Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Duusu-hati irumu 2014

Lunti san nasansiruni nisaminan?

Lunti san nasansiruni nisaminan?

ABA desidírü hamá fiú nibureintiña kristiánugu houdin ariha aban pelikula. Saragu hádangiñe hánigu paaná ariha hamaali, ani hínsiñeti houn. Dan le hachülürün ñeinba lubéi harihei pelikula, aba harihinu iyawaü burí to luáguboun touba muna ani saragu áruma harihiboun ñein tuma hayawa würiña tau daüguaü chátitu. Kaba san hadüga? Herederamémeba san arihei pelikula?

Arufuda lumuti hénpulu le súngubei lan wagía chülüti oura lun desidírü wamá luagu katei le gániti efekütu lidan wabagari luma lidan wamadagua luma Heowá, dandu lun buiti kei lun wuribati. Anihein dan samina wamá wadügün somu katei, gama lumoun, lárigiñe wasaminaruni buidu aba madügün wamani. Mini lan san le siñagua wamá woungua lun desidírü wamá? O buídubei lun desidírü wamá amu katei?

Dan le MABUIDUN LAN wasansiruni wasaminan

Ínsiñeni le wasandirubei luagu Heowá ligía adügübei lun wederegeruni wabagari lun ani badisei wagía. Füramasetiwa lun úaraguabadiwa lan lun súnwandan, ani busentiwa wagunfuliruni le füramase wabéi. Gama lumoun, busenti Satanási, le wágani, ladügün lun múaragun wamá lun Bungiu (Aruf. 12:17). Desidírühadiwa weseriwidun lun Heowá ani lun gaganbadi wamá lun lilurudun; anhein wasansira wasaminan, gayarabei weferidiruni wabagari. Hírubei hamuga katei le!

Kéiburi 2,600 irumu guentó, adügati Nabukodonosoru, le meha lurúeite Babilónia, aban óunwenbu guáriua lauti golu ani aba líchugun gumadi lun háhuduragun sun gürigia lun. Le máhuduragunti lagurúba meha lidoun aban régigi durunguti. Sadürákü, Mesakü luma Awedi-negó hagía meha 3 nibureintiña ha áhuduragubaña lun Heowá, ani busentiña meha gaganbadi hamá lun. Kei le máhuduragun habéi ligibugiñe guáriua, aba hagurún lidoun régigi durunguti. Íbini aba lan meha lesefuruniña Heowá lau aban milaguru, aranseñu haña meha lun hóunwegun lubaragiñe hachararun lun Bungiu (Dan. 3:1-27).

Desidírühali meha profeta Danieli láhuduragun  lun Bungiu ani masansirun lumuti laritagun. Subudi lumuti anhein lan hariha afurieida, lagurúba lan lidoun fusu le ñein habéi liñún. Íbini ítara, sigiti afurieida lun Bungiu 3 wéiyaasu luagu weyu, kéiñaha ladügüni. Biní lumuti meha Heowá Danieli lau lesefuruni “hawéi liñún” (Dan. 6:1-27).

Uguñe weyu, desidírütiña giñe lubúeingu Heowá lun úaragu hamá lidan heseriwidun lun. Tidan aban leskuela Áfürika, máhatiña fiú nibureintiña gefentiña luagu Heowá lun habusuragun lun aban sínbolu le lánina ageiraü. Aba hasiadirún luagu habugúba lan leskuelarugugiñe ánhaña mabusuragun lun sínbolu ligía kei hadügüni hánigu paaná. Murusun dan lárigiñe, aba labisidahani minisi le arihibei lau furendei uburugu, ani aba layanuhan hama fiú hádangiñe nibureintiña gefentiña luagu Heowá hagía, aba hafuranguagüdüni lun lau inebesei, ani sin anufudei, ka lan lébubei mabusuragun hamá lun sínbolu le lánina ageiraü. Lúmagiñe dan ligía, maturobulinhaña íbirigu, ani gayarati houdin leskuela sin leredúniwa hawagu lun maganbadi hamá lun Heowá.

