Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Eneru irumu 2015

Ru wamá eteingiruni lun Heowá

Ru wamá eteingiruni lun Heowá

Ru humá eteingiruni lun [Heowá], ladüga buiti Bungiu.” (SÁLUMU 106:1)

1. Ka uagu lunti lubéi weteingiruni Heowá?

MOSU weteingiruni Heowá ladüga lúmagiñe liabin “sun buiti le ichugúbei woun, le úabei mégeiti luagu” (Santiagu 1:17). Keisi aban Óunigiruti hínsiñehabuti, góunigi lumutiwa, ru lumuti sun le wemegeirubei woun ani íderagua lumutiwa lun wakipuruni lubuidun wamadagua luma (Sálumu 23:1-3). Arufuda laali ligía lan “waramudaguagülebei, ligía giñe wérebei” lídantima lidaani idiheri (Sálumu. 46:1). Ligía wasandiragunbei woungua kei abürühati sálumu le ariñagubei: “Ru humá eteingiruni lun [Heowá], ladüga buiti Bungiu, ladüga magumuchaditi línsiñehabu” (Sálumu 106:1).

Sagawati bérusu lánina irumu 2015 lídangiñe Sálumu 106:1: “Ru humá eteingiruni lun [Heowá], ladüga buiti”

2, 3. a) Ka uagu lunti lubéi geteingiradi wamá luagu abinirúni burí le weresibirubei? b) Kaba burí álügüdahani wóunaba lidan arütíkulu le?

2 Ka uagu súdini lubéi wakutihani anhein geteingiradi wabéi? Lugundun, ítara kei meha lariñawagún lidan aban profesía, uguñe weyu meteingiraditiña hiibe-agei gürigia (2 Timotéu 3:2). Gíbetiña mebegiti abinirúni burí le ibiha hamaalibei houn. Lidan ubóu le magufurumaduntiña gürigia lau katei le hámabei, busenrügütiña lanwoun. Ani  gayarati lasuseredun ligiaméme woun. Ítara kei meha ísüraelina, gayarati wagumeserun arufuda meteingiradi ani ábame mebegi lan wamadagua luma Heowá woun ni abinirúni burí le ibiha wamaalibei lúmagiñe (Sálumu 106:7, 11-13).

3 Samina wamá giñe luagu le gayarabei lasuseredun lidan lidaani lénrengunga. Ladüga libe waturóbulin, gayarati wabulieiduni sun burí abinirúni le resibi wamaalibei lúmagiñe Bungiu (Sálumu 116:3) Kaba san wadüga lun wakipurun aban anigi to geteingiraditu? Kaba íderaguawa lun wakipurun aban lubuidun igaburi dan le lidan wamá turóbuli le wéiriti? Ariha waméi.

“[HEOWÁ], GÍBETI BURÍ KATEI BUÍDUBURITI LE ADÜGA BÁALIBEI”

4. Ka lunbei wadügüni lun wakipurun aban anigi to geteingiraditu?

4 Lun geteingiradi wamá súnwandan, mosu wararamagun asaminara luagun sun katei le adüga láalibei Heowá wawagu. Mosu wasaminarun buidu luagun línsiñehabu luma ida liña lan larufuduni woun weiri lan wínsiñe lun. Dan le ladügünbalin abürühati sálumu katei le, aba taweiridun lanigi luagu sun katei buiti le adüga láalibei Heowá (aliiha huméi Sálumu 40:5 luma 107:43).

5. Ka wafurendeirubei lúmagiñe apostolu Pábulu lidan luáguti geteingiradi?

5 Gayarati wafurendeirun lúmagiñe apostolu Pábulu luagu larufudúniwa eteingiruni. Chóuruti samina lan meha luagun sun abinirúni le leresibirubei, lugundun súnwandan meha leteingiruni Bungiu tídangiñe sun lanigi. Subudi lumuti meha luagu adimureha lan wuriba luagu Bungiu, barüguati lan meha lungua ani furunde ligía. Geteingiraditi meha lun Bungiu ladüga lau sun meha adüga lan katei wuribati, gudemehabuti meha Heowá luma Hesukrístu lun ani rúhaña meha aban wadagimanu lun ‘lun leseriwidun’ (aliiha huméi 1 Timotéu 1:12-14). Hínsiñetiña meha giñe líbirigu Pábulu lun ani afurieidati meha lun Bungiu hawagu saragu wéiyaasu luagu lubuidun hagaburi luma ladüga heseriwidun lun lau úaraguni (Filipuna 1:3-5, 7; 1 Tesalónikana 1:2, 3). Dan le meha lidan lan turóbuli, ruti meha seremei lun Heowá luagu sun ídemuei le leresibirubei hámagiñe íbirigu (Adügaü 28:15; 2 Korintuna 7:5-7). Maweiriduntu lubeiti wanigi luagu leweridiruniña Pábulu kristiánugu: “Geteingiradi humá giñe. [...] Heremuha luagu luéirigun Bungiu lau eteingiruni lun tidan hanigi lau sálumu luma burí uremu” (Kolosana 3:15-17).

