Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Bián-hati irumu 2015

Ganigi wamá ani óusera wamá lau lichú aau kei Hesusu

Ganigi wamá ani óusera wamá lau lichú aau kei Hesusu

“Hínsiñeti Hesukrístu hun lau sun marihin humagili lan; ani lau sun lira, afiñeedün luagu.” (1 FÉDURU 1:8).

1, 2. a) Ka lunbei wadügüni anhein busén wabéi wawinwandun lun súnwandan? b) Kaba íderaguawa lun úaragua wamá darí lagumuhóun?

ÍTARA liña ibagari kristiánu kei dan le wagumeserun éibuga lidan aban üma. Lidan lagumuha üma ñeinñein ibagari magumuchaditi. Ariñagati Hesusu: “Le áfaaguti darí lumoun lagumuhóun, ligíaba asalbara” (Matéu 24:13). Ka lunbei wadügüni anhein busén wabéi wawinwandun lun súnwandan? Mosu úaragua wamá darí wóunwegun o darí lagumuchun ubóu le. Gama lumoun, anihein katei burí le gayarati ladügün lun wadireirun luma lun ua lan úaragua wamá (1 Huan 2:15-17). Kaba íderaguawa lun úaragua wamá darí lumoun lagumuhóun?

2 Mosu wáyeihani lani Hesusu hénpulu. Arufudahatu Bíbülia woun ida liña lan meha ligaburi. Anhein waturiaha le tariñagubei Bíbülia luagu, línsiñedatimaba woun ani afiñetimabadiwa luagu (aliiha huméi 1 Féduru 1:8, 9). Ariñagati apostolu Féduru mosu lan wáyeihani lani Hesusu hénpulu (1 Féduru 2:21). Anhein wadüga, wawanduba darí lagumuhóun. *  (Aliiha huméi abürüdǘni.) Lidan arütíkulu le lubaragiñebei le furendeitiwa ida luba lan ǘnabugu wamá ani gudemehabu wagíame kei Hesusu. Ani lidan arütíkulu le warihibei ida luba lan ganigi wamá ani desidírü wagíame buidu kei Hesusu.

GANIGITI HESUSU

3. a) Ka mini lubéi ganigi lan aban gürigia? b) Kaba íderaguawa lun ganigi wamá?

3 Aban gürigia ganigiti, héreti ani awandati dan le lídanñein lan lénrengunga. Ageindaguati giñe luagu le buídubei, kíputi darangilaü ani úaraguati lun Bungiu íbini lidan lidaani turóbuli. Kei le ganigi wabéi ani mabusenruntiwa wagañidagüdüni Bungiu, mígiruntiwa lun hanufudedagüdüniwa amu (1 Samueli 11:7; Ariñawagúni 29:25). Ánhawa arufuda ganigi ani afiñe wagíame luagu lani Heowá füramasei, wíchugubei warihin luagun abinirúni le lunbei wibihini ámuñegü, mama luagun waturóbulin (Sálumu 27:14). Ani anhein hínsiñe habéi amu woun, wíderagubaña íbini lídanñein lan peliguru wabagari (Huan 15:13). Kaba íderaguawa lun ganigi wamá? Wafiñerun luagu Heowá luma wasigiruni lani Hesusu hénpulu (Sálumu 28:7).

4. Ida liña meha larufudun Hesusu ganigi ténpulurugu? (Ariha huméi dibuhu le lídanbei lagumeseha arütíkulu.)

4 Lidan aban ókaasion, arufudati Hesusu ganigi lan dan le “ténpulurugu [lubéi] ñun hadan arufudahatiña” (aliiha huméi Lúkasi 2:41-47). Duusu meha irumu lau Hesusu, ani lábutigu relihión ha ñéinbaña subudihabutiña meha lun lilurudun Moisesi buidu. Subuditi meha giñe hechun huríu houn, le burí adügübei lun hénrengu lan gaganbadi hamá lun Lúrudu. Gama lumoun, manufudeti meha Hesusu hawéi. Ligía meha ladügünbei saragu álügüdahani houn. Gama lumoun, mama meha furumiñeguarügü álügüdahani. Chóuruti adüga lan álügüdahani burí ligía lun hasaminarun máisturugu luma lun híchugun arigei lun. Háfuga adüga hamá máisturugu hagía álügüdahani lun lun gayara lan hasigenehan, gama lumoun, masuseredunti. Ha aganbubalin Hesusu, íbini máisturugu, aba taweiridun hanigi luagu le lasubudirubei luma luagu ligaburi layanuhan. Ganigiti meha Hesusu ani ageindaguati luagu inarüni.

