Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Bián-hati irumu 2015

Chülüti larufudahan Heowá hamoun sun néchani

Chülüti larufudahan Heowá hamoun sun néchani

‘Aba lafiñerun gumadimati lugundun aba taweiridun lanigi lau larufudahan Heowá.’ (ADÜGAÜ 13:12, TNM)

1-3. Ka uagu hénrengubei lubéi meha lapurichihóun lidan sun Ubóu?

ÓUNAHA lumutiña meha Hesusu lani disipulugu lun hapurichihani uganu buiti houn “gürigia ha lílana sun fulasu”. Lun hagunfulirun lau wadagimanu ligía, mosu meha hapurichihan lidan sun Ubóu (Matéu 24:14; 28:19). Wéiribei wadagimanu ligía!

2 Hínsiñeti meha Hesusu houn disipulugu ani hínsiñeti meha giñe uganu le hapurichihabei houn. Gama lumoun, háfuga meha samina hamá hénrengubei lan hapurichihan lidan sun Ubóu. Ka uagu? Furumiñe, ladüga murusunrügüñanu meha. Libiaman, ladüga harufudahan luagu Liráü lan Bungiu Hesusu ani subuditi meha houn gürigia hilaali lan Hesusu. Lǘrüwan, ladüga ariñagatiña meha besafu gürigia luagu malulin lan hafurendeirun lani Hesusu disipulugu (Adügaü 4:13). Aturiahaaña meha lábutigu relihión tidan burí leskuela to wéinamutu, ánhañati lani Hesusu disipulugu malulinti haturiahan. Ani ámuti uganu le meha harufudahabei luéi échuni huríu. Ani binaduhali meha giñe échuni ligía. Háfuga ligía hálügüdagunbei disipulugu houngua: “Anhein mineben wabéi houn gürigia, ida luba san haganbuniwa?”.

3 Ligadürün, subudi hamuti meha disipulugu hayereeguduba lan houn gürigia, héibaahouba lan ani áfarawagua hagíame lugundun ariñaga laali meha Hesusu houn (Lúkasi 21:16, 17). Liseingün, subudi hamuti meha giñe  luagu hagarabaaguba lan fiú haduheñu hama hamadagu hawagun. Lisisin, subudi hamuti luagu harufudahaba lan fiú disipulugu iyeeni. Ani lisedün, subudi hamuti luagu mósubei lan hapurichihan lidan burí fulasu denchati (Matéu 24:10-12). Dan le hasaminarun luagun turóbuli burí le, háfuga álügüdaguatiña meha disipulugu houngua ida luba lan hapurichihan “chülǘ lumoun lidise-agei fulasu ubouagu” (Adügaü 1:8).

4. Ida liña meha lidin houn disipulugu lau hapurichihan?

4 Lau sun subudi hamani meha disipulugu hénrengubei lan houn hapurichihan lidan sun Ubóu, gaganbaditiña ani aba houdin apurichiha lidan fulasu kéiburi Herusalén luma Samaria, lárigiñe aba houdin lidoun amu fulasu. Ida liña meha lidin houn? Lárigiñe 30 irumu, apurichihaaña meha lidan saragu fulasu darí lun lariñagun Pábulu luagu apurichihaaña lan “lidan sun ubóu”. Ani gíbetiña meha gürigia lídangiñetiña saragu fulasu afalaruti Kristu (Kolosana 1:6, 23). Kei hénpulu, samina wamá luagun le asuseredubei lárigiñe le lariñagubei luma le ladügübei Pábulu chípüre (aliiha huméi Adügaü 13:6-11). Ariñagatu Bíbülia: “Danti le larihinbalin gumadimati rómana [Sérühiu Paulu] le asuseredubei, aba lafiñerun, ladüga aba taweiridun lanigi luagu larufudahan Heowá” (Adügaü 13:12, TNM).

