Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Duusu-hati irumu 2014

Lun wásügürün lau ibagari, mosu lidan wamá aban

Lun wásügürün lau ibagari, mosu lidan wamá aban

“Lumegegu ábanmeme úgubu sun [wagía].” (EFE. 4:25)

1, 2. Ida liña labusenrun Bungiu lun wáhuduragun lun, meberesenga ka lan warumudiribei luma wanichigu?

ANHEIN nibureingidibu lubéi ani tídanñadibu lóundarun Heowá, gayarati bachoururuni luagu weiri lan bebegi. Lidan saragu ageiraü badiseitiña besafu nibureintiña sagü irumu. Ruti gurasu warihiniña haganagua ha desidírübaña heseriwidun lun Heowá!

2 Chóuruti hínsiñe lan bun búaradun hama amu nibureintiña. Hínsiñeti woun wásügürün dan hama gürigia ha waseisin. Gama lumoun, meberesenga ka lan warumudiribei o wanichigu, busenti Bungiu lun wáhuduragun lun súngubei wagía lidan aban. Abürühati apostolu Pábulu luagu busén lan Bungiu “lun hasalbarun sun gürigia, lun giñe hayabin lun hasubudiruni inarüni” (1 Tim. 2:3, 4). Ani ariñagati Arufudúni 7:9 luagu “lídangiñetiña [lan] sun fulasu, sun rasa, sun iñeñein luma néchani” sun gürigia ha áhuduragubaña lun Heowá.

3, 4. a) Ka igaburi harufudubei hiibe-agei nibureintiña uguñe weyu? b) Según Éfesuna 4:25, ida luba warihiniña íbirigu lidan damuriguaü?

3 Ma ámuti hagaburi nibureintiña ha hádanbaña lumutuniña Heowá hawéi ha ubouagubaña? Ha meseriwidunbaña lun Bungiu hawouguounrügüñein hasaminara ani adüga hamuti lérügü habusenrubei. Ligía giñe hariñagubei fiú akutihatiña hawagu saragu nibureintiña.  Lau ligaburi hayanuhan luma lau ligaburi hasansiragun arufuda hamuti ua lan inebe hamá gürigia wéinamuhaña houn, ani ariha hamutiña kamá gürigia ha “sügühaña lídangiñe moda”.

4 Le linarün katei, arihúati igaburi le lidan sun fulasu. Ligía mosu lubéi háfaagun nibureintiña ha busenbaña hagundaaragüdüni Heowá lun hadisedun luéi igaburi ligía. Gama lumoun, mama iseriti igaburi le, lugundun lidan furumiñeti sígulu, mosu meha línchahaniña Pábulu kristiánugu lun hadisedun luéi aban igaburi ítarati le meha gánibei efekütu hawagu luagu aban dan. Wati lun igaburi ligía “sífiri [...] le nadagimeinbei hádangiñe ha maganbadibaña lun Bungiu” (aliiha huméi Éfesuna 2:1-3). Nibureintiña, busentiwa wariñagun hun buidu lan hadüga lau háfaagun lun hadisedun luéi igaburi le luma luagu hídehan lidan aban hama íbirigu lidan damuriguaü. Lau ligaburi hawinwandun arufuda humuti luagu gunfuranda humani dimurei le lariñagubei Pábulu dan le lariñagun “lumegegu [wamá] ábanmeme úgubu” (Efe. 4:25). Eibu layarafadun lagumuchagüle ubóu wuribati le, súdinibei werederun lidan aban hama wíbirigu. Ariha wamá fiú hénpulu tídangiñeti Bíbülia le arufudubalin mégeiwa lan katei le.

RÉDEITIÑA MEHA LIDAN ABAN

5, 6. Ka wafurendeirubei lídangiñe lerederun Lotu hama lisaanigu lidan aban?

5 Lidan binadu dan, góunigi lumutiña Heowá lubúeingu dan le híderagunbei hóuniwagua lidan lidaani lénrengunga. Uguñe weyu, sun lubúeingu Bungiu, meberesenga ka lan warumudiribei, gayarati wafurendeirun lídangiñe hénpulu le híchugubei binadu lubúeingu Bungiu. Gumese wamá ayanuha luagu le asuseredubei lun Lotu.