5. Ida liña meha larufudun Hesusu ganigi dan le lapurichihanbei?

5 Arufudati meha Hesusu ganigi dan le lapurichihanbei. Kéiburi dan le lariñagunbalin houn gürigia iyeeni lan le harufudahabei lábutigu relihión houn, manufudedunti (Matéu 23:13-36). Mígirunti meha giñe Hesusu lun ladügün ubóu lun maganbadi lan lun Bungiu (Huan 16:33). Sigiti apurichiha íbini áluaha hamá gürigia hararamuni (Huan 5:15-18; 7:14). Ani bugá lumutiña alugurahatiña ténpulurugugiñe bián wéiyaasu (Matéu 21:12, 13; Huan 2:14-17).

Dan le hálügüdagunbalin Hesusu, arufudati ganigi, ani ariñagati ligía lan Krístubei, le Liráü Bungiu

6. Ida liña meha larufudun Hesusu ganigi lidan lagumuhóun weyu le laubei ya ubouagu?

6 Ariha waméi ida liña lan larufudun Hesusu ganigi lidan lagumuhóun weyu le lásügürübei ubouagu. Subudi lumuti meha le lunbei lasuseredun lun danme le lagarabaagun Húdasi lun. Gama lumoun, ariñagamémeti lun: “Le lunbei badügüni, adügabéi furese” (Huan 13:21-27). Dan le hóudinbei súdara lun hárügüdüni, maramudagunti Hesusu. Íbini lídanñein lan meha peliguru libagari, deregeguati lungua ani aba lariñagun houn súdara lun hígiruniña lani disipulugu lun houdin (Huan 18:1-8). Dan le haguseragüdünbalin lidan liñun-agei lúrudu huríu, ariñagati Hesusu houn lau ganigi luagu ligía lan Krístubei, le Liráü Bungiu. Áluahati meha fádiri le íñutimabei lébuna láfaruni Hesusu hilagubei, lau sun lira, manufudedunti Hesusu (Márükosu 14:60-65). Úaraguati meha Hesusu darí háfaruni. Ligíati,  lubaragiñe lounwen, ariñagati: “Gúnfuliha sun katei” (Huan 19:28-30).

GANIGI WAMÁ KEI HESUSU

7. a) Nibureinti, ida liña basandiragun bungua lau aban ban gefenti luagu Heowá? b) Ida liña gayara lan barufuduni ganigi ban?

7 Ida liña gayara lan harufuduni nibureintiña kristiánugu ganigi hamá kei Hesusu leskuelarugu? Gíbetiña nibureintiña ariñaga hamuti houn hánigu paaná leskuelarugu luma houn hamaisturun luagu gefentiña hamá luagu Heowá. Anhein nibureingidibu lubéi, gayarati barufuduni ganigi ban lau bariñaguni gefentibu lan luagu Heowá íbini hadügün bula bau leskuelarugu. Ítara luba barufuduni hínsiñe lan bun aban ban gefenti luagu Heowá (aliiha huméi Sálumu 86:12). Gayarabei giñe busén hamá máisturugu lun bafiñerun luagu saliguarügü lan sun katei lungua. Gama lumoun, gayarati bachoururuni ariñaga tani Bíbülia inarüni súnwandan. Ánhabu lálügüdagua somu gürigia ka lan uagu bafiñera luagu Bungiu lan adügübalin sun katei, gayarati bayusurunu garüdia El origen de la vida lun bóunabuni (1 Féduru 3:15). Ítarati, buídubei basandiragun bungua luagu badimurehan lau ganigi luagu le tariñagubei Bíbülia.

