le (Matéu 10:40-42; 25:40, 46, TNM; 2 Timotéu 3:1-5.

10. Ida luba híderaguniña mudún líbirigu Kristu?

10 Dan le layanuhanbei Hesusu luagu hénpulu hawaguti mudún hama gábara, ayanuhati giñe luagu le lunbei lasuseredun lidan lagumuhóun dan (Matéu 24:3). Kei hénpulu, ariñagati: “Lapurichihóuba uganu buiti le luáguti larúeihan Bungiu lidan sun ubóu” (Matéu 24:14). Lubaragiñeraü layanuhan hawagu mudún hama gábara, ru lumuti hénpulu luáguti seinsu. Ariñagati arufudaha lan hénpulu ligía houn kristiánugu anuadirúaaña luagu mosu lan hawadigimaridun saragu lidan apurichihani. Gama lumoun, ida luba meha san hapurichihan murusun kristiánugu anuadirúaaña ha ubouagubaña lidan lidaani Hesusu houn sun gürigia ha ubouagubaña? Arufuda lumuti hénpulu hawaguti mudún hama gábara luagu hibihiba lan ídemuei hámagiñe amu mudún. Ida? Lau hídehan lidan apurichihani. Ka mini lubéi le? Buídurügüti meha san lau híderaguniña lau seinsu o híchugun dǘgüdaguaü houn, odi agurabúati amu katei hámagiñe?

KA LÚNBAÑA HAPURICHIHAN

11. Ka álügüdahani gayarabei wadügüni wóuniwagua, ani ka uagu?

11 Uguñe weyu, añaheinhaña widü-míñunu lani Hesusu disipulugu ubouagu, ani mama kristiánugu anuadirúaaña súngubei. Mama houn líchigei Hesusu seinsu. Houn kristiánugu anuadirúaaña líchigei (Matéu 25:14-18). Ligía hálügüdagunbei fiú houngua, anhein mama lubéi houn amu mudún líchigei Hesusu seinsu, ka uagu mosu lubéi hapurichihan? Ariha waméi ka lan uagu.

12. Ka wafurendeirubei lídangiñe lererun Hesusu lidan Matéu 28:19, 20?

12 Ariñagati Hesusu houn sun lani disipulugu lun hapurichihan. Lárigiñe láguyugun, ariñagati Hesusu houn lani disipulugu lun lan ‘hadügün disipulugu’ luma lun harufudahani sun le arufuda láalibei houn. Ligíati, mosu meha gaganbadi hamá disipulugu lun gumadi ligía lun hapurichihan (aliiha huméi Matéu 28:19, 20). Furanguti lubeiti sun lan lani Hesusu disipulugu mosu hapurichihan, meberesenga anhein siéluba lubéi hawinwanda o ya ubouagu (Adügaü 10:42).

Súngubei wagía lunti wapurichihan, meberesenga anhein wawinwanduba lubéi sielu o ubouagu

13. Ka wafurendeirubei lídangiñe arufudúni le larihibei Huan?

 13 Tidan líburu Arufudúni, furendeitiwa giñe lunti lan hapurichihan dandu kristiánugu anuadirúaaña kei amu gürigia. Lidan aban arufudúni arihati apostolu Huan aban “adari” to amisurahanbaliña gürigia lun ‘hatun lídangiñe duna le íchugubei ibagari’. Adari tuguya, kristiánugu anuadirúaaña ha lúnbaña harúeihan luma Kristu sielu (Arufudúni 14:1, 3; 22:17). Mini lan duna, sun katei le ladügübei Heowá lun lesefuruniña gürigia lídangiñe figóu luma óunweni lau lani Hesusu sákürifisiu (Matéu 20:28; Huan 3:16; 1 Huan 4:9, 10). Súdiniti arufudahani luáguti lebegi asalbaruni lidan wapurichihan, ani íderagua hamutiña kristiánugu anuadirúaaña gürigia lun gunfuranda hamani ida luba lan gayara lan lahuudun houn (1 Korintuna 1:23). Gama lumoun, lidan arufudúni ligía ayanuhóuati luagu ábanya sétanu, ha lúnbaña hawinwandun lun súnwandan ya ubouagu. Ariñagawagúati giñe houn lun hamisurahaniña gürigia lun hatun lídangiñe duna le íchugubei ibagari. Ani adüga hamuti lau hapurichihan. Arufudahati lubeiti arufudúni le woun súngubei lan wagía mosu wapurichihan.