6 Lídanñein meha peliguru Lotu hama liduheñu, lugundun lagünrinchawaguba meha Sodoma, uburugu le ñein lubéi meha haganawa. Ligía aba lubéi meha hariñagun fiú ánheligu lun mosu lan lidin aramudagua áraabu. Aba hariñagun lun: “Furesebá! Saraba” (Agu. 19:12-22). Gaganbaditi meha Lotu, ani furitiña giñe bián lisaanigu uburugugiñe úara luma. Dan le lariñagunbalin Lotu houn wügüriña ha gadaradunbaña hama lisaanigu mosu lan hígiruni fulasu ligía, “mafiñeruntiña”. Ani féridi hamuti habagari (Agu. 19:14). Lóturügüñein hama lisaanigu, ha mafareinragubaña luéi, hagía esefurubaña.

7. Ida liña meha líderaguniña Heowá ha áfuridubaña Ehiptugiñe ladüga herederun lidan aban?

7 Ariha wamá ábanya hénpulu. Dan le meha háfuridunbei ísüraelina Ehiptugiñe, adüga hamuti keisi ábanmeme sétanu. Ani dan le meha liñurunbalin Moisesi “lúhabu luagun barana” lun ladaaruni Heowá, mánhiñuragun lumuti lábuguarügü o hámarügü fiú ísüraelina. Subudi wamuti íderagua lániña Heowá ani aba lan hásügürün súngubei lidan aban, (Áfu. 14:21, 22, 29, 30). Rédeitiña meha súngubei lidan aban, íbini “saragu hawuyerigu gürigia” ha desidírübaña houdin hama íbini mama hamá ísüraelina (Áfu. 12:38). Ma masaminaruntiwa hawagun fiú, háfuga fiú nibureintiña, adireira lun houdin luéigiñe amu üma le genegeti houn buídutima lan? Aban hamuga lanarime libidiounigan au lira, ladüga heferidiruñein hamuga lídehan Heowá (1 Ko. 10:1).

8. Lidan meha lidaani urúei Hosafátü, ida liña harufuduni lumutuniña Bungiu lídanñanu lan aban?

8 Lidan lidaani urúei Hosafátü, gagibuguatiña meha lumutuniña Bungiu hama “saragu súdaragu” ha meha busenbaña hagayuahan hawagu (2 Kro. 20:1, 2). Ida liña meha hóunabun lubúeingu Bungiu? Lubaragiñe hageindagun lau habafu guánarügü, aba hafiñerun luagu Heowá (aliiha huméi 2 Krónikasi 20:3, 4). Máluahantiña meha haranseruni turóbuli sin lídehan Bungiu, según le lídanbei hasaminan. Ariñagatu Bíbülia “rara haña [lan] buga sun lílana Hudá ligibugiñe Wabungiute hau sun hámarigu, harahüñü hama irahüñü  ha ñǘbüritimagiñabaña” (2 Kro. 20:13). Rédeitiña súngubei lidan aban, meberesenga harumudiri, ani gaganbaditiña lun ladundehan Heowá lau afiñeni. Kei resultóu, góunigi lumutiña Heowá hawéi háganiñu (2 Kro. 20:20-27). Ma lubuidun hénpulu le hígirubei woun luagu ida luba lan hararamun lumutuniña Bungiu lun óuchawaguni!

9. Ka wafurendeirubei lídangiñe úarani le meha hádanbei kristiánugu ha lánina furumiñeti sígulu?

9 Rédeitiña meha giñe kristiánugu ha lánina furumiñeti sígulu lidan aban. Kei hénpulu, dan le meha hebelurunbei saragu huríu hama ha mámabaña huríu lidoun damuriguaü kristiánu, “aba hederegeragun houngua lun hafurendeiruni le harufudahabei apostolugu houn, afanreinha haméi hámati, óundaragua hagía lun héiginu fein luma lun hafurieidun” (Adü. 2:42). Arihúatimati meha úarani ligía dan le lagumeserunbei éibaahouni ani mosu meha hóunigiragun hóuniwagua (Adü. 4:23, 24). Gunfuranda wamuti san arufudahani le? Mosu úara wamá lidan lidaani lénrengunga.

