Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Garüdia Awisahatu  |  Unsu-hati irumu 2014

Sandu wamá lidan sun le wadügübei

Sandu wamá lidan sun le wadügübei

“Abagarida humá aban ibagari sánduti le gumuti.” (1 FE. 1:15)

1, 2. a) Ka lagurabubei Heowá hámagiñe lumutuniña? b) Kaba álügüdahani wóunaba lidan arütíkulu le?

YÚSUTI apostolu Féduru aban fánreinti tídangiñe haliburun Fádirigu ani lau lídehan Bungiu afuranguagüdati mosu lan haruma hama kristiánugu lidan sun le hadügübei, ítara kei meha ísüraelina (aliiha huméi 1 Féduru 1:14-16). Agurabati Heowá, ‘létima Sándubei’, lun háfaagun dandu kristiánugu anuadirúaaña kei “amu mudún” lun sandu hamá lidan sun katei (Huan 10:16).

2 Lidan arütíkulu le wadarirayaba ariñahani le súdiniti tidan haliburun Fádirigu le lunbei líderaguniwa lun gunfuranda wamani lilurudun Heowá le harumabei luma ida luba lan wawinwanduni. Ani wóunabubei álügüdahani burí le: Ka uagu lunti lubéi gaganbadi wamá lun lilurudun Heowá súnwandan? Ka tarufudahabei haliburun Fádirigu woun luagu inebesei luagu Heowá keisi Warúeite le ábanrügüti? Ani, ka wafurendeirubei lídangiñe sákürifisiu burí le meha hadügübei ísüraelina?

GAGANBADI WAMÁ LUN LILURUDUN HEOWÁ SÚNWANDAN

3, 4. a) Ka uagu mosu lubéi gaganbadi wamá lun lilurudun Heowá luma lun ladundehan súnwandan? b) Ka uagu moun lumuti lubéi wáguyuguagüdün wuribani luagu wuribani ani mareidun wagíame igarihabu?

3 Lun gunda lan Bungiu wau, mosu wagunfuliruni lilurudun luma burí adundehani le líchugubei súnwandan, ani lun marihin wamani kei aban katei le úati súdini lan. Íbini mama lan mosu wagunfuliruni Lúrudu le líchugubei lun Moisesi, íderagua lumutiwa  lúrudu ligía lun wasubudiruni le buídubei luma le wuribabei ítara kei larihini Bungiu. Kei hénpulu, ariñagati meha Heowá houn ísüraelina: “Máguyugüda humá wuribani luagu wuribani, mariban tuguyame hanigi houn gürigia híledigu. Hínsiñehabu humá houn gürigia híledigu, ladüga ítara haña kéigubeirügü huguya. Au [Heowábei]” (Fad. 19:18).

4 Kei aubei warihei, mabusenrunti Heowá lun wáguyuguagüdün wuribani luagu wuribani ni lun wareidun igarihabu (Rom. 12:19). Ánhawa maganbadi lun le lariñagubei woun, wawiyedubei liri ani wagundaaragüdübei Satanási. Ligíati, danme hadügün o hariñagun gürigia somu katei le gáriti woun, moun lumuti wígirun lun tabuinchun wanigi lau igarihabu. Ariñagatu Bíbülia ítara waña lan kei “sóudieru [o ágeidinaü] lauti múa”, le buínñubei lau irisini: wani ministeriu irisini ligía (2 Ko. 4:1, 7). Siñati wádarun aban irisini le gebegiti kei wani ministeriu lidoun ábanmeme ágeidinaü úara luma aban katei wuribati kei igarihabu.

5. Ka wafurendeirubei lídangiñe laganbadi Aarón dan le hóunwegunbei lisaanigu? (Ariha huméi dibuhu le lídanbei lagumeseha arütíkulu.)

5 Abahüdaguati Fádirigu 10:1-11 luagu lirun sügǘ le lásügürübei Aarón hama liduheñu. Óunahati Heowá watu gemeti siélugiñe lun lagumuchun lau libagari Nadabü luma Abiú, bián hádangiñe lisaanigu Aarón, ani aba lariñagun houn iduheñu lun marufudun hamá igarigu luagu le asuseredubei. Ma funa lirun lagunfulirúniwa gumadi ligía! Agia wagía, kíputiwa san arumani ligibugiñe Heowá lau máluahan wamá wóundarun hama waduheñu o wamadagu ha bugawaaña lídangiñe damuriguaü? (Aliiha huméi 1 Korintuna 5:11.)