 KA GAYARABEI LÍDERAGUNIWA LUN GETEINGIRADI WAMÁ

6. Ka abinirúni lúmagiñeti Heowá uágubei wéiritima lan heteingiruni?

6 Ida luba wáyeihani lani Pábulu hénpulu? Mosu wasaminarun luagun le ladügübei Heowá wawagu (Sálumu 116:12). Lun hamuga walügüdǘniwa ka burí lan abinirúni ibiha wamaalibei, kaba hamuga wariñaga? Wayanuhaña hamuga san luagu wamadagua luma Heowá? Wasaminaruña hamuga san luagun lani Kristu sákürifisiu le adügübei lun gayara lan ferudunawa lan wafigoun? Wayanuhaña hamuga san hawagu íbirigu ha íderagubaliwa dan le gaturóbulin wamá? Háfuga wayanuhaña lan hamuga giñe tuagu wani weiriou o luagu wani weiriei, hawagu wasaanigu luma luagu saragu amu katei. Ánhawa asagara dan lun wasaminarun luagun sun abinirúni burí le, tabuinchuba wanigi lau geteingiradi lun Heowá. Ábameti wíchugun seremei lun sagü weyu (aliiha huméi Sálumu 92:1, 2).

Furíei wamá lun weteingiruni Bungiu luagu le líchugubei woun, ítara kei hadügün Ana luma Esekíasi

7. a) Ka uagu lunti lubéi weteingiruni Heowá lidan wafurieidun? b) Kaba wibiha anhein weteingira Bungiu lidan wafurieidun?

7 Dan le wasaminarun luagun sun abinirúni le resibi wamaalibei, aba busén wamá weteingiruni Heowá luagu lidan furíei (Sálumu 95:2; 100:4, 5). Gíbetiña afurieidutiña lúnrügü hamuriahan. Ánheinti wagía, subudi wamuti gúndaagüda wamani Heowá dan le weteingiruni luagu sun le wámabei. Tidan Bíbülia daritiwa furíei le añuludaguagüdübarun wanigi, kéiburi tafurieidun Ana luma Esekíasi, le arufudubalin lanarime eteingiruni le hasandirubei fiú lubúeingu Bungiu (1 Samueli 2:1-10; Isaíasi 38:9-20). Áyeiha waméi hagaburi ani ru wamá seremei lun Heowá luagu sun le adüga láalibei wawagu (1 Tesalónikana 5:17, 18). Anhein wadüga ítara, buídubei wasandiragun woungua, línsiñedatimaba Heowá woun ani yarafatimabadiwa lun (Santiagu 4:8).

Ka burí abinirúni lúmagiñeti Heowá uágubei heteingirei? (Ariha huméi párafu 6 luma 7)

8. Ka gayarabei ladügün lun weferidiruni wínsiñehabu luagu sun katei le adüga láalibei Heowá wawagu?

8 Ka uagu lunti lubéi duari wamá luéi weferidiruni wínsiñehabu luagu sun le líchugubei Heowá woun? Ladüga galagante wamuti meteingiradi. Samina wamá: lidan meha aban paraísu hawinwanda furumiñetiña wagübürigu, Adán tuma Ewa, anihein meha sun le hemegeirubei hama ani hawinwanduba yebe lun súnwandan (Agumesehani 1:28). Gama lumoun, marihin hamuti meha kei aban katei gebegiti, igaaduatiña ani busentiña meha lóugiñe le ibiha hamaalibei. Kei resultóu, aba heferidiruni sun hámati (Agumesehani 3:6, 7, 17-19). Meteingiradihaña gürigia ani gayarati ladügün hagaburi lun giñe wabulieidagun luéi sun le ru láalibei Heowá woun. Gayarati ladügün lun mebegi lan wamadagua luma Bungiu woun, ani mebegi ligíame chansi le wibihibei lun hadan wamá lubúeingu ha lídanbaña sun ubóu woun, ani ábame ladügün lun woudin lidoun ubóu le málühalibei agumuchagua (1 Huan 2:15-17). Lun méiguadun wamá tidoun sádara to, mosu wasaminarun luagun abinirúni le wibihibei ani ru wagíame seremei lun Heowá luagu hadan wamá lumutuniña (aliiha huméi Sálumu 27:4).