Ariha waméi le asuseredubei lun Joseph. Anihein meha kánserü tuagu lani weiriou, ani sódini aba tounwen. Inebeti meha lafiñen Joseph houn liduheñu libügürü ligaburi ábunahani. Gama lumoun, mama meha gefentiña luagu Heowá tiduheñu hilaaru, ani busentiña hadügün fiú katei le kóntürati luagu lilurudun Bungiu. Ariñagati Joseph: “Kei máhabadina lubéi meha lun hadügüni, aba houchun héredun hawagun nisaanigu, gama lumoun, úati ni aban ánharuti. Hóuchatiña giñe tiduheñu lun hadügün aban beluria wábiñe lun hasigiruni hechun. Aba nariñagun houn anhein lan busén habéi hadügüni, mámaba lan núbiñe hadügei. Subudi hamuti meha kóntüra lan hechun luagu nafiñen luma luagu tafiñen finóu nani weiriou. Lárigiñe saragu sigenei, aba houdin adügei lidan amu fulasu.

”Lidan dan hénrenguti ligía, amuriahatina meha luma Heowá lun líderagunina, íderagua láñame niduheñu lun madüraagun wamani lilurudun. Aganba lumuti nafurieidun ani íderagua lumutiwa giñe lun wakipurun úaraguni íbini lidan lénrengunga ligía”. Ni Joseph ni lisaanigu masaminarungubeitiña hasansiruni hasaminan lun maganbadi hamá lun Bungiu.

Dan le GAYARA LAN wasansiruni wasaminan

Murusun dan lárigiñe lefeduhóun Luéyuri Esefuruni lidan irumu 32, aba tayarafadun aban würi kananna lun Hesusu dan le ñein lubéi Sidón ani amuriahatu luma saragu wéiyaasu lun lasagaruni mafia le tuágubei tiráü. Furumiñe, móunabun lumutu Hesusu ani aba lariñagun houn lani disipulugu: “Hóunrügüñein gürigia ha Ísüraelina ha féridihaña lóunahana Bungiu lun níderaguniña”. Kei le aba lubéi tasigirun amuriaha, aba lariñagun: “Mabuidunti lun tagidarúniwa fein hawéi isaanigu lun tichugúniwa houn ounli”. Gama lumoun, aba tóunabun würi tuguya lau óunwenbu afiñeni: “Anha, Nabureme; gama lumoun lau sun lira gayaraati héigini ounli ifei le ábürühati luéigiñe hadabulan haburiña”. Ánhati Hesusu lun le tamuriahabei, ani aba lareidaguadünu tisaani (Mat. 15:21-28).

Lau ladügüni, lóuseruña kei Heowá, le aranseñubei lun lasansiruni lisaminan dan le anihein lan resun buiti. Kei hénpulu, dan le hadügünbei ísüraelina aban bágasu lauti golu, saminati meha Bungiu lagumuchaguagüdüniña, gama lumoun aba lasansiruni lisaminan lárigiñebei layumuragun Moisesi luagu hafulesein (Afu. 32:7-14).

Sigí lumuti meha apostolu Pábulu lani Heowá luma Hesusu hénpulu. Luagu aban dan, saminati yebe mabuidunti lan meha lanügüni Huan Márükosu lúmagua lidan luéiyasun kei misioneru, lugundun dan le laweiyasuhanbei úara luma Berünawé, ígira lumutiña hábuguarügü. Gama lumoun, dan lárigiñe ariha lumuti luagu adüga lan asansiruni ani nadagimein lan lau erei lidan leseriwidun lun Bungiu. Ligía aba lubéi lamuriahan luma Timotéu: “Áluahabei Márükosu, banügeime búmagua; gayaraabei líderagunina lidan wadagimanu” (2 Tim. 4:11).

Agia wagía? Háfuga mosu wasansiruni wasaminan, ítara kei ladügüni Wáguchi le siélubei le hínsiñehabubei ani gaguraasun ligía. Kei hénpulu,  háfuga mosu wasansiruni ligaburi warihiniña amu gürigia. Anhein adüga lubalin Heowá luma Hesusu katei le, bián gürigia mafigountiña, ma lunti giñe wáfaagun, wagía gürigia gafigountiña, lun wasaminarun luagun le gádanbaliña amu luma lun wasansiruni ligaburi warihini katei, anhein gayara?

