Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Eneru irumu 2015

Ka uagu wefeduhei Ladinerun Aburemei

Ka uagu wefeduhei Ladinerun Aburemei

Adügameme huméi katei le, haritaguagüleme nuagun.(1 KORINTUNA 11:24)

1, 2. Ka meha ladügübei Hesusu guñoun le lánina weyu 14 lidan nisán irumu 33? (Ariha huméi dibuhu le lídanbei lagumeseha arütíkulu.)

GÚÑEELI Herusalén, gama lumoun, anihein aban fulenu hati le arugoungadagüdübei lidan sun uburugu. Weyu 14 lidan nisán irumu 33. Sun liña meha lefeduhani Hesusu Luéyuri Esefuruni hama lani apostolugu, fedu le aritaguagüdübaliña luagun dan le háfuridunbei ísüraelina Ehiptugiñe 1,500 irumu lubaragiñe dan ligía. Guentó, aba lagumeserun Hesusu aban adineruni espechaliti úara hama 11 lani apostolugu ha úaraguabaña. Adineruni ligía, ábanbei aritaguagülei lánina lounwen, le lunbei lasuseredun lubaragiñe lagumuchun weyu ligía (Matéu 26:1, 2).

2 Lárigiñe ladügün Hesusu aban furíei, aba lásügüragüdünu fein maganatu lébini houn lani apostolugu ani aba lariñagun: “Hou humá”. Lárigiñe lira, aba lárügüdün aban kopu tau diwéin, ábaya ladügün aban furíei, aba lariñagun: “Gurá humá lídangiñe le, sun huguya” (Matéu 26:26, 27). Yusu lumutu meha Hesusu fein tuma diwéin sínbolume. Ani guñoun ligía, arufudaha lumuti houn lani apostolugu ka lan mini lubéi sínbolu ligía luma saragu amu katei súdiniti.

3. Kaba burí álügüdahani wóunaba lidan arütíkulu le?

3 Ítara liña lagumeseruni Hesusu Aritaguagülei lánina lounwen, le giñe  subudiwabei kei “Ladinerun Aburemei” (1 Corintios 11:20TNM). Ka san uagu lunti lubéi waritaguni lounwen Hesusu? Ka mini tubéi fein tuma diwéin? Ida luba waranserun lubá Aritaguagülei? Kátaña gayarabei heigin tídangiñe fein ani gurá hagía tídangiñe diwéin? Ani ka san hasandirubei kristiánugu luagu sun le füramase lubéi Heowá houn lubá ámuñegü?

KA UAGU WARITAGUEI LOUNWEN HESUSU

4. Ka wibihibei lau lederegeruni Hesusu libagari wawagu?

4 Sun ladügawagun Adán galagante wamuti figóu luma óunweni (Rómana 5:12). Úati ni aban gürigia ubouagu gayarati lesefuragun lungua o lesefurun amu gürigia lídangiñe figóu luma óunweni. Úati ni kata gayarati líchuguni lun Bungiu lun lebegime lasalbarun (Sálumu 49:6-9). Gama lumoun, lau lounwen Hesusu, ruti aban katei lun Bungiu le gayarabei leresibiruni lebegime asalbaruni: lita luma lúgubu le mafigounbei. Ru lumuti libagari wawagu, ani aba lanügüni lebegi lani sákürifisiu ligibugiñoun Heowá. Ítara liña lesefuruniwa lídangiñe figóu luma óunweni ani ibiha waméi emenigini lun wawinwandun lun súnwandan (Rómana 6:23; 1 Korintuna 15:21, 22).

Wéiriti weteingiruni Heowá luma Hesusu luagu le hadügübei wawagu!

5. a) Ida liña wasubudiruni hínsiñe wamá lun Heowá luma lun Hesusu? b) Ka uagu lunti lubéi woudin lidan Aritaguagülei?