LIDAN WAMÁ ABAN EIBU LAYARAFADUN LUÉYURI HEOWÁ

10. Ídaba lunti lan úaratima wamá?

10 Ayarafadeina liña dan le hénrengutimabei lídangiñe sun dan. Ayanuhati profeta Hoeli luagu kei “luéyuri luburiga luma lamuñounga” (Hoe. 2:1, 2; Sof. 1:14). Lídanme dan ligía, mósume herederun lumutuniña Bungiu lidan aban. Haritagua waméi le lariñagubei Hesusu: “Furumiñeguarügü arúeihani le afanreinraguti lun hageindagun hámagua, lagünrinchaguba” (Mat. 12:25).

11. Ka larufudahabei Sálumu 122:3, 4 woun luagu úarani? (Ariha huméi dibuhu le lídanbei lagumeseha arütíkulu.)

11 Yarafa madise, danme le lagumeserun lidaani lénrengunga lun ubóu wuribati le, mósume werederun lidan aban. Úarani ligía gayarati konparárü wamani tuma muna burí to yarafaguaboun uburugu Herusalén. Hanarimeti tiyarafagun darí lun leremuhan abürühati sálumu ítara liña lan Herusalén kei aban “uburugu adügǘti lun hóundaragun lílana fulasu ñein”. Ligía gayara lubéi meha hóunigiragun lílana uburugu hóuniwagua. Háfuga haritaguagüda lumuti tiyarafagun muna burí tugía abürühati sálumu luagu úarani le meha hádanbei “lani Aburemei türibu” dan le meha hóundaragunbei lun háhuduragun lun Bungiu (aliiha huméi Sálumu 122:3, 4). Dandu guentó kei lidan lidaani lénrengunga le lunbei liabin, mosu giñe lidan wamá aban.

12. Kaba íderaguawa lun werederun wínwanñu danme le heibaahóun lumutuniña Bungiu yarafa madise?

12 Ka uagu súdinibei lubéi werederun lidan aban danme le lachülürün lidaani lénrengunga? Ariñagati Esekiéli kapítulu 38 luagu lagayuahaba lan ‘Gogu’ hawagu lumutuniña Bungiu. Mámame dan lun wígirun lun ñein lan fánreinguaü wadan ni lun wáluahan aramudaguagülei lidan ubóu le. Lubaragiñe lira, mósume wabadülerun hawagu wíbirigu. Gama lumoun, mama luagu lidan wamá aban sétanu lun wesefuruba lan, lugundun kada aban wádangiñe mósume larufuduni afiñe lan luagu Bungiu ani gaganbadi ligía lun. Hárügübaña agúaruti liri Heowá lau afiñeni asalbara (Hoe. 2:32; Mat. 28:20). Kábati asusereda houn ha adisedubaña hawéi lumutuniña Heowá lun houdin luéigiñe amu üma? Hesefuruba san? (Mik. 2:12.)

13. Ka gayarabei hafurendeiruni nibureintiña kristiánugu lídangiñe sun le akutiha wamaalibei darí guentó?

13 Nibureinti, ariha bumuti san denchá lan badisedun hawéi lumutuniña Bungiu, kei hadüga saragu? Wayarafaduña lun aban dan le ñein lubéi mósume lan lidan wamá aban. Ligía mosu lubéi wafurendeirun eseriwida lun Heowá úara guentó kipu wameime úarani le lunbei wemegeiruni lun gayara lan wesefurun ámuñegü.

 “LUMEGEGU ÁBANMEME ÚGUBU SUN [WAGÍA]”

14, 15. a) Ka uagu larufudaha Heowá woun? b) Ka adundehani líchugubei Heowá woun lun línchahaniwa akipura úarani hama wíbirigu?