6, 7. a) Ka burí puntu súdiniti lunbei gabaroun wamani dan le desidírü wamá anhein wóudiba lubéi lidan aban maríei tidan somu ligilisi? (Ariha huméi abürüdǘni.) b) Ka gayarabei wariñagun lun aban waduhe le amisurahatiwa lidoun aban maríei le lunbei ladügǘn tidan aban ligilisi?

6 Uguñe weyu, háfuga magagibudagunbadiwa luma aban óuchawaguni hanarimeti kei le lásügürübei Aarón hama liduheñu. Gama lumoun, kaba san wadüga ánhawa lamisuraha aban waduhe lidoun aban maríei tidan aban ligilisi o lun wídehan ñein lidan somu katei? Íbini mariñagun tan Bíbülia furangu siñati lan wadügüni, anihein adundehani tidan le gayarabei líderaguniwa lun desidírü wamá buidu. *

7 Háfuga mínsiñebei lan le desidírü wabéi houn fiú waduheñu. Háfuga úabei gunfuranda hamani busén wamá gaganbadi wamá lun Heowá ani kipu wagíame arumani ligibugiñe (1 Fe. 4:3, 4). Inarüni mabusenrun wamá wayusurun dimurei le gáriti houn, ligía mosu lubéi wayanuhan lau ínsiñeni; gama lumoun, súdiniti lun furangu wamá. Ani buídubei lun wayanuhan luagu katei ligía lau lóufudagun. Gayarabei wagumeserun íchiga seremei houn luagu hamisurahaniwa lidoun hamarieidun, lárigiñe gayarabei wafuranguagüdüni houn luagu aniheinbei lan katei adügǘti ligilisirugu le lunbei siñá lan wadügüni ani kei le mabusenrun wamá lun hasandiragun houngua wuriba lidan weyu espechaliti ligía, buítimati lan lun moudin wamá. Wariñaguni houn ítara líderagubadiwa lun madüraagun wamani lilurudun Heowá ani gaganbadi wagíame lun lidan sun katei.

HEOWÁRÜGÜÑEIN GARICHA LUN LARÚEIHANIWA

8. Ida liña lafuranguagüdüni Fádirigu liricha Heowá lun líchugun lúrudu?

8 Afuranguagüda tumuti haliburun Fádirigu liricha Heowá keisi Urúei lun líchugun lúrudu. Ariñagatu kéiburi 30 wéiyaasu luagu Heowá lan íchugubalin lúrudu burí le waliihabei ñein. Subudi lumuti meha Moisesi katei le, ligía súnwandan lubéi ladügüni lugundan Bungiu (Fad. 8:4, 5). Ítarameme, mosu giñe gaganbadi wamá súnwandan lun Warúeite Heowá. Íderagua tumutiwa lóundarun lun  wibihini katei le. Gama lumoun, ñeinbei dan lunti lan warufuduni waganbadi lun Bungiu dan le wábuguarügü wamá, kei meha ladügüni Hesusu lidan fulasu mageirawati (Luk. 4:1-13). Kaba wadüga? Anhein afiñe wabéi luagu Bungiu ani inebe ligía woun keisi Warúeite, úabei gayarati ladügün lun maganbadi wamá lun ani mígiraguagüdünbadiwa woungua lun anufudei (Ari. 29:25).

9. Ka uagu iyereegu wabéi houn fiú gürigia?

9 Wagía lani Kristu disipulugu moun lumuti taweiridun wanigi lau weibaahóun. Ariñagati houn lani disipulugu: “Hederegerúaba lun lúrudu lun hasufurirawagüdün, lun giñe háfarawaguniwa hilagubei; hiyereegudúba lun sun ubóu nuéigiñe” (Mat. 24:9). Gama lumoun, mararamun lumutiwa iyereehabúni ligía: sigitiwa apurichiha ani harumamémetiwa ligibugiñe Heowá lidan sun le wadügübei. Harumati wanügüni wabagari ani inebeti hálagu amu woun. Kati uagu iyereegu wabéi houn fiú gürigia? (Rom. 13:1-7.) Lugundun gaganbaditiwa lun Heowá keisi Warúeite. ‘Lúnrügüñein’ wáhuduragua, ani maweiyasunbadiwa adüraaguei lilurudun (Mat. 4:10).