Füramaseti meha Hesusu houn lani disipulugu luagu ñeinbei lan hama ani líderagubaña lan Bungiu lau lani sífiri sandu

5. a) Ka meha füramase lubéi Hesusu houn lani disipulugu? b) Ka tariñagubei aban líburu lánina abahüdaguni luagu furumiñeti sígulu?

5 Subudi hamuti meha disipulugu siñabei lan hapurichihan lidan sun Ubóu hábuguarügü. Gama lumoun, subudi hamuti meha giñe füramase haali lan Hesusu houn luagu hámabei lan ani líderagubaña lan Bungiu lau lani sífiri sandu (Matéu 28:20). Anihein san amu katei le íderagubaliña? Másiñati. Ariñagatu aban líburu lánina abahüdaguni luagu furumiñeti lan meha sígulu dan le buídutimabei lun hagumeserun kristiánugu apurichiha. Ariñagatu giñe samina hamá kristiánugu dan lárigiñe luagu Bungiu lan aransehabalin sun katei lidan furumiñeti sígulu lun líderaguniña.

6. Kaba wakutiha lidan arütíkulu le luma lidan le aban?

6 Inarüni san aranse lani meha Heowá katei lidan furumiñeti sígulu lun gayara lan hapurichihan disipulugu? Ibidiñeti woun ladüga mariñagun tumuti Bíbülia. Gama lumoun, subudi wamuti busén lan meha Heowá lun hapurichihan lubúeingu. Ani subudi wamuti giñe siñá lániña Satanási ararama. Lidan arütíkulu le warihiba fiú katei le gayarabei íderagua lániña lánigu Hesusu disipulu lun hapurichihan lidan furumiñeti sígulu. Ani lidan le aban warihiba katei burí le íderagubadiwa uguñe weyu lun wapurichihan lidan sun ubóu.

DARANGILAÜ LÁBUGIÑE HAGUMADIHAN RÓMANA

7. a) Katei meha san darangilaü rómana? b) Ka meha uagu súdini lubéi dan ligía?

7 Darangilaü rómana ligía furumiñeti katei le íderagubaliña disipulugu lun hapurichihan. Lidan furumiñeti sígulu, lábugiñeñein meha habafu rómana liibe-agei fulasu ubouagu. Ani lidan dan ligía anihein meha aban dan le subudiwabei kei hadarangilan rómana. Lidan meha dan ligía, mígirunti lúrudu lun ñein lan saragu ebedaaguni. Inarüni anihein lan meha fiú wuribu ñǘbüriti, kei meha lariñaguni Hesusu lidan lani profesía (Matéu 24:6). Kei hénpulu, günringua hamuti rómana Herusalén lidan irumu 70. Ani anihein meha fiú wuribu yarafa lun fulasu burí le lábugiñebei hagumadihan rómana. Gama lumoun lidan meha darangilaü hawinwanda hiibe-agei gürigia. Durati meha darangilaü ligía kéiburi 200 irumu. Ariñagatu aban líburu marihínñahagiña lan saragu gürigia awinwanda lidan darangilaü luagu saragu dan. Ani seremei darangilaü ligía, gayarati meha haweiyasuhan lani Hesusu disipulugu ani apurichiha hagía lau darangilaü.

8. Ida liña líderaguniña darangilaü rómana lani Hesusu disipulugu?

 8 Kéiburi 250 irumu lárigiñe Kristu, afuranguagüdati aban abürühati luáguti relihión gíriti Orígenes ida liña lan líderaguniña hadarangilan rómana lani Hesusu disipulugu. Seremei hakipuruni rómana darangilaü lidan saragu ageiraü, ménrengunti meha houn disipulugu houdin apurichiha lidan burí fulasu ligía. Mawuribuhantiña meha gürigia, hawinwanduña meha lidan darangilaü. Afuranguagüda lumuti giñe abürühati ligía íderagua lániña lira gürigia lun haganbuni uganu lánina ínsiñeni luma darangilaü le hapurichihabei disipulugu. Íbini éibaahoua hamá, yusu hamuti lidaani darangilaü ligía lun hapurichihan lidan saragu fulasu (aliiha huméi Rómana 12:18-21).

