Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Duusu-hati irumu 2014

Ka mini lubéi le resibi báalibei bun?

Ka mini lubéi le resibi báalibei bun?

“Wagía afiñetiña, [...] [s]ífiri le ñǘbuinbei lúmagiñe Bungiu, ligía weresibirubei, lun gunfuranda wamani le ru laalibei Bungiu woun lau lareini.” (1 KO. 2:12)

1. Ka ariñawagúni arufudubalin le asuseredubei houn saragu gürigia?

SUBUDITI san ariñawagúni le bun: Úati asubudiruti le lúmabei darí féridi laali? Susereñahali san le bun? Le linarün katei gayarati mebereserun wamá lau le wámabei darí féridi wamaali. Kei hénpulu, aban gürigia le agüriahóubei lidan aban familia rísiti háfuga marihin lumuti lebegi le lúmabei. Lidan hakesin nibureintiña, kei le ibidiñe lubéi luáguti ibagari houn saragu, háfuga ibidiñeti houn ka lan katei gebegitimabei.

2, 3. a) Ka katei uágubei lunti lan háfaagun nibureintiña? b) Ka gayarabei líderaguniwa arihei gebegi lan katei le wámabei?

2 Anhein nibureingidibu lubéi, háfuga 20 lan irumu bau guentó, ka katei súdinitimabei bun? Lidan ubóu le, luágunrügüñein umegeguni hasaminara hiibe-agei gürigia: hagañeirun seinsu, hibihin aban muna wéiritu luma lagumuhóun burí katei áfuriduti lidan teknolohía. Gama lumoun, masaminaruntiña luagun le súdinitimabei: irisini le lúmagiñeti Bungiu. Híruti meberesen hamá saragu míñunu gürigia lau katei le. Anhein lidan lubéi inarüni baweirida, lunti báfaagun lun meferidirun bani bínsiñehabu luagu inarüni lúmagiñeti Bungiu le harufudahabei bagübürigu bun (Mat. 5:3). Gayarati ladügün mebereseni  luagu katei le lun wuriba lan lidin bun lidan bibagari.

3 Lun masuseredun lan ítara, mosu desidírü ban buidu. Ida luba bibihini? Akutiha wamá fiú hénpulu tídangiñeti Bíbülia le gayarabei líderaguniña sun kristiánugu, mámarügü nibureintiña, lun harihini halagante lúmagiñeti Bungiu keisi aban katei gebegiti.

MEBEGITI HALAGANTE LUMAGIÑETI BUNGIU HOUN

4. Ka lariñagubei 1 Samueli 8:1-5 hawagu lisaanigu Samueli?

4 Ayanuhatu Bíbülia hawagu fiú gürigia ha meha eresibirubaña aban óunwenbu alagan lúmagiñe Bungiu ani marihin hamuti keisi aban katei gebegiti. Ligía asuseredubei houn lisaanigu profeta Samueli, le eseriwidubei lun Heowá lau úaraguni lúmagiñe liñüraü (1 Sam. 12:1-5). Ígirati meha Samueli aban lubuidun hénpulu houn lisaanigu, Hoeli luma Awíasi, gama lumoun marihin hamuti halagante keisi aban katei gebegiti, ani aba haribadun. Ariñagatu Bíbülia mítaran hamá kei háguchi lugundun “madügün hamuti katei lau úarani” (aliiha huméi 1 Samueli 8:1-5).

5, 6. Ida liña meha hagumuchun lisaanigu luma libari Hosíasi?

5 Susereti meha aban katei ítarati houn liduheñu urúei Hosíasi, aban lubúein Bungiu le buiti. Dan le meha tadarirúnwabei liliburun lilurudun Bungiu ani aganbaléi urúei Hosíasi le tariñagubei líburu tugía, adüga lumuti meha sun liyaraati lun lafalaruni lererun Heowá. Nadagimeinti lau erei lun lagumuchun lau áhuduraguni houn amu búngiugu gumuguagüdalei abiñarahani le lídanbei sun ageiraü. Ani ínchaha lumutiña ha híbiri lun gaganbadi hamá lun Heowá (2 Uru. 22:8; 23:2, 3, 12-15, 24, 25). Ma lubuidun alagan le heresibirubei lisaanigu! Arúeihatiña ǘrüwa hádangiñe luma aban libari, gama lumoun, úati ni aban hádangiñe arufuduti ínsiñeni luagu le larufudahabei houn.

