Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Duusu-hati irumu 2014

Gunfuranda wamuti san kan lan mini lubéi?

Gunfuranda wamuti san kan lan mini lubéi?

“Ábati ladaaruni hasaminan lun gunfuranda hamanu Lererun Bungiu.” (LUK. 24:45)

1, 2. Ida liña líchugun Hesusu gurasu houn lani disipulugu wéyumeme le láguyugunbei?

WEYU le láguyugunbei Hesusu, hóudiña bián lani disipulugu éibugeina lidoun aban aüdü kéiburi 11 kilómeturu (7 maili) Herusaléngiñe. Ibidiñeti yebe houn luagu águyuguaali lan ani hírutiña luagu katei le asuseredubei fiú weyu lubaragiñe weyu ligía. Sódini, aba larufudagun Hesusu lungua houn, aba lidin úara hama ani aba líchugun dǘgüdaguaü houn. Ida liña ladügüni? “[Aba] lagumeserun afuranguagüdei sun le tariñagubei Lererun Bungiu luagu houn, lagumesera túmagiñe burí liliburun Moisesi tumoun sun haliburun profetagu.” (Luk. 24:13-15, 27.) Ma meha lanarime ugundani le hasandirubei dan le lafuranguagüdübarun Lererun Bungiu houn! (Luk. 24:32.)

2 Rábounweyu ligía, aba hagiribudun bián disipulugu hagía Herusaléun. Dan le hadunragunbei hama ha híbiri apostolugu, aba habahüdaguni le asuseredubei houn, ani lidan añaha lan ayanuha, aba lasaliragun Hesusu houn súngubei. Aba halouchun apostolugu saragu ani aba hagumeserun asaminara luagu mama lan Hesusu gürigia le harihibei. Afuranguagüda tumuti Bíbülia ida liña lan líchugun gurasu houn: “[Aba] ladaaruni hasaminan lun gunfuranda hamanu Lererun Bungiu” (Luk. 24:45).

3. a) Ka gayarabei ladügün lun weferidiruni waguraasun lidan wani ministeriu? b) Kaba íderaguawa lidan wani ministeriu?

 3 Anihein dan, gayarabei wasandirun íruni kei disipulugu hagía. Háfuga beresegu wamá eseriwida lun Heowá, gama lumoun, gayarabei weferidiruni waguraasun ánhaña móunabun gürigia buidu lun uganu le wapurichihabei (1 Ko. 15:58). Háfuga mawanserun hamá gürigia ha aturiahabaña Bíbülia wama o háfuga desidírü hamá hadisedun luéi Heowá. Ida luba warihini wani ministeriu? Aban katei le gayarabei líderaguniwa gunfuranda wamani buidu ka lan mini lubéi hénpulu burí le layusurubei Hesusu. Akutiha wamá ǘrüwa lídangiñe lun warihini ka lan gayarabei wafurendeiruni lídangiñe.

ÁBUNAGUTI LE ARUMUGUBEI

4. Afuranguagüda huméi hénpulu luáguti ábunaguti le arumugubei.

4 (Aliiha huméi Márükosu 4:26-29.) Ka mini lubéi hénpulu luáguti ábunaguti le arumugubei? Ábunaguti le lídanbei hénpulu mini lan kada apurichihati luagu Larúeihan Bungiu. Mini lan ilaü uganu luáguti Larúeihan Bungiu le anügǘbei houn gürigia haruma tanigi. Barǘ lumuti ábunaguti libagari kei súnwandan, ‘arumugati guñoun, ani nadagimeinti wéyuagu’. Luagu amu oubaü, lúmagiñe lábununi ilaü darí lidaani alubahani, sügüti saragu dan. Lidan dan ligía, aba ‘labouchun nadü ani aba laweiridun’ murusun murusun. Ítarameme, murusun murusun hachülüra gürigia lun lumadagu hamá Bungiu. Dan le lawanserun aban gürigia darí lun desidírü lan leseriwidun lun Bungiu, aba lederegeruni libagari lun Heowá ani aba labadiseirun. Ítara liña kamá aban nadü le agindubei.

5. Ka uagu layusurei Hesusu hénpulu luáguti ábunaguti le arumugubei?

5 Ka uagu layusurei Hesusu hénpulu le? Lun líderaguniwa lun gunfuranda wamani Heowá lan adügübei lun gani lan inarüni efekütu tidan hanigi gürigia ha eresibirubalin uganu lau aban lubuidun igaburi (Adü. 13:48; 1 Ko. 3:7). Wagía ábunagubalin ilaü ani tugua waméi, gama lumoun siñati wafosuruni lun laweinamudun. Ítara kei wügüri le lídanbei hénpulu, ibidiñeti woun ida liña lan laweinamudun. Anihein dan susereti sin wíchugun fe, dan le weteniruña lan lun amu katei. Gama lumoun, lau lásügürün dan, gayarati ladügün uganu buiti luáguti Larúeihan Bungiu lun ñein lan aban iseri disipulu le lunbei líderaguniwa lidan wadagimanu lánina alubahani (Huan 4:36-38).