8. Ka uagu lunti lubéi ganigi wamá dan le wapurichihan?

8 Arufudatiwa giñe ganigi wamá dan le wapurichihan (Adügaü 14:3). Ka uagu lunti lubéi warufudun ganigi dan le wapurichihan? Furumiñe, ladüga le tariñagubei Bíbülia ligía wapurichihabei. Ani ariñaga tumuti Bíbülia inarüni (Huan 17:17). Libiaman, ladüga ‘wídehaña luma Bungiu’ ani íderagua lumutiwa lau lani sífiri sandu (1 Korintuna 3:9; Adügaü 4:31). Ani le lǘrüwan, ladüga hínsiñeti Heowá hama amu gürigia woun. Ínchaha lumutiwa katei le lun wapurichihan saragu (Matéu 22:37-39). Kei le ganigi wabéi, mígirun wamuti wapurichihan. Desidírühadiwa warufudahani inarüni houn ha heyeedubaña lábutigu relihión (2 Korintuna 4:4). Wasigiruba apurichiha íbini mabusenrun hamá haganbuniwa ani éibaaha hamawa (1 Tesalónikana 2:1, 2).

9. Ida luba warufuduni ganigi wamá dan le wásügürün lídangiñe lénrengunga?

9 Gayarati giñe warufuduni ganigi wamá dan le wásügürün lídangiñe lénrengunga. Ánhawa afiñera luagu Heowá, líchuguba ganigi woun luma afiñeni le wemegeirubei lun wawandun. Kéiburi anhein óunwe somu waduhe o wamada, gáriti woun, gama lumoun meferidirun wamuti wemenigin. Subudi wamuti líchuguba lan Heowá erei woun, lugundun ligía íchugubei “gurasu” woun (2 Korintuna 1:3, 4; 1 Tesalónikana 4:13). Dan le sandi wamá, íbini láfaahañadiwa lan gáriti, meresibiruntiwa ni aban luwuyeri agaranihani le kóntürati luagu lilurudun Bungiu (Adügaü 15:28, 29). O anhein nidiheri wabéi, gayarati wasandiragun woungua wuriba, gama lumoun sigitiwa áfaagua. Subudi wamuti íderagua lániña Heowá ha asufurirubaña súnwandan (Sálumu 34:18; 1 Huan 3:19, 20). * (Ariha huméi abürüdǘni.)

DESIDÍRÜTI HESUSU BUIDU

10. a) Ka lunbei wadügüni lun desidírü wamá buidu? b) Anhein buidu lubéi le desidírü wabéi, ida luba warufuduni lau ligaburi wayanuhan luma lau le wadügübei?

10 Lun desidírü wamá buidu mosu wasubudiruni le buídubei lumoun le wuribabei, ani ábame wanúadiruni le buídubei (Ariñawagúni 15:21; Ebüréu 5:14). Ánhawa desidírü buidu, warufudubei lau ligaburi wayanuhan luma wóuserun. Ida? Lau wanúadahani dimurei le lunbei wariñaguni buidu lun gayara lan wíderagun amu, mama lun wadügün dañu houn. Ligía labuserunbei Bungiu lun wadügün (Ariñawagúni 11:12, 13). Warufudubei giñe lau magañidun wamá lau lumenrengun (Ariñawagúni 14:29). Dan le desidírü wamá buidu, ábatima wakipuruni wamadagua luma Bungiu. Ka lunbei wadügüni lun desidírü wamá buidu? Mosu waturiahanu Bíbülia, winwan wameime le wafurendeirubei (Ariñawagúni 2:1-5, 10, 11). Líderagubadiwa giñe wakutihani lani Hesusu hénpulu ani áyeiha wameime.