6 Dan lárigiñe, aba liabin Hoakasi, le lisaani Hosíasi, lun larúeihan leweñeguame, “gama lumoun wuribati lóuserun [...] ligibugiñe Bungiu”. Ǘrüwarügüñein hati lau arúeiha, aba lárügüdüni lurúeite Ehiptu, ani aba lounwen furisunrugu (2 Uru. 23:31-34). Lárigiñe, aba larúeihan Hoakimü, le lamulen luagu unsu irumu. Gama lumoun, arufudati giñe mebereseni luagu le meha larufudahabei lúguchi lun. Hanarimeti meha luriban Hoakimü darí lun lariñagun profeta Heremíasi luagu: “Labunúba keisi aban burigü” (Her. 22:17-19). Íbini urúeigu ha arúeihabaña lárigiñe Hosíasi, kéiburi Sedekíasi le lisaani luma Hoakín, le libari, wuribati giñe hóuserun, lugundun úati ni aban asigiruti lani Hosíasi hénpulu (2 Uru. 24:8, 9, 18, 19).

7, 8. a) Ida liña meha leferidiruni Salomón lalagante lúmagiñeti Bungiu? b) Ka wafurendeirubei hámagiñe ha meha marihinbalin halagante lúmagiñeti Bungiu keisi aban katei gebegiti lidan binadu dan?

7 Resibiti giñe urúei Salomón aban lubuidun alagan lúmagiñe Dawidi, le lúguchi. Íbini arufudaha lan Dawidi ínsiñeni luagu Heowá lun, lau lásügürün dan aba leferidiruni Salomón ínsiñeni ligía. Ariñagatu Bíbülia: “Dan le wéiyaali lubéi Salomón, aba hadügün lúmarigu lun tegeyedun lanigi hawagun amu búngiugu, lugundun mederegeragunti lungua sunsuinagubei lun Aburemei le Lubungiute, kei buga ladügüni Dawidi le lúguchi” (1 Uru. 11:4). Ligía aba lubéi leferidiruni Salomón lubuidun lumadagua luma Heowá.

8 Súngubei wügüriña ha gachansintiña meha lun harufudun ínsiñeni luagu Heowá luma lun hadügüni le buídubei, gama lumoun, madügün hamuti. Lau sun lira, ayanuhatu Bíbülia hawagu amu nibureintiña ha meha arihibalin halagante lúmagiñeti Bungiu keisi aban katei gebegiti, ítara kei saragu nibureintiña uguñe weyu. Ariha wamá fiú hénpulu buiti le gayarabei  háyeihani nibureintiña kristiánugu uguñe weyu.

GEBEGITI LE HERESIBIRUBEI HOUN

9. Ka uagu aban habéi lubuidun hénpulu lisaanigu Noé? (Ariha huméi dibuhu le lídanbei lagumeseha arütíkulu.)

9 Rútiña meha lisaanigu Noé aban lubuidun hénpulu. Resibihali meha háguchi gumadi lun ladügün aban árüka lun hesefurun gürigia. Chóuruti aba lan gunfuranda hamani mosu lan meha hadügüni lugundan Heowá ani aba híderaguni háguchi adügoun árüka. Ani kei lariñaguni abahüdaguni, aba hebelurun tidoun árüka dan le lachülürünbei Guran (Agu. 7:1, 7). Ka asuseredubei lárigiñe? Ariñagati Agumesehani 7:3 aba lan hebelaagüdün animaalugu tidoun árüka “lun magumuchagun hamá ubouagugiñe”. Ani séfutiña giñe fiú gürigia. Seremei harihini le hafurendeirubei lúmagiñe háguchi keisi aban katei gebegiti, ídehatiña meha lisaanigu Noé lun móunwegun hamá sun gürigia ha ubouagubaña luma lun hagumeseruniya áhuduraguni inarüniti lidan aban ubóu harumati (Agu. 8:20; 9:18, 19).