DAN LE WAGAGIBUDAGUN LUMA ÓUCHAWAGUNI

9. Ka uagu buidu lubéi wasaminarun luagun abinirúni burí le ibiha wamaalibei dan le lidan wamá turóbuli?

9 Líderagubadiwa weteingiradi lun wagagibudagun luma óuchawaguni le hénrenguti. Dan le wagagibudagun luma turóbuli, kéiburi agabarahani lidan maríei, aban sandi le máraninabei,  lounwen somu waduhe o somu liñawan dan, gayarati weferidiruni sun were. Lidan aban dan ítarati, gayarati wibihin gurasu lídangiñe wasaminarun luagun abinirúni burí le resibi wamaalibei. Akutiha wamá fiú sügǘ inarüniti le lánina dan le.

10. Ida liña leseriwidun tun Irina tasaminarun luagun abinirúni le tibihibei lúmagiñe Heowá?

10 Wayanuha tuagu Irina, * aban prekursora to eseriwiduboun Meriga. (Ariha huméi abürüdǘni.) Seriwiti meha tani weiriei kei wéiyaali lidan afiñeni, gama lumoun, aba lidin tuma amu würi ani aba lígirunu hau ǘrüwa tisaanigu. Ka íderagubarun lun tasigirun eseriwida lun Heowá? Ariñagatu: “Teinki numuti Heowá luagu lóunigirunina. Dan le nasaminarun sagü weyu luagu lóunigirunina, aba níchugun fe luagu lueirin chansi le nibihibei lun nadarirun aban Úguchili le subudihabuti nun buidu ani góunigi lana. Subudi numuti mígirun lubadina lan nábugua”. Íbini gíbeeli lan tasufurirun, meferidirun tumuti Irina tugundan. Ligía íchugubei erei tun ani gayara ligía tíderagun amu gürigia.

11. Ka íderagubarun Kyung-sook áfaagua kóntüra aban sandi hanarimeti?

11 Seriwiharu aban íbiri gíritu Kyung-sook kei prekursora úara luma tani weiriei luagu 20 irumu. Sódini, aba lariñawagún tun anihein lan kánserü tidan tani pulmón, awanseeli lan ani sísirügali lan hati gayara lan tawinwandun. Íbini gíbeeli lan meha turóbuli tásügürün, súnwandan meha buidu lan tátuadi. Aba tariñagun: “Hilatina yebe dan le nasubudirunbalin sándiñadina lan. Aba nasandirun luagu féridi naali lan sun katei, aba nanufudedun”. Ka íderagubarun lun tasigirun tubaruaguóun? Ariñagatu: “Sagü guñoun lubaragiñe narounrun, aba nawarirun iñun tun waban lun nafurieidun. Ábatiha neteingiruni Heowá luagu seingü katei buiti le asuseredubei nun weyu ligía. Íderagua lumutina katei le lun darangilu nan ani lun narufuduni lun Heowá hínsiñe lan nun”. Ida liña san líderagunu luwuyeri furíei le? Ariñagatu: “Guentó, subudi naali luagu góunigi lániwa Heowá dan le lidan wamá lénrengunga ani gíbetimati lan abinirúni wibihin lidan wabagari sügǘ lau turóbuli”.

Sheryl luma John, ábanrügü tamulen le awinwandubei (Ariha huméi párafu 13)

12. Ka íderagubalin Jason lun lawanduni igarigu le lígirubei tounwen lani weiriou?

12 Abahüdaguati Jason, le nadagimeinbei tidan aban sukursáli Áfürika ani barühali lóugiñe 30 irumu eseriwida lidan dan dayarüti: “Sedü irumu guentó lúmagiñe tounwen nani weiriou. Ani  dan le nasaminarun luagun lanarime tasufurirun lau kánserü, gárigüda lumutu nanigi”. Ka íderagubalin lun lawanduni igarigu ligía? Ariñagati: “Aban weyu, aba naritagun luagu aban sügǘ lánina ugundani le wásügürübei úara. Aba neteingiruni Heowá luagu sügǘ ligía ani aba nasandirun aban lanarime awalidaguni. Lúmagiñe weyu ligía, súnwandan neteingiruni Bungiu luagu katei buiti le wásügürübei úara. Íderagua láadina katei ligía saragu lun nasansiruni nigaburi. Íbini gárigili lan nun neferidiruni nani weiriou, rútina seremei lun Heowá luagu gunda nan meha tuma, luma luagu winwan nan meha tuma aban gürigia to giñe hínsiñehabuboun lun”.