14. Ida liña gaganbadi wamá lun “lilurudun Kristu”?

14 Sun ha gaganbadibaña lun “lilurudun Kristu” mosu hapurichihan (Galasiana 6:2). Busenti Heowá lun gaganbadi hamá sun ha áhuduragubaña lun lun lúrudu le. Lidan binadu dan, agurabati meha Heowá lun dandu lan ísüraelina kei terencha ha awinwandubaña ñein lun gaganbadi hamá lun lilurudun (Áfuriduni 12:49; Fádirigu 24:22). Íbini mámadiwa lan lábugiñe lilurudun Moisesi, súngubei wagía, dandu kristiánugu anuadirúaaña kei amu mudún, lábugiñeñadiwa “lilurudun Kristu”. Lidan lúrudu ligía anihein sun le meha larufudahabei Hesusu, ani aban lídangiñe larufudahan le súdinitimabei ligía le ariñagubei lun hínsiñehabu wamá (Huan 13:35; Santiagu 2:8). Samina wamá san: ka san igaburi buídutimabei lun warufuduni hínsiñe lan Bungiu  woun, hínsiñe lan Kristu woun ani hínsiñe hagía gürigia woun? Chóuruti arufuda wamani lau wapurichihan (Huan 15:10; Adügaü 1:8).

15. Ka uagu gayara lubéi wariñagun óunaha lániña Hesusu sun lani disipulugu lun hapurichihan?

15 Le lariñagubei Hesusu houn fiú hádangiñe lani disipulugu anihein dan hounti lan saragu. Kéiburi dan le ladügünbalin Hesusu daradu luáguti arúeihani, únsurügüñanu apostolugu ñein. Ani le linarün katei, añahein 144,000 lidan daradu ligía (Lúkasi 22:29, 30; Arufudúni 5:10; 7:4-8). Ítarameme, dan le láguyugunbei Hesusu, fiúrügüñanu hádangiñe ha afalarubalin aganbuti lariñagun mosu lan hapurichihan (Adügaü 10:40-42; 1 Korintuna 15:6). Gama lumoun, sun kristiánugu ha lánina furumiñeti sígulu gaganbaditiña meha lun gumadi ligía, lugundun gunfuranda hamuti meha ligía lan agurabúbei hámagiñe (Adügaü 8:4; 1 Féduru 1:8). Íbini ua lan ni aban wádangiñe aganbuti lariñagun Hesusu mosu lan wapurichihan, houstamémediwa widü-míñunu Gefentiña agunfulirei gumadi ligía. Ítara liña warufuduni afiñe wamá luagu (Santiagu 2:18).

ANIHÁN LIDAANI WÍDERAGUNIÑA LÍBIRIGU KRISTU

16-18. a) Ida liña gayara lan wíderaguniña líbirigu Kristu? b) Ka uagu súdini lubéi lun wíderaguniña líbirigu Kristu guentó?

16 Lageindaguña Satanási hama líbirigu kristu ha añaheinguabaña ya ubouagu. Ani eibu dan héretimati lagayuahan ladüga subudi lumuti “murusunrügaali lan lidaani” (Arufudúni 12:9, 12, 17). Íbini aniha lan Satanási éibaahaña, sigitiña kristiánugu anuadirúaaña apurichiha ani gíbetimahaña gürigia aganbuti uganu buiti. Furanguti líderaguñanu lan Kristu kristiánugu anuadirúaaña, ani ligía lan adundehabaliña (Matéu 28:20).

Gúndaatiwa lau wíderaguniña líbirigu Kristu

17 Aban óunwenbu chansi lúmagiñe Heowá gayara lan wíderaguniña líbirigu Kristu apurichiha. Ídehatiwa giñe lau wíchugun budagia luma lau wawadigimaridun lidan tábunawagun luban adamuridaguni tuma muna lun adamurini wéiriti tuma burí sukursáli. Íderagua wamutiña giñe dan le gaganbadi wamá houn wéiyaaña lidan afiñeni lau úaraguni luma houn amu íbirigu ha lanúadirubaña “musu úaraguati” (Matéu 24:45-47; Ebüréu 13:17).

18 Yarafa madise, heresibirubei kristiánugu anuadirúaaña lagumuhóun haseyun. Ábameti lagumeserun óunwenbu asufuriruni (Arufudúni 7:1-3). Lubaragiñe lagumeserun Arümahedón, lanügübaña Hesusu kristiánugu anuadirúaaña sielun (Matéu 13:41-43). Ligíati, anhein busén wabéi lun líriduniwa Hesusu keisi mudún, lunti úaragua wamá houn líbirigu lúmagiñe oura le.

Íderagua wamutiña líbirigu Kristu lidan ámuñegueinarügü igaburi (Ariha huméi párafu 17)

^ par. 1 Matéu 25:41 (TNM): “Lariñagameti houn ha luéigiñebaña lubaünan: ‘Heiba nuéi, huguya le íñarawaguaalibei, lidoun watu gemeti le magumuchadibei, le aranserúaalibei lubá Mafia hama lani ánheligu’”. Matéu 25:46 (TNM): “Ábameti lagidarún habagari hawéi lun sun dan, ánhañati ha richaguabaña habihiba ibagari magumuchaditi”.

^ par. 6 Akutihóuati hénpulu burí le buidu lidan arütíkulu “¿En qué condición se hallará usted cuando esté de pie delante del trono de juicio?” luma “¿Qué les depara el futuro a las ovejas y las cabras?” tidan La Atalaya to lánina 15 lidan diisi-hati irumu 1995.