MÉNRENGUNTI MEHA AWEIYASUHANI

9, 10. Ka uagu ménrengun lubéi meha houn lani Hesusu disipulugu haweiyasuhan?

9 Lidan dan ligía, ménrengunti meha houn gürigia haweiyasuhan, ani ídehati katei le lun gayara lan hapurichihan disipulugu. Adügatiña meha rómana üma, lóugiñe 80,000 kilometuru (50,000 maili) lidise. Yusu hamuti meha súdaragu rómana lun houdin lau lóufudagun ageindagua luéigiñe fulasu le yuubei lun hageira luma lun hóunigiruniña gürigia. Yusu hamuti giñe kristiánugu lun hánhiñuragun dabíara, fulasu mageirawati luma áraabu dan le hapurichihaña lan.

Üma burí le hadügübei rómana íderagua lumutiña disipulugu lun hapurichihan

10 Gama lumoun, mámarügüñein meha múarugugiñe haweiyasuha rómana, aweiyasuhatiña meha giñe baranahagiñe luma dúnarugugiñe. Anihein meha saragu fulasu le ñein lubéi gayara lan hígirunu hagune ani chülütiña lidoun lóugiñe 900 fulasu. Ligíati, yúsutiña meha kristiánugu waporu lun haweiyasuhan lidoun burí ageiraü le lábugiñebei hagumadihan rómana. Ani memegeiruntiña meha ni aban tuwuyeri dugumedu lun hebelurun lidoun amu burí ageiraü. Chóuruti meha aweiyasuhani dandu baranahagiñe kei múarugugiñe. Míbetiña meha híwerutiña ǘmadarügü, lugundun subudi hamuti luagu wéiribei lan hafayeirun luagu hadurun. Ani gíbetu meha waporu hani súdaragu rómana baranaha, ligía manufude habéi aweiyasuhatiña luéi hadunragun hama híwerutiña ñein. Ariñagatu Bíbülia súfuri lan meha Pábulu saragu peliguru baranaha ani luagu anuhein meha waporu abuluchutu lau, gama lumoun mariñaguntu dungua lan hama híwerutiña baranaha (2 Korintuna 11:25, 26).

IÑEÑEIN GÜRIEGU

Ménrenguntimati meha ladarirún aban bérusu tidan iseri dugumedu sügǘ lau tidan dugumedu hóuburagu umutu (Ariha huméi párafu 12)

11. Ka meha uagu hayusurei lani Hesusu disipulugu iñeñein güriegu?

11 Saragu lídangiñe ageiraü le meha lábugiñebei habafu rómana hani meha güriegu furumiñe. Ligía gariñagadi habéi meha lílana fulasu burí ligía güriegu. Ligía gayara lubéi hapurichihan disipulugu lidan aban luwuyeri güriegu le meha hayusurubei sun gürigia. Gayarati meha giñe hayusurunu Abürüdǘni Ebüréu lidan hapurichihan, lugundun sügügüda waaru meha lidoun güriegu. Huríu ha meha awinwandubaña Ehiptu ásügüragüdübarun, ani Septuaginta tíribei. Ani lidan güriegu labürüdǘwa aban fánreinti tídangiñe Bíbülia. Buiti meha iñeñein ligía lun lafuranguagüdüniwa le tariñagubei Bíbülia lugundun gíbeti meha dimurei lidan. Ani íderagua lumutiña meha kristiánugu ha lídangiñetiña ámuñegueinarügü ageiraü lun hayanuhan hámagua luma lun lidan hamá aban.

12. a) Ka meha dugumedu hayusuruboun kristiánugu teweñegua dugumedu hóuburagu umutu? b) Ka meha uagu ménrengun lubéi tahandilihóun dugumedu tugía? c) Ídabuga hagumesera hiibe-agei kristiánugu ayusuroun iseri dugumedu?