14 Íderagua lumutiwa Heowá lun weseriwidun lun lidan ‘úarani’ (Sof. 3:8, 9). Larufudahaña woun lubá ámuñegü, danme le lagunfuliruni lisuuni lun lóundaruni “sun katei lidan Kristu” (aliiha huméi Éfesuna 1:9, 10). Busenti lun lidan hamá aban sun lubúeingu dandu ha siélubaña kei ha ubouagubaña lun háhuduragun lun keisi ábanmeme familia. Ani chóuruti lagunfulirubei lan. Ligíati, nibureinti, gunfuranda baali san ka lan uagu súdini lubéi berederun lidan aban hama lumutuniña Heowá?

15 Larufudahaña Heowá woun lúmagiñe guentó lun lidan wamá aban súnwandan. Ligía aba lubéi tariñagun Bíbülia woun saragu wéiyaasu lun wóunigiragun wóuniwagua lau dimurei kéiburi le: “Hínsiñegua humá húmagua”, “ru humá [...] gurasu húniwagua” ani “[ru] humá [...] erei húniwagua” (1 Ko. 12:25; Rom. 12:10; 1 Tesa. 4:18; 5:11). Subudi lumuti Heowá gafigoun wamá ani ligía lan adügübei lun lachülürün oura lun hénrengu lan woun wakipurun úarani hama wíbirigu. Ligía aba lubéi lariñagun woun: “Ferudunagua humá húmagua” (Efe. 4:32).

16, 17. a) Írida humá aban resun le uágubei moun lumuti lan wígiruni wadamuridagun? b) Ka gayarabei hafurendeiruni nibureintiña lídangiñe lani Hesusu hénpulu?

16 Yusu lumuti giñe Heowá adamuridaguni lun líderaguniwa eredera lidan aban hama íbirigu. Haritaguagüda lumutiwa Ebüréu 10:24, 25 luagu aban lídangiñe resun le uágubei lunti lan wáfaagun lun lidan wamá wadamuridagun dan le lariñagun: “Lunti giñe wáfaagun wíderaguniña wíbirigu lun hínsiñehabu hamá, luma lun hadügüni le buídubei”. Ani súdiniti giñe wariñagun luagu ru lani Heowá adamuridaguni woun lun wíchugun gurasu wóuniwagua éibutima layarafaduña lan “luéyuri”.

17 Ruti Hesusu aban hénpulu woun, lugundun hínsiñeti meha lun ladamuridagun hama lumutuniña Bungiu. Dan le meha 12 irumu lau, ñǘdünti hama lagübürigu lidoun aban óunwenbu adamuridaguni tidan ténpulu. Dan le hagiribudunbei, aba leferidirun Hesusu hawéi Hosé tuma María, gama lumoun mama ladüga lidin hamoun amu nibureintiña. Lubaragiñe lira, darí hamuti ayanuha tuagu Lererun Bungiu hama máisturugu ha tídanbaña ténpulu (Luk. 2:45-47).

18. Ida liña lídehan wafurieidun lun ñein lan úarani?

 18 Kei aubei warihei, lun werederun lidan aban mosu wakipurun ínsiñeni hawagu amu ani lunti giñe wadamuridagun. Gayarati giñe wafurieidun hawagu amu kristiánugu. Dan le wafurieidun luagu le hemegeirubei wíbirigu, íderagua lumutiwa lun gunfuranda wamani mosu lan wasaminarun hawagun wíbirigu. Ani mámarügüñanu ha wéinamuhañabaña lun hadügüni katei le. Anhein nibureingidibu lubéi, saminabá anhein bayusuruñein lubéi sun adundehani le lúntima búaradun hama íbirigu lidan damuriguaü. Líderagubadibu katei le lun yarafatima ban houn lumutuniña Bungiu ani díseñu luéi ubóu le lani Satanási danme le lagünrinchawagun.

Súngubei wagía gayarati wafurieidun hawagu wíbirigu (Ariha huméi párafu 18)

ARUFUDA WAMÉI “LUMEGEGU [WAMÁ] ÁBANMEME ÚGUBU”

19-21. a) Lidan burí ka sügǘ larihíwa furangu luagu lídanñanu lan aban lubúeingu Heowá? Ru humá fiú hénpulu. b) Ka wafurendeirubei lídangiñe le hadügübei fiú íbirigu dan le liabin somu liñawan dan?