10. Ka asuseredubei lun aban íbiri le adüraagubalin lilurudun Bungiu?

10 Ariñagatu Bíbülia luagu mama hamá “ubouaguna” kristiánugu. Ligía mádaragun wabéi woungua lidoun wuribu ni lidoun polítika (aliiha huméi Huan 15:18-21 luma Isaíasi 2:4). Híruti añaheinhaña lan íbirigu adüraaguti úaraguni le harufudubei lun Heowá. Saragu hádangiñe aba hasakürihan lárigiñe ani aba hagiribudun lun Heowá (Sal. 51:17). Gama lumoun, añahein hagía madügün hamuti. Samina wamá luagu le asuseredubei Hungría lidan lidaani Libiaman Wuribu Wéiriti. Aba hóundaragun súdaragu 160 íbirigu ha magunfulirúngiña 45 irumu ha burí adaürǘbaña tidan ámuñegueinarügü furisun lidan ageiraü ligía ladüga úaragua hamá lun Bungiu. Ñein aba lariñawagún houn mosu lan hasudarahan. Íbini maha hamá hiibe-agei lun hadügüni, añahein meha nefu hádangiñe ánhatiña. Bián irumu lárigiñe, dúnguati aban hádangiñe luma aban turóbuli: aba lichugún gumadi lun hádanbei lan súdaragu ha lúnbaña houdin áfara fiú hádangiñe gefentiña luagu Heowá ha úaraguabaña. Aba taweiridun lanigi dan le larihinbei luagu anihein lan líbiri haganagua! Gama lumoun, masuseredunti áfarahani ligía.

RU WAMÉI LE BUÍDUTIMABEI LUN HEOWÁ

11, 12. Ka larufudahabei woun luagu Heowá sun le meha lariñagubei Lúrudu luagu sákürifisiu lidan binadu dan?

11 Ariñawagúati meha lidan lilurudun Moisesi mosu lan meha hadügün ísüraelina sákürifisiu (Fad. 9:1-4, 15-21). Siñati meha danima lan sákürifisiu ligía lugundun aban meha sínbolu luagu lani Hesusu sákürifisiu le úati mégeiti lidan. Ani mosu meha ladügǘn kada aban lídangiñe según le bürüwañubei lidan Lúrudu. Kei hénpulu, afuranguagüda lumuti Fádirigu 12:6 le lunbei meha tadügüni aban würi lárigiñe tágurahan: “Danme gúnfulihali lidaani tarumadun würi lárigiñe tágurahan wügüri yebe irahü o würi yebe, lunti tanügün aban liraüraü mudún le ábanti irumu lau tubenari kianpu lánina óundaruni lun tadagaragüdüni keisi adagaragüdüni gudawarügüti, tuma aban tiraüraü unhun o aban lan wagugua keisi adagaragüdüni luagu figóu”. Íbini furangu lan meha le bürüwañubei lidan lúrudu ligía, arihúati giñe luagu aban lan Bungiu richaguati ani hínsiñehabuti Heowá. Anhein mebegi lubéi aban gábara tun úguchuru, gayarati meha tadagaragüdün bián wagugua o bián lan harahüñü unhun (Fad. 12:8). Íbini meha gudeme tan würi tuguya, hínsiñetu meha lun Heowá ani gebegitu meha lun kéigubeirügü to gayarabei tadagaragüdün aban animaalu séruti. Ka larufudahabei le woun?

12 Ínchaha lumutiña apostolu Pábulu kristiánugu lun híchugun “uéiriguni lun [Bungiu] lau [h]ayuma” (Ebü. 13:15). Adüga wamuti sákürifisiu ligía dan le wasubudiragüdüni liri Heowá le sándubei lidan apurichihani. Furanguti mama lan sun wagía lun gayara lan  wadügüni ligiaméme, gama lumoun súdiniti lun wíchuguni sun le buídubei wámagiñegua lun Heowá. Kei hénpulu, ha siñati háfuridun hábiñegiñe ladüga aweiyaduni o ladüga somu sandi apurichihatiña tau gárada o luéigiñe gágamuru, ani apurichihatiña houn ha ñǘdünbaña arihaña. Ítara liña híchugun uéiriguni lun Heowá (Rom. 12:1; 2 Tim. 2:15).