5 Arufuda lumuti Bungiu lueirin wínsiñe lun lau lederegeruni Liráü lun lounwen wawagu (Huan 3:16). Arufuda lumuti giñe Hesusu hínsiñe wamá lun lau lederegeruni libagari wawagu. Íbini lubaragiñe liabin ubouagun, hínsiñetiña meha gürigia ha ubouagubaña lun (Proverbios 8:30, 31TNM). Anhein inarüni lubéi luagu teinki wamani Heowá luma Hesusu luagu le hadügübei wawagu, wóudiba lidan Aritaguagülei. Ítara luba gaganbadi wamá lun gumadi le: “Adügameme huméi katei le, haritaguagüleme nuagun” (1 Korintuna 11:23-25).

KA MINI TUBÉI FEIN TUMA DEWÉIN?

6. Ka meha lígirubei Hesusu furangu tuagu fein luma tuagu diwéin?

6 Dan le ladügünbalin Hesusu Aritaguagülei lánina lounwen, masaliraguagüdün lumutu fein lúgubume masaliraguagüdünloun diwéin lítame. Dan le lariñagun ñein “mini tan to núgubu” ani “mini lan le nita”, ígira lumuti furangu luagu layusurarügüña lan meha fein tuma diwéin keisi sínbolu (Marcos 14:22-24TNM).

7. Ka mini tubéi fein to ayusurúboun lidan Aritaguagülei?

7 Lidan guñoun ligía, lidan irumu 33, yusu lumutu Hesusu fein maganatu lébini to ígiraguboun lídangiñe Luéyuri Emeraaguni (Áfuriduni 12:8). Tidan Bíbülia, anihein dan yusua lan dimurei lébini lun layanuhóun luagu figóu (Matéu 16:6, 11, 12; Lúkasi 12:1). Ligía buidu lubéi meha tayusurún fein maganatu lébini keisi sínbolu lani lúgubu Hesusu le mafigounbei (Ebüréu 7:26). Ítara tiña giñe fein to ayusurúboun lidan Aritaguagülei uguñe weyu.

8. Ka mini tubéi diwéin to ayusurúboun lidan Aritaguagülei?

8 Lita meha Hesusu mini tubéi diwéin to layusuruboun, ani ligiaméme mini tubéi diwéin to wayusuruboun uguñe weyu lidan Aritaguagülei. Lidan meha aban fulasu bóugudi lun Herusalén lounwen Hesusu ‘lun ferudunawa lan hafigoun gürigia’ (Matéu 26:28; 27:33). Anhein súdini lubéi lani Hesusu sákürifisiu woun, waranseruba sagü irumu lubá ókaasion espechaliti le.

IDA LUBA WARANSERUN?

9. a) Ka uagu lunti lubéi waliihan luagu le ladügübei Hesusu lubaragiñe lounwen? b) Ka hasandirubei luagu Aritaguagülei?

9 Anhoun wasigira programa lánina taliihóun Bíbülia lubá Aritaguagülei to áfuachuboun tidan garüdia Examinando las Escrituras diariamente, gayarabei wasaminarun luagun le ladügübei Hesusu fiú weyu lubaragiñe lounwen. Líderagubadiwa katei le lun waranserunu wanigi. Ariñagatu aban íbiri: “Busenhadiwa lun lachülürün luéyuri  Aritaguagülei. Sagü irumu espechalitimati woun. Haritagua nágili dan le tidan nubéi muna to ñein lubéi hariwachagua hilaaña, anihán núguchi ñein weyu ligía riwagu, aba súdinitima lan narihini sákürifisiu le ladügübei Hesusu. [...] Subudi numuti meha sun bérusu le ayanuhabei luagu katei le ani gayarati meha giñe nafuranguagüdüni buidu. Gama lumoun, darí dan le nasandirunbalin igarigu le lanügübei óunweni, ligía gunfuranda nani lueirin sákürifisiu le adügǘbei lun lafayeirún lebegi wasalbarun ani gunfunrandanei le mini lubéi woun. Wéiriti gurasu le líchugubei katei le nun!”. Dan le waranserun lubá Aritaguagülei, saminatiwa luagu ida liña lan lesefuruniwa lani Hesusu sákürifisiu lídangiñe figóu luma óunweni.