12 Ka meha hayusurubei kristiánugu lun hapurichihan lidan furumiñeti sígulu? Furumiñe, yúsutiña dugumedu hóuburagu umutu. Gama lumoun hénrenguti meha tanügǘn luma tayusurún. Sagü meha busén lan aban gürigia laliihanu, mosu látuleragunu, ñéingiñe ábaya lóuburagunu.  Ani liibe-agei dan luágurügüñein meha aban touba labürühóua. Mégeiwatu aban dugumedu dayarütu túnrügü liliburun Matéu. Dan lárigiñe, aba hagumeserun gürigia ayusura aban amu dugumedu tenege aban líburu. Ménrengunti meha tahandilihóun lugundun adaraharügü habéi meha tubana lun hadariruni le habusenrubei haliihan. Ariñagatiña sásaamu luagu yusu hamanu meha kristiánugu dugumedu tugía kéiburi 100 irumu lárigiñe lounwen Kristu.

LÚRUDU RÓMANA

13, 14. a) Ka uagu buidu lubéi meha lun Pábulu rómana lan? b) Ida liña meha líderaguniña lilurudun Roma kristiánugu?

13 Íderagua lumutiña giñe lúrudu rómana kristiánugu lun hapurichihan. Kéiburi Pábulu, rómana meha. Íderagua lumuti katei le lidan burí luéiyasun. Luagu aban weyu, ragǘ hamuti súdaragu rómana Herusalén ani habeichaali yebe. Gama lumoun, aba lariñagun houn luagu rómana lan ligía ani ariñaga lan lúrudu luagu mosu lan haguseragüdüni lubaragiñe habeichuni. Ligía aba lubéi hígiruni lungua. Ariñagatu giñe Bíbülia aba lan lanufudedagun hábuti súdaragu dan le líchugunbei fe aban lan rómana lagüragubei (Adügaü 22:25-29).

Yusu hamuti meha kristiánugu lilurudun Roma lun hayanuhan hawougua luma lun higirún lun hapurichihan

14 Buítimati meha louserúniwa Pábulu uburugu Filipu ladüga rómana lan (Adügaü 16:35-40). Éfesu, añahein meha saragu gürigia gáñitiña ñein ani busentiña meha hábürühan hawagun kristiánugu. Gama lumoun, aba lariñagun gálidi houn lun darangilu hamá ladüga hadüraaguñein lan lúrudu rómana (Adügaü 19:35-41). Lidan uburugu Sesaréa, ariñagati Pábulu lun gumadimati lun hanügüni Romoun lun layanuhan luma urúei luagu lufulesein uganu le lapurichihabei (Adügaü 25:8-12). Kei aubei warihei, yusu hamuti meha kristiánugu lilurudun Roma lun hayanuhan hawougua luma lun higirún lun hapurichihan (Filipuna 1:7).

AÑAHEIN MEHA HURÍU LIDAN SARAGU AGEIRAÜ

15. Halía meha haganawa huríu lidan furumiñeti sígulu?

15 Ariha wamá ábanya katei le gayarabei íderagua lániña lani Hesusu disipulugu lidan hapurichihan. Lidan furumiñeti sígulu, añahein meha huríu lidan saragu ageiraü, mámarügü Ísüraeli. Ka uagu? Saragu irumu lubaragiñe dan ligía, aba meha hanügǘn huríu Asirioun. Saragu irumu lárigiñe, ábaya hanügǘn fiú huríu Babilónioun. Ligíati, dan le meha pérüsiana lubéi agumadiha Babilónia, añahein meha saragu huríu lidan burí ageiraü le lábugiñebei hagumadihan (Ésüterü 9:30). Dan le meha ubouagu lubéi Hesusu, añahein meha kéiburi 60 míñunu gürigia lábugiñe hagumadihan rómana. Ani haganagua gürigia hagía genegeti añahein lan meha hóugiñe gádürü míñunu huríu. Lidan meha fulasu kéiburi Ehiptu luma nórüte lani Áfürika, Liraüraü Asia (Turquía), Güresia luma Mesopotamia (Irak) hawinwanda. Kei aubei warihei, añahein meha saragu huríu lidan saragu ageiraü. Íbini ítara, kipu hamuti meha hani relihión (Matéu 23:15).