13. Ka uagu lunti lubéi wederegeruni ariñahani luáguti wapurichihan?

13 Dan le wadügün sákürifisiu lun Heowá, madügün wamuti ladüga wafosurúña lan, adüga wamuti ladüga lanarime ínsiñeni le wasandirubei luagu (Mat. 22:37, 38). Ida lubati wasandiragun woungua dan le lamuriahóun wama lun wederegeruni dan le wásügürübei lidan apurichihani sagü hati? Lau wederegeruni ariñahani ligía warufuduñein hínsiñe lan Heowá woun ani gaganbadi wamá lun (2 Fe. 1:7). Gama lumoun, moun lumuti wáfuridun apurichiha kamá wafosurúña lúnrügü gibe lan oura wederegerun luagu hati. Le linarün aban katei, anhein siñá lubéi lapurichihan somu íbiri lóugiñe 15 minutu luagu hati, háfuga ladüga aweiyaduni o sandi, gayarabei lederegeruni 15 minutu ligía. Subudi lumuti Heowá adüga hamani tau aban anigi buin lau ínsiñeni luagu luma luagu lubuidun chansi le hibihibei lun lánigu hamá Gefentiña. Subudi lumuti luagu ligíarügüñein lan liyara adüga, ani ligía gebegi lubéi lun saragu. Kei aubei warihei, mama meha ladüga gudeme lan aban ísüraelina lun siñabei lan ladügün sákürifisiu lun Heowá. Ítarameme, íbirigu ha siñati hadügün saragu lidan hani ministeriu gayarati hederegeruni dan le hadügübei lau ugundani. Lau ariñahani le híchugubei sun apurichihatiña, óundarawaguati ariñahani le ibihíbei lídangiñe sun ubóu, ani ídehati le lun tasubudiruni lóundarun Heowá halía lan mégeiwa lan ídemuei, ani ítara liña laransehóun sun luáguti apurichihani. Ma buiti lun wederegeruni ariñahani luáguti wapurichihan sagü lagumuchun hati?

ATURIAHA WAMÓUN BÍBÜLIA HULILI

14. Ka uagu lunti lubéi wakutihani ligaburi waturiahanu Lererun Bungiu?

14 Lárigiñe wakutihani lubuidun ariñahani lúmagiñeti Bungiu le, ma gunfurandatima wamaali ka lan uagu anuhein lubéi haliburun Fádirigu tidan Lererun Bungiu? (2 Tim. 3:16.) Chóuruti desidírütimahadiwa lan lun haruma wamá, mámarügü ladüga ligía lan lagurabubei Heowá wámagiñe, adüga wamuti ladüga yu lan lun wíchuguni le buídutimabei wámagiñe lun. Ani íderagua láadiwa akutihani le lun waturiahanu Lererun Bungiu hulili (aliiha huméi Ariñawagúni 2:1-5). Furanguti súngubei lan wagía busentiwa lun lánharun Heowá lun sákürifisiu le wadügübei lun wíchugun uéiriguni lun. Ligíati, álügüdagua wamá woungua: “Huliliti san naturiahanu Lererun Bungiu? Nígiruña san lun tadügün bigibigitu, huraraü tidan konputadora, isebáhari luma amu luwuyeri huraraü lun mawanserun nan lidan nafiñen?”. Anhein ítara liña lubéi, samina wamá luagun dimurei le lariñagubei Pábulu tidan ligaradan houn Ebüréu.

Wéiriti san lisudinin taturiahóun Bíbülia luma áhuduraguni kei iduheñu woun? (Ariha huméi párafu 14)

15, 16. Ka uagu furangu lubéi layanuhan Pábulu houn kristiánugu ebüréu?

15 Furanguti meha layanuhan Pábulu dan le labürüdünbarun ligaradan houn ebüréu (aliiha huméi Ebüréu 5:7, 11-14). Aba lariñagun houn hénrenguti lan houn ‘gunfuranda hamani’ arufudahani le dǘgüdatimabei. Ka uagu furangu lubéi layanuhan houn? Lugundun, ítara  kei Heowá, hínsiñetiña meha kristiánugu hagía lun, ani nidiheriti meha luagu busén hamá habagaridun láurügü “míligi”, lidan amu dimurei, láurügü aban subudi le malulinti tídangiñe Lererun Bungiu. Íbini súdini lan meha hasubudiruni arufudahani burí le malulinti, anhein busén habéi kristiánugu hamá ha derebugutiña, mosu meha heigin “éigini le dǘgüdati”, lidan amu dimurei, mosu meha haturiahanu Lererun Bungiu hulili.

16 Lubaragiñe hamuga meha máisturugu haaña lan, megeimémegiña meha lun larufudahóun houn. Ka uagu? Ladüga mégeitiña meha “éigini le dǘgüdati”. Agia wagía? Ida liña warihini inarüni le dǘgüdati? Áfaaguatiwa san lun gunfuranda wamani? Sagatiwa san dan lun wafurieidun luma lun waturiahanu Bíbülia buidu? Anhein hénrengu lubéi woun, háfuga ladüga héchuhadiwa lan aturiaha furesegueina. Haritagua waméi mámarügüñein lan apurichihani wawadigimari, mosu giñe warufudahan houn gürigia ani adüga wagíame disipulugu (Mat. 28:19, 20).