Lun waranserun lubá Aritaguagülei, mosu wasigiruni programa lánina taliihóun Bíbülia lubá weyu espechaliti ligía (Ariha huméi párafu 9)

10. Ka amu katei gayarabei wadügüni lun waranserun lubá Aritaguagülei?

10 Líderagubadiwa giñe waganwoundagüdüni wapurichihan lun waranserun lubá Aritaguagülei. Háfuga gayarabei íbini weseriwidun kei prekursorugu ídehatiña lidan hati burí ligía. Amisuraha wamaña sun gürigia ha wayaraatiña lidoun Ladinerun Aburemei. Tabuinchuba wanigi lau ugundani dan le wayanuhan luagu Heowá, luagu Liráü luma luagu abinirúni le lunbei wibihini (Sálumu 148:12, 13).

11. Ka uagu lariñaga Pábulu hóutiña lan fiú korintuna tídangiñe fein gurá hagía tídangiñe diwéin to lánina Aritaguagülei madünamouga, o lau minebenehabuni?

11 Samina wamá giñe luagu le labürühanbei apostolu Pábulu houn kristiánugu korintuna (aliiha huméi 1 Korintuna 11:27-34). Ariñagati Pábulu luagu furumiñeguarügü lan le éigitu fein tuguya, guraloun diwéin “madünamouga”, o lau menebenehabuni, “ladügüña figóu lau líchugun minebesei lun lúgubu luma lita Wabureme”. Ligíati, lubaragiñe leigin aban kristiánu tídangiñe fein luma diwéin, lunti letenirun buidu lúniwagua lun larihini anhein gunda lubéi Bungiu lau ligaburi lóuserun, anhein madügün lan ítara, “hou lumuti ani gurá lumuti lasiadirúniwa guánarügü”. Ladüga luriban hóuserun, gíbetiña meha korintuna “sánditiña, débilitiña, hilagua híbiri”. Háfuga añahein lan meha hádangiñe éigitiña lóugiñe le hawandun o ha átagutiña lubaragiñe o lidan añaha lan lidan Aritaguagülei, ani háfuga ligía lan lébunabei merederun hamá agagudúañu. Minebenti meha fedu le houn kristiánugu anuadirúaaña hagía. Ligía magundan lubéi meha Heowá lau héiginu fein luma lau hátunu diwéin.

12. a) Ka uma konparárü lani Pábulu Aritaguagülei? b) Ka eweridihani líchugubei houn kristiánugu anuadirúaaña? c) Ka lunbei ladügüni aban kristiánu anuadirúaali anhein adügaali lubéi aban figóu wéiriti?

12 Konparárü lumuti meha Pábulu Ladinerun  Aburemei luma aban éigini hama fiú amisurahóutiña. Aba lariñagun: “Siñati hatun lídangiñe likopun Wabureme [...] ǘnhame ata lídangiñe hakopun máfianu. Siñati giñe heigin luagu lidabulan Wabureme [...] ǘnhame eiga luagu hadabulan máfianu” (1 Korintuna 10:16-21). Anhein adüga aban kristiánu anuadirúaali aban figóu wéiriti, mosu láluahan ídemuei hama wéiyaaña lidan afiñeni (aliiha huméi Santiagu 5:14-16). Anhein arufuda luagu asakürihaali lan tídangiñe sun lanigi, mama larufuduña minebenehabuni luagu lani Hesusu sákürifisiu anhoun leiga fein ani guraloun diwéin (Lúkasi 3:8).

Mabuseruntiwa warufudun minebenehabuni luagu lani Hesusu sákürifisiu

13. Ka uagu lunti lubéi wafurieidun ani rárama wagíame asaminara luagu ka lan emenigini líchugubei Bungiu woun?

13 Buídubei lun wararamagun asaminara ani furíei wagía danme le waranserun lubá Aritaguagülei lun gayara lan wachoururuni ka lan emenigini líchugubei Heowá woun. Moun lumuti léiginu ni aban gürigia fein ani guraloun diwéin anhein machourun lubalin buidu luagu aban lan kristiánu le anuadirúaali. Anhein ladüga, larufuduña minebenehabuni luagu lani Hesusu sákürifisiu. Ida lubati lasubudiruni aban gürigia anhein gayara lubéi leigin lídangiñe sínbolu le ayusurúbei lidan Aritaguagülei?