6. Ka lunbei gunfuranda wamani luagu ligaburi lawanserun aban aturiahati Bíbülia?

6 Ka wafurendeirubei lídangiñe hénpulu le? Furumiñe, furendeitiwa siñá lan wafuresehani hawanserun aturiahatiña Bíbülia lidan inarüni. Wasubudiruni luagu siñati lan wadügüni sun katei líderagubadiwa lun madügüdarun wamá hawagu lun habadiseirun. Adüga wamuti sun wayaraati lun wíderaguniña, gama lumoun gunfuranda wamuti luagu hagíaba lan desidírü anhein hederegeraguba lubéi houngua lun Bungiu. Lánharuba Heowá lun wederegeragun woungua lun ánheingubeirügü wadüga ladüga hínsiñe lan woun (Sal. 51:12; 54:6; 110:3).

7, 8. a) Ka amu katei wafurendeirubei lídangiñe hénpulu luáguti ábunaguti le arumugubei? Ru humá aban hénpulu. b) Ka larufudahabei hénpulu le woun luagu Heowá luma luagu Hesusu?

7 Libiaman, gunfuranda wamani le larufudahabei hénpulu le woun líderagubadiwa lun meferidirun wamani waguraasun danme le marihin wamá resultóu buiti furumiñe. Lunti gaguraasun wamá (Sant. 5:7, 8). Anhein adüga wamaali lubéi sun wayaraati lun wíderaguni aturiahati ani mawanserunti, masaminara wamá marufudaheidi wamá. Tídanrügüñein hanigi gürigia ha busentiña hasansiruni hagaburi lígira Heowá lun gani lan inarüni efekütu (Mat. 13:23). Ligía moun lumuti lubéi wasaminarun buiti lan lidin woun lidan wani ministeriu dánrügü le wanügün somu gürigia lidoun inarüni. Mariñagunti Heowá buiti lan lidin woun lidan wani ministeriu ladüga ligaburi hóunabun  gürigia ha únbaña wapurichiha, létima larihibei áfaaguni le wadügübei luma úaraguni le warufudubei (aliiha huméi Lúkasi 10:17-20 luma 1 Korintuna 3:8).

8 Lǘrüwan, mámaba súnwandan warihini asansiruni le ladügübei aban gürigia. Kei hénpulu, aban feru maríeitiña ha aturiahabarun Bíbülia luma aban misioneru aba hariñagun lun luagu busén hamá háfuridun apurichiha. Aba laritaguagüdüniña mosu lan hígiruni agumulahani anhein busén habéi háfuridun apurichiha. Gama lumoun, aba taweiridun lanigi dan le hariñaguni lun sügühali lan fiú hati lúmagiñe hígiruni luriban échuni ligía. Ka uagu hadügei? Furendeihaña meha luagu iyereegu hamá gürigia biánguatiña igibu lun Heowá ani luagu gayarabei lan larihiniña agumulaha. Ligía aba lubéi desidírü hamá hadügün aban katei: hagumulaha ligibugiñe misioneru o hígiruni bisiu ligía sunsuinagubei. Ínsiñeni le hagumeserubei asandira luagu Heowá ligía ínchahabaliña lun hadügüni le buídubei. Íbini marihin lágili lan meha misioneru asansiruni ligía hawagu, hawanseruña meha lidan hafiñen.

SENI

9. Ka mini lubéi hénpulu tuáguti seni?

9 (Aliiha huméi Matéu 13:47-50.) Ka mini lubéi hénpulu tuáguti seni? Konparárü lumuti Hesusu esenihani luma lapurichihóun uganu luagu Larúeihan Bungiu houn sun gürigia. Ítara kei tárügüdün seni “sun hawuyeri úduraü”, achawahati giñe wapurichihan saragu míñunu gürigia (Isa. 60:5). Ítara liña larufuduni hanumerun gürigia ha achülürübaña lidoun wani adamurini luma lidoun Aritaguagülei sagü irumu. Saragu hádangiñe ítara haña kei úduraü “ha buídubaña”, ligía aba lubéi hayabin lun lílana hamá damuriguaü kristiánu. Gama lumoun, añahein giñe “ha wuribabaña”, ani meresibirun lumutiña Heowá.

Lárigiñe waliihani Matéu 13:47-50...