10. Ida liña meha harufuduni gádürü nibureintiña ebüréu luagu gebegi lan le resibi hamaalibei houn?

10 Saragu sígulu lárigiñe, arufuda hamuti gádürü nibureintiña ebüréu luagu subudi hamani ka burí lan katei gebegitimabei. Barüwatiña meha Ananíasi, Misaeli, Asaríasi luma Danieli Babilónioun lidan irumu 617 lubaragiñe wadaani. Chuti meha hau ani magadiñetiña giñe, ani gayarati hamuga meha háyeihani ligaburi hawinwandun babilóniana. Gama lumoun, madügün hamuti. Lau le hadügübei ígira hamuti furangu luagu subudi hamani ka lan burí katei súdinitimabei, le meha harufudahabei hagübürigu houn. Biní lumutiña Heowá ladüga mabulieidun hamani le harufudahabei hagübürigu houn luagu Bungiu lúmagiñe hañüraü (aliiha huméi Danieli 1:8, 11-15, 20).

11. Ida liña meha hasagarun amu gürigia buiti lídangiñe le furendei láalibei Hesusu lúmagiñe Lúguchi?

11 Siñati wayanuhan luagu lubuidun hénpulu sin wíriduni Hesusu, le Liráü Bungiu. Furendeiti saragu katei lúmagiñe Lúguchi, ani hínsiñeti meha katei ligía lun. Arihúati furangu lidan le lariñagubei: “[Madügüntina] ni kata lidan niri, luéidigia le larufudahabei Núguchi nun” (Huan 8:28). Ani busenti meha lun hasagarun amu gürigia buiti lídangiñe le furendei láalibei. Ariñagati houn: “Gasu giñe níchuguni uganu le luáguti larúeihan Bungiu houn lílana líbiri fulasu, ladüga lun lira nounahóua” (Luk. 4:18, 43). Íderagua lumutiña meha gürigia ha aganbubalin lun gunfuranda hamani moun lumuti lan hádaragun houngua lidoun luáguti “ubóu”, lugundun mebegiti katei luáguti Bungiu houn lánigu ubóu (Huan 15:19).

GEBEGITI SAN LE RESIBI BÁALIBEI BUN?

12. a) Ka idan genegegua lan libagari Timotéu luma habagari saragu nibureintiña? b) Ka álügüdahani lunbei hadügüni nibureintiña kristiánugu hóuniwagua?

12 Ítara kei nibureintiña ha uágubaña wayanuha, háfuga hínsiñe lan giñe Heowá houn bagübürigu, ani ítara liña hagüriarunibu. Anhein ítara liña lubéi, háfuga genegeguati gádantibu luma Timotéu (aliiha huméi 2 Timotéu 3:14-17). Arufudahatiña bagübürigu bun luagu Bungiu le inarüniti luma luagu ida luba lan bagundaaragüdüni. Chóuruti aba lan harufudahan bun lúmagiñe biñüraü, ani ligía íderagubalibu lun bibihini “lichú aau le busenwabei lun gayara lan hasalbarun gürigia, lau hafiñerun luagu Hesukrístu” luma lun “aranseñu” ban lun beseriwidun lun Bungiu. Gebegiti san le resibi báalibei bun? Saminabá murusun luagu katei le. Álügüdaguaba bungua: “Ida liña san nasandiragun nungua luagu hadan nan lubúeingu Bungiu ha úaraguabaña lun? Gúndaatina san luagu anahein lan hadan  murusun gürigia ha larihibaña Bungiu keisi lumadagu? Gebegiti san óunwenbu chansi le nibihibei lun nasubudiruni inarüni nun?”.