“Rútina seremei luagu anihein lan Heowá numa.” (Sheryl)

13. Ka íderagubarun Sheryl awanda dan le teferidirunbaliña tiduheñu?

13 Dan le ladagarunbei aban hiriri gíriti Haiyan Filipinas lidan irumu 2013, 13 meha irumu tau Sheryl. Féridi tumuti sun le túmabei. Ariñagatu: “Féridi numutu nuban hama niduheñu”. Hilatiña tagübürigu hama ǘrüwa tíbirigu lidan lanarime liñawan dan ligía. Ka íderagubarun ararama lun lanarime lamiselu le sin tagahüdün tanigi? Íderagua lumutu teteingiradi luma mabulieidagun tan luéi sun abinirúni burí le resibi táalibei. Ariñagatu: “Ariha numuti sun le hadügübei íbirigu lun híderaguniwa luma lun híchugun gurasu woun. Subuditi meha nun luagu añahein lan íbirigu afurieida nuagu lidan sun ubóu”. Ani ábaya tariñagun: “Rútina seremei luagu anihein lan Heowá numa. Súnwandan líchuguni le wemegeirubei woun”. Ítara liña, wasaminarun luagun sun abinirúni le resibi wamaalibei líderagubadiwa lun máfarun lániwa igarigu. Ani gayarati giñe wasigirun wabaruaguóun íbini laganagua óuchawaguni (Éfesuna 5:20; aliiha huméi Filipuna 4:6, 7).

GUNDA WAMÁ LUAGU ANIHEIN LAN HEOWÁ WAMA

14. Ka abinirúni lunbei wibihini ámuñegü? (Ariha huméi dibuhu le lídanbei lagumeseha arütíkulu.)

14 Lidan sun dan le sügühalibei, gúndaahaña lumutuniña Heowá luagu sun abinirúni le heresibirubei lúmagiñe. Kéiburi dan le hesefurúnwabei ísüraelina lúhaburugugiñe faraón lidan barana Funati, wéiriti hagundan darí lun heremuhan lubuidun burí uremu lánina seremei lun Bungiu (Áfuriduni 15:1-21). Uguñe weyu, wéiriti hemenigin sun lubúeingu Heowá luagu hesefurúba lan lídangiñe sun le anügübei asufuriruni (Sálumu 37:9-11; Isaíasi 25:8; 33:24). Samina humá san ida luba lan wasandiragun woungua danme le lagumuchun Heowá hau sun láganiñu ani ábame leresibirúniwa lidan aban iseri ubóu buin lau darangilaü luma irichaü. Weyu ligía, gíbetimabei wani resun lun geteingiradi wamá (Arufudúni 20:1-3; 21:3, 4).

Ruti Bungiu aban lubuidun emenigini woun: málühali agumucha lau sun katei le adügübei lun wasufurirun

15. Ka lunbei wadügüni lidan irumu 2015?

15 Agurabatiwa wibihin saragu abinirúni lúmagiñe Heowá lidan irumu 2015. Háfuga mosu lanme wagagibudagun luma fiú turóbuli. Gama lumoun, subudi wamuti mígirun lubadiwa lan Heowá (2 Lúrudu 31:8; Sálumu 9:9, 10). Lasigiruba íchigei sun le wemegeirubei woun lun úaragua wamá lun. Ligía lunti lubéi wáyeihani profeta Abakúku, le ariñagubei íbini lan úa lan éigini ani gibe ligíame lituróbulin gúndaabei lau lídehan Heowá (Abakúku 3:17, 18). Samina wamá lau ínsiñeni luagun sun abinirúni le ibiha wamaalibei ani sigí waméi adundehani le lídanbei bérusu le lánina irumu 2015: “Ru humá eteingiruni lun [Heowá], ladüga buiti” (Sálumu 106:1).

^ par. 10 Sánsiwati fiú iri lidan arütíkulu le.