Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Duusu-hati irumu 2014

 TÍTULU LE LUÁGUBEI TIDÁÜ: GAYARATI LUMADA HUMÁ BUNGIU

Subuditi san liri Bungiu hun?

Subuditi san liri Bungiu hun?

Gayarati funa san gamadagua humá luma aban gürigia ani ibidiñeti liri hun? Ma siñati lasuseredun lira? Ítara kei tariñaguni aban würi bulgariana gíritu Irina, “siñati lumada ban Bungiu ani ibidiñeti liri bun”. Gama lumoun, kei aubei warihei lidan arütíkulu le ásügürübei, busenti Bungiu lun wayarafadun lun. Ligía lariñagunbalin liri woun tidan Bíbülia. Ariñagati: “Heowá Au. Ligía níribei” (Isaías 42:8TNM).

Ariñaga laali Bungiu liri woun tidan Bíbülia: “Heowá au. Ligía níribei” (Isaías 42:8TNM).

Bereseti san Bungiu anhein subudi wabalin liri ani yusu waméi? Samina huméi le: liri Bungiu —le abürüdǘbei lau gádürü létüra ebüréu le asubudirúabei kei Tetragrámaton— dariwati kéiburi 7,000 wéiyaasu tidan binadu dugumedu lánina abürüdǘni Ebüréu, létima subudiwabei guentó kei Binadu Daradu. Le linarün katei, gíbetimati wéiyaasu liridúniwa sügǘ lau amu iri. Arufudati le furangu luagu busén lan Heowá lun wasubudiruni liri ani yusu wameime. *

Dan le hasubudiragun bián gürigia houngua luagu furumiñeti wéiyaasu, aba hariñaguni hiri. Subuditi san liri Bungiu hun?

Kei le sandu lubéi Bungiu ani suntigabafu, añahein gürigia saminatiña harufuduña lan minebenehabu dan le hayusuruni liri. Inarüni moun lumuti lan wayusuruni wuriba, ítara kei moun lumuti lan wayusuruni liri aban wamada wuriba. Gama lumoun, busenti Heowá lun híchugun lubúeingu uéiriguni lun liri ani lun hasubudiragüdüni houn amu (Sálumu 69:30, 31; 96:2, 8). Haritagua huméi aba lan lariñagun Hesusu houn lani disipulugu lunti lan hafurieidun ítara: “Wáguchi Bungiu le siélubei, inebewalá biri”. Arufudatiwa inebesei luagu liri Bungiu dan le wasubudiragüdüni houn amu, ani adügati lira lúntima wayarafadun lun (Matéu 6:9).

Arufudahatu Bíbülia luagu aganbatima lániña Bungiu ha “hínsiñehabubaña lun liri” (Malaquías 3:16, La Biblia de las Américas). Füramaseti Heowá houn sun ha hínsiñehabubaña lun liri: “Níchugubei iñun le ñein lumuti siñá lan lachülürǘniwa lumoun, ladüga hínsiñetina lun ani subudilána. Nóunabubei danme le láwarun nun; lúmabadina! Nesefurubei luéi idiheri” (Sálumu 91:14, 15). Ítara liña, anhein busén wabéi lumadagu wamá Bungiu, mosu wasubudiruni liri ani yusu wameime.

^ par. 4 Híruti lubaragiñe lan hamuga hayusuruni ha ásügüragüdübarun Bíbülia lidoun amu iñeñein liri Bungiu, ábarüga hagidaruni ñéingiñe ani aba híchugun “Aburemei” o “Bungiu” leweñeguame. Anhein busén hubéi lanwoun ariñahani luagu tema le, akutiha huméi páhina 195 darí 197 tidan líburu Kátima san tarufudahabei Bíbülia?, hadügün gefentiña luagu Heowá.