10. Ka uagu layusurei Hesusu hénpulu tuáguti seni?

10 Ka uagu layusurei Hesusu hénpulu le? Afanreinraguni le uágubei layanuhóua lidan hénpulu mama layanuhaña luagu lagumuhóun aguseruni le lunbei lasuseredun lídanme lidaani óunwenbu asufuriruni, layanuhaña luagu le asuseredubei ubouagu lidan lagumuhóun dan le. Ariñagati meha Hesusu mama lan sun ha hínsiñehabubaña lun inarüni lun hóudinba lan luéigiñe lóubadina Heowá. Saragu hádangiñe ñǘdünhaña adamuridagua wama o aturiaha hamaaru Bíbülia, gama lumoun mabuseruntiña aban buligasion sériuti (1 Uru. 18:21). Añahein amu, móundaragunhaña lidan damuriguaü kristiánu. Añahein giñe nibureintiña ha agüriarubaña lidan inarüni gama lumoun mínsiñedunti lilurudun Heowá houn. Meberesenga ka lan asuseredubei, ariñagati meha Hesusu kada lan gürigia lun desidírü lan luougua. Ha desidírütiña hadügüni le buídubei lídangiñebaña “katei buídumeraüti le lídanbei sun néchani” (Ageo 2:7TNM, abürüdǘni).

... samina wamá luagu ida liña lan lagunfulirun uguñe weyu

11, 12. a) Ida liña líderaguniwa hénpulu tuáguti seni? b) Ka larufudahabei hénpulu le woun luagu Heowá luma luagu Hesusu?

11 Ida liña líderaguniwa hénpulu tuáguti seni? Gunfuranda wamani le larufudahabei hénpulu le woun íderagua lumutiwa lun madiheridun wamá saragu anhein mabusenrun somu gürigia le aturiahati Bíbülia wama o somu wasaani lánharun lun inarüni. Ligía aban katei le siñati wasansiruni, íbini ánhawa áfaagua saragu. Mama ladüga lagumeserun aban gürigia aturiahoun Bíbülia o ladüga lidan lan inarüni lagüriara lun ladügüba lan aban lubuidun umadaguaü luma Heowá ítaraguarügü. Sun ha mabusenrubaña herederun lábugiñe Larúeihan Bungiu lasagarubaña Heowá hádangiñe lumutuniña.

Fiú hádangiñe ha hínsiñehabubaña lun inarüni hóudinba luéigiñe lóubadina Heowá (Ariha huméi párafu 9 darí 12)

12 Mini lan san lira sun lan ha ígira hamaali inarüni siñahali lan hagiribudun lidoun damuriguaü o harihíba lan súnwandan kei aban gürigia ‘mabuidunti’ anhein  mederegerun lágili lubéi libagari lun Heowá? Uá. Gayarabei hebelurun tidoun lóundarun Heowá lubaragiñe lachülürün óunwenbu asufuriruni. Ítara liña kamá hamuga lariñaguña Heowá houn: “Giribu humá nun, ábame nagiribudun hun” (Mal. 3:7). Afuranguagüda lumuti giñe Hesusu katei le lau amu hénpulu: le luáguti isaani le agiribudubei lúbiñoun lúguchi (aliiha huméi Lúkasi 15:11-32).

ISAANI LE AGIRIBUDUBEI LÚBIÑOUN LÚGUCHI

13. Afuranguagüda huméi hénpulu luáguti isaani le agiribudubei lúbiñoun lúguchi.

13 Ka mini lubéi hénpulu luáguti isaani le agiribudubei lúbiñoun lúguchi? Úguchili gudemehabuti le uágubei layanuhóua lidan hénpulu le layanuhaña luagu Heowá, Wáguchi le siélubei. Isaani le amuriahabalin lalagante ani aba lidin achagarei mini lan sun ha adisedubaña luéi damuriguaü. Dan le hadügüni, ítara liña kamá hamuga aba houdin “dise lidoun amu fulasu”, lidoun ubóu le lani Satanási dise luéi Heowá (Efe. 4:18; Kol. 1:21). Gama lumoun, lau lásügürün dan fiú hádangiñe aba hasaminaruni katei buidu ani aba hadügün aban óunwenbu áfaaguni lun hagiribudun tidoun lóundarun Heowá. Feruduna lumutiña lau sun lugundan, lugundun arufudaaña ǘnabuguni ani asakürihaaña giñe (Isa. 44:22; 1 Fe. 2:25).