19 Uguñe weyu arufuda hamuti lubúeingu Heowá lídanñanu lan aban, ítara kei lariñagun Rómana 12:5. Ani arihúati katei le dántima le lasuseredun somu liñawan dan. Lidan duusu-hati irumu 2011, adügati aban durumandei saragu damichi lidan aban ubouhu gíriti Mindanao Filipina. Lídanrügü aban áriebu, adügati dañu tun tóugiñe 40,000 muna, haban saragu íbirigu taganagua. Gama lumoun, según ariñahani le ñǘbuinbei tídangiñe sukursáli “lubaragiñe hagumeserun lílana sétanu le ídehabei lidan lidaani chagaguaü nadagimein, gumeseeña íbirigu lídangiñetiña amu fulasu óunaha ídemuei”.

20 Dan le ladügünbei aban lanarime hárabaganali luma aban tsunami chagaguaü Japón, saragu íbirigu súfuritiña ani fériditiña saragu. Añahein hádangiñe féridi hamuti sun hámati. Yoshiko, aban íbiri to awinwanduboun 40 kilometuru (25 maili) tuéi Luban Adamuridaguni, féridi tumutu tuban. Ariñagatu: “Wéiritu wanigi dan le wíchugunbei fe ñübuin lan óunigiruti sirkuitu hama amu íbiri áluahawa larugan lárigiñe hárabaganali”. Aba táhayachun ani aba tariñagun: “Gúndaatiwa saragu luagu ru lani damuriguaü le wemegeirubei woun. Ani rútiña giñe daüguaü woun, sabadu, posu tuma arumagülei”. Ariñagati aban hádangiñe íbirigu ha ídehabaña lidan lidaani chagaguaü: “Úaratiña íbirigu ha lídangiñetiña sun ageiraü ani rútiña meha ídemuei hóuniwagua. Ñǘbuintiña giñe íbirigu Merigagiñe lun hídehan. Dan le wálügüdünbaliña ka lan uagu desidírü habéi hayabin dísegiñe, aba hóunabun: ‘Úaratiwa hama wíbirigu japonna, ani mégeitiña ídemuei’”. Ma wéiriti wagundan lau tidan wamá aban óundaruni to nidiheriboun hawagu tílana? Chóuruti weiri lan lugundan Heowá dan le larihini úarani le hádanbei lubúeingu.

21 Werederun lidan aban guentó líderagubadiwa lun wagagibudagun úara lun óuchawaguni le lunbei liabin, íbini anhein ásiñara wasubudirun hawagu wíbirigu ha lídangiñetiña amu fulasu. Gagaburi wamani igaburi le líderagubadiwa lun wawanduni óuchawaguni danme le lagumuchun binadu ubóu le. Ariñagatu Fumiko, aban íbiri japonna to erederuboun wínwanñu lárigiñe aban hiriri: “Yarafaali lagumuchagülei ubóu. Mosu wasigirun íderaguaña wíbirigu darime lachülürün weyu lun úaali lan liñawan dan”.

22. Ida luba líderaguniwa úarani le wádanbei keisi kristiánugu ámuñegü?

22 Súngubei wagía le áfaagubei lun lidan wamá aban, dandu nibureintiña kei wéinamuhaña, waranseruña lun wásügürün lau ibagari lídangiñe ubóu wuribati le. Ítara kei meha lidan binadu dan, lesefurubaña Wabungiute lumutuniña (Isa. 52:9, 10). Chouru waméi súnwandan gayarabei lan hadan wamá ha lúnbaña hásügürün wínwanñu anhein wadüga sun wayaraati lun hadan wamá lumutuniña Heowá ha lídanbaña aban. Líderaguniwa giñe waganwoundagüdüni ínsiñeni le wasandirubei luagu le resibi wamaalibei. Wakutihabei katei le lidan le aban arütíkulu.