11. Ida liña meha desidírü lan Hesusu buidu dan le layanuhan?

11 Ida liña meha desidírü lan Hesusu buidu? Ariha  waméi. Furumiñe, desidírüti meha buidu dan le layanuhan. Dan le meha lapurichihan, wéirigüda lumutu hanigi ha aganbubalin lau lubuidun larufudahan (Matéu 7:28; Lúkasi 4:22). Aliihati giñe tídangiñe Lererun Bungiu súnwandan. Subudi lumuti meha kaba lan bérusu layusura lidan kada ókaasion (Matéu 4:4, 7, 10; 12:1-5; Lúkasi 4:16-21). Ani danha lafuranguagüdün somu katei, dagatiha tuagu hanigi gürigia. Kéiburi lárigiñe láguyugun, ayanuhati Hesusu houn lani disipulugu dan le éibugeina habéi lidoun aban aüdü ani aba lafuranguagüdüni sun profesía le ayanuhabei luagu houn. Adügati meha lira lun hárügüdün gurasu, ligía aba lubéi hariñagun: “Sanditiwa tádühan wanigi le wagundan dan le adimureheina lubéi woun ǘmada” (Lúkasi 24:27, 32).

12, 13. Ka burí hénpulu arufudubalin woun magañidun lan meha Hesusu lau lóufudagun ani rugua lan lungua lidan halugaarun amu?

12 Libiaman, arufuda lumuti meha Hesusu buidu lan desidírü lan lau ligaburi. Magañidunti meha lau lumenrengun (Ariñawagúni 16:32). Ragüguati meha lungua ani súnwandan meha darangilu lan (Matéu 11:29). Gaguraasunti meha giñe habá lani disipulugu dan le hachararun (Márükosu 14:34-38; Lúkasi 22:24-27). Ani meferidirun lumuti liguraasun ni dan le louserúniwa wuriba (1 Féduru 2:23).

13 Rúguati giñe Hesusu lungua lidan halugaarun amu. Samina wamá san tuagun würi to meha gawaguboun aban sandi le adügübei lun taseñenhan saragu (aliiha huméi Márükosu 5:25-34). Éibugatu haganagua saragu gürigia lun tachülürün lumoun Hesusu lun taguurunu ladaüragun. Según lilurudun Moisesi, moun lumuti meha taguurun hawagu ni aban (Fádirigu 15:25-27). Gama lumoun, madeinhanti Hesusu tun. Subudi lumuti ka lan meha uagu líchigei Bungiu Lúrudu. Subudi lumuti luagu súdinitimati lan ínsiñeni luma gudemehabu sügǘ lau gaganbadiwa lan lun kada dimurei le lídanbei Lúrudu (Matéu 23:23). Ligía lariñagunbei tun würi tuguya: “Niráü, areidaguaadibu ladüga bafiñen. Beiba lau darangilaü, areidaguñu lídangiñe bisandi”. Ma lubuidun hénpulu!

14. a) Ka meha súdinitimabei lun Hesusu? b) Ka meha desidírü lubéi Hesusu lun letenirun lun apurichihani?

14 Lǘrüwan, arufuda lumuti meha Hesusu lau ligaburi lawinwandun luagu desidírü lan buidu. Apurichihani meha katei le súdinitimabei lidan libagari (Lúkasi 4:43). Ligía aba lubéi desidírü lan buidu lun gayarabei lan letenirun lun lani ministeriu buidu. Ka ladügübei? Sensiyuti meha lanügüni libagari lun gayara lan layusuruni lidaani luma lere lun lapurichihan (Lúkasi 9:58). Arufudahati meha giñe houn lani disipulugu lun hasigirun apurichiha íbini lárigiñe lounwen (Lúkasi 10:1-12; Huan 14:12). Ani füramaseti giñe houn lasigiruba  lan íderaguaña darí lagumuchun ubóu (Matéu 28:19, 20).

