Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Duusu-hati irumu 2014

 TÍTULU LE LUÁGUBEI TIDÁÜ: GAYARATI LUMADA HUMÁ BUNGIU

Ayanuhatün san luma Bungiu?

Ayanuhatün san luma Bungiu?

Umadagu ha buítiña ayanuhatiña hámagua súnwandan, dandu dan le hadunragun kei luagu gágamuru, Internet, bidéu o tau gárada. Ítarameme, lun lumadagu wamá Bungiu mosu wayanuhan luma súnwandan. Ida luba san wadügüni?

Gayarati wayanuhan luma lidan furíei. Furanguti mama lan ligiaméme wayanuhan luma Bungiu kei dan wayanuhan luma aban gürigia wáledi. Dan le wafurieidun lunti gunfuranda wamani wayanuhaña lan luma gürigia le súdinitimabei ligibuagu Ubóu, Bungiu le adügübaliwa, ligía lunti lubéi wayanuhan lun lau inebesei. Ani lun laganbuniwa, mosu wagunfulirun lau fiú katei. Ariha wamá ǘrüwa lídangiñe.

Lidan furumiñeti lúgaaru, lunti wafurieidun lun Heowá, mama lun Hesusu ni lun somu “guáriua” (Áfuriduni 20:4, 5). Ariñagatu Bíbülia furangu: “Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun” (Filipuna 4:6). Libiaman, mosu wafurieidun lidan liri Hesukrístu, le Liráü Bungiu. Ariñagati meha Hesusu: “Úati achülürüti lumoun Bungiu Úguchili anhein mama lubéi nuéigiñe” (Huan 14:6). Ani le lǘrüwan katei, le wamuriahabei luma Bungiu mosu úara lan luma lugundan. Ariñagatu Bíbülia: “Subudi wamuti luagu ánhawa lan amuriaha furumiñeguarügü katei [luma Bungiu] keisi lugundan, laganbubadiwa lan” (1 Huan 5:14). *

Umadagu buítiña ayanuhatiña hámagua sagü gayara lan

Furanguti madurabei lan aban umadaguaü saragu anhein ábanrügüñein lubéi hádangiñe ayanuha. Biángubei hagía lunti hafurendeirun aganbagua houngua. Ítarameme, lunti giñe wafurendeirun aganbei Bungiu dan le layanuhan woun. Gama lumoun, ida liña ladimurehan Bungiu woun?

Uguñe weyu, ayanuhati woun tídangiñe Bíbülia, to Lererun (2 Timotéu 3:16, 17). Kei hénpulu, samina humá resibihadün lan aban gárada lúmagiñe aban humada. Dan le haliihani le lariñagubei hun, ítara liña kamá haganbuñein ayanuha, adián? Ítarameme, dan le waliihanu Bíbülia wígiruña lun layanuhan Bungiu woun. Ligía aba lubéi tariñagun Gina, to uáguboun wayanuha lidan furumiñeti arütíkulu: “Mosu naturiahanu Bíbülia, to ligaradan Bungiu, anhein busén nubéi lun lumada nan”. Ariñagatu giñe: “Naliihanu Bíbülia sagü weyu adügati lun nayarafadun lun Bungiu”. Aliiha humutu san Bíbülia sagü weyu? Anhein hadüga, hígiruba lun layanuhan Heowá hun ani hasandiraguba hungua yarafa lun.

^ par. 5 Hadariruba lanwoun ariñahani luagu ida luba lan wafurieidun lun Bungiu lidan kapítulu 17 tidan líburu Kátima san tarufudahabei Bíbülia?, hadügün gefentiña luagu Heowá.