Gúndaatibu san luagu hadan ban lubúeingu Bungiu ha úaraguabaña lun? (Párafu 9, 10 luma 12))

13, 14. a) Ka burí óuchawaguni úmabei hagagibudagua fiú nibureintiña kristiánugu? b) Ka uagu súdini lubéi hawanduni óuchawaguni ligía? Ru humá aban hénpulu.

13 Añahein fiú nibureintiña ha agüriarúbaña lidan inarüni úagili gunfuranda hamani buídutima lan katei tidan lóundarun Bungiu sügǘ lau lidan ubóu le lani Satanási. Ani añahein hagía, busentiña hasandiruni ka lan lídanbei ubóu. Agia buguya, ka bisaminanbei? Bachüüraguña hamuga san bungua tubaroun aban karü lun barihini anhein tabuleseirubadibu lubéi o anhein bóunwenba lubéi? Uá. Ítarameme, mama mosu wawinwanduni liwiye habagari lílana ubóu lun wasubudiruni anhein ladügüba lubéi dañu woun (1 Fe. 4:4).

14 Lidan aban familia kristiánu lagüriarúa Hener, aban nibureinti ásiana, le abadiseirubei dan le 12 lubéi irumu lau. Gama lumoun, dan le aweirideinatima lan, aba meha línsiñedun ubóu lun. Ariñagati: “Busentina meha nasandiruni ‘líbürei’ le líchugubei ubóu”. Aba lagumeserun awinwanda aban ibagari dóbuliti ani dan le meha 15 irumu lau, wuribaali meha lémeri kei ha híbiri lumadagu. Gátaguadihali meha ani bulagiadi ligía kei hagía. Létiti meha lachülürün múnadoun lárigiñe lidin áhurera billar luma burí bidéu lánina huraraü le mabuidunti. Lau lásügürün dan, aba líchugun fe luagu manügünti lan katei burí le ugundani. Masuuniti meha libagari. Lárigiñe lagiribudun lidoun damuriguaü, ariñagati Hener: “Hénrengugili nun nagagibudagun luma óuchawaguni le lídanbei ubóu le, gama lumoun abinirúni burí le neresibirubei luagu neseriwidun lun Heowá adügati lun nasigirun áfaagua”.

15. Ka lunbei hasaminaruni ha magüriarúnbaña lidan aban familia kristiánu?

15 Añahein amu nibureintiña mama lidan inarüni hagüriarúa. Anhein aban bubéi hádangiñe, saminabá luagun lubuidun chansi le bibihibei lun basubudiruni Bungiu luma lun beseriwidun lun. Añahein saragu míñunu gürigia ubouagu, gama lumoun ábanrügüñein gürigia hádangiñe kada 1,000 asubudirei inarüni tídangiñe Lererun Bungiu. Ani buguya aban hádangiñe! Aban óunwenbu abinirúni hádangiñe wamá gürigia ha lachawahabaña Heowá ani subudigüdalei inarüni tídangiñe Bíbülia houn (Huan 6:44, 45). Ma adügati katei le lun wagundaarun, meberesenga ida liña lan wasubudiruni inarüni?  (Aliiha huméi 1 Korintuna 2:12.) Ariñagati Hener: “Aba lásiuhan luagu nura dan le nasaminarun luagu katei le. Kátana san lun leberesedun Heowá, le Labureme sun Ubóu, nau?” (Sal. 8:4). Ani ariñagatu aban íbiri lídangiñememe fulasu ligía: “Anhein panta lubéi aban aturiahati luagu haritagua lan aban máisturu luagu, saminabá san luagu chansi le wibihibei lun lasubudirúniwa Máisturu le Wéiritimabei, Heowá!”.

KABA SAN BADÜGA?