Ñeinbei dan, háfuga mosu lan wasansiruni ligaburi wasaminan libügürü le lunbei wadügüni lidan weseriwidun lun Bungiu. Fiú aturiahatiña Bíbülia ha barühaña saragu dan abasiha lidoun wadamuridagun aba desidírü hamá hígirun lun lásügürün saragu dan lubá habadiseirun. Añahein apurichihatiña úati desidírü hamá heseriwidun keisi prekursoru íbini gayara lan hadügüni. Ani añahein fiú íbirigu máfaaguntiña saragu lun hibihin lanwoun buligasion lidan damuriguaü (1 Tim. 3:1). Aríaguatün san hungua lidan aban lídangiñe kesi le? Haritagua huméi amisuraha lanün Heowá lau ínsiñehabuni lun haganwoundagüdüni heseriwidun lun. Ligíati, ka uagu masansirun hubalin ligaburi hisaminan, ani áfaagua huguyame lun heseriwidun lun Bungiu luma houn aemu gürigia?

Anihein dan, buiti lun wasansiruni wasaminan

Ariñagatu aban íbiri gíritu Ela luagu teseriwidun tidan aban sukursáli hani gefentiña luagu Heowá Áfürika: “Dan le nachülürünbei Betelirugun, ibidiñeti meha nun anhein nerederuba lubéi saragu dan. Busentina meha neseriwidun lun Heowá tau sun nanigi, gama lumoun, hanarimeti meha nabadülerun hawagu niduheñu. Furumiñe, wéiriti meha nálugun hawagu... Gama lumoun, aba meha tíchugun nani paaná lidan rumu gurasu nun, ligía aba lubéi desidírü nan nerederun. Lárigiñe diisi irumu le naubei Betelirugu, desidírühadina nerederun ya lun neseriwidun houn íbirigu”.

Dan le MOSU LAN wasansiruni wasaminan

Haritagua humagili san le asuseredubei lun Kaín dan le meha gimuga lubéi lun lamulen ani aba lagañidun saragu? Ariha lumuti meha Heowá lanügübei lan igañi ligía Kaín lun ladügün katei  wuribati, ligía leweridirunbalin lun lárügüdagun lungua anhein busén lubéi lunya lagundaarun Heowá luma. Aba lariñagun lun: “Lagurabahaña figóu lun lagumadirunibu”. Gayarati yebe meha lasansiruni Kaín lisaminan, gama lumoun, aba desidírü lan maganbadi lan lun eweridihani le líchugubei Bungiu lun. Ani wuribati meha lani resultóu, lugundun aba láfaruni lamulen hilagubei, ani aba liabin lun ligía lan furumiñeti áfarahati ubouagu (Agu. 4:2-8).

Kaba hamuga meha asusereda lun hamuga sansi lani Kaín lisaminan?

Le asuseredubei lun urúei Usíasi arufudahati giñe aban leksióun súdiniti woun. Íbini adüga lani le buídubei ligibugiñe Heowá furumiñe, ani buiti meha lumadagua luma, lau lásügürün dan aba lanaagun lungua. Ariñagati abahüdaguni aba lan lebelurun tidoun ténpulu lun lágudahan kupali, lau sun hóunrügüñein lan fádirigu yu lan hadügüni. Ani dan le hariñagunbei lun lun lan madügün lani katei ligía, masansirun lumuti lisaminan. Lubaragiñe lira “aba lagañidun houn fádirigu” ani madügünti gasu hau. Kei resultóu, aba labeichuni Heowá lau lépüra (2 Kro. 26:3-5, 16-20).

Arufudati hénpulu burí le luagu anihein lan dan mosu lan wasansiruni waritagun sunsuinagubei. Samina wamá luagu Joachim, le abadiseirubei lidan irumu 1955 ani lidan irumu 1978, aba labugún lídangiñe damuriguaü. Lóugiñe 20 irumu lárigiñe, aba larufudun luagu ásakürihaali lan ani ábaya lagiribudun tidoun lóundarun Heowá. Aba lálügüdüni aban wéiyaali lidan afiñeni ka lan uagu ladarasahanbei lubá lamuriahan lun lagiribudun. Aba lóunabun Joachim: “Anihein meha igarihabu tidan nanigi, ani barüguatina meha nungua. Híruti aba lan nadarasarun lun nasansiruni nigaburi. Lidan sun dan le naubei bóugudi luéi damuriguaü, subudi numuti luagu arufudaha hamani gefentiña luagu Heowá inarüni”. Aba líchugun Joachim fe luagu mosu lan meha lasakürihan, ani sansi laali meha ligaburi.

Háfuga ñeinbei dan mosu lanme giñe wasansiruni wasaminan luma ligaburi wadügüni katei. Ligíati, aranseñu wamá lun wadügüni, gayara láamuga wagundaaragüdüni Heowá (Sal. 34:8).