KÁTAÑA ÁTUBAÑA TÍDANGIÑE DIWÉIN ANI HOU HAGÍA TÍDANGIÑE FEIN

14. Ka mini lubéi iseri daradu houn ha éigibaña lídangiñe sínbolu le ayusurúbei lidan Aritaguagülei?

14 Ha éigibaña tídangiñe fein ani gurá hagía tídangiñe diwéin lidan Aritaguagülei chouru hamuti luagu anuadirúaaña lan. Dan le layanuhanbei Hesusu tuagu diwéin, ariñagati: “Kopu le tau diwéin to, liseinin iseri lidaradun Bungiu huma, le achoururúabei lau nita” (1 Korintuna 11:25). Ariñagati Heowá liyumulugugiñe profeta Heremíasi luagu ladügüba lan aban iseri daradu leweñeguame daradu le lánina Lúrudu le meha ladügübei hama ísüraelina (aliiha huméi Heremíasi 31:31-34). Adüga lumuti Heowá iseri daradu ligía hama kristiánugu anuadirúaaña (Galasiana 6:15, 16). Lita Kristu añuuragüdübalin daradu ligía (Lúkasi 22:20). Yusu lumuti Heowá Hesusu lun ladügüni iseri daradu ligía hama kristiánugu anuadirúaaña ha lúnbaña hawinwandun luma sielu (Ebüréu 8:6; 9:15).

15. a) Kátaña san añaheinbaña lidan daradu luáguti aban Arúeihani? b) Kaba san chansi hibiha kristiánugu anuadirúaaña ánhaña akipura úaraguni?

15 Subudi hamuti kristiánugu anuadirúaaña luagu añahein lan giñe lidan daradu luáguti aban Arúeihani (aliiha huméi Lúkasi 12:32). Hesusu adügübalin daradu ligía hama ha erederubaña luma ani awanda haméi sun “lasufurirun” (Filipuna 3:10). Seremei daradu le, sun kristiánugu anuadirúaaña ha úaraguabaña gayarabei harúeihan luma Hesusu sielu lun súnwandan (Arufudúni 22:5). Gayarati lubeiti heigin kristiánugu ha tídangiñe fein ani gurá hagía tídangiñe diwéin lidan Ladinerun Aburemei.

16. Lidan murusun dimurei, afuranguagüda huméi ka lan mini lubéi Rómana 8:15-17.

16 Hárügüñanu resibi hamaali sífiri sandu keisi lirahüñü Bungiu, hagíarügüñanu lun heigin tídangiñe fein luma tídangiñe diwéin (aliiha huméi Rómana 8:15-17). Ariha waméi yusu lani Pábulu dimurei “Bungiu Baba”. Layusuruña meha aban dimurei lidan iñeñein araméu le arufudubei ínsiñeni, kei dimurei “papa” o “núguchi”. Yarafati meha hasandiragun kristiánugu anuadirúaaña houngua lun Heowá darí lun hagúarun lun: “Núguchi”. Buiti larufuduni lubuidun hamadagua kristiánugu anuadirúaaña luma Heowá dan le heresibiruni ‘sífiri [...] le adügübaliña lun lirahüñü hamá Bungiu’. Adügati lani Bungiu sífiri lun hasubudiruni luagu anuadirúaaña lan. Ligía chouru habalin kristiánugu anuadirúaaña luagu anúadira laaña lan Bungiu keisi lirahüñü. Ani mama wayanuhaña luágurügü mabusenrun hamá hawinwandun ubouagu. Chouru hamuti ánhaña lan úaragua lun Bungiu darí hounwen, harúeihaba lan luma Kristu sielu. Uguñe weyu, murusunrügaaña  hádangiñe 144,000 ha resibi hamaalibei “[s]ífiri [s]andu” ya ubouagu (1 Huan 2:20; Arufudúni 14:1). Yarafati hasandiragun houngua lun Heowá darí lun gayara lan hariñagun lun: “Bungiu Baba”.