16. Ka gayarabei desidírü hamani nibureintiña kristiánugu?

16 Buiti lun hadan wamá murusun gürigia ha anúadirubalin ibagari le buídutimabei. Desidírübadibu san lun meferidirun bani lubuidun chansi le? Anhein badüga, babahüdǘba hadan lubúeingu Heowá ha úaraguabaña lun. Buítimati katei le sügǘ lau basigiruniña hiibe-agei nibureintiña, ha mayusurunbalin habagari buidu, ani masuuniti habagari lidan ubóu le, le málühalibei agünrinchawagúa (2 Ko. 4:3, 4).

17-19. Kaba íderaguabu lun masandiragun ban bungua wuriba ladüga amu ban hawéi ha híbiri?

17 Furanguti hénrengu lan amu lan bóuserun hawéi ha híbiri, gama lumoun ligía buídutimabei. Kei hénpulu, saminabá luagun aban áhureruti lidan Juegos Olímpicos. Chülüti ñein ladüga mítaran lan kei ha híbiri lupaanágu. Háfuga ígira lumuti ladügün saragu katei le agidarubalin lidaani lun laranserun lubá huraraü. Ladüga mítaran lan kei ha híbiri ligía gayara lubéi laranserun buidu ani ibihaléi le labusenrubei.

18 Hiibe-agei gürigia masaminaruntiña luagun luriban resultóu le gayarabei lanügüni luriban hóuserun. Gama lumoun, ánhabu asaminara luagun le, amu ligía bóuserun hawéi lílana ubóu ani mádaragun bugía bungua lidoun katei burí le gayarati lagadeiruni bibagari luma bumadagua luma Bungiu, bibihibei “ibagari magumuchaditi” (1 Tim. 6:19). Ariñagatu íbiri to buga uáguboun wayanuha: “Dan le bayanuhan luagu bafiñen, buiti basandiragun bungua. Arufuda bumuti luagu here ban lun bidin kóntüra ubóu le lani Satanási. Ítara liña kamá hamuga gayarati barihini Heowá áhayacha buagun, lau lueirin ugundani. Ligía adügübei lun basandiragun bungua buidu luagu mítaran ban kei ha híbiri”.

19 Meferidirabei bidaani asaminara luágunrügü le gayarabei bibihini guentó (Apur. 9:2, 10). Anhein gunfuranda bubalin ka lan lisuunibei ibagari ani subudibei luagu líchuguba lan Heowá ibagari magumuchaditi bun, ma mosu báfaagun lun mabagaridun ban “kei ha ibidiñehabúbaña lun Bungiu”? Ánhabu anúadira beseriwidun lun Heowá, gasuunibei bibagari (Efe. 4:17; Mal. 3:18).

20, 21. a) Ánhawa desidírü buidu, ka ubá waransera? b) Ka lagurabubei Heowá wámagiñe?

20 Ánhawa desidírü buidu, wawinwanduba lau ugundani guentó, ani waranseruba lun wagundaarun lau ibagari magumuchaditi lidan iseri ubóu. Siñati ni lun wasaminarun luagun sun abinirúni le lunbei wibihini (Mat. 5:5; 19:29; 25:34). Gama lumoun, mibihin wabéi ítaraguarügü. Agurabati Heowá lun wadügün somu katei (aliiha huméi 1 Huan 5:3, 4). Gama lumoun, wibihibei wafayeiruaha luagu weseriwidun lun lau úaraguni.

21 Resibihadiwa saragu katei lúmagiñe Heowá. Ibihaadiwa subudi le dayarüti tuagu Lererun ani gunfuranda wamuti inarüni luagu luma luagu lisuuni. Ibiha wamuti óunwenbu chansi lun wanügüni liri luma lun lánigu wamá Gefentiña. Ani chóurugüda lumuti Bungiu woun anihein lan wama (Sal. 118:7). Arufuda waméi sun wagía, dandu nibureintiña kei wéinamuhaña, luagu hínsiñe lan walagante lúmagiñeti Bungiu woun ani luagu busén wamá wíchuguni “uéiriguni lun [...] lun sun dan!” (Rom. 11:33-36; Sal. 33:12).