Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Eneru irumu 2015

 TÍTULU LE LUÁGUBEI TIDÁÜ | ABAN ARÚEIHANI HARUMATI

Larúeihan Bungiu—Aban arúeihani sin marichaü

Larúeihan Bungiu—Aban arúeihani sin marichaü

Ariñagati aban nadagimeinti luma lurúeite Nigarawa: “Lau sun luwuyeri, hádangiñe lílana ageiraü háfurida gumadimatiña”. Ariñaga lumuti lira lun lafuranguagüdüni ka lan uagu lasaminara siñabei lan lagumuchún lau marichaü.

Anhein lídangiñe lubéi ageiraü háfurida gumadimatiña ani gíbeti marichaü hadan gürigia, siñati wagurabahan lun harumabei lan hóuserun gumadimatiña, adián? Ligíati, lun úabei lan íweruhani luma marichaü lidan aban arúeihani, mosu hanügǘn gumadimatiña lídangiñe amu fulasu. Ayanuhatu Bíbülia luagu aban arúeihani ítarati. Ligía aba lubéi lariñagun Hesusu houn lani disipulugu lun lan hamuriahani lidan furíei. Wayanuhaña luagu Larúeihan Bungiu (Matéu 6:9, 10).

Larúeihan Bungiu ligía aban arúeihani le siélubei le lunbei larúeihan leweñegua sun arúeihani le ubouagubei (Sálumu 2:8, 9; Arufudúni 16:14; 19:19-21). Aban lídangiñe katei le lunbei ladügüni Larúeihan Bungiu luagu wafulesein lagumuchun lau marichaü. Guentó, wakutihaba ka lan uagu siñagili lubéi hagumuchun gumadimatiña lau marichaü luma ka lan uagu gayara lubéi wachoururuni luagu ladügübei lan Larúeihan Bungiu katei ligía.

1. UBAFU

TURÓBULI: Téniwati houn gumadimatiña seremei hafayeiruni lílana ageiraü liseinsuna gumadi. Ahandilihatiña saragu seinsu darí lun habusenrun híweruhani; añahein amu ánhatiña heresibirun seinsu hámagiñe gürigia ha mabuserunbaña hafayeihan saragu seinsu lun ageiraü. Kei resultóu, mosu liñuruni urúei lebegi lafayeirúniwa liseinsuna gumadi lun gayara lan libihini seinsu le féridiwaalibei. Gama lumoun, adügati lira lun laganwoundun marichaü. Ani magumuchunti turóbuli ligía, ani gürigia ha richaguabaña hagía asufurirubalin sun katei le.

LÁRANINA TURÓBULI LE: Lúmagiñe Heowá liabin ubafu le lídanbei Larúeihan (Arufudúni 11:15). *Memegeirunti Bungiu laguburahani liseinsuna gumadi lun lagunfulirun lau lisuuni. Gayarati líchugun lóugiñe le hemegeirubei ha lábugiñebaña larúeihan houn ladüga areidati, héreti ani gabafuti (Isaíasi 40:26; Sálumu 145:16).

2. ABAN ALIDIHATI

TURÓBULI: Ariñagatu Susan Rose-Ackerman, sásaamu to uáguboun wayanuhan lidan arütíkulu le ásügürübei, lun lan gayara lan lagidarúniwa marichaü “mosu lagumeserún lúmagiñe íñugiñe lun ǘnabun”. Dan le hageindagun urúeigu lun hagumuchun lau íweru luma marichaü hadan súdaragu luma tidan muna to ñein lubéi leresibirúa umegeguni le ebelurubei lidoun ageiraü, ani madügüntiña ni kata lun hagidaruniña gürigia ha íñubaña ubara lidan lúrudu, aba mafiñenhaña lan lílana ageiraü hawagu. Ani íbini gürigia létima richaguabei hadan sun gürigia, gafigounti, kei tariñaguni Bíbülia: “Úati ni aban gürigia úaraguati ubouagu le adügüti buiti súnwandan lun mafigouhanbei lan” (Apurichihati 7:20).

