Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Bián-hati irumu 2015

 TÍTULU LE LUÁGUBEI TIDÁÜ | GÚNDAATÜN SAN LAU HUADIGIMARI?

Ida luba wagundaarun lau wadagimanu hǘrüti?

Ida luba wagundaarun lau wadagimanu hǘrüti?

“Ánhawa eiga, gurá wagía, aríagua wameime buiti le líchugubei wawadigimari, rúrügü liñalin Bungiu woun.” (Apurichihati 3:13.) Anhein busén lubéi Bungiu lun wagundaarun lau wawadigimari, ma lunti larufuduni woun ida luba lan wibihini? (Isaíasi 48:17). Ligía ladügübei tidan Bíbülia, to Lererun. Ariha wamá fiú adundehani luagu ida luba lan wagundaarun lidan wadagimanu.

BUIDULÁ HARIHINI HUADIGIMARI

Dandu anhein mosu lubéi hayusuruni hisaminan o here saragu lidan huádigimari, mabulieida huméi “sagawati [lan] katei buiti lídangiñe sun áfaaguni” (Ariñawagúni 14:23). Furumiñe, adügati wawadigimari lun gayara lan wibihini sun le wemegeirubei. Inarüni füramase tan Bíbülia leteniruba lan Bungiu houn ha áfaagubaña lun heseriwidun lun (Matéu 6:31, 32). Gama lumoun, ariñagatu giñe lunti lan wawadigimaridun lau benefaü (2 Tesalónikana 3:10).

Mabulieida huméi ídeha lan huádigimari lun hibihini le hemegeirubei luma lun hagunfulirun lau hani buligasion buidu. Ariñagati Joshua, aban wügüri 25 irumu lau: “Buiti dan le gayara lan lanuriagun gürigia lungua. Anhein gabafu bubéi lun bibihini sun le bemegeirubei, gayarati lariñawagún gúnfuli lani buadigimari lisuuni”.

Adügati giñe wadagimanu hǘrüti lun buidu lan hasandiragun gürigia houngua. Ka uagu? Ladüga hénrenguti ladügǘn ani gayarati labuchadun hawagu gürigia, gama lumoun, ánhawa asigira áfaagua, buídubei wasandiragun woungua lau wasubudiruni luagu adüga wamaali lan sun wayaraati (Ariñawagúni 26:14). Adügati katei ligía lun gunda wamá. Ariñagati Aaron, le uágubei wayanuha lidan arütíkulu le ásügürübei: “Gayarati buchá lan nuagu lagumuchun weyu, o gayarati marihin hamani amu gürigia lárigi nuadigimari, gama lumoun, subudi numuti adüga nan somu katei ani gúndaatina”.

 SUBUDILÁ HUADIGIMARI HUN BUIDU

Ayanuhatu Bíbülia luagu wügüri le subudihabubei lun luadigimari luma tuagu würi to benefaboun nadagimein lau túhabu (Ariñawagúni 22:29; 31:13). Inarüni siñati lan lafurendeirun aban gürigia adüga aban wadagimanu buidu buidu lidan bián weyu, ani úati gürigia unti línsiñeda lawadigimaridun luagu aban katei le siñá lumuti adüga, háfuga ligía mínsiñe lubéi hawadigimari fiú gürigia houn: lugundun máfaaguntiña lun buídutima lan hadügüni.

Le linarün katei, gayarati hagundaarun gürigia lau furumiñeguarügü wadagimanu ánhaña arufuda aban igaburi buiti, lidan amu dimurei, ánhaña afurendeira adügei katei buidu. Ariñagati William, aban wügüri 24 irumu lau: “Gúndaatiwa dan le warihini resultóu lani wáfaagun. Ani masandi bubéi ugundani ligía ánhabu anuraha luéi wadagimanu”.

SAMINA HUMÁ IDA LIÑA LAN LESERIWIDUN HUADIGIMARI HOUN AMU

Masaminara humá luágunrügü átiribei lan seinsu hagañeirun. Álügüdagua humá hungua: “Ka san uagu mégeiwa lubéi nuadigimari? Kaba san asusereda anhein ua ni aban lunti ladügüni o anhein adügǘwa wuriba? Ida liña leseriwidun nuádigimari houn amu?”.

Súdinitimati lagumuhóun álügüdahani le, lugundun gayarati líderaguniwa lóunabagüle lúntima wagundaarun lau wawadigimari. Ariñagati meha Hesukrístu: “[Gúndaatimati] le íchugubei sügǘ lau le eresibirubei” (Adügaü 20:35). Amu hawéi wayubudirigu o gürigia ha únbaña lahuuda wawadigimari, añahein giñe amu úntiña lahuuda: waduheñu hama gürigia ha gayarabei wíderaguniña lidan hemegeirun.