DESIDÍRÜ WAMÁ BUIDU KEI HESUSU

Lun wanúadiruni le lunbei wariñaguni buidu, mosu wasaminarun luagun le hemegeirubei gürigia (Ariha huméi párafu 15)

15. Ida luba gayara lan desidírü wamá buidu dan le wayanuhan?

15 Kei aubei warihei, gayarati giñe wáyeihani lani Hesusu hénpulu lau desidírü wamá buidu dan le wayanuhan. Dan le wayanuhan hama wíbirigu, lunti wayusurun dimurei le lunti líchugun gurasu, mama le adügüti lun heferidiruni hagundan (Éfesuna 4:29). Dan le wapurichihan, ‘lunti semé lan wayanun’, lidan amu dimurei, mosu wayanuhan lau inebesei (Kolosana 4:6). Lun wanúadiruni dimurei le lunbei wariñaguni buidu, áfaaguatiwa lun wasubudiruni ka lan hemegeirubei gürigia o ka lan súdinibei houn. Anhein buidu laganbún wayanun, gayarabei haganbuniwa gürigia ani gayarabei lachülürün uganu tidoun hanigi. Ani yusu wamutu Bíbülia súnwandan lun wafuranguagüdüni wafiñen. Adüga wamuti ladüga gabafutimati uganu le tídanbei Bíbülia sügǘ lau le gayarabei wariñaguni (Ebüréu 4:12).

16, 17. a) Ka gayarabei líderaguniwa lun magañidun wamá lau lumenrengun? b) Ida liña warufuduni gunfuranda wamaniña gürigia? c) Kaba íderaguawa lun wetenirun lun apurichihani?

16 Arufuda wamuti giñe desidírü wamá buidu lau wagaburi. Ida luba wadügüni? Lau wárügüdagun woungua. Ka gayarabei líderaguniwa lun magañidun wamá lau lumenrengun? (Santiagu 1:19.) Danme le ladügün aban gürigia somu katei o lariñagun somu katei le mínsiñeti woun, houcha wamá gunfuranda wamani ka lan uagu lariñagei. Ítara, ménrenguntimabei woun feruduna wamani (Ariñawagúni 19:11). Lunti giñe warufuduni gunfuranda wamaniña gürigia. Ida? Mosu gunfuranda wamani gafigoun hamá wíbirigu. Haritagua waméi gayara lan gaturóbulin hamá ani úati gunfuranda wamani sunsuinagubei. Gayarati giñe warufuduni gunfuranda wamaniña lau waganbuni le hasaminarubei. Moun lumuti wafuudun súnwandan lun ladügǘn katei kei auti wabusenra (Filipuna 4:5).

17 Arufuda wamuti giñe desidírü wamá buidu lau ligaburi wawinwandun. Ariha wamuti apurichihani keisi aban óunwenbu chansi lúmagiñeti Heowá. Kaba íderaguawa lun wetenirun lun apurichihani? Mosu wíchuguni weseriwidun lun Heowá lidan furumiñeti lúgaaru ani sensiyu ligíame wabagari. Líderagubadiwa lira lun wayusuruni wadaani luma were lun wapurichihan lubaragiñe lagumuchun ubóu (Matéu 6:33; 24:14).

18. Ka lunbei wadügüni anhein busén wabéi wawinwandun lun súnwandan?

18 Chóuruti gunda wamá lau warihini ǘnabuguti lan meha Hesusu, gaguraasunti, ganigiti ani buiti desidírü lan. Líderagubadiwa giñe wasigirun afurendeira luagu amu burí ligaburi. Ligíati, sigí wamá afalarei lani Hesusu hénpulu. Ítara luba wayarafaduntima lun Heowá ani ábame wawinwandun lun súnwandan.

^ par. 2 Houn meha kristiánugu ha lúnbaña hawinwandun sielu labürüdǘwa dimurei burí le lídanbei 1 Féduru 1:8, 9. Gama lumoun, gayarati giñe layusurún houn ha lúnbaña hawinwandun ubouagu.

^ par. 9 Hadariruba ariñahani hawagu gürigia ha meha ganigibaña dan le hásügürün lídangiñe lénrengunga tidan La Atalaya to lánina 1 lidan duusu-hati irumu 2000, páhina 24 darí 28; ¡Despertad! to lánina 22 lidan gádürü-hati irumu 2003, páhina 18 darí 21, luma tidan ¡Despertad! to lánina 22 lidan eneru irumu 1995, páhina 11 darí 15..