17, 18. a) Ka uagu lunti lubéi wáfaagun lun waturiahani inarüni le hulilitimabei tidan Bíbülia? b) Ida luba san warihini laatún diwéin lubaragiñe adamuridaguni?

17 Besafu wádangiñe hénrenguti woun waturiahanu Bíbülia, ani mafosurunti Heowá ni aban lun ladügüni. Íbini ítara, meberesenga átirihali lan dan wau lidan inarüni, lunti wéredagüdüni wafiñen lau éigini dǘgüdati, lugundun megei wamuti lun wakipuragun woungua harumañu.

18 Lun sandu wamá ligibugiñe Heowá, mosu wakutihanu Lererun lau duari ani adüga wameime le lamuriahabei wámagiñe. Ayanuhaya wamá hawagu Nadabü luma Abiú, ha meha láfaragubaña Heowá ladüga hadügün aban adagaragüdüni “le uágubei mariñagun lan” houn háfuga ladüga bacharuaña lan (Fad. 10:1, 2). Samina wamá luagu le lariñagubei Bungiu lun háguchi, Aarón, lárigiñe katei ligía (aliiha huméi Fádirigu 10:8-11). Mini lan san lira moun lumuti lan watun binu lubaragiñe adamuridaguni kristiánu? Samina wamá murusun. Wagía mámaali mosu gaganbadi wamá lun Lilurudun Moisesi (Rom. 10:4). Lidan fiú ageiraü, añahein íbirigu guratiña murusun diwéin lidan lóurate heigin lubaragiñe houdin lidoun adamuridaguni. Lidan Luéyuri Esefuruni gurawati meha gádürü kopu diwéin. Ani dan le meha ladügünbalin Hesusu Ladinerun Aburemei, amuriahati hama apostolugu lun hátuni diwéin le meha ayusurúbei keisi sínbolu lani lita (Mat. 26:27). Siadi tumuti Bíbülia átaguni luma bacharuaü (1 Ko. 6:10; 1 Tim. 3:8). Gíbetiña íbirigu, ladüga hasaminan, himei hamuti matun hamá diwéin lubaragiñe hagunfulirun lau furumiñeguarügü wadagimanu lidan heseriwidun lun Bungiu. Gama lumoun, ámuñegueinarügüti hechun gürigia lidan kada ageiraü. Le labusenrubei Bungiu lun wasubudiruni “le harumabei lumoun le wíyebei”, gayara láamuga wagundaaragüdüni luma lun sandu wamá lidan sun le wadügübei.

19. a) Ka gayarabei líderaguniwa lun wasagarun buiti lídangiñe áhuduraguni lun Bungiu keisi iduheñu luma lídangiñe waturiahanu Bíbülia wábuguarügü? b) Ka lunbei wadügüni lun haruma wamá?

19 Gíbeti inarüni wéiriti lebegi le gayarabei wadariruni anhein wáluaha tidan Lererun Bungiu lau duari. Íderagua tumutiwa lóundarun Heowá lun wasagarun buiti lídangiñe áhuduraguni hama waduheñu luma lídangiñe waturiahanu Lererun Bungiu wábuguarügü. Wayusuruñein san? Áfaagua wamá lun laganwoundun wasubudin luagu Heowá luma luagu lisuuni, ani sigí wamá ayarafada lun (Sant. 4:8). Ítara kei abürühati sálumu, amuriaha wamá luma Bungiu: “Darabei nagu, ariha náamugei lubuidun barufudahan” (Sal. 119:18). Gaganbadi wamá súnwandan lun lilurudun Heowá, ‘le Sándutimabei’, ani ídeha wamá lau ubebeni lidan ‘lapurichihóun uganu buiti’ (1 Fe. 1:15; Rom. 15:16). Wawinwanduña lidan aban dan hénrenguti, ligíati, desidírü wamá lun haruma wamá lidan sun le wadügübei lidan wabagari luma lun weseriwidun lun Heowá keisi Warúeite le ábanrügüti.

^ par. 6 Ariha huméi arütíkulu “Álügüdahani burí le hadügübei aliihatiña” tidan La Atalaya to lánina 15 lidan seingü-hati, irumu 2002.