Lamahaduña Hesusu lun le lariñagubei Mafia lun

LÁRANINA TURÓBULI LE: Hesukrístu, Urúei le lunbei lagumadihan lidan Larúeihan Bungiu, mítaranti kei urúeigu ubouaguna, mígirunbei lun hagadeiruni amu. Arufuda laali dan le lamahadunbei lun ladügüni le lariñagubei Mafia lun. Aba yebe lariñagun Mafia, le agumadihabei lidan ubóu le, lun Hesusu líchugubei lan “sun arúeihani le ubouagubei lun luma burí luéirigun” anhein áhuduragua lun. Gama lumoun madügün lumuti Hesusu (Matéu 4:8-10; Huan 14:30). Úaraguati Hesusu darí lun dan le lan dáwaguñu lubéi luagu wagabu máhati latun aban düroga. Íbini gayarabei lan hamuga tíderaguni lun masandirun lan saragu gáriti, tadügüba yebe lun libidiñedagun lungua (Matéu 27:34). Arufuda laali Hesusu gabafu lan lun lalidihani Larúeihan Bungiu guentó lau aniheinhali lan sielu (Filipuna 2:8-11).

3. SUN KATEI LIDAN LUBUDUBU

TURÓBULI: Lidan saragu ageiraü anihein abuduhani kada átiri dan. Ídehati le lun háfuridun ábutigu mabuiduntiña lídangiñe ubafu. Le linarün katei, anihein marichaü lidan abuduhani le adügǘbei, íbini lidan burí ageiraü le awanseti. Kei hénpulu, yusu hamuti rísitiña  habafu hawagu ha busenbaña hibihin somu ubaraü lidan ageiraü lau híderaguniña lau seinsu.

Ariñagati aguseragüdüti John Paul Stevens, aban hádangiñe ha nadagimeinbaña tidan Liñun-agei Lúrudu Meriga luagu adügati lan katei le lun “machoururúniwa lan anhein ábanbei lubéi arúeihani le buiti ani anhein haruma lubéi lagañeirúniwa, ani adügati giñe lun mafiñen hamá lílana ageiraü hawagu gumadimatiña”. Ligía aba lubéi hariñagun saragu gürigia gibe lan marichaü hadan gumadimatiña.

LÁRANINA TURÓBULI LE: Kei aban lubéi arúeihani le lunti sun dan Larúeihan Bungiu, lagumuchaguba sun programa le hadügübei polítiku lun labuduhóun hawagu luma lau sun marichaü le lídanbei (Danieli 7:13, 14). Ani Bungiu anúadirubalin Lurúeite Larúeihan, mama abuduhóuarügüti luagu, ligíati siñabei lubéi lagidarún lídangiñe lubara. Ruti katei ligía chansi lun lun desidírü lani le lunbei ladügüni luagu hafulesein lánigu.

4. LÚRUDU

Larúeihan Bungiu ligía aban agumadihani inarüniti sielu

TURÓBULI: Gayarati hamuga wasaminarun mosu lan ladügǘn lanwoun lúrudu le aniheinhalibei lun gayara lan lagumuchún lau íweruhani luma marichaü. Gama lumoun, ariha hamaali fiú sásaamu luagu eibu lan lagibedun lúrudu, gíbetimati chansi lun ladüraawagún. Ani séruti giñe ladügǘn lun lagunfulirúniwa lúrudu kóntüra marichaü, ani lagumuhóun oura mibihínwati resultóu buiti.

LÁRANINA TURÓBULI LE: Íñutimati lilurudun Heowá sügǘ lau halurudun wügüriña. Kei hénpulu, lubaragiñe meha líchugun Hesusu aban óunwenbu lísüta luagu katei le lunbei hadügüni gürigia luma luagu le moun lubéi hadügüni, aba lariñagun: “Súnwandanla lubeiti hadügün houn amu kei le habusenrubei lun hadügün hun” (Matéu 7:12). Gama lumoun, súdinitimati anihein lan lúrudu le ayanuhabei mámarügü luagu le hadügübei gürigia, ayanuhati giñe luagu le hasandirubei. Ariñagati Hesusu: “Hínsiñe hamá bíbirigu bun kei bínsiñegua bungua” (Matéu 22:39). Kei gayara lubéi laliirunu Bungiu hanigi gürigia, gayarati lachoururuni lagunfulirun lilurudun (1 Samueli 16:7).

5. LUBUIDUN USA

TURÓBULI: Lídangiñe uamahabuni luma hawounguounrügü lan gürigia hasaminara liabin íweru luma  marichaü, ani bián igaburi wuribati le anihein dandu hawagu gumadimatiña kei hawagu lílana ageiraü. Lidan tagururudun muna to buga uáguboun wayanuha furumiñe, dariwati luagu fáyeirügü hamaniña ábunagutiña gürigia ha íñubaña ubara lidan lúrudu lun hayusurun ubuñaü le maserunti ani lun masigirun hamani lúrudu luáguti ábunaguni.