16, 17. a) Ka meha uagu buidu lubéi lun ñein hamá huríu lidan saragu ageiraü? b) Ka meha katei hadügübei kristiánugu ítara kei hadügüni huríu?

 16 Ka uagu buidu lubéi meha añahein lan huríu lidan saragu ageiraü? Seremei katei ligía, subudi hamuti meha saragu ha mámabaña huríu Abürüdǘni Ebüréu ani subudi haméi fiú lídangiñe hafiñen huríu. Kei hénpulu, aganbaaña luagu ábanrügüñein lan Bungiu inarüniti ani luagu lunti lan hagunfuliruni lubúeingu lilurudun. Aganbahaña meha giñe lúmagiñe lan Bungiu tiabin Abürüdǘni Ebüréu ani luagu anihein lan saragu profesía tidan le ayanuhabei luagu Mesíasi (Lúkasi 24:44). Dan le hagumeserunbei kristiánugu apurichiha, subudi hamaali meha dandu huríu kei mama huríu fiú lídangiñe harufudahan kristiánugu. Ani yusu hamuti kristiánugu chansi ligía. Kei hénpulu, héchuti meha Pábulu ñüdün ñein lubéi hadamuridagua huríu, ani yusu lumutu meha Lererun Bungiu lun lapurichihan houn (aliiha huméi Adügaü 17:1, 2).

17 Saragu lídangiñe katei le meha hadügübei kristiánugu, adüga hamuti giñe huríu. Kei hénpulu, óundaraguatiña meha lun háhuduragun lun Bungiu lidan fulasu lánina adamuridaguni luma bóugudi. Ñein meha heremuha, hafurieida ani aturiaha hamóun Lererun Bungiu. Uguñe weyu adüga wamuti ligiaméme.

ÍDERAGUA LUMUTIÑA MEHA HEOWÁ KRISTIÁNUGU LIDAN HAPURICHIHAN

18, 19. a) Seremei sun katei le asuseredubei lidan furumiñeti sígulu, ka meha gayarabei hadügüni kristiánugu? b) Lárigiñe haturiahani arütíkulu le, ka hisaminanbei luagun Heowá?

18 Lidan arütíkulu le ariha wamaali súdiniti lan meha furumiñeti sígulu. Furumiñe, anihein meha darangilaü lábugiñe hagumadihan rómana. Libiaman, ligiaméme meha iñeñein hayanuhabei saragu gürigia. Lǘrüwan, anihein meha lúrudu le íderagubaliña gürigia. Ligadürün, ménrengunti meha houn gürigia haweiyasuhan. Ani le liseingün, subudiwatiña meha huríu lidan saragu ageiraü ani subudiwati meha giñe Abürüdǘni Ebüréu. Sun katei le ídehati meha lun hasigirun kristiánugu apurichiha.

19 Kéiburi 400 irumu lubaragiñe Kristu, ariñagati aban güriegu aturiahati filosofía luagu hénrengubei lan lasubudirúniwa Bungiu ani siñabei lan layanuhóun luagu houn sun gürigia ha ubouagubaña. Gama lumoun, ariñagati Hesusu: “Le hásiñarubei gürigia adüga, gayara lumuti Bungiu” (Lúkasi 18:27). Furanguti íderagua laaña lan Heowá kristiánugu lun hapurichihan. Busenti lun hasubudiruni sun gürigia ha ubouagubaña ani aganba hameime luganute (Matéu 28:19). Ani uguñe weyu, ida liña lapurichihóun lidan sun Ubóu? Warihaali lidan le aban arütíkulu.