14. Ka uagu layusurei Hesusu hénpulu luáguti isaani le agiribudubei lúbiñoun lúguchi?

14 Ka uagu layusurei Hesusu hénpulu le? Lun larufuduni lau aban lubuidun igaburi luagu busén lan Heowá lun hagiribudun ha adisedubaña luéi. Úguchili le uágubei layanuhóua lidan hénpulu meferidirun lumuti lemenigin luagu lagiribuduba lan lisaani. Dan le larihinbei liabin, íbini ‘dísegili’ lan, aba ladügün aransehani lau lóufudagun lun líchugun lubuidun achülürüni lun. Ínchaha lumutiña hénpulu le sun ha adisedubaña luéi Heowá lun hagiribudun lun. Gayarati hasandiragun houngua buchá lan hawagu ani nibusigari hagía, ani genege lan houn hénrengu lan üma lánina agiribuduni. Gama lumoun, buiti lun hadügüni lugundun íbini sielu ñeinbei ugundani danme le hagiribudun (Luk. 15:7).

15, 16. a) Ka wafurendeirubei lídangiñe hénpulu luáguti isaani le agiribudubei lúbiñoun lúguchi? Ru humá fiú hénpulu. b) Ka larufudahabei hénpulu le woun luagu Heowá luma luagu Hesusu?

15 Ida liña líderaguniwa hénpulu luáguti isaani le agiribudubei lúbiñoun lúguchi? Íderagua lumutiwa lun wasigiruni lani Heowá hénpulu. Mabuseruntiwa lun “lásügürün lueirin [wa]buidun” darí lun siñá lan weresibiruniña ha agiribudubaña asaküriheina.  Ánhawa óusera ítara, gayarabei weferidiruni wamadagua luma Heowá (Apur. 7:16). Furendeitiwa giñe mosu lan warihiniña ha adisedubaña luéi damuriguaü keisi aban ‘mudún le ayuridaguti’, mama kei aban gürigia le féridi waali (Sal. 119:176). Ánhawa adarira aban gürigia le adisedubei luéi damuriguaü ani mabugúnwagili lídangiñe damuriguaü, wíderagubei san lau ínsiñeni lun gayara lan lagiribudun? Wawisarubaña san wéiyaaña lidan afiñeni lau lóufudagun lun giñe híderaguni? Wadügübei anhein busén wabéi wagunfuliruni le larufudahabei Hesusu woun lidan hénpulu luáguti isaani le agiribudubei lúbiñoun lúguchi.

16 Ayanuhaaña fiú gürigia ha agiribudubaña lidoun damuriguaü luagu lugudemehabu Heowá luma luagu ídemuei le heresibirubei lidan damuriguaü. Kei hénpulu, ariñagati aban íbiri le meha abugúbei lídangiñe damuriguaü ani rédeiti bóugudi lóugiñe 25 irumu: “Lúmagiñe nagiribudun lidoun damuriguaü, gúndaatimatina sagü weyu ladüga líchugun Heowá ‘emeraaguni’ nun (Hech. 3:19TNM). Íderagua hamaadina súngubei ani arufudaaña giñe ínsiñeni nun. Guentó, gíbeeña niduheñu tidan lóundarun Heowá”. Aban nibureintu to meha adiseduboun luéi Heowá luagu seingü irumu ariñagatu dan le tagiribudunbei: “Siñati nafuranguagüdüni ida liña lan meha nasandiragun nungua dan le narihini harufuduni ínsiñeni le meha uágubei layanuhan Hesusu. Úati katei buítimati luéi werederun tidan lóundarun Heowá”.

17, 18. a) Ka wafurendeirubei lídangiñe ǘrüwa hénpulu le aturiaha wamaalibei? b) Ka lunbei desidírü wamá wadügüni?

17 Ka wafurendeirubei lídangiñe ǘrüwa hénpulu le? Furumiñe, siñati lan wahandilihani ligaburi hawanserun gürigia lidan hafiñen. Lun Heowá yu lan lira. Libiaman, siñati lan wagurabahan lun sun lan ha aturiahatiña Bíbülia o ha ñǘdüntiña adamuridagua lun hóudinba lan luéigiñe lóubadina inarüni. Lagumuhóun, luagu moun lumuti lan weferidiruni wemenigin luagu hagiribuduba lan ha íchugubalin hanagan luagun Heowá ani aban hadisedun luéi inarüni. Ani ánhaña agiribuda, luagu lunti lan wíchugun aban lubuidun achülürüni houn ítara kei ladügüni Heowá.

18 Sigila kada aban wádangiñe áluahei subudi, gunfurandaü luma lichú aau. Danme le waliihani hénpulu burí le layusurubei Hesusu, álügüdagua wamá woungua ka lan mini lubéi, ka lan uagu anihein lubéi tidan Bíbülia, ida luba lan wayusuruni le wafurendeirubei lídangiñe luma ka lan larufudahabei woun luagu Heowá luma luagu Hesusu. Ítara luba gunfuranda wamani le mini lubéi lererun Máisturu le Wéiritimabei.