Ligíati, lun lagumuchun marichaü mégeiwati larufudahóun houn gürigia lun mígiraguagüda hamá houngua lun güridí luma lun masaminarun hamá hawouguounrügü. Le suserebei, mabafu hamá urúeigu ani mabusenrun hagía harufudahani katei burí le houn gürigia.

LÁRANINA TURÓBULI LE Anati Larúeihan Bungiu gayarati lagumuchun lau turóbuli le sunsuinagubei, lugundun arufudahati igaburi buiti houn gürigia. * Sansi lumuti arufudahani ligía ‘ligaburi hasaminan’ gürigia (Éfesuna 4:23). Ani íderagua lumutiña katei ligía lun hagidaruni úamahabuni hawariua luma lun mámarügü lan hawouguoun hasaminara, lun gufuruma hamá lau le hámati luma lun hasaminarun hawagun amu (Filipuna 2:4; 1 Timotéu 6:6).

6. LÍLANA AGEIRAÜ

TURÓBULI: Íbini lidan fulasu le buiti léibugun katei ñein ani íñuti haturiahan gürigia, añahein hádangiñe desidírütiña hadügün katei mabuidunti. Ariñagatiña sásaamu ligía lan lébubei siñá lan hagumuchun wügüriña lau marichaü. Lérügüñein hayara adüga, hagidarun lídangiñe damichi le hadügübei gürigia ha wíyebaña igaburi.

LÁRANINA TURÓBULI LE: Ariñagatiña lílana Convención de las Naciones Unidas contra la Corrupción luagu lun lan lagidarún marichaü, mosu hadügün urúeigu aransehani lun hayanuhan luagu “úaraguni, richaguaü” luma lun hagunfulirun gürigia lau hani buligasion. Buiti le hasaminarubei urúeigu, ánheinti Larúeihan Bungiu amuriahati lun ladügǘn amu katei. Ariñagatu Bíbülia úa lan ubaraü houn gürigia güriditiña ni houn yéetiña lidan Larúeihan Bungiu (1 Korintuna 6:9-11; Arufudúni 21:8).

Sun gürigia gayarati hafurendeirun arufuda inebesei luagu lilurudun Larúeihan Bungiu, ítara kei meha hadügüni furumiñetiña kristiánugu. Kei hénpulu, dan le lálugunbei aban disipulu gíriti Simón líchugun seinsu houn apostolugu luagu aban abinirúni, aba hamahadun lun. Aba hariñagun lun: “Asakürihabá, ayumuragua buguyame lun Bungiu, lun feruduna lánibu luagu luriban baritagun”. Aba meha líchugun Simón fe luagu wuriba lan le layumahabei ani aba lamuriahan hama lun hafurieidun luagu, gayara láamuga lígiruni igaburi ligía (Adügaü 8:18-24).

IDA LUBA WAWINWANDUN LÁBUGIÑE LARÚEIHAN BUNGIU

Meberesenga halíana humá, gayarati hawinwandun lábugiñe Larúeihan Bungiu (Adügaü 10:34, 35). Líderagubadün programa lánina arufudahani le adügǘbei lidan sun ubóu lun hasubudiruni ida luba lan hawinwandun lábugiñe Arúeihani ligía. Gúndaabaña gefentiña luagu Heowá lau harufuduni hun ida liña lan taturiahóuniwa Bíbülia. Ánhadün adireira fiú minutu sagü dimaasu, hasubudirubei “uganu le luáguti larúeihan Bungiu” buidu buidu. Laganagua amu katei, hafurendeiruba ida luba lan lagumuchun Bungiu lau marichaü (Lúkasi 4:43). Ayanuha humá hama Gefentiña ha erederubaña lidan fulasu le ñein hubéi, o heiba lidoun wani páhina lánina Internet, jw.org.

Hínsiñeti hamuga san hun haturiahanu Bíbülia mafayeihanga?

^ par. 8 Ariñagatu Bíbülia Heowá lan líribei Bungiu.

^ par. 22 Kei hénpulu, aliiha huméi arütíkulu “Gayarati san haruma wamá lidan aban ubóu buin lau liwiye igaburi?”, tidan Garüdia Atalaya to lánina 1 lidan unsu-hati, 2012.