BIÁN LUWUYERI EMENIGINI

17. a) Ka hemeniginbei kristiánugu anuadirúaaña? b) Ida liña hasubudiruni anuadirúaaña lan?

17 Anhein aban hubéi kristiánu le anuadirúaali, chóuruti írida humani hemenigin lun hidin sielun sun oura dan le hafurieidun lun Heowá. Ani sandí humuti giñe anihein lan fiú bérusu tidan Bíbülia le espechaliti hun. Kéiburi dan le haliihan luagu lamarieidun Hesusu tuma “ladari” sielu, subudi humuti huagu lan layanuha ani memeniha hanigi lun lachülürün weyu ligía (Huan 3:27-29; 2 Korintuna 11:2; Arufudúni 21:2, 9-14). Dan le layanuhan Bungiu tidan Bíbülia luagu ínsiñeni le lasandirubei hawagu kristiánugu anuadirúaaña, aba hasaminarun: “Layanuhaña nuagu”. Ani dan le hadarirun adundehani tidan Bíbülia le hounti kristiánugu anuadirúaaña, ínchaha lumutün sífiri sandu lun gaganbadi humá luma lun hariñagun tidan hanigi: “Nunti ariñahani le”. Ítara liña ladügün sífiri sandu lun hasubudiruni luagu anuadirúadün lan lun hawinwandun sielu.

18. a) Ka hemeniginbei “amu mudún”? b) Ka hasandirubei dan le hasaminarun luagun hemenigin?

18 Luagu amu oubaü, anhein hádangiñetün lubéi “saragu gürigia” o “amu mudún”, ru laali Bungiu emenigini hun lun hawinwandun ya ubouagu (Arufudúni 7:9; Huan 10:16). Busentün hawinwandun lun súnwandan lidan Paraísu, ani hínsiñeti hun hararamagun asaminara luagun le tariñagubei Bíbülia luagu ida luba lan ibagari ubouagu. Busentün lun lachülürün oura lun hagundaarun hama hiduheñu luma hama humadagu lidan darangilu. Ani busenhadün lun lagumuchun likesin éigini, gudemei, asufuriruni, sandi luma óunweni (Sálumu 37:10, 11, 29; 67:6; 72:7, 16; Isaíasi 33:24). Memeniha hanigi lun lachülürün dan lun hásaarun hiduheñu ha hilaguañabaña lun híchuguni lubuidun achülürüni houn (Huan 5:28, 29). Chóuruti weiri lan heteingiruni Heowá luagu líchuguni lubuidun emenigini le hun lubá ámuñegü. Ani íbini meigin humanu fein matun humóun diwéin lidan Aritaguagülei, ñéinñadün lun harufuduni lun luagu weiri lan heteingiruni luagu lani Liráü sákürifisiu.

ÑÉINBADÜN SAN?

19, 20. a) Ka lunbei hadügüni lun lagunfulirun hemenigin? b) Ka uagu lunti lubéi hidin lidan Aritaguagülei?

19 Meberesenga ka lan hemeniginbei, anhein busén hubéi lun lagunfulirun, mosu hafiñerun luagu Heowá, luagu Hesusu luma luagu lebegi asalbaruni. Lidan Aritaguagülei, gadaanibadün lun hasaminarun luagun hemenigin luma luagu lebegi lani Hesusu sákürifisiu. Danme le lálüdün Weyu wándaradi 3 lidan gádürü-hati irumu 2015, hefeduhabei saragu míñunu gürigia Ladinerun Aburemei lidan sun ubóu. Ladügǘba tidan burí Luban Hadamuridagun Gefentiña luagu Heowá luma lidan amu burí fulasu.

20 Ánhadün ñüdün lidan Aritaguagülei, laweiridatimaba heteingiradi luagu lebegi asalbaruni. Línchahabadün yanu le lunbei haganbuni ñein lun hasandirun ínsiñeni hawagu gürigia ani lun hayanuhan houn luagu lueirin wínsiñe lun Heowá luma luagu le lunbei ladügüni ámuñegü luagu wafulesein (Matéu 22:34-40). Meferidira huméi Aritaguagülei espechaliti le!