Waduheñu. Dan le láfaagun aban úguchili o aban úguchuru lun híchuguni hemegeirun tílana haban houn, íderagua hamutiña íbini lidan bián katei. Furumiñe, chouru hamuti hibihibei lan le hemegeirubei: éigini, daüguaü tuma muna; ítara liña hagunfulirun lau dasi le líchugubei Bungiu houn lun hetenirun houn ‘haduheñu’ (1 Timotéu 5:8). Libiaman, arufudahatiña houn luagu súdini lan gawadigimaridadi hamá gürigia. Ariñagatu Shane: “Buiti hayanuhan gürigia luagu ligaburi lawadigimaridun núguchi: harumati ligaburi ani nadagimein haali saragu lidan sun libagari, liibe-agei dan keisi sarafangei. Furendeitina lúmagiñe buiti lan lawadigimariduniwa lau wáhabu, lun wadügün katei le gayarati lahuudun houn gürigia.

Ha mégeibaña ídemuei. Ariñagati meha apostolu Pábulu lunti lan hawadigimaridun kristiánugu lau erei. Ka uagu? “Lun [...] gayara lan [h]íderaguniña ha gudemebaña” (Éfesuna 4:28). Ánhawa áfaagua lun wíchuguni hemegeirun waduheñu houn, háfuga lerederun murusun lun gayara lan wíderagun amu (Ariñawagúni 3:27). Ítara liña: ruti wadagimanu hǘrüti chansi woun lun wagundaarun lau wíderagun amu gürigia.

 ADÜGA HUMÁ LÓUGIÑE LE AMURIAHÓUBEI HUMA

Lidan lani Serumu luagu Wübü, ariñagati Hesusu houn lani disipulugu anhein lan amuriaha aban gürigia hama lun héibugun aban maili luma, lun lan héibugun biama (Matéu 5:41). Ida luba líderagunün dimurei burí le? Lubaragiñe hadügüni lérügü amuriahóubei huma, adüga humá lóugiñe. Áfaagua humá lun hadügüni huádigimari buidu ani lau lóufudagun. Teni humá giñe lun burí lirahüñü katei le genegeti maweirin lan lisudinin.

Anhein hadüga ítara, háfuga gúndaatimabadün lau huádigimari. Ka uagu? Ladüga mama hadügüñein kamá hafosuruña, hadügüñein lau hugundan. Huguya desidírübei, mama amu desidírübaña huagu (Filemón 14). Haritaguagüda lumutiwa katei le luagu le lariñagubei aban ariñawagúni: “Ha nadagimeintiña, hagumadihaba; ha magúalitiña, hagumadirúba” (Ariñawagúni 12:24). Háfuga machülübei dan lun idamuni wamá ani mafosurúnwa wagíame lun wawadigimaridun. Gama lumoun, ánhawa nadagimein lau magúali, gayarabei wasandiragun woungua ítara: keisi hadamun amu. Adüga humá lóugiñe le amuriahóubei huma, ábame hagundaarun.

KIPU HUMÉI WADAGIMANU LIDAN LILUGAARUN

Íbini buidu lan hawadigimaridun gürigia saragu, haritagua huméi mámarügüñein lan ligía lun hadügüni lidan hibagari. Inarüni ínchaha tániwa Bíbülia lun benefa wamá (Ariñawagúni 13:4). Gama lumoun, mama lun ligíarügü lan wadüga. Ariñagati Apurichihati 4:6: “Buítimati aban úhabu buin lau emeraaguni sügǘ lau biama lau lubucha uagu”. Ka wafurendeirubei lídangiñe le? Gayarati marihin lani aban gürigia le wéiriti luadigimaridun buiti lídangiñe luadigimari ladüga lagidaruni wadagimanu sun lidaani luma lere. Ariñagatu líburu Apurichihati ítara liña lan lira kamá hamuga lóuchuña gürigia lárügüdüni garabali.

Tíderagubadün Bíbülia lun hakipuruni wadagimanu lidan lufulasun. Inarüni mosu lan benefa wamá, gama lumoun, ariñagatu Lererun Bungiu woun lun wachoururuni ‘katei le buídutimabei’ woun (Filipuna 1:10). Katei san katei buídutimati ligía? Wásügürün dan hama waduheñu luma hama wamadagu. Ani le súdinitimabei, wígirun dan lun waliihanu Bíbülia luma lun wasaminarun luagun le tariñagubei.

Gürigia ha íchugubalin sun katei lidan lilugaarun gúndaatimatiña lau hawadigimari. Ariñagati William: “Buiti lani aban hádangiñe binadu niyubudirigu hénpulu luagu ida luba lan wíchuguni sun katei lidan lilugaarun. Nadagimeinti saragu ani gúndaatiña gürigia lau ligaburi lawadigimaridun. Gama lumoun, lagumuchun weyu, aba lígiruni sun katei lárigiñegua ani aba letenirun houn lufamilian luma lun lani relihión. Ani ligía aban hádangiñe gürigia gúndaatimatiña ha nasubudirubaña”.